វិភាគអន្តរជាតិ៖ «អនាគត» របស់អ៊ុយក្រែន មិនមែននៅក្នុង NATO

(វ៉ាស៊ីនតោន)៖ កាលពីអំឡុងសង្រ្គាមលោកលើកទី២ ក្រុមប្រទេសសម្ព័ន្ធមិត្តដឹកនាំដោយសហរដ្ឋអាមេរិក បានចាប់ផ្ដើមរៀបចំផែនការសម្រាប់យុគសម័យក្រោយសង្រ្គាមបញ្ចប់ នៅពេល ដែលពួកគេមើលឃើញ ឬយល់ថាជ័យជម្នះកំពុងស្ថិតនៅចំពោះមុខ។ ដូចគ្នានេះដែរ រយៈពេលមួយឆ្នាំមកនេះនៃការប្រយុទ្ធតស៊ូរបស់អ៊ុយក្រែនប្រឆាំងនឹងសង្រ្គាមឈ្លានពានរបស់រុស្ស៉ី វាក៏ជាពេលដែលទីក្រុងកៀវ និងលោកខាងលិចត្រូវចាប់ផ្ដើមគិតគូពី «ផែនការ» បែបនេះផងដែរ។

អ៊ុយក្រែនមិនទាន់ឈ្នះនៅក្នុងសង្រ្គាមនោះទេ រីឯការវាយលុក និងការកាន់កាប់របស់រុស្ស៉ីលើទឹកដីអ៊ុយក្រែនអាចនឹងត្រូវអូសបន្លាយពេលជាច្រើនខែ ឬក៏អាចរាប់ឆ្នាំទៅមុខទៀតក៏ថាបាន។​ មិនតែប៉ុណ្ណោះ មិនថាសន្តិភាពលេចចេញជារូបរាងឡើងនៅពេលណាក៏ដោយ ក៏អ៊ុយក្រែននឹងនៅតែត្រូវការពារសន្តិសុខរបស់ខ្លួនប្រឆាំងនឹងរបបរុស្ស៉ីមួយដែលស្ទើរតែមិនទទួលស្គាល់ ទាំងស្រុងនូវសិទ្ធិជាប្រទេសឯករាជ្យរបស់ពួកគេ។ ក្នុងន័យនេះ ទោះជាចង់ ឬមិនចង់ អ៊ុយក្រែននឹងមិនអាចដោះស្រាយបញ្ហាតាមរយៈការចូលរួម ឬក្លាយជាសមាជិកបក្សសម្ព័ន្ធយោធា NATO នោះទេ។ តែទោះជាបែបនេះក្ដី អ៊ុយក្រែនត្រូវការជាចាំបាច់នូវការគាំទ្រពីលោកខាងលិច នៅប៉ុន្មានឆ្នាំទៅមុខទៀត។ ពីព្រោះថាទោះជាសង្រ្គាមត្រូវបញ្ចប់ ក៏វានៅតែមានលក្ខខណ្ឌ ជាច្រើន អាចនឹងបង្កជាហានិភ័យផ្ទុះសង្រ្គាមឡើងវិញ។ លោកប្រធានាធិបតី វ្ល៉ាឌីមៀ ពូទីន បានបញ្ជាក់ច្បាស់ៗរួចហើយពីការប្ដេជ្ញាចិត្តបន្តគ្រប់គ្រង និងកាន់កាប់ទឹកដីអ៊ុយក្រែនបន្ថែម ដ្បិតលោកមិនដែលទទួលស្គាល់ឡើយថាអ៊ុយក្រែនជារដ្ឋពិតប្រាកដមួយមានអធិបតេយ្យ និងឯករាជ្យ។ ដូច្នេះមិនថាមានបទឈប់បាញ់ ឬកិច្ចព្រមព្រៀងសន្តិភាពនោះទេ ក៏ទីក្រុងមូស្គូ អាច នឹងបើកការឈ្លានពានសាជាថ្មីគ្រប់ពេល នៅពេលមើលឃើញថាវាជាឱកាសល្អ។

សម្រាប់អ៊ុយក្រែន ការចូលជាសមាជិក NATO គឺជាក្ដីប្រាថ្នាមួយមានចែងនៅក្នុងរដ្ឋធម្មនុញ្ញនៃប្រទេស ហើយវាក៏មិនពិបាកយល់នោះដែរថាតើហេតុ​អ្វីបានជាអ៊ុយក្រែន ចង់ជ្រកនៅក្នុង បក្សសម្ព័ន្ធយោធាដ៏ធំជាងគេបំផុតនៅលើពិភពលោកមួយនេះ។ ពោលគឺក្លាយជាសមាជិកភាពនៅក្នុង NATO នឹងទទួលបានការធានាសន្តិសុខដ៏មានតម្លៃ និងពាក្យសន្យាពីមហាអំណាច ដ៏មានឥទ្ធិពលនៅក្នុងបក្សសម្ព័ន្ធយោធានេះ ក្នុងនោះរួមមានកំពូលមហាអំណាចលេខមួយ ដែលចាត់ទុកថាការវាយប្រហារណាលើសមាជិកណាមួយ មានន័យស្មើនឹងការវាយប្រហារលើ ប្រទេសទាំងអស់ជាសមាជិក។ ប៉ុន្តែ តាមពិតទៅវាគ្មានឡើយ «ពាក្យសន្យា និងការធានារ៉ាប់រងសន្តិសុខល្អឥតខ្ចោះប្រឆាំងនឹងការឈ្លានពាន» នៅក្នុងពិភពលោកសម័យទំនើបច្ចុប្បន្ន។

និយាយជារួម រឿងដែលអ៊ុយក្រែនចង់ក្លាយជាសមាជិក NATO ទំនងជានឹងមិនអាចកើតឡើងទេ។ បើតាមក្រឹត្យក្រមរបស់ NATO បក្សសម្ព័ន្ធយោធានេះមិនទទួលយកប្រទេសណាមួយ ដែលកំពុងមានជម្លោះ ឬសង្រ្គាមឱ្យចូលជាសមាជិកនោះទេ ពីព្រោះពួកគេមិនចង់បង្កើតបញ្ហាឱ្យខ្លួនឯងដោយសារតែទទួលយកសមាជិកថ្មី ហើយបើទោះជាសង្រ្គាមបិទបញ្ចប់ជាមួយ ការដកកងទ័ពរុស្ស៉ីចេញទាំងស្រុង និងការទទួលស្គាល់បូណរភាពទឹកដីអ៊ុយក្រែន ក៏មិនប្រាកដថាអ៊ុយក្រែនអាចនឹងចូល NATO បាននោះដែរ។ ពិតណាស់ថា ស្ថាប័នដែលបង្កើតច្បាប់ ដោយខ្លួនឯងអាចកែប្រែច្បាប់បានគ្រប់ពេល។ ប៉ុន្តែ NATO អនុវត្តតាម «គោលការណ៍កុងសង់ស៊ីស» ហើយវាក៏ពិបាកជឿណាស់ថាបណ្ដាប្រទេសទាំង៣០ជាសមាជិកទាំងអស់នឹងធ្វើ សង្រ្គាមជាមួយរុស្ស៉ី ដើម្បីតែអ៊ុយក្រែន ដូចដែលលោកប្រធានាធិបតីអាមេរិក ចូ បៃដិន បានបញ្ជាក់ថាកងទ័ពអាមេរិកនឹងមិនទៅប្រយុទ្ធក្នុងសង្រ្គាមលោកលើកទី៣ នៅអ៊ុយក្រែននោះទេ។

ចំពោះអ្នកគាំទ្រអ៊ុយក្រែន អ៊ុយក្រែនស័ក្តិសមនឹងទទួលបានសមាជិកភាព NATO ដោយសារតែពួកគេបានបង្ហាញពីភាពក្លាហាន និងមានសមត្ថភាពបង្ហូរឈាមរុស្ស៉ីដែលជាសត្រូវទីមួយ របស់ NATO។ ក៏ប៉ុន្តែ «ពាក្យថាស័ក្តិសមនេះ» វាមិនមែនចេះតែមាននោះទេនៅក្នុង «នយោបាយសកល»។ គេអាចគិតលើផែនការ B ឬជម្រើសមួយផ្សេងទៀត នោះគឺអ៊ុយក្រែនស្ថិតនៅ ក្នុង «ប្លុកលោកខាងលិច តែមិនមែនជាសម្ព័ន្ធមិត្តផ្លូវការ» និងដែលមានយោធាខ្លាំងក្លាអាចការពារឯករាជ្យភាពខ្លួនឯងបាន។ ក្រុមអ្នកវិភាគលោកខាងលិចយល់ថាអ៊ុយក្រែននឹងងើបឡើងពី សង្រ្គាមសព្វថ្ងៃ ក្លាយជាមហាអំណាចយោធាមួយនៅអឺរ៉ុប ហើយនឹងមានកងទ័ពបម្រុងដ៏ច្រើនដែលទទួលបានការបណ្ដុះបណ្ដាលត្រឹមត្រូវ និងគ្មានប្រទេសណាមួយនៅអឺរ៉ុបដែលនឹងគិតគូពី យោធាខ្លាំងជាងអ៊ុយក្រែននោះដែរ។ អ៊ុយក្រែន ដែលកំពុងផ្លាស់ប្ដូរពីការប្រើប្រាស់ស្ដង់ដារអាវុធសូវៀត ទៅជាអាវុធស្ដង់ដាររបស់ NATO​ នឹងកាន់កាប់សព្វាវុធទំនើបៗមានគុណភាពខ្ពស់ ជាងនៅមុនពេលសង្រ្គាមផ្ទុះឡើង ក្នុងនោះរួមមានប្រព័ន្ធមីស៊ីល HIMARS​ និងរថក្រោះ Abrams ជាដើម។ ត្រង់ចំណុចនេះ វាមានជាប់ពាក់ព័ន្ធនឹងសមាសធាតុបន្ទាប់បន្សំនៃសន្តិសុខរបស់ អ៊ុយក្រែន នោះគឺភាពជាដៃគូជិតស្និទ្ធកំពុងបន្តធ្វើឡើងដូចសព្វថ្ងៃ ហើយដែលក្នុងនោះបណ្ដាប្រទេសលោកខាងលិចបានប្រឹក្សាយោបល់ និងជួយបណ្ដុះបណ្ដាលយោធាអ៊ុយក្រែន ខណៈ នៅតែបន្តផ្ដល់អាវុធឱ្យទីក្រុងកៀវ និងការផ្គត់ផ្គង់ចាំបាច់នានាដើម្បីប្រយុទ្ធតតាំងជាមួយរុស្ស៉ី។

គំរូបែបនេះបាន និងកំពុងដំណើរការទៅមុខហើយ។ ជាក់ស្ដែង រថក្រោះប្រយុទ្ធ Abrams ដែលលោក ចូ បៃដិន ប្រកាសបញ្ជូនឱ្យអ៊ុយក្រែន គឺជាសព្វាវុធមានបច្ចេកវិទ្យាស្មុគស្មាញបំផុត ហើយបើទីក្រុងវ៉ាស៊ីនតោន មិនមានផែនការស៊ីជម្រៅរយៈពេលវែងជាមួយអ៊ុយក្រែនទេ ម្ល៉េះលោក បៃដិន ក៏នឹងមិនយល់ព្រមផ្ដល់ Abrams ឱ្យទីក្រុងកៀវនោះដែរ។ ផែនការ B គឺជា ដំណោះស្រាយមួយដ៏ល្អសម្រាប់អ៊ុយក្រែន ខណៈសង្រ្គាមបានបង្ហាញពីសារៈសំខាន់ដូចគ្នារវាង «សម្ព័ន្ធមិត្ត NATO» និង«ដៃគូសន្តិសុខជិតស្និទ្ធ»។ អ៊ុយក្រែនបានបង្កើនសមត្ថភាពយោធា មួយមិនគួរឱ្យជឿ ប៉ុន្តែពួកគេនៅត្រូវប្រឈមមុខនឹងបញ្ហាធំៗជាច្រើន ជាពិសេសសេដ្ឋកិច្ចដែលត្រូវបានបំផ្លាញដោយសារសង្រ្គាម។ ម្លោះហើយទោះបីជាអ៊ុយក្រែនមិនអាចចូល NATO ក៏ពិតមែន តែសង្រ្គាមឈ្លានពានរបស់រុស្ស៉ីបានបង្ហាញពីការចាប់ផ្ដើមនៃការប្ដេជ្ញាចិត្តយូរអង្វែងរ​បស់លោកខាងលិចចំពោះអ៊ុយក្រែនរួចទៅហើយ៕ (Fresh News)

អាជ្ញាធរជាតិអប្សរា ប្រារព្ធពិធីប្រុងពលី សាងសង់រោងពិព័រណ៌ភូមិបេតិកភណ្ឌវប្បធម៌ នៅកសិន្ធុខាងជើងប្រាសាទអង្គរវត្តសម្រាប់ព្រឹត្តិការណ៍អង្គរសង្ក្រាន្ត ឆ្នាំថោះ ចត្វាស័ក ព.ស ២៥៦៦-២៥៦៧

អាជ្ញាធរជាតិអប្សរា ប្រារព្ធពិធីប្រុងពលី បួងសួងសុំសេចក្តីសុខ បើកការដ្ឋានសាងសង់ជាផ្លូវការសម្រាប់គម្រោង«ភូមិបេតិកភណ្ឌវប្បធម៌» នាថ្ងៃទី២៧ ខែកុម្ភៈ ឆ្នាំ២០២៣ នៅកសិន្ធុខាងជើងប្រាសាទអង្គរវត្ត ឧទ្យានប្រវត្តិសាស្រ្តអង្គរ ខេត្តសៀមរាប  គឺបានបង្ហាញការកំណត់យ៉ាងច្បាស់ថា ព្រឹត្តិការណ៍អង្គរសង្ក្រាន្ត នឹងធ្វើដំណើរមកដល់ខួប១០ឆ្នាំរបស់ខ្លួន សម្រាប់ឆ្នាំថោះ ចត្វាស័ក ព.ស ២៥៦៧ ដែលគ្រោងនឹងប្រារព្ធឡើង ចាប់ពីថ្ងៃទី១៤ដល់ថ្ងៃទី១៦ ខែមេសា ឆ្នាំ២០២៣ ខាងមុខ។ ក្នុងឱកាសប្រារព្វពិធីប្រុងពលី ដែលបានប្រព្រឹត្តិទៅនាថ្ងៃនេះ មានវត្តមានរបស់ ឯកឧត្តម បណ្ឌិត ហង់ ពៅ អគ្គនាយកនៃអាជ្ញាធរជាតិអប្សរា អគ្គនាយករង ប្រធាននាយកដ្ឋាន និងមន្រ្តីបុគ្គលិកជាច្រើននាក់។  

ពិធីប្រុងពលីនេះ បានធ្វើឡើងតាមទំនៀមសាសនា ក្នុងនោះរួមមាន ពីធីថ្វាយគ្រឿងសក្ការៈចំពោះបារមីវត្ថុស័ក្តសិទ្ធ ដើមី្បសុំនូវសេចក្តីសុខក្នុងការរៀបចំធ្វើអង្គរសង្រ្កាន្ត នៅលើទឹកដីប្រវត្តិសាស្ត្រអង្គរ ឱ្យបានប្រព្រឹត្តទៅប្រកបដោយភាពសុខសាន្ត ជូនដល់ប្រជាពលរដ្ឋ ភ្ញៀវទេសចរជាតិ អន្តរជាតិ បានសប្បាយរីករាយ៕

សម្ដេចតេជោ ហ៊ុន សែន ចេញអនុក្រឹត្យកំណត់តំបន់គ្រប់គ្រងសត្វផ្សោតទន្លេមេគង្គក្នុងខេត្តស្ទឹងត្រែង និងក្រចេះ

(ភ្នំពេញ)៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នាថ្ងៃទី២៧ ខែកុម្ភៈ ឆ្នាំ២០២៣ បានចេញអនុក្រឹត្យស្ដីពីការកំណត់តំបន់គ្រប់គ្រងសត្វផ្សោតទន្លេមេគង្គ នៅក្នុងខេត្តស្ទឹងត្រែង និងខេត្តក្រចេះ។

ការកំណត់តំបន់គ្រប់គ្រងសត្វផ្សោតទន្លេមេគង្គនេះ គឺដើម្បីការពារនិងអភិរក្សសត្វផ្សោតដែលជារតនសម្បត្តិធម្មជាតិមានជីវិតដ៏ពិសិដ្ឋ ប្រកបដោយប្រសិទ្ធភាព សំដៅចូលរួមអភិវឌ្ឍវិស័យអេកូទេសចរណ៍ លើកកម្ពស់សេដ្ឋកិច្ចសង្គម និងជីវភាពរស់នៅរបស់ប្រជាពលរដ្ឋ ព្រមទាំងថែរក្សាលំនឹងមជ្ឈដ្ឋានធម្មជាតិ សម្រាប់ការរីកលូតលាស់នៃជីវចម្រុះ និងទ្រទ្រង់ការរស់នៅរបស់សត្វផ្សោត៕

ខាងក្រោមនេះជាអនុក្រឹត្យកំណត់តំបន់គ្រប់គ្រងសត្វផ្សោតទន្លេមេគង្គ៖

សម្តេចតេជោ ហ៊ុន សែន អញ្ជើញ​ជាអធិបតីក្នុងពិធីអបអរសាទរ​ទិវាជាតិ ទីក្រុងស្អាត លើកទី១១

សៀលថ្ងៃចន្ទ ទី២៧ ខែកុម្ភៈ ឆ្នាំ២០២៣ នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញ​ជាអធិបតី ក្នុង​ពិធីអបអរសាទរទិវាជាតិទីក្រុងស្អាត លើកទី១១ ឆ្នាំ២០២៣ ក្រោមប្រធានបទ “ទីក្រុងស្អាត បដិសណ្ឋារកិច្ចល្អ ម្ចាស់ផ្ទះកម្ពុជា ផ្តល់ភាពកក់ក្តៅ”។ 

ទិវានេះ ប្រារព្ធឡើង អមជាមួយពិធីប្រគល់ជ័យលាភី ទីក្រុងស្អាត លើកទី៣ ដល់ទីក្រុង​ជាប់ចំណាត់ថ្នាក់។ ពិធីនេះ ធ្វើឡើង​ នៅសណ្ឋាគារ រ៉េស៊ីដង់ សុខា ភ្នំពេញ។​​

សម្តេចតេជោ​ ហ៊ុន សែន បានមានប្រសាសន៍ថា សុខសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់ល្អបរិបូរណ៍ពេលបច្ចុប្បន្ននេះ គឺជាមូលដ្ឋានដ៏រឹងមាំគាំទ្រដល់ការអភិវឌ្ឍន៍ និងភាពរីកចម្រើនលើគ្រប់វិស័យ ហើយផ្តល់នូវកាលានុវត្តភាពយ៉ាងធំធេងដល់ការកសាងអនាគតកម្ពុជាប្រកបដោយភាពរុងរឿង។

សម្តេចតេជោ ហ៊ុន សែន មានប្រសាសន៍ថា វិស័យទេសចរណ៍នៅតែជាចន្ទល់កំណើនសេដ្ឋកិច្ចជាតិដ៏សំខាន់មួយ។ ក្នុងនោះឆ្នាំ២០២២ កម្ពុជា ទទួលបានភ្ញៀវទេសចរអន្តរជាតិជាង ២.២លាននាក់ កើនឡើង ១០៥៩ភាគរយ ធៀបឆ្នាំ២០២២។សម្ដេចតេជោបានមានប្រសាសន៍ថា កម្ពុជាត្រូវគិតគូរលើការបង្កើនឧត្តមភាពប្រកួតប្រជែង និងការធានាចីរភាពនៃការអភិវឌ្ឍន៍ ដើម្បីឆ្លើយនឹងការវិវត្ត និងនិន្នាការនៃការអភិវឌ្ឍន៍ថ្មីៗ។សម្ដេចបន្តទៀតថា ចលនាប្រលងប្រណាំងទីក្រុងស្អាត គឺជាយន្តការវាយតម្លៃ និងជាការក្រើនរំលឹកដល់រដ្ឋបាលដែនដី អាជ្ញាធរមូលដ្ឋាន វិស័យឯកជន និងប្រជាពលរដ្ឋ ភ្ញៀវទេសចរជាតិ អន្តរជាតិ អំពីសារៈសំខាន់នៃការអភិវឌ្ឍបៃតង ដោយរក្សាតុល្យភាពនៃការអភិវឌ្ឍន៍ និងការអភិរក្សា លើទិដ្ឋភាពសេដ្ឋកិច្ច សង្គម វប្បធម៌ និងបរិស្ថាន។ការអនុវត្តចលនាប្រលងប្រណាំងទីក្រុងស្អាត បានចូលរួមកាត់បន្ថយផលប៉ះពាល់ជាអវិជ្ជមានលើនិរន្តរភាពនៃសម្បត្តិធនធានវប្បធម៌ ធម្មជាតិ និងបរិស្ថាន នៅតាមបណ្តាទីក្រុង និងទីប្រជុំជន ព្រមទាំងជួយបង្កើនភាពទាក់ទាញ និងធានាចីរភាពនៃការអភិវឌ្ឍវិស័យទេសចរណ៍ថែមទៀត។

សម្តេ​ចតេជោនាយករដ្ឋមន្ត្រីបានមានប្រសាសន៍ថា ប្រធានបទ «ទីក្រុងស្អាត បដិសណ្ឋារកិច្ចល្អ ម្ចាស់ផ្ទះកម្ពុជាផ្តល់ភាពកក់ក្តៅ» សម្រាប់ទិវាជាតិទីក្រុងស្អាតនាពេលនេះ បានឆ្លុះបញ្ចាំងយ៉ាងច្បាស់ថា ទីក្រុងដែលមានភាពទាក់ទាញគួរឱ្យចង់ទស្សនាកម្សាន្ត និងស្នាក់នៅសម្រាប់ភ្ញៀវទេសចរជាតិ និងអន្តរជាតិ គឺជាទីក្រុងដែលស្អាត មានបរិស្ថានល្អ ធានាបាននូវសន្តិសុខ សុវត្ថិភាព ផ្តល់បដិសណ្ឋារកិច្ចល្អ ភាពរួសរាយរាក់ទាក់ជាមួយនឹងភាពជាម្ចាស់ផ្ទះ ដែលផ្តល់នូវការស្វាគមន៍ប្រកបដោយភាពកក់ក្តៅ។ សម្តេចតេជោជំរុញឲ្យប្រជាពលរដ្ឋត្រូវបង្កើនការយល់ដឹងពីតម្លៃអនាម័យ និងបរិស្ថាន  

ព្រោះជាមុខមាត់របស់ប្រទេសយើង។ សម្តេចតេជោបានមានប្រសាសន៍ ថា រយៈពេលប្រមាណ ២៣ឆ្នាំហើយ កម្ពុជាមិនកើតមានជំងឺចុះក្អួតក្រោយទឹកជំនន់នោះទេ ដែលនេះការស្តែងឱ្យឃើញពីភាពប្រសើរនៃសុខភាពប្រជាពលរដ្ឋ តាមរយៈការរស់នៅប្រកបដោយអនាម័យ។

សម្តេចតេជោនាយករដ្ឋមន្ត្រីបានមានប្រសាសន៍ថា ចលនា «ភូមិស្អាត ស្រែល្អ» ដែលរាជរដ្ឋាភិបាល បានដាក់ចេញកាលពីពេលមុន គឺជាចលនាលើកកម្ពស់ការរស់នៅស្អាតរបស់ប្រជាពលរដ្ឋនៅតាមទីជនបទ។

សម្តេចតេជោបានណែនាំឱ្យជំរុញការអភិវឌ្ឍន៍បៃតងនៅតាមបណ្តាក្រុង ខណ្ឌ រាជធានី ខេត្ត នៅទូទាំងប្រទេសតាមគោលនយោបាយ និងយុទ្ធសាស្ត្រអភិវឌ្ឍន៍ជាតិរបស់រាជរដ្ឋាភិបាល ដោយត្រូវជំរុញការរៀបចំផែនការមេអភិវឌ្ឍន៍ទីក្រុង ដោយរួមបញ្ចូលទាំងទិដ្ឋភាព នគរូបនីយកម្ម ប្រជាសាស្ត្រ ទេសចរណ៍ បរិស្ថាន សេដ្ឋកិច្ច និងសង្គម។

សម្តេចតេជោបានណែនាំឱ្យបន្តអភិវឌ្ឍទីក្រុងស្អាត ផ្សារភ្ជាប់នឹងទីក្រុងឆ្លាត ដែលមានលក្ខណៈប្រកួតប្រជែងផ្នែកសេដ្ឋកិច្ច​ ភាពទាក់ទាញ ផ្នែកទេសចរណ៍ បរិស្ថានប្រកបដោយចីរភាព និងការទទួលខុសត្រូវសង្គម ដើម្បីលើកកម្ពស់គុណភាពរស់នៅរបស់ប្រជាជនប្រកបដោយ សុខុមាលភាព សុវត្ថិភាព សន្តិសុខ វិបុលភាព ភាពធន់ និងផ្តល់បដិសណ្ឋារកិច្ចប្រកបដោយភាពកក់ក្តៅ ដល់ភ្ញៀវទេសចរជាតិ និងអន្តរជាតិ។ សម្តេចតេជោ ចង់ឃើញសណ្ឋាគារ និងអាហារដ្ឋាននានា ក្លាយទៅជាប្រភពទីផ្សារសម្រាប់កសិផលរបស់ខ្មែរ និងបានណែនាំឱ្យក្រសួងទេសចរណ៍ដាក់បញ្ចូលលក្ខខណ្ឌនៃការប្រើប្រាស់កសិផលខ្មែរ សម្រាប់ការវាយតម្លៃសណ្ឋាគារនានា។ សម្តេចតេជោបានណែនាំឱ្យបន្តលើកកម្ពស់ការអភិវឌ្ឍន៍ទីក្រុង ប្រកបដោយភាពធន់ ចីរភាព និងបរិយាប័ន្ន និងលើកស្ទួយ «វិស័យទេសចរណ៍ជាការនាំចេញនៅនឹងកន្លែង» តាមរយៈការបង្កើនអន្តរកម្មខ្សែច្រវាក់តម្លៃនៃវិស័យទេសចរណ៍ ជាមួយវិស័យគាំទ្រពាក់ព័ន្ធ ជាពិសេសវិស័យកសិកម្ម សិប្បកម្ម ឧស្សាហកម្មច្នៃប្រឌិត និងផលិតកម្មក្នុងស្រុក ដើម្បីបង្កើនលទ្ធភាពនៃការបែងចែកផ្លែផ្កានៃកំណើនតាមរយៈការអភិវឌ្ឍន៍វិស័យទេសចរណ៍។

សម្តេចតេជោនាយករដ្ឋមន្ត្រីក៏បានណែនាំឱ្យរួមគ្នាថែរក្សាធនធានធម្មជាតិ រួមមានព្រៃឈើ និងសត្វព្រៃ សម្រាប់ទាក់ទាញទេសចរណ៍។សម្តេចតេជោ បានសម្តែងនូវក្តីរីករាយ ដែលក្លឹបឆ្នេរស្អាតបំផុតលើពិភពលោក យកគំនិតផ្តួចផ្តើមរបស សម្តេច «ឆ្នេរសមុទ្រដែលស្អាត គឺឆ្នេរគ្មានប្លាស្ទិក» ដាក់ក្នុងលក្ខខណ្ឌវាយតម្លៃរបស់ខ្លួន។

សម្តេចតេជោនាយករដ្ឋមន្ត្រី បានអំពាវនាវគ្រប់ក្រសួង ស្ថាប័ន រាជធានី ខេត្ត អាជ្ញាធរគ្រប់ លំដាប់ ថ្នាក់ កងកម្លាំងប្រដាប់អាវុធវិស័យឯកជន អង្គការ សង្គមស៊ីវិល ដៃគូអភិវឌ្ឍពាក់ព័ន្ធ ព្រះសង្ឃគ្រប់ ព្រះអង្គ លោកគ្រូអ្នកគ្រូ សិស្សានុសិស្ស និស្សិត យុវជន យុវនារី មន្ត្រីរាជការ បុគ្គលិកក្រុមហ៊ុនឯកជន  រោងចក្រ និងជនរួមជាតិទាំងអស់មេត្តាបន្តផ្តល់នូវការគាំទ្រ និងចូលរួមអនុវត្តឱ្យបាន ផុលផុស ប្រកប ដោយស្មារតីទទួលខុសត្រូវខ្ពស់នូវចលនាប្រឡងប្រណាំង «ទីក្រុងស្អាត រមណីយដ្ឋាន ស្អាត សេវាល្អ បដិសណ្ឋារកិច្ចល្អ» ដើម្បីឱ្យកម្ពុជាក្លាយជាគោលដៅទេសចរណ៍ប្រកបដោយគុណភាព ចីរភាព ភាព ស្អាត និងបៃតងនិងភាពទាក់ទាញខ្ពស់សម្រាប់ភ្ញៀវទេសចរជាតិ និងអន្តរជាតិ ស័ក្តិសមនឹងកិត្តិនាម «កម្ពុជា៖ ព្រះរាជាណាចក្រអច្ឆរិយៈ ផ្តល់ភាពកក់ក្ដៅ»៕