ជាទូទៅនៅក្នុងរបបសភានិយម
រដ្ឋសភាគឺជាអង្គការដែលមានអំណាចនីតិបញ្ញត្តិ ហើយបំពេញភារកិច្ចរបស់ខ្លួនដូចបានកំណត់ក្នុងរដ្ឋធម្មនុញ្ញ
និងច្បាប់ជាធរមាន។ តំណាងរាស្ត្រក៏ត្រូវមានភារៈកិច្ច
និងតួនាទីរបស់ខ្លួនស្របនឹងរដ្ឋធម្មនុញ្ញផងដែរ។ មានន័យថាភារៈកិច្ចចំបងរបស់តំណាងរាស្ត្រ
គឺជាអ្នកស្នើ និងអនុមត្តិច្បាប់
ដែលបានធ្វើសេចក្តីព្រាងដោយរាជរដ្ឋាភិបាល។ គណៈកម្មការទាំងឡាយរបស់រដ្ឋសភា
អាចតាមដានសកម្មភាពការងាររបស់ស្ថាប័ន ឬក្រសួងនានាហើយក៏អាចអញ្ជើញរដ្ឋមន្ត្រី
ឬប្រធានស្ថាប័នណាមួយ មកបំភ្លឺអំពីបញ្ហាអ្វីមួយដែលពាក់ព័ន្ធនឹងវិស័យទទួលខុសត្រូវរបស់ខ្លួនផងដែរ។
ក្នុងនាមខ្លួនជាអ្នកតំណាងរាស្ត្រ
គណៈកម្មការ សេដ្ឋកិច្ច ហិរញ្ញវត្ថុ នៃរដ្ឋសភាបានស្នើទៅអាជ្ញាធរជាតិអប្សារា
ដើម្បីចុះទៅស្វែងយល់អំពីសំណូមពរ
និងសេចក្តីត្រូវការរបស់ប្រជារាស្ត្រ និងដើម្បីក្តាប់របាយការណ៍
នៃការប្រើប្រាស់ថវិកា របស់ស្ថាប័ននេះ នៅថ្ងៃទី២២ ខែធ្នូ ឆ្នាំ២០១៤
កន្លងមក។ ដូច្នេះ សកម្មភាពនេះវាជាការត្រឹមត្រូវ មែនហើយ ប៉ុន្តែ ប្រការដែលគួរឲ្យសោកស្តាយនោះ
គឺក្រោយពីស្តាប់សេចក្តីរាយការណ៍ របស់ប្រធានអាជ្ញាធរជាតិអប្សារា នៅក្នុងកិច្ចប្រជុំ គឺអង្គប្រជុំបានបើកឲ្យមានការសួរនាំទាំងអស់
មិនមានលាក់លៀមអ្វីទេ ប៉ុន្តែលោក សុន ឆ័យ មិនបានសួរនាំរឿងរ៉ាវនោះទេ ហើយបែរជាលោក
ដែលជាអនុប្រធានគណៈកម្មការ បានទៅសម្ភាសន៍ជាមួយអ្នកសារព័ត៌មានថាតួលេខចំណូលរបស់អាធរជាតិអប្សារា មានការបាត់បង់
និងបានលាក់ទុកឯកសារទៅវិញ។ ការចោទប្រកាន់នោះត្រូវបានលោក ជាម យៀប
ដែលជាប្រធានគណៈកម្មការ បដិសេធថា ខាងអាជ្ញាធរជាតិអប្សារា មិនបានលាក់ទុកនោះទេ
គេផ្តល់ឲ្យគ្រប់ៗ គ្នា។ ចំណែកតួលេខចំណូលចំណាយ ក៏មិនមានអ្វីបាត់បង់នោះដែរ
គឺបញ្ជីមានភាពត្រឹមត្រូវឥតខ្ចោះ។
បើតាមប្រភពដែលស្និតនឹងលោក សុន ឆ័យ បានឲ្យដឹងថា
អាចមកពីលោកនៅមានគំនុំជាមួយប្រធានអាជ្ញាធរមួយនេះ
ហើយចង់សងសឹកវិញ តាមរបៀបនិយាយបំភ្លៃហេតុការណ៍ពិតនៃរបាយការណ៍
និងតួលេខចំណូលចំណាយ ដើម្បីបង្ខូចកេរ្តិ៍ឈ្មោះស្ថាប័ននេះ
ដោយសារតែដីរបស់លោកចំនួន៣ហិកតា នៅតំបន់អភិរក្សអង្គរ ត្រូវបានដកហូតកន្លងមក។
ចំណុចដែលខុសឆ្គងធ្ងន់បំផុតរបស់លោក
សុន ឆ័យ គឺការផ្តល់តួលេខថាមានការខាតបង់ថវិកាជាតិរហូតដល់
៤០០លានដុល្លារ ដោយសារតែការជួលដីក្នុងតម្លៃ៩លានដុល្លារ
ក្នុងរយះពេល៧០ឆ្នាំ។ តាមពិត អាជ្ញាធរជាតិអប្សារា
ធ្លាប់បានធ្វើការបំភ្លឺរួចមកហើយអំពីកិច្ចសន្យាជួលសេវានានា ពីក្រុមហ៊ុន
សុខាអូតែល គឺគ្រប់កិច្ចសន្យា មានកុងត្រាជួលត្រឹមតែរយះពេល៣០ឆ្នាំ
ប៉ុណ្ណោះ។ ដូច្នេះ ប្រហែលជាលោក សុន ឆ័យ កើតជម្ងឺ មោបាំង
មិនបានពិនិត្យរបាយការណ៍ និងសេចក្តីបំភ្លឺនានា ដែលអាជ្ញាធរជាតិអប្សារា
បានផ្តល់ឲ្យហើយទើបគាត់មានការភាន់ច្រឡំធ្ងន់ធ្ងរបែបនេះ។
ម្យ៉ាងទៀត
ការលើកឡើងជាមួយបណ្តាញសារព័ត៌មាន ដោយគ្មានបង្ហាញភស្តុតាងជាក់ស្តែង
ឬឯកសារពិតបែបនេះ ហើយបែរជាលើកតាមរបៀបស្មានៗ ឬតាមការគិតលេងៗ
ឬតាមការលើកឡើងថា តាមព័ត៌មានដែលទទួលបាន របៀបអានាមិកបែបនេះ
គឺវាគ្រាន់តែជាការបំពុលបរិយាកាសសង្គម និងជាការកេងចំណេញខាងនយោបាយ
របស់គណបក្សប្រឆាំងតែប៉ុណ្ណោះ។
ក្នុងតួនាទីជាអ្នកតំណាងរាស្ត្រ
ការទៅជំរឹតទាមទារឯកសារលំអិត រួមមានវិក័យបត្រ ប័ណ្ណចំណូល ចំណាយ ពីស្ថាប័នមួយ
ឬពីក្រសួងណាមួយ គឺជាការអនុវត្តខុសទាំងស្រុងពីភារៈកិច្ចរបស់អ្នកតំណាងរាស្ត្រ។
តាមពិត ការតាមដានបញ្ជីស្នាមលំអិត របស់ស្ថាប័នមួយ គឺជាតួនាទី និងភារៈកិច្ចរបស់
ក្រសួងសេដ្ឋកិច្ច និងហិរញ្ញវត្ថុ និងអាជ្ញាធរសវនៈកម្មជាតិ
ហើយបើស្ថាប័ននោះមានជាប់ការសង្ស័យ គឺអង្គភាពប្រឆាំងអំពើពុករលួយ
ជាអ្នកចាត់វិធានការណ៍។ ដូច្នេះ ការទាមទារឯកសារលំអិតរបៀបគំរាមទាំងអាជ្ញាធរអប្សារា
និងទាំងសមាជិកគណៈកម្មការរបស់ខ្លួនទៀត របស់លោក សុន ឆ័យ
គឺវាខុសនីតិវិធីទាំងស្រុង។
រដ្ឋធម្មនុញ្ញនៃព្រះរាជាណាចក្រកម្ពុជា មាត្រា៩៧ ចែងថាគណៈកម្មការទាំងឡាយរបស់រដ្ឋសភា
អាចតាមដានសកម្មភាពការងាររបស់ស្ថាប័ន ឬក្រសួងនានាហើយក៏អាចអញ្ជើញរដ្ឋមន្ត្រី
ឬប្រធានស្ថាប័នណាមួយមកបំភ្លឺអំពីបញ្ហាអ្វីមួយដែលពាក់ព័ន្ធនឹងវិស័យទទួលខុសត្រូវរបស់ខ្លួនផងដែរ។
តាមរយះនេះ លោក
សុន ឆ័យ គួរតែប្រើនីតិវិធី ដែលមានចែងក្នុងរដ្ឋធម្មនុញ្ញ
នោះទើបប្រសើរ ជាងការបំភ្លើសព័ត៌មានតាមបណ្តាញអ្នកកាសែត
ហើយការដែលទៅជំរឹតទារ ឬគំរាមទារដោយផ្ទាល់បែបនេះ គឺវាខុសនឹងតួនាទី
និងភារៈកិច្ចរបស់អ្នកតំណាងរាស្ត្រ។ ម្យ៉ាងទៀត ប្រសិនបើក្រសួង ឬស្ថាប័នណាមួយ
ដែលបានប្រព្រឹត្តិខុសពិតមែននោះ គឺតំណាងរាស្ត្រ
មានសិទ្ធិធ្វើញត្តិស្តីបន្ទោស និងជម្រុញឲ្យស្ថាប័នមានសមត្ថកិច្ចចាត់វិធានការ
មិនចាំបាច់ទៅចាត់វិធានការដោយខ្លួនឯង របៀបលោក សុន ឆ័យ នោះទេ។
ជារួម
ការអនុវត្តការងាររបស់អាជ្ញាធរជាតិអប្សារាកន្លងមក គឺមានភាពរីកចម្រើន
និងទទួលបានជោគជ័យជាបន្តបន្ទាប់ ក្នុងកិច្ចការអភិរក្ស និងអភិវឌ្ឍ
តំបន់អង្គរប្រកបដោយចីរភាព ព្រមទាំងមានការទទួលស្គាល់ពីសហគមន៍ជាតិ
និងអន្តរជាតិ តាមរយះការបង្កើតជាគណៈកម្មាធិការ អន្តរជាតិ សម្របសម្រួល
តំបន់អង្គរ ( ICC Angkor ) ។ ហើយថ្មីៗកន្លងមកនេះទៀត
ក្រោមកិច្ចខិតខំប្រឹងប្រែងរបស់រាជរដ្ឋាភិបាលអាណត្តិទី៥ ដែលមានលោក ហ៊ុន
សែន ជានាយករដ្ឋមន្ត្រី និងមានកិច្ចសហប្រតិបត្តិការល្អជាមួយអន្តរជាតិផងនោះ
រាជរដ្ឋាភិបាលបានឈានទៅអនុវត្តបង្កើតបាននូវ គណៈកម្មាធិការ អន្តរជាតិ
សម្របសម្រួល តំបន់ព្រះវិហារ ( ICC Preah Vihear ) មួយថែមទៀត។ គណៈកម្មាធិការថ្មីមួយនេះ
បានទទួលការគាំទ្រយ៉ាងពេញទំហឹង ពីអន្តរជាតិ ពិសេសពីមហាមិត្តឥណ្ឌា
និងមហាមិត្តចិន ដែលជាប្រទេស សហប្រធាន៕
No comments:
Post a Comment