គម្រោងសាងសង់ផ្ទះគំរូ ដែលនឹងត្រូវសាងសង់លើផ្ទៃក្រឡាប្រមាណ១ហិចតា នៅភូមិកំពង់អំពិល ឃុំបូរីជលសា ស្រុកបូរីជលសា ខេត្តតាកែវ ដែលក្នុងនោះមានផ្ទះគំរូចំនួន៤៨ខ្នង វិហារអ៊ីស្លាម១ សាលារៀន១ខ្នងមានពីរបន្ទប់ រួមទាំងគម្រោងអភិវឌ្ឍផ្សេងៗមួយចំនួនទៀត ចំណាយថវិការសរុបប្រមាណ៥៣០ពាន់ដុល្លារសហរដ្ឋអាមេរិក ត្រូវបានប្រារព្ធពិធីបញ្ចុះបឋមសីលាសាងសង់ នៅព្រឹកថ្ងៃទី២៥ ខែតុលា ឆ្នាំ២០១៤នេះ ក្រោមអធិបតីភាពដ៏ខ្ពង់ខ្ពស់ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមការងារថ្នាក់ជាតិចុះជួយខេត្តតាកែវ តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
នេះ គឺជាគម្រោងសាងសង់លើកទី៣ហើយ ក្រោមជំនួយឧបត្ថម្ភរបស់សមាគមពិភពលោកនៃក្តីមេត្តា និងសម្របសម្រួលសង្គមនៃរដ្ឋកូវ៉ែត។
ឯកឧត្តម ឡាវ វណ្ណៈ អភិបាល នៃគណៈអភិបាលខេត្តតាកែវ បានឲ្យដឹងថា នៅស្រុកបូរីជលសា មានប្រជាពលរដ្ឋខ្មែរអ៊ីស្លាមរស់នៅ៧ភូមិ ក្នុងនោះមាន៤៨គ្រួសារ ត្រូវបានសាងសង់ផ្ទះធ្វើជាភូមិគម្រូនៅពេលនេះ ក្នុងចំណោមប្រជាពលរដ្ឋខ្មែរអ៊ីស្លាមចំនួន១៥០២គ្រួសារ និង២០ភូមិក្នុងខេត្តតាកែវទាំងមូល ហើយតាងនាមថ្នាក់ដឹកនាំខេត្ត និងក្នុងនាមប្រជាពលរដ្ឋនៃខេត្តតាកែវ ឯកឧត្តមសូមថ្លែងអំណរគុណដ៏ជ្រាលជ្រៅចំពោះសមាគមពិភពលោក នៃក្តីមេត្តា ដែលបានជួយអភិវឌ្ឍនៅក្នុងតំបន់នេះ។
លោក មហាម៉ាត់ កូអ័ក្ស ប្រធានសមាគមពិភពលោក នៃក្តីមេត្តា និងសម្របសម្រួលសង្គមនៃរដ្ឋកូវ៉ែត បានមានប្រសាសន៍ថា ជាមួយនឹងផែនការគម្រោងសាងសង់ភូមិគម្រូទី៣នេះ គឺលោកបានមកពិនិត្យទីតាំងភូមិនេះដោយផ្ទាល់ ឃើញបងប្អូនក្នុងភូមិនេះរស់នៅលើផ្ទៃទឹក លើកក៏បានស្នើឡើងដើម្បីអនុវត្តគម្រោងដ៏សំខាន់មួយនេះ។ លោក មហាម៉ាត់ កូអ័ក្ស បានបន្តថា « កត្តាដែលនាំឲ្យលោកចាប់ផ្តើមការងារនេះ គឺអនុវត្តតាមប្រសាសន៍របស់សាហារីមូហាម៉ាត់ ថា ៖ ពុំមែនជាប្រជាជាតិយើងទេ អ្នកដែលហូបឆ្អែតដេកលក់ ហើយញាតិជិតខាងរបស់គេដេកឃ្លាននោះ»។ យ៉ាងណាមិញបងប្អូនរួមជាតិរបស់យើង កំពុងរស់នៅក្នុងស្ថានភាពខ្វះខាតទីជម្រក។
ឯកឧត្តម ឌីរ៉ា ណាសៀរ អាត់ទូវ៉ៃជីរីយ៍ ឯកអគ្គរដ្ឋទូតកូវ៉ែតប្រចាំកម្ពុជា បានមានប្រសាសន៍ថា គម្រោងសាងសង់លំនៅដ្ឋាន វិស័យអប់រំ មណ្ឌលសុខភាព និងសេវាសាធារណៈសម្រាប់អ្នកភូមិត្រូវបានចាត់ទុកជាវិស័យស្នូល និងសំខាន់សម្រាប់សកម្មភាពសប្បុរសធម៌ មនុស្សធម៌ នៅកម្ពុជា និងជាសេចក្តីត្រូវការចាំបាច់បំផុត ជាពិសេសនៅតាមភូមិឃុំ និងទីជនបទ ដើម្បីលើកកំពស់សេវាសាធារណៈ ការរស់នៅថ្លៃថ្នូរ និងការអភិវឌ្ឍឲ្យកាន់តែមានភាពរីកចំរើនថែមទៀតលើគ្រប់វិស័យ។
ឯកឧត្តមបណ្ឌិតសភាចារ្យ សុខ អាន បានមានប្រសាសន៍ថា គម្រោងសាងសង់ផ្ទះគំរូជូនប្រជាពលរដ្ឋ៤៨ខ្នងនៅពេលនេះ គឺជាគម្រោងមនុស្សធម៌ពិតៗ ដែលបានរួមចំណែកកាត់បន្ថយភាពក្រីក្ររបស់ប្រជាពលរដ្ឋ និងការអភិវឌ្ឍសង្គមកម្ពុជាឲ្យមានការរីកចំរើនថែមមួយកម្រិតទៀត។ ដើម្បីសម្រួលដល់ការធ្វើដំណើររបស់ប្រជាពលរដ្ឋនៅក្នុងឃុំបូរីជលសា នៃស្រុកបូរីជលសា ឯកឧត្តមបណ្ឌិតសភាចារ្យ ក៏បានប្រកាសពីគម្រោងបើកការដ្ឋានសាងសង់ផ្លូវមួយខ្សែប្រវែង២០គីឡូម៉ែត្រ ដែលកំពុងខូចខាត នៅក្នុងរយៈពេល២ ឬ៣ខែខាងមុខទៀត។ ឯកឧត្តម បានមានប្រសាសន៍បន្ថែមថា ស្របពេលដែលបណ្តាប្រទេសមួយចំនួនកំពុងប្រឈមនឹងជម្លោះរវាងសាសនា និងសាសនា ខុសពីកម្ពុជា ដែលបងប្អូនអ៊ីស្លាម បាននិងកំពុងរស់នៅដោយសុខដុមនីយកម្មក្នុងប្រទេសជាមួយប្រជាពលរដ្ឋកម្ពុជា ដែលជាង៩០ភាគរយគោរពព្រះពុទ្ធសាសនា។
ឯកឧត្តមបានបន្តថា រាជរដ្ឋាភិបាលកម្ពុជាពិតជាត្រូវការកិច្ចសហប្រតិបត្តិការសម្រាប់ការអភិវឌ្ឍ ហើយថ្ងៃនេះ គឺជាសក្ខីភាព នៃកាយវិការសប្បុរសធម៌របស់សមាគមពិភពលោកនៃក្តីមេត្តា និងសម្របសម្រួលសង្គមនៃរដ្ឋកូវ៉ែត ដែលបានជួយលើគម្រោងសាងសង់ភូមិគំរូនេះឡើង និងឯកឧត្តមក៏បានអំពាវនាវឲ្យបន្តជួយឧបត្ថម្ភក្នុងការអភិវឌ្ឍបន្ថែមទៀត។ ក្រៅពីនេះ ឯកឧត្តមបណ្ឌិតសភាចារ្យ សុខ អាន ក៏បានមានប្រសាសន៍អំពីគម្រោងរៀបចំផ្សារ មូលនិធិសមធម៌ និងសហគមន៍កសិកម្មក្នុងពេលខាងមុខនេះក្នុងស្រុកបូរីជលសា ដោយឲ្យប្រជាពលរដ្ឋមានការរចងក្រងគ្នាក្នុងមូលដ្ឋាន និងជម្រុញក្រុមការងារថ្នាក់ជាតិឲ្យជួយដោះស្រាយពូជស្រូវ និងការផ្គត់ផ្គង់ជី ដើម្បីបង្កើនជីវភាពរស់នៅសមរម្យជូនប្រជាពលរដ្ឋឲ្យកាន់តែមានភាពល្អប្រសើរឡើង។
គួរបញ្ជាក់ផងដែរថា សកម្មភាពសមនុស្សធម៌របស់សមាគមពិភពលោក នៃក្តីមេត្តា និងសម្របសម្រួលសង្គមនៃរដ្ឋកូវ៉ែត និងការរួមចំណែកនៃម្ចាស់ជំនួយទូទៅ រហូតមកដល់ពេលនេះ បានជួយថវិការលើគម្រោងសាងសង់នានា ក្នុងទឹកប្រាក់ចំនួនប្រមាណ១៥លានដុល្លារសហរដ្ឋអាមេរិកហើយ សម្រាប់ចំណាយលើគម្រោងផ្សេងៗ ដូចជាគម្រោងសង្គមកិច្ច អប់រំ សុខាភិបាល អភិវឌ្ឍ និងជំនួយមនុស្សធម៌៕
No comments:
Post a Comment