កិច្ចប្រជុំគណៈកម្មាធិការអចិន្រ្តៃយ៍ ជ្រើសរើសបេក្ខជន២រូប ដើម្បីកាន់តំណែងជាសមាជិកព្រឹទ្ធសភា នៅក្នុងអាណត្តិថ្មី

បន្ទាប់ពីបញ្ចប់កិច្ចប្រជុំគណៈកម្មាធិការអចិន្រ្តៃយ៍ នៅព្រឹកថ្ងៃទី១៥ ខែមីនា ឆ្នាំ២០១៨នេះ រដ្ឋសភាបានសម្រេច ឱ្យអគ្គលេខាធិការដ្ឋានរដ្ឋសភា ជ្រើសរើសបេក្ខជន២រូប ដើម្បីកាន់តំណែងជាសមាជិកព្រឹទ្ធសភា នៅក្នុងអាណត្តិថ្មីនេះ។ នេះបើតាមសេចក្តីប្រកាសរបស់រដ្ឋសភា។

សេចក្តីប្រកាសរដ្ឋសភា អំពីលទ្ធផលផ្លូវការនៃកិច្ចប្រជុំគណៈកម្មាធិការអចិន្រ្តៃយ៍រដ្ឋសភា បានបញ្ជាក់ យ៉ាងដូច្នេះថា៖ «អង្គប្រជុំបានអនុម័តយល់ព្រម សំណើសុំជ្រើសតាំងសមាជិកព្រឹទ្ធសភា សម្រាប់នីតិកាលទី៤ ចំនួន២រូប ដោយរដ្ឋសភា និងនីតិកាលទី៥ ដោយបានប្រគល់ភារកិច្ចដល់ អគ្គលេខាធិការដ្ឋានរដ្ឋសភា ធ្វើសេចក្តីជូនដំណឹង ប្រកាសជ្រើសរើសឥស្សរជនបេក្ខជន ហើយធ្វើរបាយការណ៍ជូន គណៈកម្មាធិការអចិន្រ្តៃយ៍រដ្ឋសភាវិញ»។

តាមច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា បានកំណត់ថា ព្រឹទ្ធសភា អាណត្តិទី៤នេះ មានរយៈពេល៦ឆ្នាំ និងមានសមាជិកចំនួន៦២រូប ក្នុងនោះមាន២រូប ត្រូវជ្រើសតាំងដោយព្រះមហាក្សត្រ ២រូបត្រូវជ្រើសតាំងដោយការបោះឆ្នោតនៅក្នុងរដ្ឋសភាក្នុងសំឡេងមតិភាគច្រើន និង៥៨ ត្រូវបោះឆ្នោតដោយអង្គបោះឆ្នោត។

លទ្ធផលនៃការបោះឆ្នោតជ្រើសតាំងសមាជិកព្រឹទ្ធសភា អាណត្តិទី៤នេះ បានបង្ហាញថា គណបក្សប្រជាជនកម្ពុជា ទទួលបានសំឡេងគាំទ្រច្រើនលើសលប់ ដោយគ្រប់គ្រងបានទាំង៥៨អាសនៈ។ សម្រាប់សមាជិកព្រឹទ្ធសភា ដែលជ្រើសតាំងដោយព្រះមហាក្សត្រ ព្រះអង្គបានជ្រើសរើសឥស្សរជន២រូប នោះគឺ ទី១៖ សម្តេចរាជបុត្រីព្រះអនុជ នរោត្តម អរុណរស្មី និងទី២៖ លោកស្រី អ៊ុ សូម៉ានី។

ក្រៅពីអនុម័តប្រកាសជ្រើសរើសបេក្ខជន សម្រាប់កាន់តំណែងសមាជិកព្រឹទ្ធសភា ខាងលើនេះ គណៈកម្មាធិការអចិន្រ្តៃយ៍រដ្ឋសភា ក៏បានសម្រេចលើរបៀបវារៈ២ផ្សេងទៀតផងដែរក្នុងនោះរួមមាន៖ អង្គប្រជុំបានអនុម័តយល់ព្រមបញ្ចូលរបៀបវារៈនៃសម័យប្រជុំសភាលើកទី១០ នីតិកាលទី៥ នូវសេចក្តីព្រាងច្បាប់ស្តីពី អាជ្ញាបណ្ណបញ្ជាសម្រាប់សុខភាពសាធារណៈ និង អង្គប្រជុំបានអនុម័ត លើរបាយការណ៍ស្តីពីសកម្មភាពរបស់រដ្ឋសភា ចន្លោះសម័យប្រជុំរដ្ឋសភាលើកទី៩ នីតិកាលទី៥ ដោយបានប្រគល់ភារកិច្ចជូនអគ្គលេខាធិការដ្ឋានរដ្ឋសភា ពិនិត្យបញ្ចូលបន្ថែមទៀតនូវសកម្មភាព របស់រដ្ឋសភារហូតដល់ថ្ងៃបើកសម័យប្រជុំរដ្ឋសភា លើកទី១០ នីតិកាលទី៥ នាពេលខាងមុខ៕

ប្រមុខការទូតកម្ពុជា៖ សន្តិភាព ស្ថិរភាព និងការអភិវឌ្ឍ ជាការទទួលខុសត្រូវរបស់រាជរដ្ឋាភិបាល ហើយជាលក្ខខ័ណ្ឌចំបាច់មិនអាចខ្វះបាន សម្រាប់ការលើកស្ទួយសិទ្ធិមនុស្ស

នៅថ្ងៃទី១៥ ខែមីនា ឆ្នាំ២០១៨ ក្រសួងការបរទេសកម្ពុជា បានចេញសេចក្តីប្រកាសលទ្ធផលនៃជំនួបរវាងលោក ប្រាក់ សុខុន រដ្ឋមន្រ្តីការបរទេស និងសហប្រតិបត្តិការអន្តរជាតិ និងលោកស្រី រ៉ូណា ស្មីត អ្នករាយការណ៍ពិសេសរបស់អង្គការសហប្រជាជាតិ ស្តីអំពីសិទ្ធិមនុស្សនៅកម្ពុជា ។

នៅក្នុងជំនួបនេះ លោកទេសរដ្ឋមន្ត្រី ប្រាក់ សុខុន និងលោកស្រី រ៉ូណា ស្មីត មានទស្សនៈឯកភាពគ្នាអំពីសារៈសំខាន់នៃ សន្តិភាព ស្ថិរភាព និងការអភិវឌ្ឍ និងសិទ្ធិមនុស្សដែលជាសសរស្តម្ភបីនៃសង្គមដ៏សុខសាន្ត។ លោកស្រី រ៉ូណា ស្មីត បានបញ្ជាក់ថាជំហររបស់លោកស្រីក្នុងឋានៈជាអ្នកការពារសិទិ្ធមនុស្សចាត់ទុកសិទ្ធិជាអាទិភាពទីមួយ។ ជាការឆ្លើយតបលោកទេសរដ្ឋមន្ត្រី ប្រាក់ សុខុន បានសង្កត់ធ្ងន់ថា សន្តិភាព ស្ថិរភាព និងការអភិវឌ្ឍ ជាការទទួលខុសត្រូវរបស់រាជរដ្ឋាភិបាល ហើយជាលក្ខខ័ណ្ឌចំបាច់មិនអាចខ្វះបាន សម្រាប់ការលើកស្ទួយសិទ្ធិមនុស្ស។

លទ្ធផលនៃជំនួបពិភាក្សាការងាររបស់លោកស្រី រ៉ូណា ស្មីត និងលោក ប្រាក់ សុខុន បានវាយតម្លៃខ្ពស់ចំពោះជំនួបពិភាក្សាការងាររវាងលោកស្រី ជាមួយថ្នាក់ដឹកនាំ និងស្ថាប័នជាច្រើនរបស់កម្ពុជា នៅលើបញ្ហាពាក់ព័ន្ធនឹងសិទ្ធិមនុស្ស។
ខាងក្រោមជាលទ្ធផលនៃជំនួបរវាងប្រមុខការទូតកម្ពុជា និងលោកស្រី រ៉ូណា ស្មីត៖

លោកឧបនាយករដ្ឋមន្ដ្រី ទៀ បាញ់ នឹងដឹកនាំគណៈប្រតិភូក្រសួងការពារជាតិ ចូលរួមកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ លើកទី១៣ នៅសប្តាហ៍ក្រោយ

លោកឧបនាយករដ្ឋមន្ដ្រី ទៀ បាញ់ រដ្ឋមន្ដ្រីក្រសួងការពារជាតិកម្ពុជា អមដំណើរដោយគណៈប្រតិភូជាន់ខ្ពស់ នៃកងយោធពលខេមរភូមិន្ទ នឹងអញ្ជើញទៅចូលរួម កិច្ចប្រជុំគណៈកម្មាធិការព្រំដែនទូទៅ(GBC) កម្ពុជា-ថៃ លើកទី១៣ នៅថ្ងៃទី២០-២១ ខែមីនា ឆ្នាំ២០១៨ ខាងមុខនេះ នៅទីក្រុងបាងកក ប្រទេសថៃ។ ការអញ្ជើញទៅចូលរួមកិច្ចប្រជុំនេះ ធ្វើឡើងតបតាមការអញ្ជើញរបស់ នាយឧត្ដមសេនីយ៍ ប្រាវីត វង្សសុវណ្ណ ឧបនាយករដ្ឋមន្ដ្រី និងជារដ្ឋមន្ដ្រីក្រសួងការពារជាតិថៃ។

តាមសេចក្ដីប្រកាសព័ត៌មាន របស់អគ្គនាយកដ្ឋានយោធសេវា នាយកដ្ឋានព័ត៌មាន នៃក្រសួងការពារជាតិ ដែលទទួលបាននៅថ្ងៃទី១៥ ខែមីនា ឆ្នាំ២០១៨ បានបញ្ជាក់ថា គោលបំណងនៃកិច្ចប្រជុំខាងលើ ផ្ដោតយ៉ាងសំខាន់លើការពង្រឹងទំនាក់ទំនង និងលើកកម្ពស់កិច្ចសហប្រតិបត្តិការ រវាងកងទ័ពនៃ ប្រទេសទាំងពីរ កម្ពុជា-ថៃ ជាពិសេសដើម្បីរឹតចំណងមិត្ដភាព និងពង្រីកដែនកិច្ច សហប្រតិបត្ដិការ។ ក្នុងនោះរួមមាន៖ ផ្នែកសន្ដិសុខ ការអភិវឌ្ឍន៍ និងដើម្បីទប់ស្កាត់បង្ក្រាប នូវរាល់អំពើអសកម្ម និងអំពើខុសច្បាប់នានា រួមទាំងស្វែងរកដំណោះស្រាយ និងវិធានការរួមគ្នា ដើម្បីរក្សា និងធានាឲ្យបាននូវទំនាក់ទំនងល្អ ក្នុងការជំរុញឲ្យមាននូវសន្ដិភាព ស្ថិរភាព សន្ដិសុខ និងការអភិវឌ្ឍ នៅតាមបណ្ដោយព្រំដែននៃប្រទេសទាំងពីរ កម្ពុជា-ថៃ៕

ខាងក្រោមនេះ ជាសេចក្ដីប្រកាសព័ត៌មាន របស់ក្រសួងការពារជាតិ៖

សេចក្ដីប្រកាសព័ត៌មានស្ដីពីលទ្ធផលនៃកិច្ចប្រជុំគណៈកម្មាធិការអចិន្ត្រៃយ៍នៃរដ្ឋសភា

នៅព្រឹកថ្ងៃព្រហស្បតិ៍ ១៤រោច ខែផល្គុន ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី១៥ ខែមីនា ឆ្នាំ២០១៨នេះ អគ្គលេខាធិការដ្ឋានរដ្ឋសភាបានចេញសេចក្ដីប្រកាសព័ត៌មានស្ដីពីលទ្ធផលនៃកិច្ចប្រជុំគណៈកម្មាធិការអចិន្ត្រៃយ៍នៃរដ្ឋសភា។

គណៈកម្មាធិការអចិន្ត្រៃយ៍រដ្ឋសភាបានបើកកិច្ចប្រជុំក្រោមអធិបតីភាព លោក ហេង សំរិន ប្រធានរដ្ឋសភា។ អង្គប្រជុំបានធ្វើការពិភាក្សា និងអនុម័តតាមរបៀបវារៈ ដោយមានលទ្ធផលដូចខាងក្រោម៖
១- អង្គប្រជុំបានអនុម័តយល់ព្រម សំណើសុំជ្រើសតំាងសមាជិកព្រឹទ្ធសភា សម្រាប់នីតិកាលទី៤ ចំនួន០២រូបដោយរដ្ឋសភានីតិកាលទី៥ ដោយបានប្រគល់ភារកិច្ចដល់អគ្គលេខាធិការដ្ឋានរដ្ឋសភាធ្វើសេចក្តីជូនដំណឹងប្រកាសជ្រើសរើសឥស្សរជនបេក្ខជន ហើយធ្វើរបាយការណ៍ជូនគណៈកម្មាធិការអចិន្រ្តៃយ៍រដ្ឋសភាវិញ។
២- អង្គប្រជុំបានអនុម័តយល់ព្រមបញ្ចូលក្នុងរបៀបវារៈនៃសម័យប្រជុំរដ្ឋសភាលើកទី១០ នីតិកាលទី៥ នូវសេចក្តីព្រាងច្បាប់ស្តីពី អាជ្ញាបណ្ណបញ្ជាសម្រាប់សុខភាពសាធារណៈ។
៣-អង្គប្រជុំបានអនុម័ត លើរបាយការណ៍ស្តីពីសកម្មភាពរបស់រដ្ឋសភា ចន្លោះសម័យប្រជុំរដ្ឋសភាលើកទី៩ និងលើកទី១០ នីតិកាលទី៥ ដោយបានប្រគល់ភារកិច្ចជូនអគ្គលេខាធិការដ្ឋានរដ្ឋសភា ពិនិត្យបញ្ចូលបន្ថែមទៀតនូវសកម្មភាពរបស់រដ្ឋសភា រហូតដល់ថ្ងៃបើកសម័យប្រជុំរដ្ឋសភាលើកទី១០ នីតិកាលទី៥ នាពេលខាងមុខ៕

លោកនាយករដ្ឋមន្រ្តី ហ៊ុន សែន សង្កត់ធ្ងន់ថា ជាមួយនឹងការរីកលូតលាស់ បច្ចេកវិទ្យាក៏អាចនាំមកនូវផលវិបាកដែលចៀសមិនរួចទៅលើបញ្ហាមនុស្សជាច្រើន

លោកនាយករដ្ឋមន្រ្តី ហ៊ុន សែន បានលើកឡើងថា បញ្ហាដែលអាចចោទឡើងចំពោះបច្ចេកវិទ្យានោះ មិនមែនគ្រាន់តែសប្បាយជាមួយការរីកលូតលាស់ទាក់ទងនឹងបច្ចេកវិទ្យានោះទេ ក៏ប៉ុន្តែបច្ចេកវិទ្យានោះក៏អាចនាំមកនូវផលវិបាកដែលចៀសមិនរួចទៅលើបញ្ហាមនុស្សជាច្រើនដែលត្រូវកាត់បញ្ចេញពីបណ្តាក្រុមហ៊ុន​ដែលមានបច្ចេកវិទ្យាខ្ពស់ តើពួកគេរស់ដោយសារអ្វីទៀត? ពួកគេត្រូវការការធានារ៉ាប់រងរបៀបណាដើម្បីបានការងារធ្វើ?។ លោកបានថ្លែងដូចនេះ នៅព្រឹកថ្ងៃ ព្រហ​ស្បតិ៍ ១៤រោច ខែផល្គុន ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី១៥ ខែមីនា ឆ្នាំ២០១៨នេះ ក្នុងឱកាសអញ្ជើញជាអធិបតីនៅក្នុងសន្និសីទ ចក្ខុវិស័យប្រទេសកម្ពុជា ឆ្នាំ២០១៨ ក្រោមប្រធានបទ «វិទ្យាសាស្រ្ត និងបច្ចេកវិទ្យា សម្រាប់ឧស្សាហូបនីយកម្ម កំណើនសេដ្ឋកិច្ច និងការអភិវឌ្ឍន៍ប្រទេសកម្ពុជា» (2018 Cambodia Outlook Conference – Science and Technology for Industrialization, Economic growth and Development in Cambodia) នៅសណ្ឋាគារ Sofitel រាជធានីភ្នំពេញ។

លោកនាយករដ្ឋមន្រ្តី ហ៊ុន សែន បានបញ្ជាក់បន្ថែមថា ឥឡូវនេះបច្ចេកវិទ្យាគឺជឿនលឿនហើយ គឺច្បាស់ជាជួយជំរុញដល់កំណើនសេដ្ឋកិច្ចនៃការលូតលាស់នៃប្រទេសនានា ក៏ប៉ុន្តែបញ្ហាត្រូវគិតឱ្យច្បាស់នៅត្រង់ចំ​ណុចនេះថា បើមនុស្សយន្តធ្វើការជំនួសមនុស្សទៅហើយ តើមនុស្សមានការងារធ្វើពីណាទៀត។ នោះហើយជាបញ្ហាសង្គមដែលវានឹងកើតនៅក្នុងសម័យបដិវត្តន៍ឧស្សាហកម្មទី៤ វានឹងលេចចេញនូវបញ្ហានេះ។ នេះមិនមែនជាបញ្ហាដាច់ដោយឡែកនោះទេ តែវាជាបញ្ហាប្រឈមមួយ នៅក្នុងបញ្ហាដែលយើងហៅថា សំណាញ់សុវត្ថិភាពសង្គម។

ប្រមុខរាជរដ្ឋាភិបាលកម្ពុជា បានគូសបញ្ជាក់ថា ឥឡូវនេះ សម្រាប់ឧស្សាហកម្មនៅកម្ពុជា គឺកំពុងតែដំណើរការឧស្សាហកម្មអតិពលកម្ម ស្របពេលដែលកម្ពុជាដាក់ចេញនូវគោលន​យោបាយឧស្សាហកម្ម ២០១៥-២០២៥ ដែលមានទិសដៅទាញយកឧស្សាហកម្មដែលមានការកែច្នៃនិងមានតម្លៃបន្ថែម និងឧស្សាហកម្មដែលមានកម្រិតបច្ចេកវិទ្យាខ្ពស់។ លោកនាយករដ្ឋមន្រ្តី ហ៊ុន សែន បានបន្តថា នៅពេលដែលកម្ពុជាឈានដល់ចំណុចនោះហើយ ចំណុចដែលយើងត្រូវគិតគូរជាមុនអំពីវិធានការទាំងឡាយដើម្បីធានាថា ពលរដ្ឋដែលបានបាត់បង់ការងារធ្វើដោយសារតែបច្ចេកវិទ្យាជឿនលឿននេះ នឹងមិនត្រូវបានដាក់ឱ្យនៅក្រៅដំណើរការនៃការរីកលូតលាស់នៃសង្គមនោះទេ។

លោកនាយករដ្ឋមន្រ្តី ហ៊ុន សែន ក៏បានបញ្ជាក់ថា និន្នាការសាកលកំពុងផ្លាស់ប្តូរយ៉ាងលឿន ហើយស្ថានភាពវិទ្យាសាស្ត្រ និងបច្ចេកវិទ្យា ទាំងបច្ចេកវិទ្យានាំចូល ការអភិវឌ្ឍន៍បច្ចេកវិទ្យាក្នុងស្រុក និងការចាប់យក បច្ចេកវិទ្យារបស់ប្រជាជនកម្ពុជា កំពុងមានសន្ទុះកើនឡើង និងកំពុងចាក់ឫសជ្រៅបន្តិចម្តងៗនៅក្នុងវិស័យកសិកម្ម ឧស្សាហកម្ម និងសេវាកម្ម ស្របគ្នាទៅនឹងដំណើរការអភិវឌ្ឍន៍សេដ្ឋកិច្ច និងសង្គមកិច្ចកម្ពុជាផងដែរ៕

សេចក្ដីប្រកាសព័ត៌មានរួម ស្តីពីកិច្ចប្រជុំគណៈកម្មាធិការចំរុះកម្ពុជា-សហភាពអឺរ៉ុបលើកទី១០

កិច្ចប្រជុំគណៈកម្មាធិការចំរុះកម្ពុជា-អឺរ៉ុបលើកទី១០ ត្រូវបានប្រារព្ធធ្វើនៅថ្ងៃទី១៤ ខែមីនា ឆ្នាំ២០១៨ នៅទីក្រុងប្រ៊ុចសែល ដោយរួមមានកិច្ចប្រជុំអនុក្រុមចំនួន ០៣ គឺ កិច្ចប្រជុំអនុក្រុមស្ដីពីកិច្ចសហប្រតិបត្តិការអភិវឌ្ឍន៍ អនុក្រុមស្ដីពីការកសាងស្ថាប័ន កំណែទំរង់រដ្ឋបាល កំណែទំរង់ច្បាប់និងតុលាការ អភិបាលកិច្ច និងសិទ្ធិមនុស្ស និងអនុក្រុមស្ដីពីពាណិជ្ជកម្ម និងការវិនិយោគ។

សហភាពអឺរ៉ុប បានស្វាគមន៍ និងកោតសរសើរចំពោះការរីកចំរើនរបស់ប្រទេសកម្ពុជា និងសមទ្ធិផលពាក់ព័ន្ធនឹងសិទ្ធិសេដ្ឋកិច្ចសង្គម និងបានវាយតម្លៃចំពោះកិច្ចសហប្រតិបត្តិការល្អជាមួយកម្ពុជាជាងពីរ ទសវត្សរ៍មកនេះ។ សហភាពអឺរ៉ុប និងកម្ពុជាបានអះអាងឡើងវិញនូវការប្ដេជ្ញារបស់ខ្លួនក្នុងការធ្វើឲ្យទំនាក់ទំនង និងកិច្ចសហប្រតិបត្តិការកាន់តែស៊ីជម្រៅ ដោយឈរលើគោលការណ៍សមភាព ការគោរពគ្នាទៅវិញទៅមក និងការសន្ទនាបើកទូលាយ និងលើកកម្ពស់ការអនុវត្តនូវកម្មវត្ថុ ដែលបានកំណត់ក្នុងកិច្ចព្រមព្រៀងសហប្រតិបត្តិការកម្ពុជា-សហភាពអឺរ៉ុបឆ្នាំ១៩៩៧។

សូមអានសេចក្តីប្រកាសព័ត៌មានរួម ស្តីពីកិច្ចប្រជុំគណៈកម្មាធិការចំរុះកម្ពុជា-សហភាពអឺរ៉ុបលើកទី១០ នៅខាងក្រោមដូចតទៅ៖

(សូមទស្សនាវីដេអូ) លោកនាយករដ្ឋមន្រ្តី ហ៊ុន សែន ថ្លែងថា វិស័យវិទ្យាសាស្រ្តនិងបច្ចេកវិទ្យា ជាចំណែកសំខាន់ ផ្សាភ្ជាប់យ៉ាងជិតស្និទជាមួយ យុទ្ធសាស្រ្តកំណើនថ្មី និងចក្ខុវិស័យរយៈពេលវែងរបស់កម្ពុជា