ទេសរដ្ឋមន្រ្តី អូស្មាន ហាស្សាន់ អញ្ជើញប្រគល់អង្ករ ម៉ាស់ និងថវិកាដល់សង្កាត់ទាំង៧ ក្នុង ខណ្ឌឫស្សីកែវ

 នារសៀលថ្ងៃទី១៧ ខែមីនា ឆ្នាំ២០២១ ឧកញ៉ាបណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានក្រុមការងាររាជរដ្ឋាភិបាលចុះជួយខណ្ឌឫស្សីកែវអញ្ជើញប្រគល់អង្ករចំនួន១១តោន និងម៉ាសចំនួន ៤ម៉ឺនម៉ាស់ ដែលជាអំណោយរបស់លោក ស្រី ម៉ាណ ណាវី តំណាងរាស្ត្រមណ្ឌលរាជធានីភ្នំពេញ និងជាអនុប្រធានក្រុមការងារចុះជួយខណ្ឌឫស្សីកែវ។ ពិធីប្រគល់ ប្រព្រឹត្តនៅមណ្ឌលម៉ូឌែល៥ ដែលអំណោយនេះសម្រាប់ជូនទៅសង្កាត់នីមួយៗដើម្បីចែកជូនដល់បងប្អូនប្រជាពលរដ្ឋដែលកំពុងធ្វើចត្តាឡីស័កនិងគ្រួសារដែលមានផ្ទុកជម្ងឺ Covid19 ក៏ដូចជាការ ចូលរួមដោះស្រាយទុក្ខលំបាកក្នុងគ្រានៃវិបត្តិរីករាលដាលរបស់វីរុសកូវីដ១៩ក្នុងសហគមន៍។

អង្ករចំនួន ១១តោន ក្នុងនោះក៏មានម៉ាសចំនួន៤ម៉ឺន ម៉ាស់ ត្រូវបានប្រគល់ជូនសង្កាត់ទាំង៧ និង គណៈដឹកនាំជាន់ខ្ពស់នៃសាសនិកឥស្លាមកម្ពុជាក្នុងមួយសង្កាត់ទទួលបានអង្ករចំនួន១ តោន ម៉ាស់ចំនួន៥០០០ម៉ាស់ ទឹកអាកុល៣០លីត្រ សាលាខណ្ឌ ឬស្សីកែវ ទទួលបានអង្ករ ចំនួន ២តោន ម៉ាសចំនួន៥០០០ម៉ាសនិងថវិកាចំនួន៤លានរៀល និងគណ:ដឹកនាំជាន់ខ្ពស់ នៃសាសនិកឥស្លាមកម្ពុជាទទួលបាននូវអង្ករចំនួន ១តោន៕

ថ្នាក់ដឹកនាំខេត្តកោះកុង ដឹកនាំក្រុមការងារ ដើម្បីជំរុញការបង្កើត និងប្រើប្រាស់ប្រព័ន្ធ QR Code “ទប់ស្កាត់កូវីដ Stop Covid”

កោះកុង៖ នៅថ្ងៃទី១៨ ខែមីនា ឆ្នាំ២០២១ ដោយមានការចង្អុលណែនាំរបស់អភិបាលខេត្តកោះកុង លោក អ៊ុក សុតា នាយករងរដ្ឋបាលខេត្តកោះកុង និងជាប្រធានក្រុមមន្ត្រីបង្គោលព័ត៌មានវិទ្យា សាលាខេត្ត បានដឹកនាំក្រុមការងារ ដើម្បីជំរុញការបង្កើត និងប្រើប្រាស់ប្រព័ន្ធ QR Code “ទប់ស្កាត់កូវីដ Stop Covid” គោលដៅចេញ ចូលសំខាន់ៗក្នុងខេត្ត និងអគាររដ្ឋបាលខេត្ត មន្ទីរ អង្គភាព រដ្ឋបាលក្រុង ស្រុក រដ្ឋបាលឃុំ សង្កាត់ និងប៉ុស្តិ៍នគរបាលរដ្ឋបាលឃុំ សង្កាត់ ព្រមទាំងវត្ត និងទីតាំងមួយចំនួនក្នុងខេត្ត។

ជាមួយគ្នានេះផងដែរ ក្រុមការងារបានជំរុញ ឱ្យមន្ត្រីបង្គោលក្រុង ស្រុក និងមន្ទីរ អង្គភាពទាំងអស់បន្តផ្សព្វផ្សាយ និងបង្កើន នូវការស្កេន ជាប្រចាំរបស់មន្ត្រី និងអ្នកដែលមកស្នើសូមសេវានានា នៅទីតាំងរបស់ខ្លួន មួយវិញទៀតត្រូវអនុវត្តឱ្យបានខ្ជាប់ខ្ជួនបំផុត តាមការណែនាំរបស់ក្រសួងសុខាភិបាល និងស្ថាប័នមានសមត្ថភាពកិច្ចពាក់ព័ន្ធ៕

អង្គភាពបោសសម្អាតមីនខេត្ត មានផែនការបោសសម្អាតមីន និងយុទ្ធភ័ណ្ឌមិនទាន់ផ្ទុះនៅខេត្តប៉ៃលិន ឱ្យអស់នៅឆ្នាំ២០២៥

 ប៉ៃលិន៖ នៅសាលាខេត្តប៉ៃលិន ថ្ងៃទី១៧ ខែមីនា ឆ្នាំ២០២១ លោកស្រី បាន ស្រីមុំ អភិបាលខេត្តប៉ៃលិន បានដឹកនាំកិច្ចប្រជុំពិភាក្សា ជាមួយបណ្តាអង្គភាពបោសសម្អាតមីន និងយុទ្ធភ័ណ្ឌមិនទាន់ផ្ទុះ ដែលកំពុងធ្វើសកម្មភាពនៅក្នុងភូមិសាស្ត្រខេត្តប៉ៃលិន ដូចជា៖ ក្រុមការងារផែនការសកម្មភាពមីន ម៉ាពូ (MAPU) កងឯកភាពកំចាត់មីនទី៣ ស៊ីម៉ាក់ (CMAC) និងអង្គការហាឡូត្រាស្ត (HALO Trust ដើម្បីអនុម័តដីចំការមីន សំរាប់បញ្ចូលក្នុងផែនការបោសសំអាតមីនឆ្នាំ២០២១ នៅខេត្តប៉ៃលិន និងអនុវត្តន៍ថវិកា។

លោកស្រី បាន ស្រីមុំ អភិបាលខេត្តប៉ៃលិន និងជាប្រធានគណៈកម្មាធិការសកម្មភាពមីនខេត្តប៉ៃលិន បានមានប្រសាសន៍លើកឡើងថា រហូតមកដល់ពេលបច្ចុប្បន្ននេះ បណ្តាអង្គភាពបោសសម្អាតមីន និងគ្រាប់មិនទាន់ផ្ទុះ ដែលបានធ្វើសកម្មភាពនៅក្នុងភូមិសាស្ត្រខេត្តប៉ៃលិន បានធ្វើការបោសសម្អាតមីន និងគ្រាប់មិន ទាន់ផ្ទុះ រំដោះដីកសិកម្មជូនប្រជាពលរដ្ឋ និងរំដោះដីសំរាប់កសាងហេដ្ឋារចនាសម្ព័ន្ធនានា ព្រមទាំងបានកាត់បន្ថយអត្រាគ្រោះថ្នាក់ដោយសារមីន និងគ្រាប់មិនទាន់ផ្ទុះយ៉ាងច្រើន ហើយទទួលបានការកោតសរសើពីថ្នាក់ជាតិ និងបានយកខេត្តប៉ៃលិនជាគំរូ បង្ហាញដល់ខេត្តផ្សេងៗ ទៀតផង។

អភិបាលខេត្តបានមានប្រសាសន៍បន្តថា «នៅក្នុងឆ្នាំ២០២១នេះ យើងត្រូវខិតខំជំរុញការបោសសម្អាតមីន និងគ្រាប់មិនទាន់ផ្ទុះបន្ថែមទៀត ធ្វើយ៉ាងណាប្រឹងប្រែង អោយអស់ពីលទ្ធភាព ដើម្បីសំរេចឱ្យបានតាមផែនការកំណត់ ដូច្នេះយើងត្រូវជំរុញសកម្ម ភាពចុះពិនិត្យជាក់ស្តែងដល់ចំការមីន ដើម្បីអោយបានដឹងពីការលំបាក និងភាពងាយស្រួលរបស់ប្រតិប័ត្តករក្នុងការដោះមីននៅតំបន់នោះ ហើយត្រូវមានយន្តការ ផ្សព្វផ្សាយអោយបានខ្លាំងក្លាថែមទៀតដល់ប្រជាពលរដ្ឋនៅមូលដ្ឋាន អោយបានយល់ដឹងពីបញ្ហាគ្រោះថ្នាក់ដោយសារគ្រាប់មីន និងគ្រាប់មិនទាន់ផ្ទុះ។

នៅក្នុងឱកាសនោះផងដែរលោកស្រី បាន ស្រីមុំ បានមានប្រសាសន៍ថ្លែងអំណរគុណ និងកោត សរសើ ដល់អង្គភាពបោសសម្អាតមីន និងគ្រាប់មិនទាន់ផ្ទុះ ដែលកំពុងធ្វើសកម្មភាពនៅក្នុងភូមិសាស្ត្រខេត្តប៉ៃលិនទាំងអស់ និងសំណូមពរដល់ម្ចាស់ជំនួយបន្តគាំទ្រ ដើម្បីធ្វើការបោសសម្អាតគ្រាប់មីន និងយុទ្ធភ័ណ្ឌមិនទាន់ផ្ទុះនៅខេត្តប៉ៃលិន ឱ្យសម្រេចបានទៅតាមផែនការនៅឆ្នាំ២០២៥។

បើតាមរបាយការណ៍របស់លោក ឈឹម សម្បត្តិ ប្រធានអង្គភាពកំចាត់មីន ម៉ាពូ ( Mapou) ខេត្តប៉ៃលិន បានឱ្យដឹងថា ខេត្តប៉ៃលិនមានចម្ការមីនសរុប ១១៩២ចម្ការ ស្មើផ្ទៃដី ៧៩៣៤ហិកតា ហើយបានបោសសម្អាត រួចចំនួន ៧៧៨ចម្ការ រំដោះផ្ទៃដីបានចំនួន ៥១៤៦ហិកតា ដោយរកឃើញគ្រាប់មីន និងគ្រាប់មិនទាន់ ផ្ទុះ ដូចជា៖ ១-គ្រាប់មិនទាន់ផ្ទុះចំនួន ៣៤៣៨៤គ្រាប់ ២-មីនប្រឆាំងរថក្រោះចំនួន ១១០៧គ្រាប់ ៣-យុទ្ធភ័ណ្ឌមិនទាន់ផ្ទុះចំនួន ២៣៤៦៧៩គ្រាប់ ហើយចាប់តាំងពីឆ្នាំ២០០០ រហូតដល់ ឆ្នាំ២០២០ មានជនរងគ្រោះដោយសារគ្រាប់មីន និងយុទ្ធភ័ណ្ឌមិនទាន់ផ្ទុះ មានចំនួន ៦៧១នាក់ ស្រី ៧៧នាក់៕

អាជ្ញាធរជាតិអប្សរា កំពុងដកហូតដើមឈើមានហានិភ័យខ្ពស់ចំនួន៤ដើម នៅប្រាសាទក្រោលរមាស លើភ្នំគូលែន

 ក្រុមជំនាញនៃនាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាន និងនាយកដ្ឋានអភិរក្សប្រាសាទក្រៅឧទ្យានអង្គរនៃអាជ្ញាធរជាតិអប្សរា រួមជាមួយផ្នែកពាក់ព័ន្ធបានចុះពិនិត្យ និងកំពុងអនុវត្តវិធានការបន្ទាន់ចំពោះដើមឈើចំនួន៤ដើម បន្ថែមទៀតដែលបង្កហានិភ័យខ្ពស់មកលើរចនាសម្ព័ន្ធប្រាសាទក្រោលរមាស លើភ្នំគូលែន។

ការងារនេះធ្វើឡើង ដើម្បីធានាសុវត្តិភាពជូនភ្ញៀវទេសចរ និងប្រជាពលរដ្ឋ ជៀសវាងគ្រោះថ្នាក់ប៉ះពាល់ដល់អាយុជីវិត និងបង្ការកុំឲ្យប៉ះពាល់ដល់រចនាសម្ព័ន្ធប្រាសាទនេះកាន់តែធ្ងន់ធ្ងរ។

ដើមឈើដែលកំពុងកាត់ដកហូតរួមមាន ដើមសំបួរ៣ដើម និងដើមអាទិត្យ១ដើម ដែលស្ថានភាពដើមឈើទាំងនោះ ដុះទ្រេតជាប់រចនាសម្ព័ន្ធប្រាសាទ មានប្រព័ន្ធឬស និងតួដើមមិនរឹងមាំ៕

ព្រឹទ្ធសភា ចេញសេចក្តីថ្លែងការណ៍សម្តែងការខកចិត្តចំពោះសេចក្តីសម្រេចរបស់សភាអឺរ៉ុប ស្តីពីការជំនុំជម្រះក្តីប្រឆាំង និងជនល្មើសច្បាប់នៅកម្ពុជា

 ព្រឹទ្ធសភាកម្ពុជា នៅថ្ងៃទី១៧ ខែមីនា ឆ្នាំ២០២១ បានចេញសេចក្តីថ្លែងការណ៍ដោយបានសម្តែងនូវការខកចិត្ត និងសោកស្តាយបំផុតចំពោះសេចក្តីសម្រេចរបស់សភាអឺរ៉ុប នៅថ្ងៃទី១១ ខែមីនា ឆ្នាំ២០២១ ស្តីពីការជំនុំជម្រះក្តីប្រឆាំងនិងជនល្មើសច្បាប់នៅកម្ពុជា (២០២១/២៥៧៩(RSP))។

យោងតាមសេចក្តីថ្លែងការណ៍ ព្រឹទ្ធសភាកម្ពុជា បានចាត់ទុកថា សេចក្តីសម្រេចនេះ ធ្វើឡើងដោយគ្មានមូលដ្ឋានច្បាប់ មានចរិតលំអៀង និងក្រោមហេតុផលនយោបាយ និងលើកទឹកចិត្តឱ្យក្រុមឧក្រិដ្ឋជនប្រឆាំងជាមួយរាជរដ្ឋាភិបាលស្របច្បាប់ តាមរយៈការបម្រើ របៀបវារៈនយោបាយរបស់បរទេសប្រឆាំងជាតិឯង៕

សូមអានសេចក្តីថ្លែងការណ៍ខាងក្រោម៖

ក្រសួងអប់រំ ចេញសេចក្តីណែនាំ៥ចំណុចដើម្បីពង្រឹងវិធានការសុវត្ថិភាពសុខភាពសិក្សានៅតាមគ្រឹះស្ថានសិក្សា

 ដើម្បីចូលរួមបង្ការ និងទប់ស្កាត់ការរាតត្បាតនៃជំងឺកូវីដ-១៩ ចូលក្នុងគ្រឹះស្ថានសិក្សា ក្រសួងអប់រំ យុវជន និងកីឡា បានចេញសេចក្តីណែនាំបន្ថែមចំនួន៥ចំណុច ដើម្បីពង្រឹងវិធានការសុវត្ថិភាពសុខភាពសិក្សា នៅតាមគ្រឹះស្ថានសិក្សា។ នៅក្នុងសេចក្តីណែនាំរបស់ក្រសួងអប់រំ ថ្ងៃទី១៧ ខែមីនា ឆ្នាំ២០២១ បានឱ្យដឹងទៀតថា សេចក្តីណែនាំទាំង៥ចំណុច នោះរួមមាន៖

១៖ បង្កើត និងពង្រឹងភារកិច្ចរបស់គណៈកម្មការសុខភាពសិក្សានៅតាមគ្រឹះស្ថានសិក្សា ដែលមាននាយកសាលាជាប្រធាន និងមានការចូលរួមពីសហគមន៍
២៖ តាមដានជាប្រចាំនូវសកម្មភាព និងការចល័តទីកន្លែងរបស់បុគ្គលិកអប់រំក្រោមឱវាទ។
៣៖ សហការជាមួយអាជ្ញាធរដែនដី ដើម្បីតាមដាន និងគ្រប់គ្រងជនចំណូលស្រុក (ថ្មី) រួមទាំងការអនុវត្តវិធានការធ្វើចត្តាឡីស័ក។
៤៖ ក្នុងករណីមានការសង្ស័យ គ្រឹះស្ថានសិក្សាត្រូវផ្អាកដំណើរការជាបណ្តោះអាសន្ន និងត្រូវរាយការណ៍ជូនអាជ្ញាធរអប់រំតាមលំដាប់ថ្នាក់។
៥៖ ករណីមានការសង្ស័យ ឬសភាពមិនប្រក្រតី ដែលជារោគសញ្ញានៃជំងឺកូវីដ-១៩ ត្រូវរាយការណ៍ ឬទូរសព្ទទៅលេខ ១១៥ ជាបន្ទាន់៕

សូមអានសេចក្តីណែនាំរបស់ក្រសួងអប់រំ យុវជន និងកីឡា៖

រដ្ឋសភា ចេញសេចក្តីថ្លែងការណ៍សម្តែងការខកចិត្តចំពោះសេចក្តីសម្រេចចិត្តរបស់សភាអឺរ៉ុប ស្តីពីការជំនុំជម្រះក្តីប្រឆាំងនឹងជនល្មើសច្បាប់នៅកម្ពុជា

 នៅថ្ងៃទី១៧ ខែមីនា ឆ្នាំ២០២១ រដ្ឋសភាកម្ពុជា បានចេញសេចក្តីថ្លែងការណ៍សម្តែងនូវការខកចិត្តយ៉ាងខ្លាំង ចំពោះសេចក្តីសម្រេចចិត្តរបស់សភាអឺរ៉ុប នៅថ្ងៃទី១១ ខែមីនា ឆ្នាំ២០២១ ស្តីពីការជំនុំជម្រះក្តីប្រឆាំងនឹងជនល្មើសច្បាប់នៅកម្ពុជា ២០២១/២៥៧៩ (RSP)។

តាមសេចក្តីថ្លែងការណ៍ដដែលនោះ រដ្ឋសភាកម្ពុជា បានជំរុញឱ្យសភាអឺរ៉ុប មេត្តាវាយតម្លៃប្រកបដោយសត្យា នុម័តចំពោះការវិវត្តន៍នយោបាយនៅកម្ពុជា និងសូមបន្តចូលរួមសិក្សាស្វែងយល់អំពីក្រុមបក្សនយោបាយទាំងអស់នៅកម្ពុជា ដោយឈរលើគោលការណ៍ នៃការជឿទុកចិត្តគ្នា ការគោរពគ្នា និងផលប្រយោជន៍ទៅវិញទៅមក។

សូមអានសេចក្តីថ្លែងការណ៍របស់រដ្ឋសភាខាងក្រោម៖