ខេត្តបាត់ដំបងរៀបចំពិធីប្រគល់ជូនប័ណ្ណសរសើរដល់​សាស្រ្តាចារ្យឆ្នើម​ និងនិសិ្សត​ជ័យលាភី​ សាកលវិទ្យាល័យ​គ្រប់គ្រង​ និង​សេដ្ឋកិច្ច

បាត់ដំបង៖ នៅថ្ងៃទី២០ ខែវិច្ឆិកា ឆ្នាំ២០១៧នេះ នៅទីរួមខេត្តបាត់ដំបង មានរៀបចំពិធី បើកបវេសនកាលឆ្នាំសិក្សា២០១៧-២០១៨ និងចែកប័ណ្ណសរសើរដល់សាស្រ្តាចារ្យឆ្នើម និងនិសិ្សតជ័យលាភីរបស់សាកលវិទ្យាល័គ្រប់គ្រង និងសេដ្ឋកិច្ច ខេត្តបាត់ដំបង ក្រោមអធិបតីភាពលោក ហ៊ុន ម៉ាណែត ប្រធានគណៈកម្មាធិការអាហារូបករណ៍ សិស្ស និសិ្សតក្រីក្រ សម្តេចអគ្គមហាសេនបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត និងលោក ច័ន្ទ សុផល ទីប្រឹក្សារាជរដ្ឋាភិបាលកម្ពុជា នៅសាលមហោស្រពស្ទឹងសង្កែ ខេត្តបាត់ដំបង។

ក្នុងពិធីនេះក៏មានការអញ្ជើញចូលរួមពី លោក ងួន រតនៈ អភិបាលនៃគណៈអភិបាលខេត្តបាត់ដំបង, សាកលវិទ្យាធិការ, សាកលវិទ្យាធិការរង, លោកនាយកគ្រប់សាខា បុគ្គលិក សាស្រ្តាចារ្យ ព្រមទាំងនិសិ្សតសាកលវិទ្យាល័យគ្រប់គ្រង និងសេដ្ឋកិច្ចខេត្តបាត់ដំបង សរុបជាង៨០០នាក់ផងដែរ៕

រដ្ឋបាលខេត្តតាកែវ ផ្សព្វផ្សាយលិខិតរបស់ក្រសួង​មហាផ្ទៃស្តី​ការកែតម្រូវ​ និងការធ្វើ​មោឃភាព​ទិន្នន័យនៃ​បញ្ជីអត្រានុកូលដ្ឋាន​

តាកែវ៖ នៅថ្ងៃទី២០ ខែវិច្ឆិកា ឆ្នាំ២០១៧នេះ រដ្ឋបាលខេត្តតាកែវ បានផ្សព្វផ្សាយលិខិត ០៣៥ស.ណ.ន ក្រសួងមហាផ្ទៃស្តីការកែតម្រូវ និងការធ្វើមោឃភាពទិន្នន័យនៃបញ្ជីអត្រានុកូលដ្ឋាន នៅសាលមហោស្រពខេត្តតាកែវ ក្រោមអធិបតីភាពលោក កៅ ឆែ សមាជិកក្រុមប្រឹក្សាខេត្ត និងលោក យស់ ណាស៊ី អភិបាលរងខេត្ត។

តាមរយៈការផ្ទៀងផ្ទាត់របស់ក្រសួងមហាផ្ទៃឃើញថា ប្រជាពលរដ្ឋជិត៣៥%កំពុងជួបប្រទះបញ្ហាខុសទិន្នន័យអត្តសញ្ញាណរបស់ខ្លួននៅក្នុងបញ្ជី និងសំបុត្រអាត្រានុកូលដ្ឋាននាំឲ្យសាមីខ្លួនជួបការលំបាកយ៉ាងខ្លាំងក្នុងការស្នើសុំសេវាកែតម្រូវឡើងវិញ។

ដើម្បីសម្រួលដល់ការលំបាកទាំងនេះ ក្រសួងមហាផ្ទៃបានធ្វើការណែនាំតាមរយៈលិខិតលេខ ០៣៥ ស.ណ.ន អំពីការកែតម្រូវ និងធ្វើមោឃភាពបញ្ជីអត្រានុកូលដ្ឋានដល់គ្រប់រាជធានី-ខេត្ត។ ដោយយោងតាមខ្លឹមសារស្មារតីនៃសេចក្តីណែនាំនេះ រដ្ឋបាលខេត្តតាកែវបានបើកកិច្ចប្រជុំផ្សព្វផ្សាយស្តីពីការដោះស្រាយការលំបាកចំពោះមុខរបស់ប្រជាពលរដ្ឋដែលអាចកែតម្រូវបានមានដូចជា ខុសអក្ខរាវិរុទ្ធលើនាមត្រកូល ខ្លួន ភេទ អាយុឪពុកម្តាយ ថ្ងៃកំណើតសុរិយគតិ ចន្ទគតិ ភាន់ច្រឡំទីតាំងភូមិសាស្ត្ររដ្ឋបាល ខ្ទង់ទីកន្លែងកំណើត ការខកខានមិនបានចុះព័ត៌មានក្នុងបញ្ជីអត្រានុកូលដ្ឋាន…។ល។

នីតិវិធីនៃការកែតម្រូវត្រូវទាក់ទងទៅមន្ត្រីអត្រានុកូលដ្ឋាន ឃុំ សង្កាត់ ប្រសិនបើឋិតនៅក្នុងឆ្នាំ ប៉ុន្តែបើឆ្នាំកន្លងផុតត្រូវទាក់ទងនៅនាយកដ្ឋានអត្រានុកូលដ្ឋាន ក្រសួងមហាផ្ទៃ សាលាក្រុង សុ្រក ខណ្ឌ នៃទីតាំងដែលបានរក្សាទុក រយៈយ៉ាងយូរ៣ថ្ងៃ ថ្ងៃធ្វើការ។ ចំពោះព័ត៌មានលំអិតទាក់ទងនៅសាលាក្រុង ស្រុក ខណ្ឌ របស់សាមីខ្លួន៕

កម្ពុជា និងដំណើរការ ការបង់ប្រាក់ពន្ធ តាមប្រព័ន្ធអេឡិកត្រូនិក (E-payment) នៅដើមឆ្នាំក្រោយនេះ

រាជរដ្ឋាភិបាលកម្ពុជា តាមរយៈអគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ ដែលជាសេនាធិការ នៅថ្ងៃទី២០ ខែវិច្ឆិកា ឆ្នាំ២០១៧នេះ បានប្រកាសដាក់ឱ្យដំណើរការ ការបង់ប្រាក់ពន្ធតាមប្រព័ន្ធអេឡិកត្រូនិក (E-payment) ដែលរំពឹងថា នឹងជួយសម្រួលឱ្យអ្នកជាប់ពន្ធកាត់ តែមានភាពងាយស្រួលជាងមុន។

ការប្រកាសដាក់ឱ្យដំណើរការ ប្រព័ន្ធបង់ពន្ធតាមប្រព័ន្ធអេឡិកត្រូនិកនេះ ធ្វើឡើងក្នុងឱកាសដែល អគ្គនាយកដ្ឋានពន្ធដារ រៀបចំសិក្ខាស្តីពី ‌‌‌‌‌‌‌‌‌‌‌‌‌‌‌‍«កាតព្វកិច្ចពន្ធលើប្រាក់ចំណេញប្រចាំឆ្នាំ និងការកែទម្រង់ប្រព័ន្ធ រដ្ឋបាល សារពើពន្ធ (E-Payment)» ក្រោមអធិបតីភាពលោក គង់ វិបុល ប្រតិភូរាជរដ្ឋាភិបាលទទួលបន្ទុកជា អគ្គនាយកនៃអគ្គនាយកដ្ឋានពន្ធដារ ព្រមទាំងវត្តមានចូលរួមរបស់លោក លោកស្រីអគ្គនាយករង លោកប្រធាន-អនុប្រធាននាយកដ្ឋានថ្នាក់កណ្តាល លោកប្រធានសាខាពន្ធដារខេត្ត-ខណ្ឌ និងមន្រ្តីពន្ធដារ ពាក់ព័ន្ធ ព្រមទាំងវត្តមានរបស់លោកឧកញ៉ា លោក-លោកស្រី នាងកញ្ញា បណ្ណាធិការ អភិបាល នាយក ឬតំណាងរោងចក្រ សហគ្រាស សមាគមធុរកិច្ចក្នុងគ្រប់វិស័យដែលកំពុងប្រកបធុរកិច្ច នៅក្នុងកម្ពុជា ប្រមាណជាង១០០០សហគ្រាស ចូលរួមផងដែរ នៅសណ្ឋាគារ សូហ្វីតែល ភ្នំពេញភោគីត្រា។

យោងតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារ បនឱ្យដឹងថា សិក្ខាសាលា ស្តីពី ‌‌‌‌‌‌‌‌‌‌‌‌‌‌‌‍«កាតព្វកិច្ចពន្ធ លើប្រាក់ចំណេញប្រចាំឆ្នាំ និងការកែទម្រង់ប្រព័ន្ធរដ្ឋបាល សារពើពន្ធ (E-Payment)» ត្រូវបានរៀបចំធ្វើឡើង ក្នុងគោលបំណងផ្សព្វផ្សាយ ឱ្យកាន់តែទូលំទូលាយថែមទៀត និងឱ្យបានជ្រួតជ្រាបដល់គ្រប់ មជ្ឈដ្ឋានអ្នកជាប់ ពន្ធជាពិសេស គឺដើម្បីស្វែងយល់ោ្យបានកាន់តែ ស៊ីជម្រៅថែមទៀត ចំពោះកាតព្វកិច្ចសារពើពន្ធរបស់ សហគ្រាសជាពិសេស ការប្រកាសបង់ពន្ធលើប្រាក់ចំណូល ដែលនឹងត្រូវចូលមកដល់នាខែមករា ឆ្នាំ២០១៨ ឆាប់ៗខាងមុខនេះ។

សេចក្តីប្រកាសព័ត៌មានដដែលបន្ថែមថា «អ្វីដែលសំខាន់ជាងនេះ ទៅទៀតសម្រាប់អង្គសិក្ខាសាលានេះ គឺការផ្សព្វផ្សាយអំពីការដាក់ឱ្យដំណើរការ បង់ប្រាក់ពន្ធតាមប្រព័ន្ធអេឡិកត្រូនិក (E-payment) ដែលរួចរាល់ សម្រាប់ដាក់ឱ្យដំណើរការ ចាប់ពីពេលនេះតទៅ និងដំណើរការនៃការដាក់លិខិត ប្រកាសបង់ពន្ធតាមប្រព័ន្ធ អេឡិកត្រូនិក (E-Filing) ដែលគ្រោងនឹងដាក់ឱ្យដំណើរការ នៅដើមឆ្នាំ២០១៨ខាងមុខ ហើយដែលកិច្ចការនេះ អគ្គនាយកដ្ឋានពន្ធដារបាន និងកំពុងខិតខំធ្វើយ៉ាងណាបង្កលក្ខណៈងាយស្រួល គ្រប់បែបយ៉ាងជូនអ្នកជាប់ពន្ធ ផ្តល់សេវាជូនអ្នកជាប់ពន្ធ ឱ្យកាន់តែប្រសើរឡើងថែមទៀត»។

ជាមួយគ្នានេះ អគ្គនាយកដ្ឋានពន្ធដារ បានបង្ហាញក្តីសង្ឃឹមយ៉ាងមុតមាំថា ក្រោយបញ្ចប់សិក្ខាសាលានេះ អ្នកជាប់ពន្ធ ក៏ដូចជាភ្នាក់ងារសេវាកម្មពន្ធដារទាំងអស់ យល់កាន់តែច្បាស់នូវកាតព្វកិច្ចពន្ធដារ នីតិវិធីនៃការ ប្រកាសបង់ពន្ធលើប្រាក់ចំណូលប្រចាំឆ្នាំ២០១៧ ហើយសង្ឃឹមជឿជាក់ថា តួលេខប្រាក់ពន្ធលើប្រាក់ចំំណូល នឹងមានការកើនឡើងខ្ពស់ជាងបណ្តាឆ្នាំមុនៗ។

ឆ្លៀតឱកាសនេះផងដែរ លោក គង់ វិបុល អគ្គនាយកពន្ធដារ បានប្រកាសផ្តល់វិញ្ញាបនបត្រ អនុលោមភាព ប្រភេទមាស ដែលជាវិញ្ញាបនបត្របញ្ជាក់ពី អនុលោមភាពសារពើពន្ធបានល្អប្រសើររបស់សហគ្រាសចំនួន២០ ដែលភាគច្រើននៃសហគ្រាសទាំងនោះ គឺជាអ្នកផ្តល់ប្រឹក្សាផ្នែកច្បាប់ ប្រឹក្សាផ្នែកពន្ធដារ និងវិស័យធនាគារជាដើម។

ជាងនេះទៅទៀតនោះ លោកអគ្គនាយកក៏បានផ្តាំផ្ញើ និងក្រើនរម្លឹកដល់គ្រប់ធុរជន បណ្ណាធិការ ម្ចាស់រោងចក្រ សហគ្រាសទាំងអស់ ចូលរួមជាមួយអគ្គនាយកដ្ឋានពន្ធដារ ក្នុងការអនុវត្តច្បាប់ឱ្យកាន់តែមានតម្លាភាព ប្រសិទ្ធភាព និងសមភាពខ្ពស់ថែមទៀត ចៀសវាងមានការថ្នាំងថ្នាក់ និងត្រូវរងនូវការផាកពិន័យ ជាយថាហេតុ ៕

ផែនការ​ខ្សែក្រវ៉ាត់​ និងវិថី​ និងសណ្តាប់ធ្នាប់​កំពុងប្រែប្រួល​របស់អាស៊ី​

ក្នុងពេល​ ២ ថ្ងៃ​នៃ​ការ​ជួបប្រជុំ​រវាង​ប្រធានាធិបតី ដូណាល់ ត្រាំ និង​ប្រធានាធិបតី ស៊ី ជីនពីង​​នៅ​ប៉េកាំង​​លើ​ដំណើរទស្សនកិច្ច​ផ្លូវ​រដ្ឋ​លើក​ដំបូង​របស់ ត្រាំ នោះ វា​ហាក់ដូចជាថា ពួក​គេ​មិន​បាន​អ្វីទាល់​តែសោះ​អំពី​ផែនការ​ខ្សែក្រវ៉ាត់ ​និង​វិថី ឬផ្លូវ​សូត្រ​ថ្មី ​​របស់​ចិន។ ដំណើរទស្សនកិច្ច​របស់​ ត្រាំ នោះ​បាន​បង្ហាញ​ពី​ទំនោរ​របស់​រដ្ឋការ​គាត់​ក្នុងការ​មើលឃើញ​អាស៊ី​ទាំងមូល​តាម​រយៈ​ទំនាក់ទំនង​ទ្វេភាគី និង​វិបត្តិ។ រដ្ឋមន្ត្រីការបរទេស​អាមេរិក​ Rex Tillerson និង​ត្រាំ បាន​លើក​ឡើង​ថា អាមេរិក​កំពុងស្វះ​ស្វែង​​ធ្វើ​ឲ្យ​ចីរភាព​ និង​ការ​ពារ​​តំបន់​ឥណ្ឌូប៉ាស៊ីហ្វិក​​​មាន​លក្ខណៈ​សេរី​ និង​បើក​ចំហរ ប៉ុន្តែ​អសមត្ថភាព​ក្នុងការ​​មាន​ចក្ខុវិស័យ​យុទ្ធ​សាស្ត្រ​ប្រកប​ដោយ​អត្ថន័យ​​ ឬ​គោល​នយោ​បាយ​​ធំដំ​នោះ​គឺ​កំពុង​បង្ហាញ​ឲ្យ​ឃើញ​យ៉ាង​ច្បាស់។​

អវត្តមាន​នៃ​ការ​គិត​លក្ខណៈ​យុទ្ធ​សាស្ត្រ​អំពី​តំបន់នោះ​គឺជា​មូល​ហេតុ​សំខាន់​ដល់​ការ​មិន​អើ​ពើ​ដល់​ផែនការ​ផ្លូវ​សូត្រ​ថ្មី​របស់​ចិន​នោះ។ វា​ជាគោល​នយោ​បាយ​មួយ​ដែល​មានទំហំយ៉ាង​ធំ​ មាន​លក្ខណៈ​យុទ្ធ​សាស្ត្រ​ខ្ពស់​​នៅ​ក្នុង​ទស្សនៈ​វែងឆ្ងាយ​របស់ខ្លួន និង​បង្ហាញពី​ចក្ខុវិស័យ​ដ៏មហិច្ឆតា​និង​ទុក​ចិត្ត​របស់​ ស៊ី លើ​តួនាទីពិភព​លោក​របស់​ចិន។ ប្រសិន​បើ​អាមេរិក ​និង​សម្ព័ន្ធ​មិត្ត​របស់ខ្លួន​ចង់​រក្សា​​ស្ថានភាព​យុទ្ធ​សាស្ត្រ ​និង​សេដ្ឋ​កិច្ច​សព្វ​ថ្ងៃ​ឲ្យ​ស្ថិត​នៅ​ដដែល​នៅ​អាស៊ី​នោះ ពួក​គេ​ចាំបាច់​ត្រូវ​តែ​ទទួល​ស្គាល់ថា ពួក​គេ​កំពុង​តែ​ធ្វើ​ដូច​គ្នា​ ទន្ទឹម​ពេល​ដែល​ចិន​កំពុង​ជំរុញ​ទៅ​មុខ​ជា​មួយ​ផែនការ​ផ្លូវ​សូត្រ​ថ្មី​របស់ខ្លួន។​

ផ្លូវ​សូត្រ​នោះ​ត្រូវ​បានប្រកាស​លើក​ដំបូង​ក្នុង​សុន្ទរកថាពីរលើក​ដោយ​ ស៊ី នៅ​ឆ្នាំ ២០១៣ នៅ​ Kazakhstan និង​នៅ Bandung ដោយ​បាន​បង្កើត​នូវ​ចក្ខុវិស័យ​ធំ ប៉ុន្តែ​ស្រពិចស្រពិល​ ដល់​ការ​តភ្ជាប់​រវាង​ចិន​និង​អតីត​ផ្លូវ​សូត្រ​របស់ខ្លួននោះ។ នៅ​ក្នុង​សមាជបក្ស​​លើកទី ១៩ ថ្មីៗ​នេះ​ ផែនការ​ផ្លូវ​សូត្រ​ថ្មី​នោះ​ត្រូវ​បាន​សរសេរ​ចូល​ក្នុងរដ្ឋធម្មនុញ្ញ​របស់​បក្ស។ វា​ច្បាស់ណាស់​គឺជា​ធាតុ​ផ្សំ​សំខាន់​បំផុត​នៅ​ក្នុង​គោល​នយោបាយ​​អន្តរជាតិ​របស់​ចិន។​

សម្រាប់​​ចំណុច​សំខាន់​របស់​វា ផែនការ​ផ្លូវ​សូត្រថ្មី​​នោះ​អំពី​និយាយតែ​ពីកិច្ច​ការ​តភ្ជាប់​​ប្រជាជន​ និង​ប្រជាជន​ និង​ទីផ្សារ​​តាម​រយៈ​ហេដ្ឋារចនាសម្ព័ន្ធ។ ប៉ុន្តែ​ វា​ក៏​មាន​តួនាទី​យុទ្ធ​សាស្ត្រ​យ៉ាង​តិច​ចំនួន ៥ ដែរ។

ប្រហែល​ជា​តួនាទីសំខាន់​បំផុត​ជាងគេ​នោះ​គឺ​ថា វា​ជា​មធ្យោ​បាយ​​ក្នុងកា​រជំរុញកំណើន​សេដ្ឋកិច្ច​​នៅ​ក្នុង​បណ្តាខេត្ត​ភាគខាង​ត្បូង​ និង​ខាង​លិចដែលក្រីក្រ​​របស់​ចិន។ គោល​ដៅ​នោះ​គឺ​ដើម្បី​កាត់បន្ថយ​វិសមភាព​សេដ្ឋកិច្ច​ធំធេង​​​រវាង​តំបន់ខ្ពស់រាប​ និង​តំបន់​ឆ្នេរសមុទ្រ​របស់​ចិន​ និង​ដើម្ប​ផ្តល់​ជា​ជន្ទល់​អភិវឌ្ឍន៍​​សង្គម​សម្រាប់​ភាគ​ជា​ច្រើន​របស់​ចិន​ ដែល​បក្ស​កុម្មុយនីស្ត​ចិន​បាន​មើលឃើញ​ថា បាន​​ជំទាល់​ដល់ការ​គ្រប់គ្រង​របស់ប៉េកាំង។​ ​ចេញពីទស្សនៈ​នេះ ខេត្ត Xinjiang ដែលកាន់តែ​រីក​ចម្រើន​នោះ​ទំនង​មិន​សូវ​​​រងឥទ្ធិពល​​​នៃ “អំពីភេរវកម្ម​និង​ផ្តាច់ខ្លួន” ទេ។​

ប៉ុន្តែ ការ​វិនិយោគ​ដ៏ធំ​ក្នុង​ហេដ្ឋារចនាសម្ព័ន្ធ​​មិន​គ្រាន់តែ​​ផ្តល់​ដង្ហើម​សេដ្ឋកិច្ច​នៅ​ក្នុង​ប្រទេស​ចិនទេ ប៉ុន្តែ​ផែនការ​ផ្លូវ​សូត្រ​ថ្មី​នោះ​ក៏មាន​គោល​ដៅ​​លើកកម្ពស់​ការ​អភិវឌ្ឍន៍​សេដ្ឋកិច្ច​​នៅ​ក្នុង​តំបន់​ដាច់​ស្រយាល​​ភាគខាង​លិច​របស់​ចិនដែរ។ ច្រកសេដ្ឋកិច្ច​ចិន​-ប៉ាគីស្ថាន ពោលជា​កម្មវិធី​​បង្កើត​បំពង់បង្ហូរប្រេង​ ទំនប់ទឹក និង​ផែនការ​អភិវឌ្ឍ​នៅ​ប៉ាគីស្ថាន​នោះ មិន​មែន​តែ​លើ​ការ​នាំ​យក​ប្រេង​ពី​សមុទ្រ​អារ៉ាប់​ទៅ​កាន់ខេត្ត​ Xinjiang នោះទេ។ ប៉ុន្តែ វា​ជា​ការ​​លើក​កម្ពស់​ដល់​សុខមាលភាព​របស់​ប៉ាគីស្ថាន។ ប្រទេស​ប៉ាគីស្ថាន​ដែល​សំបូរ​សប្បាយ​​គឺជា​ទីផ្សារ​ល្អ​សម្រាប់​ទំនិញចិន ជា​ដៃគូ​កាន់តែ​ពឹង​អាស្រ័យ​បាន​​ដើម្បី​ធ្វើ​ឲ្យ​មាន​តុល្យភាព​​ឥទ្ធិពល​ឥណ្ឌា និង​មិន​សូវ​ទំនង​ជា​ប្រភព​នៃ​ដង្ហើម​​ពួក​អ៊ីស្លាម​ជ្រុល​និយម។ វា​គឺ​ជា​កាដូបន្ថែម​ដ៏ល្អ​មួយសម្រាប់​​​ការ​រីក​ចម្រើន​សេដ្ឋកិច្ច​ក្នុង​ចំណោម​ប្រទេស​ជិតខាង​ចិនដែល​​​ក៏នឹង​ស៊ី​សង្វាក់គ្នាទៅ​នឹង​ផល​ប្រយោជន៍​របស់ប្រទេស​ទាំង​នោះ​ជា​មួយ​នឹង​ផល​ប្រយោជន៍​របស់ប៉េកាំង​ ។​

នេះក៏នឹង​ជួយ​បង្កើតទី​​ផ្សារកាន់តែ​ទំនើប​​ដើម្បី​ទិញទំនិញ​​ថ្លៃៗ​ដែល​អ្នក​កំណែទម្រង់​សេដ្ឋកិច្ច​របស់​ចិន​មាន​គោល​ដៅ​បង្កើត​ឡើង។ កាន់តែ​សំខនា់នោះ នៅពេល​ទីផ្សារ​នៅតាម​បណ្តោយ​ផ្លូវ​សូត្រ​ថ្មី​នោះ​អភិវឌ្ឍន៍ ពួក​គេ​ក៏​មាន​បំណង​​ចង់បាន​ស្តង់ដារ​អន្តរជាតិ​ពី​ទំនិញ​ឧស្សាហកម្ម​របស់ចិន​​​ ដែល​បន្ត​​ពង្រីក​ផល​ប្រយោជន៍​សេដ្ឋកិច្ច​របស់​ចិន​ថែម​ទៀត។ ដូចអាមេរិក​ដឹង​អញ្ចឹង​ថា បណ្តា​ប្រទេស​ដែល​បង្កើត​ហេដ្ឋារចនាសម្ព័ន្ធ​នោះ​ក៏​កំណត់​​​ស្តង់ដារ​នោះដែរ។​

បំណងទីបួន និង​ប្រហែលជា​ចំណុច​ដែល​កាន់តែលេច​ធ្លោរ​ក្នុង​ចិត្ត​របស់​ពួក​មានអំណាច​ចិន​នោះ​គឺ​ភូមិសាស្ត្រ​នយោ​បាយ​របស់​ផែនការ​ផ្លូវ​សូត្រ​ថ្មី​នោះ។ ការ​ពឹង​ផ្អែក​​របស់​ចិន​លើ​យុទ្ធ​សាស្ត្រ​ផ្លូវ​ទឹក​និង​ភាព​ងាយ​ផុយ​ស្រួយ​របស់​វា​ចំណពោះ​អំណាចអាមេរិក​នោះ​បាន​ក្លាយជា​ប្រភព​​នៃ​ការ​ព្រួយ​បារម្ភ​ជាយូរ​មក​ហើយ​សម្រាប់​ថ្នាក់ដឹកនាំបក្ស​កុម្មុយនីស្ត។ កងនាវាមុជទឹក​​របស់ទ័ព​ជើង​ទឹក​អាមេរិក​​ទំនង​ជា​ប្រាកដថា ទោះបីជា​ចិន​​មាន​នាវាដឹកយន្ត​ហោះ​ក៏​ដោយ​ ក៏​ប្រទេស​នោះ​នៅ​តែ​ងាយ​រង​ការ​បំភិត​បំភ័យ​ពី​ទ័ពជើង​ទឹក​របស់អាមេរិកដែរ។ ដោយការ​ងាកទៅទិសខាង​លិច​និងការ​អាច​ចូលល​ទៅកាន់ទីផ្សារ​នានា​តាមផ្លូវ​គោក ចិន​អាច​យក​ឈ្នះ​បាន​ដល់ការ​បិទខ្ទប់​ផ្លូវ​ទឹក​ដែល​បង្កើត​ឡើង​នូវ​ភាព​ងាយ​រងគ្រោះ​ដល់នាវាមុជទឹក​របស់ខ្លួន ដែល​ការ​នោះ​នាំ​ឲ្យ​ទទួល​បាន​​ជម្រៅ​យុទ្ធ​សាស្ត្រ​ដែល​ត្រូវ​ការ​ខ្លាំង​នោះ។​

ចុងក្រោយ ក្នុងការ​បង្កើត​កម្មវិធី​ហេដ្ឋារចនាសម្ព័ន្ធ​ក្នុងទឹក​ប្រាក់ ១ ពាន់ពាន់​លាន​ដុល្លារ​របស់​ផ្លូវ​សូត្រ​ថ្មី​ដែល​ចងបណ្តា​រដ្ឋ​ និង​ប្រទេស​មាន​សេដ្ឋកិច្ច​នានា​​ទៅជា​ប្រព័ន្ធ​យុទ្ធ​សាស្ត្រ ​​និង​សេដ្ឋកិច្ច​​ដែល​យក​ចិន​ជា​ស្នូល​នោះ ចិន​កំពុង​មាន​បំណង​​ធ្វើ​ឲ្យ​ខ្សោយ​ដល់​រចនាសម្ព័ន្ធ​​ស្ថាប័ន​​និង​យុទ្ធ​សាស្ត្រ​​សព្វ​ថ្ងៃ​។ ជា​រួម​ ផែនការ​ផ្លូវ​សូត្រថ្មី​នោះ​​គឺជា​ផ្នែក​សំខាន់​​មួយ​នៃ​ការ​ស្ថាបនា​មិន​គំរាម​កំហែង​របស់​ចិន​ដល់​សណ្តាប់​ធ្នាប់​ថ្មី​របស់​ចិន។ ភាព​ជា​និមិត្តរូប​​​នោះ​គឺច្បាស់ណាស់ពី​ប៉េកាំង គឺ យើង​កំពុង​សាងសង់​ស្ពាន កំពង់ផែ និង​បំពង់​បង្ហូរប្រេង​ ក្នុង​ខណៈ​អ្នក (អាមេរិក) កំពុង​សាងសង់​ជញ្ជាំង។​

ប្រទេស​ជាង​ ៦០ បាន​ចុះ​ហត្ថលេខា​លើ​អនុស្សរណៈ​យោគ​យល់​​ជា​មួយ​ចិន​អំពី​ផែនការ​ផ្លូវ​សូត្រ​ថ្មី​នោះ ប៉ុន្តែប្រទេស​ផ្សេង​ជាច្រើន​ទៀត ពិសេស​ប្រទេស​ដែល​កៀក​អាមេរិក​) នៅតែ​មាន​មន្ទិស។ អូស្ត្រាលី​ហាក់ដូចជា​​មានភាព​វិល​វល់​ខ្លាំង​ក្នុងការ​ឆ្លើយ​តប ក្នុងខណៈ​ការ​ទទួល​ស្គាល់​​យ៉ាង​ប្រុង​ប្រយ័ត្ន​របស់​ជប៉ុន​​គឺជា​មុខ​មាត់​សាធារណៈ​របស់​រដ្ឋាភិបាល​ជប៉ុន​ដែល​មាន​មន្ទិល​ខ្លាំង។ ភាព​មិន​ប្រាកដ​នេះ​គឺអាច​គេ​យល់​បាន។​

ចេញពី​ទស្សនៈ​យល់ឃើញ​របស់សម្ព័ន្ធ​មិត្ត​ម្នាក់​របស់​អាមេរិក​​ ផ្លូវ​សូត្រ​ថ្មី​នោះ​គឺជា​កម្មវិធី​ស្មុគ​ស្មាញ​ខ្លាំង​។ តំបន់​នោះត្រូវការ​ការ​វិនិយោគ​ហេដ្ឋារចនាសម្ព័ន្ធ​យ៉ាង​ខ្លាំង​ ហើយ​ចិន​មាន​ដើម​ទុន បទពិសោធន៍ និង​សមត្ថភាព​ក្នុងការ​ជំរុញ​រឿង​នេះទៅ​មុខ។ ប៉ុន្តែ​ផែនការ​នោះ​នឹង​ស្ទើតែ​ប្រាកដ​​ក្នុងការ​បង្កើន​កម្លាំង​​របស់ចិន​និង​បន្ត​ធ្វើ​ឲ្យ​សឹក​រិច​រិល​ដល់​សណ្តាប់​ចាស់​របស់​តំបន់​នោះ។

ចំណង​ជិត​ស្និត​របស់​ផែនការ​ផ្លូវ​សូត្រ​ថ្មី​ជាមួយ​ប្រធានាធិបតី​ចិន​នោះ​មាន​ន័យថា វា​នឹង​ជា​សមាសភាព​សំខាន់​បំផុត​​នៃ​គោល​នយោ​បាយ​អន្តរជាតិ​របស់​ចិន​នៅ​ក្នុង​រយៈ​ពេល​ ១ ទសវត្សរ៍​ខាង​មុខ​ទៀត​នេះ។ ដូចដែល​វា​បាន​បង្ហាញ​ឡើង​នោះ វា​នឹង​ផ្លាស់ប្តូរ​យ៉ាង​ខ្លាំង​ដល់​ទំនាក់ទំនង​សេដ្ឋកិច្ច​និង​​យុទ្ធ​សាស្ត្រ​នៅ​ក្នុង​តំបន់នោះ។ កាន់តែទូលាយ ផែន​ការ​ផ្លូវ​សូត្រថ្មី​នោះ​បាន​បង្ហាញ​ពី​មហិច្ឆតា​​មួយ​ដើម្បី​បំពេញ​ចន្លោះ​ដែល​បាត់​បង់​​ពីការ​តភ្ជាប់​ដែល​នឹង​បង្កើត​​សណ្តាប់ធ្នាប់​​តំបន់​ដែល​យក​ចិន​​ជា​មូល​ដ្ឋាន។ សំណួរ​នោះគឺថា តើ​អាមេរិក​នឹង​ប្រជែង​ការ​ខិត​ខំប្រឹង​ប្រែង​របស់​ចិន​ ឬ​មម៉ាញឹក​ពេគ​​ជា​មួយ​​កិច្ចការ​ផ្ទាល់ខ្លួន​ដែល​មិន​អាច​ដឹង​ខ្លួន​ថា មានការ​ប្រកួតប្រជែង។ ប្រសិន​បើ​ការ​កាន់តំណែង​ពេល ៩ ខែ​របស់​ ត្រាំ មិន​ដឹង​ពីរឿង​នោះទេ ចិន​នឹងកាន់តែ​បើក​ចំហរ​​កាន់តែធំ៕

ប្រភព៖ East Asia Forum ចុះថ្ងៃ១៩ ខែវិច្ឆិកា ឆ្នាំ២០១៧

អតីតសមាជិកក្រុមប្រឹក្សាឃុំរាយប៉ាយសុំចូលរួមជីវភាពនយោបាយជាមួយគណបក្សប្រជាជនកម្ពុជា

លោក ហោ ហ៊ិន ជាអតីតសមាជិកក្រុមប្រឹក្សាឃុំរាយប៉ាយនៃគណបក្សសង្រ្គោះជាតិក្នុងស្រុកកងមាស ខេត្តកំពង់ចាម បានសរសេរលិខិតចុះថ្ងៃទី២០ ខែវិច្ឆិកា ឆ្នាំ២០១៧ សុំចូលរួមជីវភាពនយោបាយជាមួយគណបក្សប្រជាជនកម្ពុជាបន្ទាប់ពីបានដឹងថា លោក កឹម សុខា និងបក្ខពួកជាជនក្បត់ជាតិ សុខចិត្តឱនក្បាលបម្រើពួកអាយ៉ងបរទេស គឺដើម្បីតែអំណាចមិនគិតពីមហន្តរាយដល់ប្រទេសជាតិមាតុភូមិ នេះជាអំពើក្បត់ជាតិក្បត់ប្រជាជនខ្លួនឯងតែម្តង៕

សូមអានលិខិតរបស់អតីតសមាជិកក្រុមប្រឹក្សាឃុំរាយប៉ាយដូចខាងក្រោម៖

មេឃុំជើងព្រៃសុំចូលរួមជីវភាពនយោបាយជាមួយគណបក្សប្រជាជនកម្ពុជាដើម្បីមានឱកាសបម្រើប្រជាជនមូលដ្ឋានទាំងមូល

លោក វ៉ែន សំអុល ជាមេឃុំជើងព្រៃនៃគណបក្សសង្រ្គោះជាតិ ស្ថិតក្នុងស្រុកបាធាយ ខេត្តកំពង់ចាម បានសរសេរលិខិតចុះថ្ងៃទី២០ ខែវិច្ឆិកា ឆ្នាំ២០១៧ សុំចូលរួមជីវភាពនយោបាយជាមួយគណបក្សប្រជាជនកម្ពុជាបន្ទាប់ពីបានឃើញនូវវីដេអូឃ្លីបរបស់ប្រធានគណបក្សសង្រ្គោះជាតិនិងសកម្មភាពជាក់ស្តែងពីការធ្វើបដិវត្តន៍ពណ៌ ញុះញង់បំបែកបំបាក់ជាតិខ្មែរ ផ្តួលរំលំរាជរដ្ឋាភិបាលស្របច្បាប់ដែលដឹកនាំដោយលោកនាយករដ្ឋមន្រ្តី ហ៊ុន សែន ដែលផ្ទុយនឹងច្បាប់រដ្ឋធម្មនុញ្ញ និងផ្ទុយពីឆន្ទៈរាស្រ្តទូទាំងប្រទេស សុខចិត្តលក់ក្បាលបម្រើបរទេសគឺដើម្បីតែអំណាចផ្ទាល់ខ្លួនមិនគិតពីមហន្តរាយរបស់ប្រទេសជាតិនេះហើយជាអំពើក្បត់ជាតិ។

នៅក្នុងលិខិតដដែលនេះ ក៏បានបញ្ជាក់ថា ដោយបានឃើញពីទង្វើអាក្រក់ទាំងឡាយរបស់លោកកឹម សុខា និងគណបក្សសង្រ្គោះជាតិដូចនេះហើយ ទើបរូបលោកបានស្ម័គ្រចិត្តមកចូលរួមជីវភាពនយោបាយជាមួយគណបក្សប្រជាជនកម្ពុជាដើម្បីមានឱកាសបម្រើប្រជាជនក្នុងឃុំទាំងមូល៕

សូមអានលិខិតរបស់មេឃុំជើងព្រៃដូចខាងក្រោម៖

ស្លាកគណបក្សសង្គ្រោះជាតិចំនួន៦៤ ទូទាំងខេត្តមណ្ឌលគិរី ត្រូវបានរុះរើចោលទាំងស្រុង

មណ្ឌលគិរី៖ ប្រធានគណៈបញ្ជាការឯកភាពខេត្តមណ្ឌលគិរី លោក ស្វាយ សំអ៊ាង បានឱ្យដឹងថា គិតត្រឹម ថ្ងៃទី២០ ខែវិច្ឆិកា ឆ្នាំ២០១៧នេះ ស្លាកគណបក្សសង្គ្រោះជាតិចំនួន៦៤ស្លាក នៅទូទាំងខេត្តមណ្ឌលគិរី ត្រូវបានរុះរើចោលទាំងស្រុង ពោលលែងមានទៀតហើយសម្រាប់ស្លាក និងបដាផ្សេងៗ របស់ គណបក្សសង្រ្គោះជាតិ នៅតាមមូលដ្ឋាន។

លោក ស្វាយ សំអ៊ាង បានបន្តថា ប្រតិបត្តិការទម្លាក់ស្លាកគណបក្សសង្រ្គោះជាតិ តាមការណែនាំរបស់ ក្រសួងមហាផ្ទៃនេះ មិនមានផ្ទុះបាតុភាពរារាំងណាមួយពីអតីតថ្នាក់ដឹកនាំ ឬសមាជិក គណបក្សសង្រ្គោះជាតិ នៅក្នុងខេត្តនោះឡើយ។

ការទម្លាក់ និងរុះរើទម្លាក់ស្លាកនេះបានធ្វើឡើងបន្ទាប់ ពីតុលាការកំពូល បានកាត់ទោសរំលាយគណបក្ស សង្គ្រោះជាតិ ហើយក្រសួងមហាផ្ទៃ បានប្រកាសលុបឈ្មោះគណបក្សនេះចេញពីបញ្ជីគណបក្ស នយោបាយ ព្រមទាំងបង្គាប់ឱ្យអាជ្ញាធរគ្រប់រាជធានីខេត្ត ចុះអនុវត្ដសាលដីកាទម្លាក់ស្លាក, បដា និងពាក្យស្លោកផ្សេងៗ របស់គណបក្សសង្គ្រោះជាតិទូទាំងប្រទេស ៕