ប្រតិភូកងទ័ពជើងទឹកឥណ្ឌា មកបំពេញទស្សនកិច្ចនៅមូលដ្ឋានសមុទ្រ

ឧត្តមនាវីទោ រស់ វាសនា មេបញ្ជាការរងមូលដ្ឋានសមុទ្រ កងទ័ពជើងទឹក រួមដំណើរជាមួយនាយនាវី នាយនាវីរងជាច្រើនរូប នៅថ្ងៃទី៥ ខែកញ្ញា ឆ្នាំ២០១៩ កន្លងទៅនេះ បានអញ្ជើញទៅទទួលស្វាគមន៍នាវាកងទ័ពជើងទឹកឥណ្ឌា ចំនួន២គ្រឿង ដែលបានចូលសំចតនៅកំពង់ផែស្វយ័តក្រុងព្រះសីហនុ ក្នុងដំណើរមកបំពេញទស្សនកិច្ចសុឆន្ទះ នៅកម្ពុជា រយៈពេល០៤ថ្ងៃ ចាប់ពីពីថ្ងៃទី០៥ ដល់ថ្ងៃ ទី០៨ ខែកញ្ញា ឆ្នាំ២០១៩។ នាវីទាំងពីគ្រឿងដែលបានចូលចតនៅកំពង់ផែក្រុងព្រះសីហនុ នាពេលនោះ នាវាទី១ឈ្មោះ អ៊ីន សាយ៉ាទ្រី ( INS SAHYATRI )ជាប្រភេទនាវាចម្បាំងបំពាក់គ្រាប់មីស៊ីល មានបណ្តោយ=១៤៣ម ទទឹង=១៧និង មាននាយនាវី និង នាវិក បំរើការលើនាវាសរុបចំនួន ៣៩០នាក់។ នាវាទី២ឈ្មោះ អ៊ីន ឃីលតាន់ ( INS KILTAN ) ជាប្រភេទនាវា ប្រឆាំងនឹង នាវាមុជទឹក មានបណ្តោយប្រវែង=១១០ម ទទឹង=១២.៨ម មាននាយនាវី និងនាវិក បំរើការនៅលើនាវាសរុបចំនួន ២៨០នាក់។

ប្រតិភូកងទ័ពជើងទឹកឥណ្ឌាដឹកនាំដោយ លោក វរនាវីឯក អាសស្វ៊ីន អារីណ ( ASHWIN ARIN ) មេបញ្ជាការនាវា អ៊ីន សាយ៉ាទ្រី INS SAHYADRI និង សហការី អមដំណើរដោយសេនានុព័ន្ធយោធាឥណ្ឌា ប្រចាំនៅកម្ពុជា បានអញ្ជើញចូលជួបសំណេះសំណាល និង សម្តែងការគួរសមជាមួយ ឧត្តមនាវីឯក អ៊ុក សីហា មេបញ្ជាការរងកងទ័ពជើងទឹក មេបញ្ជាការមូលដ្ឋានសមុទ្រ។
ក្នុងនាម នាយនាវី នាយនាវីរង និងពលនាវិក កងទ័ពជើងទឹកមូលដ្ឋានសមុទ្រ ឧត្តមនាវីឯក អ៊ុក សីហា បានសម្តែងនូវការអបអរសាទរ និង សំដែងការស្វាគមន៏ចំពោះការអញ្ជើញមកដល់ របស់ប្រតិភូនាវាកងទ័ពជើងទឹកឥណ្ឌា នៅមូលដ្ឋានសមុទ្រកងទ័ពជើងទឹក នៃកងយោធពលខេមរភូមិន្ទ នាឱកាសដែលនាវាកងទ័ពជើងទឹកឥណ្ឌា បានមកចូលចតនៅកំពង់ផែស្វយ័តក្រុងព្រះសីហនុ ។

លោកបានបញ្ជាក់ថា រយៈពេលកន្លងមកនាវាចម្បាំងកងទ័ពជើងទឹកឥណ្ឌា ធ្លាប់បានមកបំពេញទស្សនកិច្ច នៅមូលដ្ឋានសមុទ្រ ដែលបាននាំមកនូវកិច្ចសហការធ្វើលំហាត់ហ្វឹកហ្វឺនរួមគ្នា ផ្លាស់ប្តូរនាវិកធ្វើទស្សនកិច្ចសិក្សាស្វែងយល់លើនាវា ដើម្បីដកស្រង់បទពិសោធន៍ពីគ្នាទៅវិញទៅមក ដើម្បីពង្រឹងចំណងមិត្តភាព និងកិច្ចសហប្រតិបត្តិការរវាងកងទ័ពជើងទឹកប្រទេសទាំងពីរកម្ពុជា-ឥណ្ឌា ឲ្យកាន់តែល្អប្រសើរឡើងថែមទៀត ៕