ព្រះសង្ឃដាឡៃឡាម៉ា៖ ការបោះឆ្នោតនៅកម្ពុជា ធ្វើឡើងដោយផ្អែកតាមច្បាប់យ៉ាងត្រឹមត្រូវ

FN (ភ្នំពេញ)៖ ព្រះសង្ឃដាឡៃឡាម៉ា មួយអង្គ មានព្រះនាម Sergey Kirishov នៅថ្ងៃទី២៤ ខែកក្កដា ឆ្នាំ២០២៣ មានសង្ឃដីកាថា ការបោះឆ្នោតជ្រើសតាំងតំណាងរាស្ត្រ នីតិកាលទី៧ របស់កម្ពុជា បានធ្វើឡើងដោយផ្អែកតាមច្បាប់យ៉ាងត្រឹមត្រូវ។

ព្រះអង្គមានសង្ឃដីកាបែបនេះ ក្នុងឱកាសអ្នកសង្កេតការណ៍អន្តរជាតិ ធ្វើសន្និសីទសារព័ត៌មាន បង្ហាញពីលទ្ធផលនៃការសង្កេតការណ៍ ទូទៅជុំវិញដំណើរការបោះឆ្នោតជ្រើសតាំងតំណាងរាស្ត្រ នីតិកាលទី៧ នៅតាមមណ្ឌលបោះឆ្នោត និងការសន្និដ្ឋានទូទៅរបស់ពួកគាត់ ដែលរៀបចំដោយវេទិកាសម្ព័ន្ធសង្គមស៉ីវិល (វ.ស.ស.) នៅសណ្ឋាគារ ហៃយ៉ាត់។

ព្រះសង្ឃដាឡៃឡា មានសង្ឃដីកាថា នៅរុស្ស៉ី តួអង្គសាសនាដើរតួនាទីយ៉ាងសំខាន់ នៅក្នុងសង្គម ព្រោះពួកគាត់ខ្វាយខ្វល់ពីអនាគតនៃសង្គម ជាពិសេសព្រះសង្ឃនៃពុទ្ធសាសនា តែងតែចូលរួមគ្រប់សកម្មភាពក្នុងសង្គម។ នៅពេលលឺថា កម្ពុជាដែលជាប្រទេសកាន់ពុទ្ធសាសនា មានការរៀបចំបោះឆ្នោតជ្រើសតាំងតំណាងរាស្ត្រ នីតិកាលទី៧ ព្រះអង្គក៏បានដាក់ពាក្យចូលរួមសង្កេតការណ៍។

បើតាមសង្ឃដីការបស់ព្រះអង្គ គឺព្រះអង្គបាននិមន្តទៅសង្កេតការណ៍នៅតាមការិយាល័យបោះឆ្នោតជាច្រើន ខណៈការបោះឆ្នោតនៅកម្ពុជា មិនឃើញមានភាពមិនប្រក្រតីនោះទេ។ ផ្ទុយទៅវិញ ការបោះឆ្នោតនៅកម្ពុជា ប្រកបដោយបច្ចេកទេស។

ព្រះអង្គ មានសង្ឃដីកាជាគំនិតថា កម្ពុជា មិនគួរប្រៀបធៀបខ្លួនឯងនឹងប្រទេសដទៃពេកទេ ព្រោះប្រទេសនីមួយៗ មានច្បាប់រៀងៗគ្នា។ មានតែប្រជាជនកម្ពុជាទេ ដែលបានបោះឆ្នោត ឆ្នាំ២០២៣ ដោយព្រះអង្គមិនជឿថា ប្រទេសដទៃ (រុស្ស៉ីក្តី) មកបោះឆ្នោត និងមកលូកដៃក្នុងទឹកខ្មៅ នៅកម្ពុជានោះដែរ។

ព្រះអង្គ ដែលធ្លាប់សង្កេតការណ៍ការបោះឆ្នោតជាតិ នៅប្រទេសនេប៉ាល់ នៅឆ្នាំ២០២២ បានចាត់ទុកការបោះឆ្នោតជាតិ ឆ្នាំ២០២៣​ នៅប្រទេសកម្ពុជា ធ្វើឡើងដោយផ្អែកតាមច្បាប់ និងបទដ្ឋានគតិយុត្ត យ៉ាងត្រឹមត្រូវ។