ខ្មែរតែមួយ

Monday, November 17, 2014

សេចក្តីជូនដំណឹង ក្រសួងការបរទេស, សម្តេចតេជោ ហ៊ុន សែន នឹងអញ្ញើញចូលរួមប្រជុំកំពូលកម្ពុជា - ឡាវ - វៀតណាម លើកទី៨ ថ្ងៃទី២៤ ដល់ ២៥ វិច្ចិកា ២០១៤ នៅប្រទេសឡាវ

បទអត្ថាធិប្បាយ ដោយ៖ ពង្ស សុក្រឹត្យ «ច្បាប់ និងដំណោះស្រាយនយោបាយ មិនអាចលាយឡំគ្នាបានទេ»

« ប្រទេសមានច្បាប់ គ្រួសារមានវិន័យ » គឺជាពាក្យស្លោក ដែលប្រជាពលរដ្ឋរស់នៅក្នុងសង្គមប្រជាធិបតេយ្យ យកមកអនុវត្ត នោះទើបជាប្រទេសដែលមានអរិយធម៌ ស៊ីវិល័យ និងជឿនលឿន។

ថ្មីៗនេះ មានការចាប់ខ្លួនមនុស្សមួយចំនួនដែលបានប្រព្រឹត្តិបទល្មើសជាក់ស្តែងដោយអាជ្ញាធរមានសមត្ថកិច្ច ប៉ុន្តែដោយសារតែមនុស្សទាំងនោះជាសកម្មជនរបស់គណបក្សសង្គ្រោះជាតិ ទើបមន្ត្រីគណបក្សនេះ បានចោទគណបក្សប្រជាជនកម្ពុជា ថា គាបសង្កត់ខាងនយោបាយទៅវិញ។ ការចោទប្រកាន់នេះ គឺខុសស្រឡះតែម្តង ហើយក៏ជាការដែលគួរសោកស្តាយ ដែលគណបក្សសង្គ្រោះជាតិ យកការងារគ្រប់គ្រងនិតិរដ្ឋមកលាយឡំជាមួយនឹងគោលនយោបាយរបស់គណបក្ស។

ទន្ទឹមនឹងនោះក៏មានក្រុមសង្គមស៊ីវិល និងអ្នកវិភាគមួយចំនួនដែលស្និទ្ធនឹងបក្សប្រឆាំងក៏បាននាំគ្នាបន្ទរសម្លេងចោទរាជរដ្ឋាភិបាល ថាបានដាក់ការគាបសង្កត់ទៅលើបក្សប្រឆាំង តាមរយៈប្រព័ន្ធតុលាការផងដែរ ដោយសារតែសកម្មជនរបស់បក្សសង្គ្រោះជាតិទាំងនោះត្រូវបានតុលាការ បើកចំណាត់ការតាមនីតិវិធី ។

បើតាមការសង្កេតមើលរបស់ប្រជាពលរដ្ឋ ក្រុមសង្គមស៊ីវិល និងអ្នកវិភាគដែលមាននិន្នាការប្រឆាំងមួយចំនួន គឺពិតជាក្រុមតែមួយ ពីព្រោះនៅពេលដែលគណបក្សសង្គ្រោះជាតិ ស្រែកបែបណា គឺក្រុមសង្គមស៊ីវិល និងអ្នកវិភាគបែបប្រឆាំងទាំងនោះតែងតែលើកហេតុផលដូចគ្នាជានិច្ច។ មានពេលខ្លះក្រុមរបស់គេក៏បើកឱកាសឲ្យក្រុមសង្គមស៊ីវិលស្រែកមុន រួចទើបខាងគណបក្សសង្គ្រោះជាតិ ស្រែកបន្ទរវិញម្តង មើលទៅវាហាក់ដូចជាត្រូវដង ត្រូវផ្លែគ្នាខ្លាំងណាស់។

តាមពិត ការឃាត់ខ្លួនមនុស្សមួយចំនួននាពេលនេះ «គឺជាការអនុវត្តច្បាប់ដ៏ត្រឹមត្រូវរបស់សមត្ថកិច្ច» យោងតាមពាក្យបណ្តឹងរបស់ជនរងគ្រោះ ក្នុងការចាត់វិធានការណ៍ច្បាប់ ទៅលើជនដែលបានប្រព្រឹត្តបទល្មើសជាក់ស្តែង ។ បក្សប្រឆាំង និងសង្គមស៊ីវិល ទាំងនោះគួរមានភាពសុច្ចរិត ក្នុងការបែងចែកឲ្យដាច់ស្រឡះ រវាងទិដ្ឋភាពច្បាប់ ទិដ្ឋភាពបទល្មើស និងទិដ្ឋភាពនយោបាយ ។ ពួកគេមិនគួរចាត់ទុកការអនុវត្តនីតិរដ្ឋរបស់ប្រទេស មករួមបញ្ចូលជាមួយកិច្ចព្រមព្រៀងនយោបាយ ដែលគណបក្សទាំងពីរបានព្រមព្រៀងគ្នាកន្លងមកនោះទេ។

ទាក់ទងរឿងសកម្មជនគណបក្សប្រឆាំង ប្រព្រឹត្តិបទល្មើសអំពើហិង្សា វាគឺជាបទល្មើសជាក់ស្តែង របស់បុគ្គលម្នាក់ៗបានប្រព្រឹត្តិ ហើយបុគ្គលនោះត្រូវតែទទួលខុសត្រូវនៅចំពោះមុខច្បាប់ ដោយមិនអាចយកមករាប់បញ្ចូលជាកញ្ចប់ នៅក្នុងបញ្ហាដំណោះស្រាយនយោបាយ បានឡើយ។

ការយល់ច្រឡំដ៏ខុសឆ្គង នូវអត្ថន័យរបស់ពាក្យ «ដំណោះស្រាយនយោបាយ»ដែលបានព្រមព្រៀងគ្នាកាលពីថ្ងៃទី២២ ខែកក្កដា ឆ្នាំ២០១៤ គឺជារឿងមួយគួរឲ្យសោកស្តាយ។

កិច្ចព្រមព្រៀងនយោបាយ គឺមិនបានរួមបញ្ចូលគ្នានូវអ្វីដែលទាក់ទងទៅនឹងការអនុវត្តច្បាប់របស់ប្រទេស និងការប្រើអំពើហិង្សារបស់បុគ្គល ឬក្រុមណាមួយ ដែលបានរំលោភលើសិទ្ធិពលរដ្ឋដូចគ្នាថានឹងមិនទទួលទោសទណ្ឌនោះទេ។ រដ្ឋធម្មនុញ្ញកម្ពុជា ចែងថា ពលរដ្ឋគ្រប់រូបត្រូវបានការពារដោយស្មើភាពគ្នានៅចំពោះមុខច្បាប់។ ការបង្កើតនូវវប្បធម៌និទណ្ឌភាពនៅក្នុងសង្គម គឺជារឿងអយុត្តិធម៌សម្រាប់ជនរងគ្រោះ ហើយ «យុត្តិធម៌និងនយោបាយមិនអាចលាយឡំគ្នាបានទេ» ។ សង្គមមួយដែលរស់ក្នុងនីតិរដ្ឋ រាល់ការទាមទារទាំងឡាយណាដែលគ្មានមូលដ្ឋានច្បាប់ គឺជាការដើរខុសផ្លូវនៃលទ្ធិប្រជាធិបតេយ្យ។

កន្លងមក គណបក្សសង្គ្រោះជាតិតែងតែលើកឡើងកុំឲ្យមាននិទណ្ឌភាពនៅកម្ពុជា ហើយតែងចោទស្ថាប័នតុលាការថាមិនឯករាជ្យ ឬនៅក្រោមការបញ្ជារបស់អ្នកនយោបាយ ប៉ុន្តែពេលដែលសកម្មជនគណបក្សសង្គ្រោះជាតិប្រព្រឹត្តិបទល្មើសជាក់ស្តែង បង្កអំពើហិង្សា បែរជា មន្ត្រីគណបក្សនេះ ព្រមានដល់ស្ថាប័នតុលាការឲ្យមានការដោះលែងជនល្មើស ដែលជាការបង្គាប់បញ្ជាទៅលើស្ថាប័នតុលាការ ដែលជាស្ថាប័នឯករាជ្យមួយក្នុងចំណោមស្ថាប័នឯករាជ្យទាំងបី ដែលមានចែងនៅក្នុងរដ្ឋធម្មនុញ្ញ ទៅវិញ។ តើឯណាទៅយុត្តិធម៌ សម្រាប់ជនរងគ្រោះនោះ?

តាមពិត មកដល់តំណាក់កាលនេះមន្ត្រីគណបក្សប្រឆាំង មិនគួរប្រើពាក្យព្រមាន អុជអាល ញុះញង់ ឬបំភ្លៃរឿងពិត ដែលជំរុញឲ្យបក្សនយោបាយទាំងពីរ បន្តឈ្លោះគ្នាតទៅទៀតនោះទេ។ ប្រការដែលមិនបានបែងចែកច្បាស់លាស់អំពីទិដ្ឋភាពច្បាប់ និងទិដ្ឋភាពនយោបាយ វានឹងនាំឲ្យសង្គម និងប្រទេសជាតិ កាន់តែប្រេះស្រាំគ្មានទីបញ្ចប់ ហើយទីបំផុតពាក្យ នីតិរដ្ឋ ដែលបក្សសង្គ្រោះជាតិ តែងតែប្រើប្រាស់ ដើម្បីសុំសន្លឹកឆ្នោតពីប្រជាពលរដ្ឋ នឹងមិនអាចមានក្នុងសង្គមខ្មែរបានឡើយ។ ត្រង់ចំណុចនេះ ចង់បញ្ជាក់ថា មន្ត្រីគណបក្សសង្គ្រោះជាតិ ពិតជាបានដឹងច្បាស់ថា សកម្មជនរបស់ខ្លួនពិតជាបានប្រព្រឹត្តិនូវបទល្មើសព្រហ្មទណ្ឌយ៉ាងពិតប្រាកដ ទើបពេលនេះមន្ត្រីនោះ ស្នើឲ្យមានការដោះលែងសកម្មជនទាំងនោះ ដោយរាប់បញ្ចូលទៅក្នុងកញ្ចប់ «ដំណោះស្រាយនយោបាយ» ទៅវិញ។

ដូច្នេះ ប្រសិនបើរាល់ពេលដែលជនល្មើស ពាក់ស្លាកជាសកម្មជន នយោបាយរបស់គណបក្សណាមួយ ហើយបានប្រព្រឹត្តិបទល្មើសជាក់ស្តែង សុទ្ធតែត្រូវបានលើកលែងទោសបែបនេះ តើប្រទេស អាចអនុវត្តនូវនីតិរដ្ឋ បានដែរឬទេ? គួររួមគ្នាបញ្ឈប់នូវវប្បធម៌និទណ្ឌភាព សម្រាប់ប្រទេសជាតិយើង។

ជារួម កិច្ចព្រមព្រៀងលើដំណោះស្រាយនយោបាយ មិនអាចយកមកអនុវត្តក្នុងប្រព័ន្ធតុលាការបានទេ ប្រសិនបើគ្រប់អ្នកនយោបាយចង់បានប្រទេសមួយដែលប្រកបដោយនីតិរដ្ឋ មានការគោរពសិទ្ធិមនុស្សពេញលេញ និងការអនុវត្តនូវលទ្ធិប្រជាធិបតេយ្យពិតៗ ៕

Friday, November 14, 2014

ជំទាវមុខលុយ ជម្រិតទារលុយពីអ្នករត់តាក់ស៊ី ដោយគ្មានធម៍មេត្តា (ទង្វើដ៏អាក្រក់នោះ ស្មើនឹងការអារកខ្យងយកឈាម)

នៅទីបំផុតប្រាក់៤ពាន់ដុល្លារត្រូវបានបដិសេធពីកាកបាទក្រហមកម្ពុជា មិនទទួលយកលុយ ដែលកើតចេញពីការជម្រិតយកលុយលើទុក្ខលំបាកអ្នកក្រពីសំណាក់លោកជំទាវម្នាក់ជារដ្ឋលេខាធិការក្រសួងទេសចរណ៍ និងដែលជាភរិយារបស់រដ្ឋលេខាធិការក្រសួងមហាផ្ទៃ។

សូមជម្រាបជូនពីសាវតារេឿងដែលពាក់ព័ន្ធនឹងទឹកប្រាក់សំណង៤ពាន់ដុល្លារ ដែលកើតចេញពីសប្បុរសជនអ្នកប្រើប្រាស់បណ្តាញផ្សព្វផ្សាយសង្គមថ្មី ដើម្បីជួយសង្រ្គោះទុក្ខលំបាករបស់អ្នករត់តាក់ស៊ីម្នាក់ដែលត្រូវបានក្រុមលោកជំទាវអ្នកមានអំណាចជិះជាន់ កេងប្រវ័ញ្ច ច្របាច់ក ជំរិតយកលុយ យ៉ាងព្រៃផ្សៃបំផុត!

-សំណងថវិកាចំនួន ៤០០០ពាន់ដុល្លារ ត្រូវបានយកទៅប្រគល់ជូនលោកជំទាវ សម មុន្នីកា រដ្ឋលេខាធិការ ក្រសួងទេសចរណ៍ និងមិត្តភក្តិរបស់ខ្លួន ៣នាក់ផ្សេងទៀត ពីបុរសរត់តាក់ស៊ី នៅខេត្តរតនៈគិរី ដោយគ្មានការយោគយល់បន្តិចណាឡើយ ទោះបីបុរសជាអ្នករត់តាក់ស៊ី ធ្លាប់បានសរសេរលិខិតសុំទោស និងសុំក្តីមេត្តាសណ្តោសពីលោកជំទាវទាំង ៤នាក់យ៉ាងណាក្តី។

ទឹកប្រាក់ទាំងអស់មិនមែន ជាទឹកប្រាក់របស់បុរសរត់តាក់ស៊ីនោះទេ ពោលលុយទាំងនេះបានមកពីការរ៉ៃអង្គាស របស់សប្បុរសជន ដែលជាមន្រ្តីធំៗក្នុងជួររដ្ឋាភិបាល មានទឹកចិត្ត ពោរពេញក្តីសប្បុរស ក្នុងនោះមាន រដ្ឋមន្រ្តីក្រសួងព័ត៌មាន ខៀវ កាញ៉ារីទ្ធ ៥០០ដុល្លារ, លោកស្រី ហ៊ុន ស៊ីណាត ប្អូនស្រីសម្តេចតេជោ ហ៊ុន សែន និង លោក នឹម ច័ន្ទតារា ឧបត្ថម្ភ ៣០០ដុល្លារ, លោកស្រី LaLa Dalin ១លានរៀល, លោកស្រី នឹម វណ្ណ: ១០០ដុល្លារ, កញ្ញា Sou Chhi ២០០ដុល្លារ, លោក ជុំ កុសល ១០០ដុល្លារ, លោក គឹម សន្តិភាព ១០០ដុល្លារ, លោក ផែង វណ្ណៈ ២០ម៉ឺនរៀល...រួមនិងសប្បុរសជនជាច្រើននាក់ផ្សេងទៀត ក្នុងនោះ ក៏មានការជួយឧបត្ថម្ភពីក្រុមចលនាយុវជន១៥៧ផងដែរ។

លោក ផែង វណ្ណៈ អ្នកផ្តើមគំនិតរៃអង្គាសប្រាក់ពីសប្បុរសជន ជាមួយលោក ព្រំ សាន មន្រ្តីក្រសួងព័ត៌មាន បានថ្លែងប្រាប់ឲ្យដឹងថា នៅព្រឹកថ្ងៃទី១២ ខែវិច្ឆិកា ឆ្នាំ២០១៤ថា ទឹកប្រាក់ទាំង ៤ពាន់ដុល្លារ ត្រូវបានរូបលោក និងភរិយារបស់បុរសរត់រថយន្តឈ្នួល ព្រមទាំងលោក ព្រំ សាន យកទៅប្រគល់ជូនលោកជំទាវ សម មុន្នីកា រួចរាល់ហើយ ។ រីឯរថយន្តត្រូវបានសមត្ថកិច្ច ប្រគល់ជូនម្ចាស់វិញហើយ ក្រោយបានផ្តល់សំណងរួចរាល់។

លោក ខឹម មករា អ្នករត់តាក់ស៊ីបានបញ្ជាក់ថា កាលពីថ្ងៃទី១៩ ខែតុលា វេលាម៉ោងជិត ៨ព្រឹក រថយន្តតាក់ស៊ីប្រភេទទេសចរ ម៉ាកសាំយ៉ុង ពណ៌សំបកឪឡឹក ពាក់ស្លាកលេខភ្នំពេញ 2AA-8934 បើកបរដោយបុរស ឈ្មោះ ខឹម មករា ចេញដំណើរពីចំណតរថយន្តមុខស្ថានីយរថភ្លើង ភ្នំពេញឆ្ពោះទៅខេត្តរតនគីរី ដោយដឹកអ្នកដំណើរ ១៥នាក់។ លុះដល់វេលាម៉ោងប្រហែល ៤៖៣០នាទី រសៀលថ្ងៃទី១៩ ខែតុលា ខណ:ពេលកំពុងបើកបររថយន្តបានខូចដាច់រ៉ូទីល ធ្លាក់ចេញពីផ្លូវចម្ងាយប្រហែល ៤,៥ម៉ែត្រ នៅចំណុចភូមិ៣ ឃុំត្រពាំងក្រហម ស្រុកកូនមុំ ខេត្តរតនគីរី ។ ក្នុងការខូចរថយន្តធ្លាក់ផ្លូវនេះ មិនបង្កឲ្យអ្នកដំណើរមានរងរបួសគ្រោះថ្នាក់អ្វីទេ ប៉ុន្តែបានបង្កការភ័យខ្លាចដល់អ្នកដំណើរ។

ក្រោយកើតហេតុខូចរថយន្ត អ្នកដំណើរចំនួន ១០នាក់ បាននាំគ្នាជិះរថយន្តផ្សេងបន្តដំណើរទៅមុខទៀត លើកលែងតែលោកជំទាវ សម មុន្នីកា និងមិត្តិភក្តិ ៣នាក់ផ្សេងទៀត កើតទុក្ខមិនសុខចិត្ត និងប្ដឹងឲ្យនគរបាលឃាត់រថយន្តតាក់ស៊ីនោះ ដោយទាមទារសំណងសម្រាប់ការភ័យខ្លាចរបស់ពួកគាត់ម្នាក់ៗ ១.០០០ដុល្លារ ៤នាក់ស្មើនឹង ៤.០០០ដុល្លារ។ ដោយម្ចាស់រថយន្តគ្មានលុយឲ្យ រថយន្តត្រូវបាននគរបាលឃាត់ទុក រហូតមកដល់ថ្ងៃទី១០ ខែវិច្ឆិកា នៅតែមិនដោះស្រាយ។

ក្រោយពីមានការប្ដឹងពីអ្នកដំណើរ ម្ចាស់រថយន្តតាក់ស៊ី លោក ខឹម មករា បានសរសេរលិខិតសុំទោសចំនួន ២លើករួចហើយ ផ្ញើជូនទៅលោកជំទាវដើមបណ្ដឹង។ នៅក្នុងលិខិតសុំទោស ម្ចាស់រថយន្តបានសារភាពថា គាត់ពិតជាមានការខ្វះខាតត្រួតពិនិត្យ លក្ខណៈបច្ចេកទេសរថយន្តមែន។ ប៉ុន្តែលោកជំទាវដើមបណ្ដឹងមិនព្រមអនុគ្រោះនោះឡើយ ដោយនៅតែទទូចចង់ទាមទារសំណង ៤.០០០ដុល្លារដដែល។

ទន្ទឹមនឹងការដោះស្រាយមិនទាន់ចប់ ម្ចាស់រថយន្តបានស្នើសុំរថយន្តទៅជួសជុសប្រើប្រាស់ ដើម្បីប្រកបរបរចិញ្ចឹមជីវិត តែគ្មានសមត្ថកិច្ចណាហ៊ានអនុញ្ញាតទេ ដោយសមត្ថកិច្ចលួចបង្ហើបប្រាប់ថា មានអ្នកមានអំណាចបញ្ជាមក មិនឲ្យដោះលែងរថយន្តនោះទេ ។

ដោយក្តីអាណិតអាសូរ និងមើលឃើញថា បុរសរត់រថយន្តទួរីសមានជីវភាពខ្វះខាត មិនមានលទ្ធភាពសង លោក ផែង វណ្ណៈ រួមអ្នកលេងបណ្តាញសង្គម Facebook បានអំពាវនាវស្វែង រកការជួយ ឧត្ថម្ភពីអ្នកមានទឹកចិត្តសប្បុរស រ៉ៃអង្គាសលុយគ្នាតាមទឹកចិត្តសទ្ធា រកលុយបានរហូតគ្រប់ ៤០០០ដុល្លារ ប្រគល់ជូនលោកជំទាវទាំង ៤នាក់ ដើម្បីបញ្ចប់សំណុំរឿងយករថយន្ត ប្រគល់ជូនទៅម្ចាស់ប្រកបរបរ ចិញ្ចឹមជីវិតបន្ត។

សំណុំរឿងប្តឹងផ្តល់ទារសំណង ព្រោះតែការភិតភ័យកើតចេញពីការ ជិះរថយន្តឈ្នួលនេះ បានធ្វើឲ្យក្រុមលោកជំទាវ នៅក្នុងក្រសួងទេសចរណ៍ ដែលគេដឹងថា មានស្វាមីជាមន្រ្តីជាន់ខ្ពស់ នៅក្រសួងមហាផ្ទៃនោះ រងនូវការរិះគន់យ៉ាងចាស់ដៃពីក្រុមអ្នកនិយមលេង Facebook និងមជ្ឈដ្ឋានទូទៅ។ ពួកគេបានហៅការលើកដៃយកលុយ ៤ពាន់ដុល្លារកើតចេញពីការរ៉ៃអង្គាសគ្នា ដែលមានទាំងមន្រ្តីតូចតាចក្នុងក្រសួងទេសចរណ៍ផងនោះថា គឺជាការស្រឡាញ់ទឹកប្រាក់លើសលប់គ្មានទឹកចិត្ត សណ្តោសប្រណីជាសណ្តានថ្លៃថ្នូរជាមនុស្សនោះឡើយ។

ក្រុមអ្នកលេងបណ្តាញសង្គម Facebook បានលើកឡើងបន្តថា ប្រសិនបើបុរសអ្នករត់រថយន្តឈ្នួល ពិតជាបានបើកបរដោយមិនមានការប្រុងប្រយ័ត្ន ជាហេតុបង្កការតក់ស្លុត ដល់លោកជំទាវនោះ យ៉ាងហោចណាស់ពិន័យត្រឹមការសុំទោស ឬការអប់រំដល់ពួកគាត់ ព្រោះអ្នករត់រថយន្តឈ្នួលទឹកប្រាក់ ៤.០០០ដុល្លារ ជាចំនួន មួយដ៏លើសលប់ ជិតស្មើនឹងតម្លៃរថយន្តទៅហើយ ពួកគាត់ប្រាកដជាគ្មានលទ្ធភាពរកសងនោះឡើយ។ តែសោកស្តាយលោក ជំទាវទាំង ៤រូប គ្មានការយោគយល់ នៅតែចិញ្ចឹមចិត្តទារសំណង ៤ពាន់ដុល្លាររហូតបានសម្រេច។

ការទទួលយកលុយដ៏ច្រើន ដែលប្រៀបបាននឹងការអារកខ្យងយកឈាមនេះ គឺត្រូវបានមជ្ឈដ្ឋានអ្នកលេងហ្វេសប៊ុក រិះគន់យ៉ាងខ្លាំងពីការខ្វះចិត្តមនុស្សធម៍របស់លោកជំទាវមុខលុយ ហើយកាន់ដំណែងធំក្នុងជួររាជរដ្ឋាភិបាលទៀតនោះ គួរតែត្រូវបានប្រមុខរាជរដ្ឋាភិបាលពិចារណា ថា តើត្រូវទុកមន្ត្រីជាន់ខ្ពស់របៀបហ្នឹងឲ្យស្អុយដល់អ្នកដៃទៃ ឬក៏ត្រូវតែផ្លាស់ប្តូរ ដកហូតដំណែង។

បន្ទាប់ពីមុខក្រាស់ទទួលយកលុយ៤ពាន់ដុល្លារហើយនោះ ជំទាវមុខលុយ សម មុន្នីកា ក្នុងកិច្ចសម្ភាសន៍ជាមួយ BTV បានប៉ុនប៉ងយកលុយនោះទៅផ្តល់ជូនកាកបាទក្រហមកម្ពុជា ។ ប៉ុន្តែ លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា បានចេញសេចក្តីជូនព័ត៍មាន ដោយបដិសេធមិនទទួលយកប្រាក់៤ពាន់ដុល្លារនោះជាដាច់ខាត។
សូមអានសេចក្តីជូនព័ត៍មានរបស់កាកបាទក្រហមកម្ពុជា!

ក្រុមប្រឹក្សាភិបាលសហជីពជាតិកម្ពុជា សំដែងការគាំទ្រជាឯកច្ឆ័ន ចំពោះការតំឡើងប្រាក់ឈ្នួលអប្បបរមាកម្មករឆ្នាំ២០១៥

ភ្នំពេញៈ នៅថ្ងៃ ព្រហស្បត្តិ ទី១៣ ខែវិច្ឆិកា ឆ្នាំ២០១៤នេះ ក្រុមប្រឹក្សាភិបាលសហជីពជាតិកម្ពុជា ដែលមានសមាជិក៦៣សហព័ន្ធសហជីព និងមានសមាជិកសរុបទាំងអស់ចំនួនជាង៥០ម៉ឺននាក់ បានធ្វើសន្និសីទសារព៌តមាន ដើម្បីប្រកាសពីការគាំទ្រចំពោះលទ្ធផលនៃកិច្ចប្រជុំប្រាក់ឈ្នួលរបស់ កម្មករនិយោជិកឆ្នាំ២០១៥នេះ ដែលតួរលេខចុងក្រោយគឺ១២៨ដុល្លារ។

លោក សោម អូន ប្រធានក្រុមប្រឹក្សាសហជីពជាតិកម្ពុជាបានមានប្រសាសន៍ថា កាលពីថ្ងៃទី១២ ខែវិច្ឆិកា ឆ្នាំ២០១៤ ម្សិលមិញនេះយោងតាមលទ្ធផលនៃកិច្ចប្រជុំគណៈកម្មការប្រឹក្សាការងារ នៅក្រសួងការងារមានតួរលេខនៃការបោះឆ្នោត សំរេចចុងក្រោយឃើញថាមានសម្លេងភាគច្រើន បានបោះគាំទ្រយកការតំឡើង១២៣ដុល្លារ ដែលជាប្រាក់ឈ្នួលទាបបំផុតអប្បបរមារបស់កម្មករ សំរាប់ឆ្នាំ២០១៥។ ក្រោយពីការសំរេចនេះ សមាជិកពេញសិទ្ធ៥រូបក្នុងចំណោម៧រូប ពីខាង សហជីពរបស់ លោក សោម អូន បានចេញសេចក្តីថ្លែងការណ៍មួយមិនពេញចិត្ត និងចំនួន១២៣ ដុល្លារនោះទេ។ នៅក្នុងសេចក្តីថ្លែងការណ៍ទី១ របស់ក្រុមប្រឹក្សាសហជីពជាតិកម្ពុជា គឺយើងបាន បង្ហាញការមិនពេញចិត្ត និងសូមឲ្យរាជរដ្ឋាភិបាលពិនិត្យលទ្ធភាពបន្ថែមទៀត ទៅលើប្រាក់ឈ្នួល ចំនួន១២៣ដុល្លានេះ និងសុំអន្តរាគមន៍ទៅលើការ តំឡើងថ្លៃផ្ទះជួលក៏ដូចជាមធ្យបាយ ធ្វើដំណើររបស់កម្មករ ដែលចេះតែឡើងទៅតាមការតំឡើងប្រាក់ឈ្នួលកម្មករ។ លោក សោម អូន បានបន្តថានៅល្ងាចម្សិលមិញនេះ ដោយមានសេចក្តីថ្លែងការណ៍របស់ខាងសហជីពជាតិ កម្ពុជា និងដោយមានរបាយការណ៍របស់ក្រសួងការងារ ប្រមុខរាជរដ្ឋាភិបាលគឺសម្តេចតេជោ ហ៊ុន សែន បានធ្វើការសំរេចបន្ថែម៥ដុល្លារទៀតទៅលើលទ្ធផលនៃកិច្ចប្រជុំគណៈកម្មការ ការងារ។

គួរបញ្ជាក់ថាមកដល់ពេលនេះ ប្រាក់ឈ្នួលអប្បបរមារបស់កម្មករផ្លូវការ គឺកម្មករសាកល្បង១ខែ ចំនួន១២៣ដុល្លារ ហើយចំពោះកម្មករពេញសិទ្ធិគឺ១ខែចំនួន១២៨ដុល្លារ។ តួរលេខចុងក្រោយ របស់ក្រសួងនេះគឺក្រុមប្រឹក្សាសហជីពជាតិកម្ពុជា បានសំរេចចិត្តស្វាគមន៍ជាពិសេស គឺគាំទ្រ និងថ្លែងអំណរគុណ ទៅដល់សម្តេចនាយករដ្ឋមន្ត្រី ដែលបានគិតគូរប្រើឆន្ទានុសិទ្ធិក្នុងនាម នាយករដ្ឋមន្ត្រីគឺបន្ថែម៥ដុល្លារទៀតទៅលើលទ្ធផលរបស់យើង។ ដោយឡែកចំពោះការសំដែង ការមិនសប្បាយចិត្តពីខាងសមាគមន៍រោងចក្រកាត់ដេរកម្ពុជា ជុំវិញតួលេខបឋម១២៣ដុល្លារ លោក សោម អូន បានលើកឡើងថារោងចក្រតូចៗដែលដេរស៊ីឈ្នួលរោងចក្រធំៗគឺអាច មានផលប៉ះពាល់ខ្លះៗ ហើយសំរាប់រោងចក្រធំៗ នឹងរោងចក្រមធ្យម លោកគិតថាមានការ ប៉ះពាល់តិចតួច នេះបើតាមអ្វីដែលខាងលោក បានធ្វើការវាយតំលៃបន្ទាប់ពីតំឡើងប្រាក់ឈ្នួល។ នៅក្នុង ដំណោះស្រាយរឿងនេះ លោក សោម អូន បានបង្ហាញជំនឿថារាជរដ្ឋាភិបាលកម្ពុជា និងអាច បើកកិច្ចប្រជុំក្រុមការងារទី៨ រឺយើងហៅថាក្រុមការងារទំនាក់ទំនងវិជ្ជាជីវៈរបស់រាជរដ្ឋាភិបាល ដើម្បីស្តាប់នូវសំណូមពររបស់ភាគីនិយោជក ដើម្បីយើងអាចបញ្ចៀសឲ្យបាននូវផល ប៉ះពាល់ធំ ទៅលើវិស័យនេះ។ ចំពោះការតវ៉ារឺការមិនពេញចិត្តនូវលទ្ធផលប្រាក់ឈ្នួលដែលយើងតែងតែ ឃើញកើតមានកន្លងមកពីខាងសហជីពមួយចំនួនតូចនោះ លោក សោម អូន បានចាប់ អារម្មណ៍ថា ការចរចារពីប្រាក់ឈ្នួលក្នុងប្រទេសប្រជាធិបតេយ្យ គឺតែងតែមិនអាចស្វែងរក ការឯកភាពជាឯកច្ឆ័នបានឡើយ។ ប៉ុន្តែយ៉ាងណាគេត្រូវតែទទួលយក និងគាំទ្រនូវមតិភាគច្រើន ហើយម៉្យាងទៀតវាជាវប្បធម៌ទៅហើយ សំរាប់ប្រទេសកម្ពុជាពាក់ព័ន្ធនិងបញ្ហាប្រាក់ខែនេះ យើងមិនដែលប្រជុំស្វែងរកការឯកភាពជាឯកច្ឆ័ន ពីគ្រប់សហជីពដែលមកពីគ្រប់និន្នាការនយោ បាយនោះទេ។ លោក សោម អូន បានបន្តថាដូចជានៅពេលនេះក្រសួងការងារ រឺក៏គណៈ កម្មការត្រីភាគី បានព្យាយាមប្រជុំដើម្បីស្វែងរកធ្វើយ៉ាងណា ឲ្យមានការឯកភាពគ្នាជាឯកច្ឆ័ន ទាំងអស់គ្នាដែលបានចំណាយរយះពេលប្រជុំដល់ទៅ៦ខែ និងរួមទាំងមានសិក្ខាសាលាដើម្បីជួយ ប្រឹក្សាយោបល់បច្ចេកទេសរូបមន្តពីអង្គការ ILO ផងហើយពីដៃគូរពាក់ព័ន្ធផង ហើយចុងក្រោយ គ្រាន់តែអាចសំរួលថាការសំរេចចុងក្រោយតួលេខគឺនៅជិតគ្នា។ លោក សោម អូន បន្ថែមថា សហជីពមួយចំនួនដែលមិនយល់ស្រប គឺជាសិទ្ធិរបស់គាត់ តែសូមឲ្យការធ្វើសកម្មភាពផ្សេងៗ ធ្វើយ៉ាងណាកុំឲ្យគាត់ប៉ះពាល់ដល់កម្មករ ដែលស្វាគមន៍ហើយពេញចិត្តទៅលើតួលេខនេះ។

គួរកត់សំគាល់ថា បើយើងប្រៀបធៀបទៅនិងការដំឡើងប្រាក់ឈ្នួលនាពេលកន្លងមក គឺលើក នេះមានចំនួនច្រើនជាងលើកមុនៗ ហើយតួលេខនេះជាតួលេខមួយដែលសមស្របទៅតាម ស្ថានភាពសង្គម និងស្ថានភាពសេដ្ឋកិច្ចបច្ចុប្បន្នរបស់ប្រទេសកម្ពុជាយើង ហើយជាទូទៅយើង សង្កេតឃើញថា ការតំឡើងប្រាក់ឈ្នួល១២៨ដុល្លារនេះ គឺនៅតែធានាបាននូវការប្រកួតប្រជែង និងស្ថេរភាពនៅក្នុងវិស័យឧស្សាហកម្មកាត់ដេរ។ លោក សោម អូន បានគូសបញ្ជាក់ថាទោះបី ជាការសំរេចអំពីប្រាក់ឈ្នួលចុងក្រោយនេះ នៅមិនទាន់មានភាពល្អប្រសើរខ្លាំងសំរាប់ជីវភាព កម្មករក្តី ប៉ុន្តែវាអាចកាត់បន្ថយការលំបាករបស់កម្មករបានខ្លះ ព្រោះកាលណាប្រាក់ខែគោលឡើង ពេលដែលគាត់ធ្វើការថែមម៉ោងនោះ និងធ្វើឲ្យប្រាក់ខែសរុបរបស់ពួកគាត់កើនឡើងខ្ពស់ដែរ។

ដោយៈ ច័ន្ទ ទេវី

Thursday, November 13, 2014

កិច្ចប្រជុំកំពូលអាស៊ាន-អង្គការសហប្រជាជាតិលើកទី៦

កិច្ចប្រជុំកំពូលអាស៊ាន-អង្គការសហប្រជាជាតិលើកទី៦ បានប្រព្រឹត្តទៅ ក្រោមវត្តមាន ឯកឧត្តមបានគីមូនអគ្គលេខាធិការអង្គការសហប្រជាជាតិ។ នៅក្នុងកិច្ចប្រជុំកំពូល អាស៊ាន-អង្គការសហប្រជាជាតិលើកទី៦នេះ បណ្តាមេដឹកនាំនៃប្រទេសអាស៊ាន-អង្គ ការសហប្រជាជាតិបានធ្វើការពិភាក្សាទី១ទៅលើការពិនិត្យឡើងវិញ និងទិសដៅ អនាគត នៃទំនាក់ទំនងអាស៊ាន-អង្គការសហប្រជាជាតិ ទី២ ការផ្លាស់ប្តូរទស្សនៈស្តីពី បញ្ហាតំបន់ និងអន្តរជាតិនិងទី៣បញ្ហាផ្សេងៗ។ នៅក្នុងកិច្ចប្រជុំកំពូលដ៏មានសារៈ សំខាន់នោះមេដឹកនាំអាស៊ានបានលើកទឹកចិត្តដល់អង្គការសហប្រជាជាតិ ឲ្យធ្វើការ កាន់តែជិតស្និតជាមួយអាស៊ានដើម្បីសម្រេចនូវគោលដៅអភិវឌ្ឍន៍សហស្សវត្សរ៍

(DGs) និង គាំទ្រដល់ការកសាងសហគមន៍អាស៊ាន។

ជាមួយគ្នានេះ មេដឹកនាំអាស៊ានបានវាយតំលៃខ្ពស់ចំពោះការគាំទ្ររបស់អង្គការសហប្រជាជាតិមកលើកិច្ចខិតខំរបស់អាស៊ាន ដើម្បីឈានឆ្ពោះទៅបង្កើតសហ គមន៍របស់ខ្លួននៅឆ្នាំ២០១៥ខាងមុខ និងការដាក់ចេញនូវចក្ខុវិស័យរបស់សហគមន៍ អាស៊ានក្រោយឆ្នាំ២០១៥។ មេដឹកនាំអាស៊ាន និងអង្គការសហប្រជាជាតិបានប្តេជ្ញាសហការគ្នាបន្ថែមទៀតក្នុងការគាំទ្រដល់ការងាររបស់វិទ្យាស្ថានអាស៊ាន សម្រាប់ សន្តិភាព និងការផ្សៈផ្សារ(AIPR) និងកិច្ចការរបស់មជ្ឈមណ្ឌលបោសសំអាតមីន តំបន់អាស៊ាន(ARMAC)។

ជាមួយគ្នានេះ មេដឹកនាំទាំងអស់បានទទួលស្គាល់នូវសារៈសំខាន់ នៃកិច្ចសហប្រតិបត្តិការលំហរសមុទ្រ ដូចជាការផ្លាស់ប្តូរព័ត៌មាន និងការផ្លាស់ប្តូរបទពិសោធន៍គ្នាក្នុងកិច្ចសន្តិសុខលំហរសមុទ្រ និងការអនុវត្តច្បាប់អន្តរជាតិដែលជាប់ពាក់ព័ន្ធនានា។

ទន្ទឹមនឹងនេះ មេដឹកនាំទាំងអស់បានលើកទឹកឲ្យមានការពិគ្រោះយោបល់ជាបន្ត ទៀតរវាងរដ្ឋភាគីនៃសន្ធិសញ្ញាតំបន់អាស៊ានគ្មានអាវុធនុយក្លេអ៊ែរ (SEANWFZ) និងបណ្តារដ្ឋមានអាវុតនុយក្លេអ៊ែរដើម្បីបង្កលក្ខណៈងាយស្រួល ដល់ការចុះហត្ថ លេខាឲ្យបានឆាប់ និងការផ្តល់សច្ចាប័នទៅលើពិធីសារ នៃសន្ធិសញ្ញាតំបន់ អាស៊ានគ្មានអាវុធនុយក្លេអ៊ែរ ដោយពុំចាំបាច់មានខបម្រុងដែលទាមទារដោយបណ្តារដ្ឋមានអាវុធនុយក្លេអ៊ែរ។

ជាមួយគ្នានេះ មេដឹកនាំទាំងអស់ក៏បានស្វាគមន៍ដល់កិច្ចខិតខំប្រឹងប្រែងក្នុងការតាក់តែងសេចក្តីព្រាងលិខិតូបករណ៍របស់អាស៊ាន ស្តីពីការការពារនិងការលើកកម្ពស់ សិទ្ធិរបស់ពលករទេសន្តរប្រវេសន៍។ នៅក្នុងកិច្ចប្រជុំកំពូលនោះដែរ ឯកឧត្តមអគ្គលេខាធិការអង្គការសហប្រជាជាតិ ក៏បានស្វាគមន៍ចំពោះកិច្ចខិតខំប្រឹងប្រែង របស់អាស៊ានក្នុងការបញ្ចប់ការតាក់តែង និងឯកភាពគ្នាទៅលើសេចក្តីព្រាងអនុ សញ្ញាអាស៊ានស្តីពីការជួញដូរមនុស្ស និងផែនការសកម្មភាពក្នុងតំបន់នៃអនុសញ្ញា នោះដើម្បីដាក់ជូនកិច្ចប្រជុំកំពូលអាស៊ានលើកទី២៦នៅឆ្នាំ២០១៥។ ជាមួយគ្នានេះ មេដឹកនាំទាំងអស់បានឯកភាពគ្នាក្នុងការពង្រឹងកិច្ចសហប្រតិបត្តិការ ដើម្បីធ្វើការ គាំទ្រក្នុងការធ្វើឲ្យបានសំរេចតំបន់អាស៊ានគ្មានគ្រឿងញៀននៅឆ្នាំ២០១៥។នៅក្នុង កិច្ចប្រជុំកំពូលនោះដែរមេដឹកនាំអាស៊ានបានជម្រុញអង្គការសហប្រជាជាតិជួយគាំទ្រដល់កិច្ចខិតខំរបស់អាស៊ានក្នុងការអនុវត្តផែនការសកម្មភាព ស្តីពីសិទ្ធលើកម្ម សិទ្ធបញ្ញា(២០១១-២០១៥) ដោយរួមបញ្ចូលទាំងកិច្ចសហប្រតិបត្តិការ ស្តីពីការត្រួត ពិនិត្យនិងការស្រាវជ្រាវប្រកាសនីប័ត្រតក្កកម្មរបស់អាស៊ាន(ASPEC) និងការធ្វើ ទំនើបរូបនីយកម្មហេដ្ឋារចនាសម្ព័ន្ធនៃអង្គភាពកម្មសិទ្ធបញ្ញាអាស៊ាន។ ជាមួយគ្នានេះ មេដឹកនាំក៏បានជម្រុញកិច្ចការរបស់ស្ថាប័នអាស៊ាន និងអង្គការសហប្រជាជាតិ ក្នុងការ តាក់តែងរបៀបវារៈនៃការអភិវឌ្ឍរបស់អង្គការ សហប្រជាជាតិក្រោយឆ្នាំ២០១៥ និងចក្ខុវិស័យរបស់សហគមន៍អាស៊ានក្រោយឆ្នាំ២០១៥ ដើម្បីដោះស្រាយឲ្យមាន ប្រសិទ្ធភាពនូវបញ្ហាទាំងឡាយរបស់ពិភពលោកដែលជាក្តីកង្វល់រួម។ ទន្ទឹមនឹងនេះ មេដឹកនាំទាំងអស់បានបញ្ជាក់អះអាងជាថ្មីពីភាពចាំបាច់បន្ទាន់ ដើម្បីពន្លឿនកិច្ច សហប្រតិបត្តិការរវាងអង្គការសហប្រជាជាតិនិងអាស៊ានក្នុងការដោះស្រាយបញ្ហា ស្តីពីការប្រែប្រួលអាកាសធាតុ។ ជាមួយគ្នានេះមេដឹកនាំទាំងអស់បានលើកទឹកចិត្តដល់ការជម្រុញកិច្ចសហប្រតិបត្តិការរវាងអាស៊ាន និង អង្គការសហប្រជាជាតិ អំពីការអភិរក្សជីវសាស្រ្តចំរុះតាមរយៈការអនុវត្តអនុសញ្ញាអង្គការសហប្រជាជាតិ ស្តីពីជីវសាស្រ្តចម្រុះ និងការសម្របសម្រួលជាមួយមជ្ឈមណ្ឌល អាស៊ានសម្រាប់ ជីវសាស្រ្តចម្រុះ ដោយការចែករំលែកចំណេះដឹងទៅលើការអនុវត្តជាក់ស្តែងល្អៗក្នុងការប្រើប្រាស់ប្រកបដោយចីរភាពនៃភាពសំបូរបែបនៃជីវសាស្រ្ត។

ទន្ទឹមនឹងនោះមេដឹកនាំទាំងអស់ក៏បានប្តេជ្ញារួមគ្នាក្នុងការពង្រឹងបន្ថែមទៀត នៃកិច្ចសហប្រតិបត្តិការរវាងអាស៊ាន និងអង្គការសហប្រជាជាតិដើម្បីធានាការគ្រប់គ្រងគ្រោះមហន្តរាយធម្មជាតិនិងការឆ្លើយតបប្រកបដោយប្រសិទ្ធភាព។

ក្នុងកិច្ចប្រជុំកំពូលនោះដែរមេដឹកនាំអាស៊ាន និងឯកឧត្តមអគ្គលេខាធិការអង្គការ សហប្រជាជាតិបានប្រគល់ភារកិច្ចជូនរដ្ឋមន្រ្តី និងឧត្តមមន្រ្តីដែលទទួលបន្ទុក ស្វះស្វែងរកប្រភពហិរញ្ញវត្ថុនានាបន្ថែមទៅលើប្រភពដែលមានស្រាប់ ដើម្បីធានា ការអនុវត្តសកម្មភាពរួមរបស់អាស៊ាន និងអង្គការសហប្រជាជាតិឲ្យមានប្រសិទ្ធ ភាពនិងទាន់ពេលវេលា។

នៅក្នុងកិច្ចប្រជុំកំពូលអាស៊ាន-អង្គការសហប្រជាជាតិលើកទី៦នេះ មេដឹកនាំ អាស៊ាន និងឯកឧត្តមអគ្គលេខាធិការអង្គការសហប្រជាជាតិ បានឯកភាពគ្នា ក្នុងការចេញនូវសេចក្តីប្រកាសរបស់ប្រធានកិច្ចប្រជុំកំពូលអាស៊ាន- អង្គការសហ ប្រជាជាតិលើកទី៦និងបានឈានទៅអនុម័តឯកសារ ស្តីពីផែនការការងារ
បណ្តោះ អាសន្នរបស់អាស៊ាន-អង្គការសហប្រជាជាតិសម្រាប់ឆ្នាំ២០១៥៕

កិច្ចប្រជុំកំពូលអាស៊ាន-ជប៉ុនលើកទី១៧

កិច្ចប្រជុំកំពូលអាស៊ាន-ជប៉ុនលើកទី១៧ បានប្រព្រឹត្តទៅក្រោមវត្ត មាន ឯកឧត្តម ស៊ីនហ្សូអាបេ (Shizo Abe) នាយករដ្ឋមន្រ្តីជប៉ុន។ នៅក្នុងកិច្ចប្រជុំកំពូល អាស៊ាន-ជប៉ុន លើកទី១៧នេះ បណ្តាមេដឹកនាំនៃប្រទេសអាស៊ាន-ជប៉ុន បានធ្វើ ការ ពិភាក្សា ទៅលើការពិនិត្យឡើងវិញ និងទិសដៅអនាគត នៃទំនាក់ទំនងអាស៊ាន-ជប៉ុន និង បញ្ហាផ្សេងៗ។

នៅក្នុងកិច្ចប្រជុំកំពូលដ៏មានសារៈសំខាន់នោះ មេដឹកនាំអាស៊ាន-ជប៉ុន បានសំដែង នូវការរីករាយចំពោះការវិវត្តន៍ក្នុងការអនុវត្តសេចក្តីថ្លែងការណ៍រួម សម្រាប់ជំរុញភាពជាដៃគូអាស៊ាន-ជប៉ុន ដើម្បីវិបុលភាពទាំងអស់គ្នានិងផែនការសកម្មភាព(២០១១-២០១៥) និងគ្រោងដាក់នូវផែនការសកម្មភាពថ្មីបន្ត។ ក្នុងកិច្ចប្រជុំកំពូលនោះដែរមេដឹកនាំអាស៊ានបានលើកទឹកចិត្តដល់ភាគីជប៉ុនឲ្យបន្តគាំទ្រការអនុវត្តផែនទីចង្អុលផ្លូវ សម្រាប់សហគមន៍អាស៊ាន (២០០៩-២០១៥) និងសេចក្តីថ្លែងការណ៍ទីក្រុងបាលី ស្តីពីសហគមន៍អាស៊ាននៅក្នុងសហគមន៍ប្រជាជាតិ (Bali Concord III) ។ ជាមួយគ្នានេះមេដឹកនាំអាស៊ាន-ជប៉ុន បានកត់សំគាល់នូវរបាយការណ៍ ស្តីពី ការវិវត្តន៍នៃការអនុវត្តសេចក្តីប្រកាសចក្ខុវិស័យនិងផែនការសកម្មភាពអាស៊ាន-ជប៉ុន (២០១១-២០១៥)។

កិច្ចប្រជុំកំពូលនោះដែរ មេដឹកនាំទាំងអស់បានឯកភាពគ្នាក្នុងការពង្រីកកិច្ចសហប្រតិបត្តិការ ដើម្បីបង្កើតនូវបរិស្ថានសន្តិសុខអន្តរជាតិឲ្យកាន់តែប្រកបដោយសន្តិភាព និងស្ថេរភាព។ ជាមួយគ្នានេះ មេដឹកនាំអាស៊ានក៏បានកត់សំគាល់នូវគំនិតផ្តួចផ្តើមរបស់ជប៉ុនស្តីពីការចូលរួមចំណែកយ៉ាងសកម្ម ដើម្បីសន្តិភាពដែលគាំទ្រដោយសាធារណៈនូវសេរីភាពទេសចរណ៍ ការហោះកាត់ និងការធ្វើពាណិជ្ជកម្មដោយគ្មានការរាំងស្ទះ។

ទន្ទឹមនឹងនេះ មេដឹកនាំទាំងអស់បានបញ្ជាក់សារជាថ្មីអំពីសារៈសំខាន់នៃការដោះស្រាយជម្លោះ និងបញ្ហានានាដោយសន្តិវិធី និងដោយអនុលោមទៅតាមគោលការណ៍នៃច្បាប់អន្តរជាតិដែលត្រូវបានទទួលស្គាល់ជាសកល រួមទាំងអនុសញ្ញាអង្គការសហប្រជាជាតិស្តីពីច្បាប់សមុទ្រ។

នៅក្នុងកិច្ចប្រជុំកំពូលនោះដែរ មេដឹកនាំទាំងអស់បានយល់ថា ជម្លោះនៅសមុទ្រចិនខាងត្បូងត្រូវដោះស្រាយតាមការប្រកាន់ខ្ជាប់នូវភាពអត់ធ្មត់ និងជៀសវាងការធ្វើសកម្មភាពនានាដែលធ្វើឲ្យសភាពការណ៍កាន់តែមានភាពស្មុគ្រស្មាញ។ ជាមួយគ្នានេះមេដឹកនាំអាស៊ាន បានកត់សំគាល់នូវទស្សនៈរបស់ជប៉ុនដែរថា បណ្តារដ្ឋដែលជាប់ឆ្នេរសមុទ្រត្រូវគោរពដល់គោលការណ៍ទូទៅ នៃច្បាប់អន្តរជាតិពោលគឺត្រូវប្រកាន់ខ្ជាប់នូវភាពអត់ធ្មត់ ដើម្បីទប់ស្កាត់នូវសកម្មភាពជាឯកតោភាគីនានាដែលបង្កឲ្យមាននូវការផ្លាស់ប្តូររូបវ័ន្តជាអចិន្រៃ្តយ៍ដល់បរិស្ថានសមុទ្រ។

ជាមួយគ្នានេះ មេដឹកនាំទាំងអស់បានបញ្ជាក់ជាថ្មីនូវការអនុវត្តឲ្យបានពេញលេញ និងប្រកបដោយសមត្ថភាពនូវសេចក្តីថ្លែងការណ៍ ស្តីពី ការប្រតិបត្តិរបស់បណ្តាភាគីនៅក្នុងសមុទ្រចិនខាងត្បូង(DOC) និងកិច្ចពិគ្រោះយោបល់ដ៏មានសារៈសំខាន់អំពីក្រមប្រតិបត្តិនៅក្នុងសមុទ្រចិនខាងត្បូង(COC)។

ជាមួយគ្នានេះមេដឹកនាំទាំងអស់បានស្វាគមន៍ចំពោះការអនុម័តនូវសេចក្តីថ្លែងការណ៍រួមអាស៊ាន-ជប៉ុន ស្តីពី កិច្ចសហប្រតិបត្តិការក្នុងការប្រឆាំងភេរវកម្មនិងឧក្រិដ្ឋកម្មឆ្លងដែន។

មេដឹកនាំអាស៊ាន-ជប៉ុន ក៏បានបញ្ជាក់ជាថ្មីម្តងទៀតនូវការប្តេជ្ញាចិត្តបង្កើនពាណិជ្ជកម្មនិងលំហូវិនិយោគទ្វេដងនៅឆ្នាំ២០២២ ក្នុងនោះមេដឹកនាំអាស៊ានបានលើកទឹកចិត្តដល់ភាគីជប៉ុនឲ្យជំរុញកិច្ចសហប្រតិបត្តិការក្នុងផែនការសកម្មភាពយុទ្ធសាស្រ្ត សម្រាប់ការអភិវឌ្ឍសហគ្រាសធុនតូច និងមធ្យម(SMEs) ក្រោយឆ្នាំ២០១៥។

ទន្ទឹមនឹងនេះមេដឹកនាំអាស៊ានក៏បានលើកទឹកចិត្តដល់ភាគីជប៉ុន ឲ្យបន្តគាំទ្រដល់ការកាត់បន្ថយគម្លាតនៃការអភិវឌ្ឍនៅក្នុងតំបន់ តាមរយៈផែនការការងារទី២ នៃគំនិតផ្តួចផ្តើមសមាហរណកម្មអាស៊ាន របៀងសេដ្ឋកិច្ច តំបន់សេដ្ឋកិច្ច ពិសេសវិស័យនានានៃកិច្ចសហប្រតិបត្តិការថ្នាក់អនុតំបន់។

មេដឹកនាំអាស៊ាន-ជប៉ុនបានជំរុញនូវភាពជាដៃគូរវាងវិស័យសាធារណៈ និងឯកជននិងឈានទៅបញ្ចប់នូវកិច្ចព្រមព្រៀង ស្តីពី សេវាកម្មអាកាសចរណ៍ក្នុងតំបន់រវាងអាស៊ាន-ជប៉ុន ជាមួយគ្នានេះមេដឹកនាំអាស៊ានបានថ្លែងអំណរគុណចំពោះជប៉ុនដែលបន្តគាំទ្រលើផែនការមេស្តីពីការតភ្ជាប់អាស៊ាននិងការតភ្ជាប់តំបន់អាស៊ីបូព៌ា ជាពិសេសការតភ្ជាប់តាមផ្លូវសមុទ្រឲ្យបានប្រសើរជាងមុន។ ថ្នាក់ដឹកនាំអាស៊ានក៏បានលើកទឹកចិត្តដល់ភាគីជប៉ុនឲ្យគាំទ្រដល់ដំណើរការ នៃមជ្ឈមណ្ឌលតំបន់អាស៊ានសម្រាប់សកម្មភាពមីន(ARMAC)។ ជាមួយគ្នានេះមេដឹកនាំអាស៊ានបានសំដែងនូវការពេញចិត្តចំពោះកិច្ចសហប្រតិបត្តិការរបស់ជប៉ុនក្នុងការពង្រឹងទំនាក់ទំនងឲ្យកាន់តែជិតស្និទ្ធ និងបង្កើតចំណងមិត្តភាពក្នុងចំណោមយុវជនអាស៊ាន-ជប៉ុន។

ជាមួយគ្នានេះមេដឹកនាំទាំងអស់ ក៏បានអរគុណចំពោះកម្ពុជាដែលបានធ្វើជាម្ចាស់ផ្ទះរៀបចំវេទិកាថ្នាក់ដឹកនាំវ័យក្មេងអាស៊ាន-ជប៉ុន តួនាទីយុវជនក្នុងទំនាក់ទំនងអាស៊ាន-ជប៉ុននៅក្នុងសតវត្សទី២១កាលពីឆ្នាំ២០១៣ និងវេទិកាសហគ្រិនវ័យក្មេងអាស៊ាន-ជប៉ុន ភាពជាដៃគូសម្រាប់ការអភិវឌ្ឍនៅដើមឆ្នាំ២០១៤។ ជាមួយគ្នានេះមេដឹកនាំទាំងអស់ក៏បានចែករំលែកនូវចំណេះដឹងផ្នែកបច្ចេកវិទ្យា វិទ្យាសាស្រ្ត និងជំនាញផ្នែកបច្ចេកវិទ្យាដែលមិនប៉ះពាល់បរិស្ថាន ដើម្បីឈានទៅសំរេចបានកំណើននៅក្នុងតំបន់ដោយមានកាបូនកម្រិតទាប។

ជាមួយគ្នានេះមេដឹកនាំអាស៊ាន-ជប៉ុន ក៏បានទទួលស្គាល់ពីសារៈសំខាន់នៃការថែរក្សាសន្តិភាព សន្តិសុខ និងស្ថេរភាពនៅក្នុងឧបទ្វីបកូរ៉េនិងអំពាវនាវឲ្យបំបាត់អាវុធនុយក្លេអ៊ែរដោយសន្តិវិធី និងឲ្យមានការចរចារប្រាំមួយភាគីឡើងវិញឲ្យបានឆាប់។ ទន្ទឹមនឹងនេះ មេដឹកនាំទាំងអស់ក៏បានសំដែងនូវការព្រួយបារម្ភចំពោះការបាញ់មីស៊ីលដោយកូរ៉េខាងជើង ក្នុងនោះមេដឹកនាំទាំងអស់បានគាំទ្រចំពោះការអនុវត្តឲ្យបានពេញលេញនូវសេចក្តីសម្រេចចិត្តពាក់ព័ន្ធនានា របស់ក្រុមប្រឹក្សាសន្តិសុខអង្គការសហប្រជាជាតិ និងសេចក្តីប្រកាសរួម នៃកិច្ចចរចារប្រាំមួយភាគីថ្ងៃទី១៩ ខែកញ្ញា ឆ្នាំ២០០៥ និងបានគូសបញ្ជាក់ផងដែរនូវសារៈសំខាន់ក្នុងការដោះស្រាយបញ្ហាកង្វល់ផ្នែកមនុស្សធម៌របស់សហគមន៍អន្តរជាតិ រួមមានបញ្ហាចាប់ពង្រត់មនុស្ស។

នៅក្នុងកិច្ចប្រជុំកំពូលប្រចាំឆ្នាំដ៏មានសារៈសំខាន់នេះ មេដឹកនាំអាស៊ាន-ជប៉ុនបានឈានទៅចេញសេចក្តីប្រកាសរបស់ប្រធាននៃកិច្ចប្រជុំកំពូលអាស៊ាន-ជប៉ុន លើកទី១៧និងបានអនុម័តលើសេចក្តីថ្លែងការណ៍រួមរវាងអាស៊ាននិងជប៉ុន សម្រាប់កិច្ចសហប្រតិបត្តិការក្នុងការប្រយុទ្ធប្រឆាំងភេរវកម្មនិងឧក្រិដ្ឋកម្មឆ្លងដែន។ ជាមួយគ្នានេះ មេដឹកនាំអាស៊ាន-ជប៉ុនក៏បានធ្វើការកត់សំគាល់នូវរបាយការណ៍វិវឌ្ឍន៍ ស្តីពីផែនការសកម្មភាពអាស៊ាន-ជប៉ុនស្តីពីមិត្តភាពនិងកិច្ចសហប្រតិបត្តិការ៕

Pages