សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដី នៃព្រះរាជាណាចក្រកម្ពុជា នាសៀល ថ្ងៃទី៣០ ខែឧសភា ឆ្នាំ២០១៦នេះ បានអនុញ្ញាតឲ្យឯកឧត្ដម ដាតូ ស្រ៊ី ហាសាន ម៉ាលីក (Dato Sri Hasan Malek) ឯកអគ្គរដ្ឋទូតម៉ាឡេស៊ីប្រចាំព្រះរាជាណាចក្រកម្ពុជា ចូលជួបសម្ដែងការគួរសម និងពិភាក្សាការងារនៅវិមានសន្ដិភាព ទីស្ដីការនាយករដ្ឋមន្រ្ដី។
បន្ទាប់ពីជំនួបបានបញ្ចប់ឯកឧត្ដមបណ្ឌិត កៅ គឹមហួន រដ្ឋមន្រ្ដីប្រតិភូអមនាយករដ្ឋមន្រ្ដី បានថ្លែងប្រាប់អ្នកសារព័ត៌មានថា ឯកឧត្ដម ដាតូ ស្រ៊ី ហាសាន ម៉ាលីក បានគោរពជម្រាបជូនសម្ដេចអគ្គមហាសេនាបតីតេជោនាយករដ្ឋមន្រ្ដីថា កាលពីព្រឹកមិញនេះ ឯកឧត្ដមបានចូលគាល់ព្រះមហាក្សត្រ ដើម្បីថ្វាយសារតាំង ដែលឯកឧត្ដមបានក្លាយជាអគ្គរដ្ឋទូតម៉ាឡេស៊ីថ្មីប្រចាំព្រះរាជាណាចក្រកម្ពុជាជាផ្លូវការ។
ឯកឧត្ដម ដាតូ បានគោរពជម្រាបជូនសម្ដេចតេជោបន្ដថា ក្រោយជំនួបជាមួយសម្ដេចតេជោរួច ឯកឧត្ដមធ្វើដំណើរទៅកាន់ប្រទេសម៉ាឡេស៊ីវិញ ដើម្បីរង់ចាំសម្ដេចតេជោអញ្ជើញទៅបំពេញទស្សនកិច្ចផ្លូវការនៅម៉ាឡេស៊ីផង និងអញ្ជើញចូលរួមក្នុងកិច្ចប្រជុំវេទិកាសេដ្ឋកិច្ចពិភពលោកស្ដីពីអាស៊ានផង។ នៅក្នុងជំនួបដដែលនេះ ឯកឧត្ដមឯកអគ្គរដ្ឋទូតម៉ាឡេស៊ីថ្មី បានប្ដេជ្ញាចិត្ដថា នឹងបន្ដពង្រឹង ពង្រីកទំនាក់ទំនងទ្វេភាគីរវាងប្រទេសទាំងពីរបន្ថែមទៀត ហើយការពង្រឹងទំនាក់ទំនងនេះ ដោយសារតែម៉ាឡេស៊ី និងកម្ពុជាមានទំនាក់ទំនងល្អ ជាពិសេសទំនាក់ទំនងល្អនេះគឺរវាងនាយករដ្ឋមន្រ្ដី នៃប្រទេសទាំងពីរ។
ឯកឧត្ដមបានកោតសរសើរ ចំពោះសម្ដេចតេជោនាយករដ្ឋមន្រ្ដីជាច្រើនចំណុច ជាពិសេសចាត់ទុកសម្ដេចតេជោ ហ៊ុន សែនជាកំពូលមេដឹកនាំកម្ពុជា ដែលមានលក្ខណៈសាមញ្ញ ហើយមានការគំាទ្រ និងមានភាពជិតស្និតជាមួយប្រជាពលរដ្ឋ។ ជាមួយគ្នានេះឯកឧត្ដមបានចាប់អារម្មណ៍ ពីភាពសាមញ្ញរបស់សម្ដេចតេជោ ពេលធ្វើដំណើរតាមរថភ្លើងជាមួយប្រជាពលរដ្ឋពីរាជធានីភ្នំពេញ ទៅកាន់ខេត្ដព្រះសីហនុកាលពីពេលថ្មីៗនេះ។ លើសពីនេះទៅទៀត ទាក់ទងនឹងវិស័យសាសនាវិញសម្ដេចតេជោ ហ៊ុន សែន បានបើកទូលាយចំពោះការគោរពសាសនារបស់ប្រជាពលរដ្ឋ ជាពិសេសសម្ដេចតេជោ បានជួបប្រាស្រ័យទាក់ទងជាមួយបងប្អូនប្រជាពលរដ្ឋខ្មែរ កាន់សាសនាអ៊ីស្លាមជាបន្ដបន្ទាប់ផងដែរ ហើយសកម្មភាពនេះ គឺមិនងាយមានមេដឹកនាំណាអាចធ្វើបានឡើយ។
នៅក្នុងជំនួបនោះឯកឧត្ដម ដាតូ បានជម្រាបជូនសម្ដេចតេជោបន្ដទៀតថា បច្ចុប្បន្ននេះប្រជាជន ម៉ាឡេស៊ី កាន់តែមានការចាប់អារម្មណ៍យ៉ាងខ្លាំង ទៅលើការវិនិយោគនៅកម្ពុជា ហើយឯកឧត្ដម និងជំរុញឲ្យមានអ្នកវិនិយោគម៉ាឡេស៊ី មកកាន់ប្រទេសកម្ពុជាបន្ថែមទៀត ដើម្បីធ្វើយ៉ាងឲ្យវិស័យសេដ្ឋកិច្ច និងពាណិជ្ជកម្មរវាងប្រទេសទាំងពីរ កាន់តែមានការរីកចំរើនបន្ថែមទៀត។
ជាការឆ្លើយតបសម្ដេចតេជោ ហ៊ុន សែន នាយករដ្ឋមន្រ្ដី បានមានប្រសាសន៍ថា ក្នុងការពង្រឹងទំនាក់ទំនងរវាងព្រះរាជាណាចក្រកម្ពុជា និងម៉ាឡេស៊ីនេះ គឺសម្ដេចតេជោបានផ្ដល់អនុសាសន៍ដល់ឯកឧត្ដម ដាតូ ឯកអគ្គរដ្ឋទូតម៉ាឡេស៊ី ត្រូវធ្វើការទំនាក់ទំនងជាមួយសមាជិករាជរដ្ឋាភិបាលកម្ពុជា ដើម្បីឲ្យការងារនេះបានរលូន និងមានប្រសិទ្ធភាព។ សម្ដេចតេជោ ហ៊ុន សែន បានមានប្រសាសន៍បន្ដថា សម្ដេចតែងមានការយកចិត្ដទុកដាក់ចំពោះការអភិវឌ្ឍន៍របស់ប្រទេសម៉ាឡេស៊ី ជាពិសេសពិនិត្យលើការវិវត្ដិរបស់ប្រទេសម៉ាឡេស៊ី ដោយសារតែការអភិវឌ្ឍន៍ខ្លះ ប្រហាក់ប្រហែលនឹងប្រទេសកម្ពុជាដែរ។ ក្រៅពីពិភាក្សាអំពីការពង្រឹងទំនាក់ទំនងរវាងប្រទេសទាំងពីរកម្ពុជា-ម៉ាឡេស៊ី ភាគីទាំងពីរ ក៏បានពិភាក្សា និងផ្លាស់ប្ដូរយោបល់គ្នា អំពីបញ្ហាអន្ដរជាតិផងដែរ៕
No comments:
Post a Comment