សម្តេច​តេជោ៖ យើង​ត្រូវ​ធ្វើឲ្យ​តំបន់​​ជនបទ​​មានភាព​រស់រវើក

Thursday, April 30, 2015

សម្តេចតេជោ៖ យើងត្រូវធ្វើឲ្យតំបន់ជនបទមានភាពរស់រវើក

ខេត្តព្រះសីហនុ ៖ យើងត្រូវធ្វើឲ្យតំបន់ជនបទមានភាពរស់រវើកយើងមិនអាចមើលរំលងវិស័យ កសិកម្មទេ។នេះជាប្រសាសន៍សម្តេចអគ្គមហាសេនាបតីតេជោហ៊ុនសែននាយក រដ្ឋមន្រ្តីនៃព្រះរាជាណាចក្រកម្ពុជាក្នុងឱកាសអញ្ជើញជាអធិបតី ក្នុងពីធីសម្ពោធដាក់ឲ្យប្រើប្រាស់ជាផ្លូវកានាព្រឹកថ្ងៃទី២៩ខែ មេសាឆ្នាំ២០១៥នូវរោងចក្រចម្រាញ់ប្រេងឆៅពីផ្លែដូងប្រេងទី២ នៅភូមិអន្លង់ក្រពើ ឃុំជើងគោ ស្រុកព្រៃនប់ ខេត្តព្រះសីហនុ ដែលមានសមត្ថភាពចម្រាញ់ប្រេងឆៅពីផ្លែដូងប្រេងបាន៤៥តោនក្នុង១ ម៉ោងដែលក្រុមហ៊ុនម៉ុងឬទ្ធីគ្រុបនិងក្រុមហ៊ុនធីស៊ីស៊ីរបស់ថៃ( MRT –TCC) បានចំណាយទុនវិនិយោគប្រមាណ២០លាន ដុល្លារអាម៉េរិកដើម្បីសាងសង់ ។

សម្តេចអគ្គមហាសេនាបតីតេជោ ហ៊ុន សែន បានមានប្រសាសន៍ វាយតម្លៃខ្ពស់ចំពោះក្រុម ហ៊ុន ម៉ុងឬទ្ធី ដែល បានសហការទុនជាមួយក្រុមហ៊ុន ធី ស៊ី ស៊ី (TCC Group) វិនិយោគទៅលើវិស័យ កសិកម្មដែលជាវិស័យអាទិភាពមួយរបស់រាជរដ្ឋាភិបាលកម្ពុជា។ សម្តេចតេជោបានចាត់ទុកក្រុមហ៊ុននេះជាក្រុមហ៊ុនគំរូ មួយនៅទូទាំងប្រទេសដែលបានស្រូបយកពលកម្មពីទីក្រុងភ្នំពេញប្រមាណ២០ភាគរយ និងជាក្រុមហ៊ុនមួយដែលកន្លងមកមានសុខដុមនីយកម្មរវាងថៅកែ និងកម្មករ។

សម្ដេចតេជោនាយករដ្ឋមន្ត្រីមានប្រសាសន៍ឲ្យដឹងថា កន្លងមកនៅពេលដែលមានការវិនិយោគចាប់ផ្ដើម អ្នកវិនិយោគដទៃគេចាប់ អារម្មណ៍ទៅលើការវិនិយោគផ្នែកសេវា ឬក៏ផ្នែឧស្សាហកម្មរយៈពេលខ្លី ដែល ងាយរកប្រាក់ចំណេញ ក៏ប៉ុន្តែការវិនិយោគលើវិស័យកសិកម្មវាលំបាក ក្នុងការ វិនិយោគទាញយកមកវិញនូវប្រាក់ចំណេញ ។ ដូច្នេះការវិនិយោគនៅចំណុច នេះជាចំណុចមួយដ៏ល្អ ហើយក៏ជាចំណុចរំឭកដាស់តឿនដល់ខេត្តដទៃទៀត ដែលត្រូវការធ្វើការវិនិយោគក្នុងវិស័យកសិកម្ម ជាការចាប់ផ្ដើមប្រកួតប្រជែងនៃ កម្លាំងពលកម្មហើយ ។

សម្ដេចតេជោថ្លែងថា ស្ថិតក្នុងក្របខ័ណ្ឌនៃគោលនយោ បាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ ហើយអ្វីដែលខ្ញុំចង់បានគឺ ពីរយ៉ាង ទន្ទឹម និងថែទាំឧស្សាហកម្មអតិពលកម្មដែលយើងកំពុងមាន ទាក់ទិន ជាមួយនិងវិស័យវាយនភណ្ឌ ផ្នែកសម្លៀកបំពាក់ និងស្បែកជើង យើងក៏ត្រូវប្រឹង ទាក់ទាញនៅវិស័យឧស្សហកម្ម ដើម្បីមកវិនិយោគ ដែលផ្ដល់អាទិភាពពីរយ៉ាង៖ ទី១ គឺឧស្សាហកម្មកែច្នៃលើផលិតផលវត្ថុធាតុដើមដែលកម្ពុជាមានស្រាប់ហើយ ប្រើឱ្យអស់លទ្ធភាពនៃវត្ថុធាតុដើមយើងមានស្រាប់ ដើម្បីបង្កើតតម្លៃបន្ថែម ក្នុង សេដ្ឋកិច្ចរបស់កម្ពុជា ។ ទី២យើងចង់បានការវិនិយោគដែលមានចរិតជាសកល ដូចជាការវិនិយោគលើបញ្ហាទាក់ទងជាមួយនឹងការបង្កើតបច្ចេកវិទ្យាថ្មី ប៉ុន្តែ ឧស្សាហកម្មទាក់ទងនឹងការកែច្នៃផលិតផលកសិកម្មវិញ គឺជាអាទិភាពសំខាន់ របស់យើង ដូច្នេះរាជរដ្ឋាភិបាលគ្មានអ្វីក្រៅតែពីស្វាគមន៍អ្នកវិនិយោគក្នុងស្រុក ហើយក៏ស្វាគមន៍អ្នកវិនិយោគមកពីក្រៅស្រុក ។ សម្តេចថ្លែងថា គ្រប់ខេត្តទាំង អស់ការវិនិយោគផ្ទាល់ពីបរទេសក្ដី ការវិនិយោគនៅក្នុងប្រទេសក្ដីគឺនាំមកនូវ ការរីកចម្រើននៃសេដ្ឋកិច្ចរបស់យើង ហើយយើងលើកទឹកចិត្តឱ្យមានការវិនិ យោគនៅទីជនបទ ដើម្បីបង្កើតឡើងការរីកចម្រើននូវសេដ្ឋកិច្ចជនបទរបស់ យើង។យើងត្រូវធ្វើឲ្យតំបន់ជនបទមានភាពរស់រវើកយើងមិនអាចមើលរំលង វិស័យកសិកម្មទេ។លោកឧកញ៉ា ម៉ុងឬទ្ធី ស្ថាបនិកក្រុមហ៊ុនម៉ុងឬទ្ធីវិនិយោគទុនដំណាំដូងប្រេងកម្ពុជា បានមានប្រសាសន៍ឲ្យដឹងថា៖ នេះជារោងចក្រចម្រាញ់ប្រេងឆៅពីផ្លែដូងប្រេងទី២ បន្ទាប់ពីរោងចក្រទី១ត្រូវបានកសាងឡើងនៅឆ្នាំ២០០២ ក្រុមហ៊ុនបានធ្វើការសាងសង់រោងចក្រចម្រាញ់ប្រេងដូងដែលមានកម្លាំង ផលិត៥តោនក្នុង១ម៉ោង ប៉ុន្តែ រហូតមកដល់បច្ចុប្បន្នបានពង្រីកកម្លាំងផលិតរហូតដល់៣០តោនក្នុង១ម៉ោង។ ទីតាំងរោងចក្រចម្រាញ់ដូងប្រេងនេះស្ថិតនៅជើងភ្នំបូកគោក្នុង ភូមិអន្លុងក្រពើជាទីរហោស្ថានមួយ ដែលពីមុនឆ្នាំ១៩៩៦ គឺជាទឹកដីសមរភូមិក្តៅប្រទាញប្រទង់ និង ជាកន្លែងឆ្លងកាត់របស់ខ្មែរក្រហម ប៉ុន្តែឥឡូវនេះបានប្រែក្លាយទៅជាទីប្រជុំជនមួយដែលមានហេដ្ឋារចនា សម្ព័ន្ធគ្រប់បែបយ៉ាងរួមមានភូមិអតីតប្រជាជនខ្មែរក្រហមសាលារៀន មណ្ឌលសុខភាព ប្រព័ន្ធ អគ្គិសនី ប្រព័ន្ធទឹកស្អាត ប្រព័ន្ធធារាសាស្ត្រ ប្រព័ន្ធសន្តិសុខ ផ្លូវថ្នល់ ចាក់បេតុង និងផ្លូវ ក្រាលគ្រួសក្រហម និង មានការរៀបចំ ប្រព័ន្ធគ្រប់គ្រងរដ្ឋបាលមួយពិតប្រាកដ។

លោកឧកញ៉ា ម៉ុង ឬទ្ធីបានឲ្យដឹងទៀតថា ៖ ការសាងសង់រោងចក្រចម្រាញ់ដូងប្រេងនេះកាលពីឆ្នាំ២០០២ក្រុមហ៊ុនបាន សាងសង់រោងចក្រចម្រាញ់ដូងប្រេងទី១ដែលមានកម្លាំងផលិត ៣០ តោនផ្លែដូងស្រស់ក្នុង១ម៉ោង ដាក់ឱ្យ ដំណើរការរួមកហើយ។ តែដោយសារកំណើនផ្លែដូងប្រេងស្រស់ចេះតែមានការកើនឡើងតម្រូវ ឱ្យក្រុមហ៊ុនត្រូវសាងសង់រោងចក្រចម្រាញ់ដូងប្រេងទី២នេះបន្ថែមមួយ ទៀតដែលមានសមត្ថភាព ផលិត៤៥តោន ក្នុង១ម៉ោងចំណាយទុនវិនិយោគ២០លាន ដុល្លារអាម៉េរិក។ ទន្ទឹមនេះ ក្រុមហ៊ុនក៏មានផែនការសាងសង់រោងចក្រផលិតប្រេងឆៅដើម្បីបម្រើ ទីផ្សារក្នុងស្រុក និងនាំចេញទៅបរទេស ។

ក្រុមហ៊ុនបានទទួលដីសម្បទានក្នុងឆ្នាំ១៩៩៦ទំហំ១១,០០០ ហិកតាក្នុងនោះដាំ ដូងប្រេងបាន៦,២០០ហិកតារីឯផ្ទៃដីដែល នៅ សេសសល់ប្រមាណ៥,០០០ហិកតា បានអនុវត្តតាមយុទ្ធសាស្ត្រស្បែកខ្លា។ បន្ទាប់មកក្រុមហ៊ុនទទួលបានដីសម្បទានពីក្រសួងបរិស្ថាន និង បានប្រមូលទិញពីប្រជាជនថែមទៀតសរុបផ្ទៃដីបច្ចុប្បន្នក្រុមហ៊ុន ដាំដូងប្រេងបានចំនួន១៦,១៥០ ហិកតាស្មើនឹង២ ២១៦ ៥៧២ដើម។ ក្នុងរយៈពេល១៩ឆ្នាំកន្លងមកនេះក្រុមហ៊ុនបានបោះទុន វិនិយោគលើដំណាំដូរប្រេងអស់ទឹកប្រាក់ប្រមាណ ១៥០ លានដុល្លារអាម៉េរិករួចមក ហើយ។ ចាប់តាំងពីឆ្នាំ២០១២ ដល់ ២០១៤ ក្រុមហ៊ុនបានប្រមូលផលផ្លែដូងប្រេងស្រស់ចំនួន ៦៨៥ ២៣៧ តោននិងផលិតជាប្រេង ឆៅបានចំនួន១៣១ ៣១០តោនដែលបាននាំចេញទៅកាន់ប្រទេសម៉ាឡេស៊ី វៀតណាម ថៃ ឥណ្ឌា ចិន កូរ៉េខាងត្បូង ស្វីស និង សហគមន៍អឺរ៉ុប ។ រីឯកម្លាំងពលកម្មឆ្នាំ ១៩៩៦ ក្រុមហ៊ុនមានត្រឹមតែ៣៥០នាក់ ប៉ុណ្ណោះប៉ុន្តែបច្ចុប្បន្ននេះចំនួនបានកើនឡើងរហូតដល់ទៅ២.៩៦០នាក់។ ក្រុមហ៊ុន បានសាងសង់ផ្ទះ ថ្មសម្រាប់បុគ្គលិកកម្មករស្នាក់នៅអចិន្ត្រៃយ៍បានចំនួន២០អគារ ដែលអាចស្នាក់នៅ បានប្រមាណ១ ០០០ នាក់។ លោក ចារើន ស៊ីរិវឌ្ឍនៈផាក់ឌី ប្រធានសម្ព័ន្ធក្រុមហ៊ុន ធី ស៊ី ស៊ី (TCC- Group)មកពីប្រទេសថៃដែលគេដឹងថាជាសេដ្ឋីលំដាប់ទី៣របស់ថៃ ដែលបានធ្វើការវិនិយោគទុននៅកម្ពុជាជាមួយក្រុមហ៊ុន ម៉ុងឬទ្ធី បានមានប្រសាសន៍ថា កាលពីឆ្នាំ ២០០៦ ក្រុមហ៊ុន បានធ្វើការវិនិយោគទុនលើវិស័យដំណាំដូងប្រេង រួមជាមួយក្រុម ហ៊ុនម៉ុងឬទ្ធី ដែលនៅពេលនោះមានផ្ទៃដី ដាំដុះចំនួន ៦,២០០ ហិកតាប៉ុណ្ណោះមាន រោងចក្រចម្រាញ់ដូងប្រេងខ្នាត ២០តោន ក្នុង១ ម៉ោងនិងអាជីវកម្មកំពង់ផែដែលរួមគ្រប់គម្រោងការមានតម្លៃដើមទុនប្រមាណ ៤០លានដុល្លារ។ រហូតមកដល់ពេលនេះ ក្រុមហ៊ុនបានបោះទុនជាង៨៩លានដុល្លាររួចហើយក្នុងការវិនិយោគនៅ កម្ពុជា ។