ចាប់តាំងពីក្រោយការបោះឆ្នោតជាតិ ថ្ងៃទី២៨ កក្កដា ឆ្នាំ២០១៣ មក គេសង្កេតឃើញថា អ្នកដែលមាននិន្នាការនយោបាយប្រឆាំង ដែលដឹកនាំដោយគណបក្សសង្គ្រោះជាតិ បានប្រើប្រាស់សិទ្ធិរបស់ខ្លួនយ៉ាងលើសលប់និងធំធេងគ្មានព្រំដែន តាមគ្រប់រូបភាព និង គ្រប់មធ្យោបាយរបស់ខ្លួន ដើម្បីបង្កឲ្យមានអស្ថេរភាពនយោបាយ បាត់សណ្តាប់ធ្នាប់ក្នុងសង្គម ដែលជាដើមហេតុគន្លឹះបង្កឲ្យមានវិបត្តិសេដ្ឋកិច្ច និង វិបត្តិសង្គមជាតិទាំងមូល។
ជាការពិត ព្រះរាជាណាចក្រកម្ពុជា បានទទួលស្គាល់គោលការណ៍ជាសកលស្តីពីសិទ្ធិមនុស្សនិងសិទ្ធិដទៃទៀត ក្នុងនាមជាប្រទេសហត្ថលេខី និង បានចែងយ៉ាងច្បាស់នៅក្នុងច្បាប់កំពូល និង ច្បាប់ពាក់ព័ន្ធដទៃទៀត របស់ខ្លួន ដែលទាមទារឲ្យប្រជាពលរដ្ឋគ្រប់រូប គ្រប់និន្នាការនយោបាយ ត្រូវតែគោរពប្រតិបត្តិ ដោយគ្មានការលើកលែង និង ដោយគ្មានការអនុគ្រោះឡើយ។ នេះគឺជាចរិតលក្ខណៈរបស់ច្បាប់ មិនមែនគោរពតែអាជ្ញាធរ ឬតែរដ្ឋាភិបាល ឬតែគណបក្សកាន់អំណាច រីឯអ្នកប្រឆាំង ដើរធ្វើសកម្មភាពដោយសេរី បើទោះបីរំលោភលើសិទ្ធិ និង ផលប្រយោជន៍អ្នកដទៃយ៉ាងណាក៏ដោយ។
សកម្មភាពរបស់ក្រុមប្រឆាំង ដែលកំពុងរំលោភលើសិទ្ធិ និង ផលប្រយោជន៍ស្របច្បាប់របស់អ្នកដទៃ ដូចជា ការបង្ខាំងកម្មករ មិនឲ្យចូលធ្វើការ ការរំខានកម្មករមិនឲ្យធ្វើការ នៅពេលដែលពួកគេកំពុងធ្វើការ ការបំផ្លិចបំផ្លាញទ្រព្យសម្បត្តិសាធារណៈ-ឯកជន ការបិទផ្លូវសាធារណៈ ការយកលេសផលប្រយោជន៍បុគ្គលមួយចំនួនតូច មកផ្សារភ្ជាប់នឹងគោលដៅនយោបាយរបស់ខ្លួន គឺជាការប្រឆាំងនឹងច្បាប់ ដែលរដ្ឋាភិបាល អាជ្ញាធរមានសមត្ថកិច្ច ត្រូវតែចាត់វិធានការ ធ្វើអន្តរាគមន៍ជាបន្ទាន់ និងជាដាច់ខាត ប្រកបដោយប្រសិទ្ធភាពខ្ពស់បំផុត ក្នុងគោលដៅបញ្ចៀសគ្រោះមហន្តរាយជាយថាហេតុ (ដែលជាគោលបំណងពិតប្រាកដរបស់ពួកប្រឆាំង) ដែលនាំទៅរកអសន្តិសុខ អស្ថេរភាពនយោបាយ វិបត្តិសេដ្ឋកិច្ចសង្គម ដែលអាចប៉ះពាល់ដល់ដំណើរឆ្ពោះទៅរកសន្តិភាពដ៏យូរអង្វែងរបស់កម្ពុជា។
ការរំលោភបំពានប្រកបដោយចេតនាបង្កហេតុ ដោយមិនខ្វាយខ្វល់ពីច្បាប់ ដែលនាំឲ្យប៉ះពាល់ដល់ផលប្រយោជន៍របស់ប្រជាពលរដ្ឋដែលមិននិយមនិន្នាការនយោបាយ និងទៅលើប្រជាពលរដ្ឋភាគច្រើនដាច់ខាតដែលគាំទ្រគណបក្សកាន់អំណាច ក៏ដូចជាអ្នកគាំទ្ររាជរដ្ឋាភិបាលនោះ បានធ្វើឲ្យពួកគេធ្វើការឆ្លើយតបតវិញ ក្នុងគោលដៅការពារផលប្រយោជន៍និងសិទ្ធិស្របច្បាប់របស់ពួកគេតែប៉ុណ្ណោះ ។
ការធ្វើអន្តរាគមន៍របស់អាជ្ញាធរមានសមត្ថកិច្ច ទៅលើសកម្មភាពរបស់ក្រុមអនាធិបតេយ្យ គឺជាតួនាទីស្របច្បាប់របស់រដ្ឋ ទាំងនៅក្នុងបរិបទរដ្ឋបាលសាធារណៈ បរិបទសេដ្ឋកិច្ច និង ក្នុងបរិបទសង្គម ដែលប្រទេសទាំងអស់នៅលើសកលលោក ដែលបាននិងកំពុងអនុវត្តតួនាទីនេះ រួមទាំងសហរដ្ឋអាមេរិក និងប្រទេសមួយចំនួននៅសហគមន៍អ៊ឺរ៉ុបផងដែរ ដែលកំពុងតាំងខ្លួនជាប្រទេសបីតាប្រជាធិបតេយ្យនោះ។ ដូច្នេះ រដ្ឋ អាជ្ញាធរមានសមត្ថកិច្ចចាំបាច់ត្រូវតែធ្វើអន្តរាគមន៍ជាដាច់ខាត់ ដើម្បីធានាការប្រព្រឹត្តទៅនៃជីវភាពសង្គម ក៏ដូចជាសកម្មភាពស្របច្បាប់របស់ប្រជាពលរដ្ឋ និងក្រុមសង្គមដទៃទៀតបានរស់នៅក្នុងបរិយាកាសសុខសន្តិភាព ស្ថេរភាព និង ការអភិវឌ្ឍន៍ប្រកបដោយចីរភាព។
បើសិនក្រុមប្រឆាំង នៅតែប្រើប្រាស់សិទ្ធិសេរីភាពដោយរំលោភលើសិទ្ធិសេរីភាពអ្នកដទៃ ដោយមិនគោរពច្បាប់ជាតិ និង គោលការណ៍ច្បាប់ជាសកលទេនោះ នោះប្រទេសជាតិ នឹងមិនបានសេចក្តីសុខសាន្តនោះឡើយ ហើយបើសិនជាពួកប្រឆាំងធ្វើសកម្មភាពតវ៉ា តែនៅក្នុងរង្វង់សិទ្ធិសេរីភាពរបស់ខ្លួន ស្របតាមច្បាប់កំណត់នោះ ដោយមិននាំឲ្យប៉ះពាល់ ឬរំលោភបំពានដល់សិទ្ធិសេរីភាពរបស់អ្នកដទៃនោះ ក៏គ្មានការតបតពីអ្នកទទួលរងនូវការរំលោភសិទ្ធិលើពួកគេនោះឡើយ ហើយក៏គ្មានការធ្វើអន្តរាគមន៍របស់រដ្ឋនោះដែរ។ ហើយអ្នកដែលរងគ្រោះ គឺជាក្រុមប្រជាពលរដ្ឋភាគច្រើនលើសលប់ នៅក្នុងសង្គមជាតិ។
ជារួម ការប្រើប្រាស់សិទ្ធិសេរីភាពនោះ ត្រូវប្រកាន់យ៉ាងខ្ជាប់ខ្ជួននូវករណីយកិច្ច និង កាតព្វកិច្ចរបស់ខ្លួន ក៏ដូចជាសិទ្ធិសេរីភាពរបស់អ្នកដទៃ ដើម្បីរួមចំណែកដល់ការពង្រឹងគោលការណ៍នីតិរដ្ឋ ដូចមានចែងនៅក្នុងសេចក្តីប្រកាសជាសកលស្តីពីសិទ្ធិមនុស្សរបស់អង្គការសហប្រជាជាតិ មាត្រា២៩ និង រដ្ឋធម្មនុញ្ញនៃព្រះរាជាណាចក្រកម្ពុជា មាត្រា៣១។
បើទោះបីរាជរដ្ឋាភិបាល បានខិតខំប្រឹងប្រែងបង្កើតនិងអនុវត្តច្បាប់យ៉ាងយកចិត្តទុកដាក់ប្រកបដោយការប្តេជ្ញាចិត្តខ្ពស់ ស្របតាមរដ្ឋធម្មនុញ្ញនៃព្រះរាជាណាចក្រកម្ពុជា និងគោលការណ៍ច្បាប់ជាសកលយ៉ាងណាក៏ដោយ ក៏កម្ពុជាមិនដែលបានទទួលការលើកទឹកចិត្តពីសង្គមស៊ីវិល ឬអង្គការក្រៅរដ្ឋាភិបាលជាតិនិងអន្តរជាតិ ដែលមាននិន្នាការប្រឆាំងឡើយ ជាក់ស្តែងថ្មីៗនេះ បានលើកឡើងនៅក្នុងរបាយការណ៍របស់អង្គការ Freedom House និង អង្គការ Human Rights Watch។
ដោយ រាជ្យ សុវណ្ណនគរ
No comments:
Post a Comment