សម្តេចធិបតី ហ៊ុន ម៉ាណែត ឆ្លើយតបទៅអ្នករិះគន់សម្តេចនិងថ្នាក់ដឹកនាំផ្សេងទៀត ជុំវិញការលើកឡើងម្តងហើយម្តងទៀតអំពីប្រវត្តិសាស្រ្តរបស់កម្ពុជា

ក្នុងពិធីសម្ពោធដាក់ឱ្យប្រើប្រាស់ប្រព័ន្ធបង្ហូរទឹកកខ្វក់ក្នុងរាជធានីភ្នំពេញ ស្ថិតនៅក្នុងសង្កាត់ចាក់អង្រែលើ ខណ្ឌមានជ័យ នៅព្រឹកថ្ងៃទី២៧ ខែធ្នូ ឆ្នាំ២០២៣ សម្តេចធិបតី ហ៊ុន ម៉ាណែត បានថ្លែងថា ការនិយាយពីរឿងប្រវត្តិសាស្រ្ត គឺដើម្បីឱ្យចងចាំពីប្រវត្តិសាស្រ្ត និយាយឱ្យយើងដឹងថា ដើរដល់ណា ដើម្បីយើងមានភាពជឿជាក់និងមោទនភាពថាខ្មែរយើងបានរួមគ្នាដើរដល់ចំណុចនេះ។

សម្តេចធិបតី ហ៊ុន ម៉ាណែត បានគូសបញ្ជាក់ថា បើទោះបីជាយើងមិនទាន់អភិវឌ្ឍន៍ដូចនៅសហរដ្ឋអាមេរិកក៏ដោយ ក៏យើងគួរមានមោទនភាពដែលប្រទេសយើងមានការអភិវឌ្ឍរីកចម្រើនពីដំណាក់កាលមួយទៅដំណាក់កាលមួយ។

សម្តេចធិបតី ហ៊ុន ម៉ាណែត ក៏បានគូសបញ្ជាក់ថា ខ្មែរយើងបានបញ្ចប់នូវការបែកបាក់គ្នា ការកាប់សម្លាប់គ្នា ដែលបច្ចុប្បន្ននេះមានការរីកចម្រើន ហើយបើសិនយើងធានាបាននូវសុខសន្តិភាព គឺយើងនឹងកាន់តែរីកចម្រើនថែមទៀតតទៅអនាគត៕