អគ្គលេខាធិការនៃគណៈកម្មាធិការមជ្ឈឹមបក្ស កុម្មុយនីស្តចិន ឯកឧត្តម Xi Jinping បានផ្ញើសារចូលរួមអបអរសាទរ ចំពោះសម្តេចអគ្គមហាសេនាបតីតេជោ ហ៊ុន សែន ក្នុងឱកាសដែលសម្តេចត្រូវបាន សន្និបាតគណៈកម្មាធិការកណ្តាលលើកទី ៣៨ របស់គណបក្ស បោះឆ្នោតជ្រើសតាំងជាប្រធានគណបក្សប្រជាជនកម្ពុជា កាលពីថ្ងៃទី ២០ ខែមិថុនា ឆ្នាំ២០១៥កន្លងទៅ។
នៅក្នុងលិខិតរបស់ ឯកឧត្តម Xi Jinping ដដែល ចុះថ្ងៃទី ២៤ ខែមិថុនា ឆ្នាំ២០១៥ បានលើកឡើងទៀតថា នាពេលបច្ចុប្បន្ននេះ ទំនាក់ទំនងរវាងចិន និងកម្ពុជា កំពុងស្ថិតនៅក្នុងឱកាសនៃការអភិវឌ្ឍន៍។ ឯកឧត្តម Xi Jinping បន្ថែមថា ភាគីចិននឹងបន្តជំរុញកិច្ចសហប្រតិបត្តិការ ជាយុទ្ធសាស្ត្រគ្រប់ជ្រុងជ្រោយ រវាងចិន និងកម្ពុជា ហើយចិននឹងបន្តគាំទ្រកម្ពុជាក្នុងការថែរក្សាស្ថិរភាព និងការអភិវឌ្ឍន៍។
ឯកឧត្តម Xi Jinping បានសង្កត់ធ្ងន់ថា ឯកឧត្តមបានយកចិត្តទុកដាក់ជាសំខាន់ លើកិច្ចសហប្រតិបត្តិការជាមិត្តភាព រវាងបក្សកុម្មុយនីស្តចិន និងគណបក្សប្រជាជនកម្ពុជា។ គណបក្សទាំងពីរ និងជំរុញការប្រាស្រ័យទាក់ទងគ្នា និងកិច្ចសហប្រតិបត្តិការ ផ្លាស់ប្តូរបទពិសោធន៍គ្នាអំពីអភិបាលកិច្ច និងជំរុញទំនាក់ទំនងរវាងចិន និងកម្ពុជាឲ្យកាន់តែស៊ីជម្រៅជាបន្តទៀត ដើម្បីជាផលប្រយោជន៍ប្រជាជននៃប្រទេសទាំងពីរ។
ឆ្លើយតបនិងសារលិខិតរបស់ ឯកឧត្តម Xi Jinping សម្តេចតេជោ ហ៊ុន សែន បានថ្លែងអំណរគុណយ៉ាងជ្រាលជ្រៅចំពោះឯកឧត្តម Xi Jinping ក៏ដូចជាបក្សកុម្មុយនិស្ត និងបានវាយតំលៃខ្ពស់ ចំពោះការយកចិត្តទុកដាក់របស់ភាគីចិន លើកិច្ចសហប្រតិបត្តិការជាមិត្តភាព រវាងបក្សកុម្មុយនីស្តចិន និងគណបក្សប្រជាជនកម្ពុជា និងការបន្តជម្រុញកិច្ចសហប្រតិបត្តិការជាយុទ្ធសាស្ត្រគ្រប់ជ្រុងជ្រោយរវាងចិន និងកម្ពុជា។
សម្តេចក៏បានថ្លែងអំណរគុណចំពោះការអះអាងរបស់ភាគីចិន អំពីការបន្តគាំទ្រដល់កម្ពុជាក្នុងការថែរក្សាស្ថិរភាព និងការអភិវឌ្ឍន៍ប្រទេសជាតិ៕
អត្ថបទ៖ ច័ន្ទ ទេវី
No comments:
Post a Comment