ក្រសួងមុខងារសាធារណៈ ណែនាំពីការបើកប្រាក់​បៀវត្ស​ជូនមន្ត្រីរាជការស៊ីវិលសម្រាប់ខែតុលា និងវិច្ឆិកា

(ភ្នំពេញ)៖ ក្រសួងមុខងារសាធារណៈ បានណែនាំ​ទៅថ្នាក់​ដឹកនាំក្រសួងស្ថាប័ន និងរដ្ឋបាលរាជធានី ខេត្ត រៀបចំបើកផ្តល់ប្រាក់ឧបត្ថម្ភក្នុង​ឱកាស​បុណ្យ​ភ្ជុំបិណ្ឌ ដំណាលគ្នាជាមួយនឹងការបើកផ្តល់​ប្រាក់បៀវត្ស​ប្រចាំខែតុលាតែមួយ​លើកយ៉ាងយូរ​បំផុតត្រឹមថ្ងៃទី១២ ខែតុលា ឆ្នាំ២០២៣។

ក្រសួងមុខងារសាធារណៈ បានណែនាំ រៀបចំការបើក​ផ្តល់ប្រាក់​បៀវត្សលើកទី១សម្រាប់ខែវិច្ឆិកា ឆ្នាំ​២០២៣ ឱ្យបានមុនដំណាច់ខែតុលា និងលើកទី២ ឱ្យបានក្នុងសប្តាហ៍ទី៣ នៃខែវិច្ឆិកា ឆ្នាំ២០២៣។ ដោយឡែកការបើកផ្តល់បៀវត្សសម្រាប់ខែធ្នូ ឆ្នាំ២០២៣ គឺអនុវត្តតាមនីតិវិធីដែល​បានកំណត់​ជាធរមាន។

ការណែនាំបែបនេះ ដើម្បីធានាថា មន្ត្រីរាជការ​ទទួល​បាន​ប្រាក់សម្រាប់​ចាយវាយក្នុង​ឱកាសបុណ្យភ្ជុំបិណ្ឌ និងក្រោយពេលបុណ្យភ្ជុំរួច។ របៀបរបបនៃការបើកប្រាក់បៀវត្សបែបនេះ បានធ្វើច្រើន​អាណត្តិមកហើយ ហើយជាការ​ផ្តួចផ្តើមឡើងដោយសម្តេចតេជោ ហ៊ុន សែន។ នេះជាការស្តែងឱ្យឃើញនូវការគិតគូរខ្ពស់មួយរបស់រាជរដ្ឋាភិបាលលើជីវភាពរបស់មន្ត្រីរាជការ៕