សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឲ្យ Hao
Ping ប្រធានមហាសន្និបាទ UNESCO និងជាសហប្រធាន អាយស៊ីស៊ីព្រះវិហារ (ICC Preah Vihear) ចូលជួបសំដែងការគួរសម នៅវិមានសន្តិភាព ទីស្តីការនាយករដ្ឋមន្ត្រី នាព្រឹកថ្ងៃទី ០១ ធ្នូ។
ឯ.ឧ អ៊ាង សុផល្លែត ជំនួយការផ្ទាលសម្តេចតេជោ បានបញ្ជាក់ប្រាប់អ្នកកាសែតនៅក្រោយជំនួប នោះថា លោក Hao Ping បានសំដែងនូវអំណរគុណចំពោះសម្តេចតេជោនាយករដ្ឋមន្ត្រី ក៍ដូចជាព្រះរាជា ណាចក្រកម្ពុជា ដែលបានទទួលរូបចំលាក់ពីសហរដ្ឋអាមេរិកមកវិញ ។ លោកបានជំរាបជូនសម្តេចថា អាយ ស៊ី ស៊ី អង្គរ ដែលត្រូវបានបង្កើតឡើងកន្លងមក ដោយបានទទួលជោគជ័យយ៉ាងខ្លាំង ហើយនាពេលនេះការបង្កើត អាយ ស៊ី ស៊ី ព្រះវិហារគឺដើម្បីរួមចំណែកដល់ការអភិរក្សបេតិកភណ្ឌពិភពលោក ។
ក្នុងន័យនេះ ចិន នឹងប្រឹងប្រែងឲ្យអស់លទ្ធភាពជាមួយនឹងឥណ្ឌា ដើម្បីធ្វើយ៉ាងណាឲ្យមហាសន្និបាត UNESCO ដែលនឹងប្រព្រឹត្តិទៅនៅថ្ងៃពុធ ទី ០៣ ធ្នូ នៅសៀមរាបទទួលបានជោគជ័យ។
សម្តេចតេជោ ហ៊ុន សែន បានបញ្ជាក់ថា ជំនួបនាពេលនេះ នឹងបង្កើតនូវបរិយាកាសមួយដើម្បីឈានដល់ការប្រជុំនៅថ្ងៃពុធនេះ។ ក្នុងន័យនោះ សម្តេចតេជោ បានស្នើឲ្យភាគីឥណ្ឌាជួយផ្តួចផ្តើមនៅឥណ្ឌាដើម្បីគៀងគរថវិកាដើម្បីជួយជួសជុលដល់ប្រាង្គប្រាសាទ ដែលមានរចនាបថបែបហិណ្ឌូនៅកម្ពុជា តួយ៉ាងគឺប្រាសាទព្រះវិហារតែម្តង។ សម្តេចតេជោ ក៍បានស្នើសុំឲ្យភាគីឥណ្ឌា ពិចារណាធ្វើយ៉ាងណាជំរុញការហោះហើរគោលបំណងបង្កើនភ្ញៀវទេសចរមកកាន់កម្ពុជាផងដែរ។ ក្នុងនោះ សម្តេចតេជោ ក៍ជំរុញឲ្យមានការហោះហើរកាន់តែច្រើនថែមទៀត ដើម្បីជំរុញភ្ញៀវទេសចរចិនមកកម្ពុជា ។ សម្តេចបន្ថែមថា កម្ពុជាពិតជាចង់បានទេសចរមកកម្ពុជាច្រើនឡើងៗ ប៉ុន្តែក៏មិនត្រូវឲ្យទេសចរក្នុងរូបភាពអវិជ្ជមានណាមួយធ្វើឲ្យប៉ះពាល់
ដល់បេតិកភ័ណ្ឌ និង វប្បធម៌កម្ពុជានោះទេ ពោលគឺទេសចរត្រូវគោរពវប្បធម៌របស់កម្ពុជា។
គួរបញ្ជាក់ថា អាយស៊ីស៊ីព្រះវិហារ ដែលត្រូវបានបង្កើតឡើងនេះ មានប្រទេស ចិន និងឥណ្ឌា ជាសហប្រធាន ហើយសហប្រធានទាំងពីរ នឹងធ្វើការគៀងគរថវិកា ពីប្រទេសខ្លួន និងសមាជិកដទៃទៀត ដើម្បីគាំពាដល់ការអភិរក្ស និងជួសជុលប្រាសាទព្រះវិហារ។ កន្លងទៅអាយស៊ីស៊ីអង្គរ ដែលមានជប៉ុន និងបារាំងធ្វើជាសហប្រធាន បានបង្កើតឡើងតាំងពីឆ្នាំ១៩៩៣នោះ បានជួយដល់ការងារអភិរក្ស និងជួសជុលប្រាង្គ ប្រាសាទអង្គរមិនតិចនោះទេ៕
No comments:
Post a Comment