នៅពាក់កណ្តាលខែមីនា លោកនាយករដ្ឋមន្រ្តី ហ៊ុន សែន នឹងអញ្ជើញជួបប្រជុំជាមួយប្រធានាធិបតីអាមេរិក ដូណាល់ ត្រាំ

លោកនាយករដ្ឋមន្រ្តី ហ៊ុន សែន បានថ្លែងថា នៅថ្ងៃទី១២ ដល់១៦ ខែមីនា ឆ្នាំ២០២០ ខាងមុខ លោកនឹងអញ្ជើញទៅចូលរួមក្នុងកិច្ចប្រជុំអាស៊ាន អាមេរិក នៅឡាសវ៉េហ្គាល សហរដ្ឋអាមរិក ដែលក្នុងឱកាសនោះដែរលោកនឹងជួបប្រជុំជាមួយលោក ដូណាល់ ត្រាំ ប្រធានាធិបតីអាមេរិកផងដែរ។ លោកបានថ្លែងដូចនេះនៅព្រឹកថ្ងៃទី១១ ខែកុម្ភៈ ឆ្នាំ២០២០ ក្នុងឱកាសអញ្ជើញជាអធិបតីក្នុងពិធីបើកការដ្ឋានស្តារនិងសាងសង់ផ្លូវលេខ២ និងលេខ២២ ប្រវែងសរុបជាង ៧២គីឡូម៉ែត្រ។

លោកនាយករដ្ឋមន្រ្តី ហ៊ុន សែន បានបញ្ជាក់ថា នៅថ្ងៃទី១២ ខែមីនា ឆ្នាំ២០២០ លោកនឹងចេញដំណើរទៅសហរដ្ឋអាមេរិក ថ្ងៃទី១៣ អាចនឹងវាយកូនហ្គោលនៅអាមេរិក ថ្ងៃទី១៤ ចូលរួមកិច្ចប្រជុំអាស៊ាន-អាមេរិក ថ្ងៃទី១៥ ជួបសំណេះសំណាលជាមួយពលរដ្ឋខ្មែរនៅអាមេរិក និងថ្ងៃទី១៦ ខែមីនា លោកនឹងចាកចេញមកកាន់ប្រទេសកម្ពុជាវិញ៕