មន្ទីរពេទ្យជោរៃភ្នំពេញ ដែលបានសាងសង់ឡើង ក្នុងទំហំទឹកប្រាក់វិនិយោគ ៤២លាន ដុល្លារអាមេរិក មានទីតាំងលើ ផ្ទៃដីទំហំ ៥០០០០ម៉ែត្រការ៉េ នៅខាងត្បូង ផ្លូវជាតិលេខ១ ក្នុងភូមិបឹងឈូក សង្កាត់ និរោធ ខណ្ឌមានជ័យ រាជធានីភ្នំពេញ នាព្រឹកថ្ងៃទី១៣ ខែមករា ឆ្នាំ២០១៤ ត្រូវបានសម្ពោធដាក់ឲ្យប្រើប្រាស់ក្រោមអធិបតីភាពសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងឯកឧត្តម ង្វៀន តាន់យ៉ុង នាយករដ្ឋមន្ត្រីនៃសាធារណរដ្ឋសង្គមនិយមវៀតណា។
ថ្លែងក្នុងពិធីសម្ពោធមន្ទីរពេទ្យជោរៃ ឯកឧត្តម ង្វៀន តាន់យ៉ុង នាយករដ្ឋមន្ត្រីវៀតណាមបានចាត់ទុកមន្ទីរពេទ្យជោរៃភ្នំពេញ ជាសមិទ្ធផលថ្មីមួយបន្ថែមទៀត នៃកិច្ចសហប្រតិបត្តិការ រវាងប្រទេសទាំងពីរ កម្ពុជា និងវៀតណាម។ ឯកឧត្តមនាយករដ្ឋមន្ត្រីបញ្ជាក់ថា មន្ទីរពេទ្យជោរៃភ្នំពេញ គឺជាគម្រោងដំបូងនៃកិច្ចសហប្រតិបត្តិការលើវិស័យសុខាភិបាល ហើយសង្ឃឹមថា គ្រូពេទ្យនៅទីនេះ គឺជាស្ពានដ៏ល្អនៃទំនាក់ទំនងរវាង ប្រជាជននៃប្រទេសទាំងពីរកម្ពុជានិងវៀតណាម។
សម្តេចអគ្គមហាសេនាបតីតេជោ ហ៊ុន សែន ក៏បានមានប្រសាសន៍រម្លឹកអំពីប្រវត្តិនៃការនាំឲ្យកើតមានមន្ទីរពេទ្យជោរៃភ្នំពេញថា ដោយសង្កេតឃើញពលរដ្ឋកម្ពុជាតែងតែស្វែងរកការព្យាបាលនៅក្រៅប្រទេស ជាពិសេសប្រទេសវៀតណាម គឺមន្ទីរពេទ្យជោរៃ ដោយរាប់ទាំងសម្តេចផងនោះ ដូច្នេះទើបសម្តេចបានស្នើសុំឱ្យមានការវិនិយោគមន្ទីរពេទ្យ ដ៏ទំនើបបែបនេះមួយ នៅកម្ពុជា ក្នុងគោលបំណងដើម្បីកាត់បន្ថយគ្រោះថ្នាក់ ដោយសារផ្លូវវែងឆ្ងាយទៅកាន់ប្រទេសវៀតណាម។ ដោយសារហេតុនេះហើយ ទើបសម្តេច និងលោកនាយករដ្ឋមន្ត្រីវៀតណាម ពិនិត្យឱ្យមានការកសាងមន្ទីរពេទ្យនេះឡើងនៅលើទីតាំងសមស្របមួយ ដើម្បីឆ្លើយតបទៅនឹងសេចក្តីត្រូវការរបស់អ្នកអាចទទួល អ្នកជំងឺមកពីគ្រប់ទីកន្លែង ដោយរាប់ទាំងជនបរទេស ដែលរស់នៅកម្ពុជា និងអ្នកទេសចរណ៍ផងដែរ។
សម្តេចតេជោនាយករដ្ឋមន្ត្រី បានអំពាវនាវឱ្យពលរដ្ឋខ្មែរ ដែលត្រូវការពិនិត្យព្យាបាលជំងឺ ឱ្យមកពិនិត្យព្យាបាលនៅមន្ទីពេទ្យជោរៃភ្នំពេញ ពីព្រោះមិនចំណាយពេលវេលា និងផ្លូវវែងឆ្ងាយ ទៅប្រទេសវៀតណាមទៀតឡើយ។
លោក ង្វៀន ហ័ងណាម ( Nguyen Hoang Nam) ប្រធានមន្ទីរពេទ្យជោរៃ បានឲ្យដឹងថា មន្ទីរពេទ្យជោរៃភ្នំពេញ បានបញ្ចុះបឋមសិលាសាងសង់ កាលពីថ្ងៃទី១៥ ខែឧសភា ឆ្នាំ២០១០ និង បញ្ចប់ការសាងសង់ នាខែវិច្ឆិកា ឆ្នាំ២០១៣ កន្លងទៅ បំពាក់ដោយឧបករណ៍ និងលក្ខណៈបច្ចេកទេសត្រូវបាននាំចូលពីក្រៅប្រទេសទាំងអស់ ដែលមានស៊េរីខ្ពស់ តាមកម្រិតស្តង់ដារឆ្នាំ២០១៣។
មន្ទីរពេទ្យនេះ មានអគារធំៗចំនួន៣ ដែលមានទំហំ ១០០០០ម៉ែត្រការ៉េ បើកបម្រើសេវាពិនិត្យជំងឺ និងផ្តល់ប្រឹក្សាតាមផ្នែកជំនាញជូនអ្នកជំងឺដោយសមរម្យ។ បច្ចុប្បន្នមន្ទីរពេទ្យនេះ មានបន្ទប់សម្រាករៀបចំទៅតាមបទដ្ឋានចំនួន ១០៦បន្ទប់ មានគ្រែប្រមាណ២០០ និងបុគ្គលិកមានសមត្ថភាព ទាំងក្នុងស្រុកនិងក្រៅស្រុក ប្រមាណ២០០នាក់ បម្រើការងារដោយសុជីវធម៌ និងវិជ្ជាជីវៈ រួមមាន វេជ្ជបណ្ឌិត គិលានុបដ្ឋាក គិលានុបដ្ឋាយិកា និងបុគ្គលិកគ្រប់គ្រងរដ្ឋបាល។
ប្រធានមន្ទីរពេទ្យជោរៃ បានបន្តឲ្យដឹងដែរថា មន្ទីរពេទ្យជោរៃភ្នំពេញ មានចំនួន ៤០ឯកទេស ក្នុងនោះ មានជំនាញខាងរំលាយអាហារ ត្រចៀក បំពង់ក លលាដ៍ក្បាល ថ្លើម បេះដូង វះកាត់ពុះច្រៀកបេះដូង តសរសៃខួរក្បាល វះកាត់តឆ្អឹង បាញ់ក្រួស ក្នុងប្រមាត់ និងវះកាត់កែសម្ផស្ស។
ក្រៅពីគ្រូពេទ្យជំនាញរបស់វៀតណាម កម្ពុជាក៏មានវេជ្ជបណ្ឌិត ចំនួន៥០នាក់ ដែលបានទៅសិក្សាជំនាញច្បាស់លាស់នៅប្រទេសវៀតណាម និងមានគិលានុបដ្ឋាយិកាចំនួន៨០នាក់បានសិក្សាបន្ថែម លើមុខជំនាញដាក់ថ្នាំសណ្តំ ផ្នែកពិសោធន៍ វិទ្យុសាស្ត្រ ឆ្មប ឱសថសាស្ត្រ ម៉ាស៊ីន អេកូថតឆ្លុះ លើមុខជំនាញ ជាង៣០ និង គិលានុបដ្ឋាយិកាទូទៅ៕
No comments:
Post a Comment