វីដេអូ៖ រដ្ឋមន្រ្តីក្រសួងសុខាភិបាលនិងជាប្រធានគណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ-១៩ ជម្រាបជូនឯកឧត្តម លោកជំទាវ អភិបាលនៃគណៈអភិបាលរាជធានី-ខេត្ត

 

កិច្ចប្រជុំបន្ទាន់ពីព្រំដែនប្រទេសខ្មែរ ថៃ ឃុំថ្មដា ស្រុកវាលវែង អំពីការទប់ស្កាត់ការរីករាលដាលជំងឺកូវីដ១៩

 ពោធិ៍សាត់៖ នាថ្ងៃទី២១ ខែធ្នូ ឆ្នាំ២០២០ លោក អ៊ឹង គឹមលាង អភិបាលរងខេត្តពោធិ៍សាត់ តំណាងលោកបណ្ឌិត ម៉ៅ ធនិន អភិបាលខេត្តពោធិ៍សាត់ បានដឹកនាំកិច្ចប្រជុំបន្ទាន់មួយ ស្តីពីការទប់ស្កាត់នូវការរីករាលដាលនៃមេរោគកូវីដ១៩ ដែលកំពុងកើតឡើងនៅប្រទេសថៃ ធ្វើឲ្យពលករ ដែលចំណាកស្រុកពីប្រទេសកម្ពុជាទៅធ្វើការនៅទីនោះ មានការព្រួយបារម្ភ ហើយនាំគ្នាវិលត្រឡប់មកស្រុកវិញ តាមច្រកថ្មដា។

ដើម្បីការពារបាន នូវការរីករាលដាលនៃជំងឺកូវីដ១៩ ចូលមកក្នុងសហគមន៍គឺអាជ្ញាធរពាក់ព័ន្ធទាំងអស់ត្រូវគ្រប់គ្រងពលករដែលចំណាកស្រុកទាំងអស់ដែលគាត់បានវិលត្រឡប់ចូលមកវិញត្រូវពិនិត្យសុខភាព និងឲ្យពួកគាត់ធ្វើចត្តាឡីស័កទាំងអស់ ក្រោមការអំពាវនាវរបស់លោកនាយករដ្ឋមន្ត្រី ហ៊ុន សែន៕

ក្រសួងធនធានទឹក៖ ចាប់ពីថ្ងៃនេះ ដល់ថ្ងៃទី២៥ ខែធ្នូ កម្ពុជាអាចនឹងមានភ្លៀងធ្លាក់ពីខ្សោយទៅបង្គួរ និងចុះត្រជាក់ខ្លាំង

 ក្រសួងធនធានទឹក និងឧតុនិយម បានចេញសេចក្តីប្រកាសព័ត៌មាន ស្តីពីស្ថានភាពធាតុអាកាសនៅកម្ពុជា ប្រចាំសប្តាហ៍ចាប់ពីថ្ងៃនេះ ដល់ថ្ងៃទី២៩ ខែធ្នូ ឆ្នាំ២០២០។

ក្រសួងបញ្ជាក់ថា នៅថ្ងៃនេះ ដល់ថ្ងៃទី២៤ ខែធ្នូ ឆ្នាំ២០២០ ភាគខាងជើងនៃកម្ពុជា ទទួលរងឥទ្ធិពលពីទ្រនុងសម្ពាធខ្ពស់ និងភាគខាងត្បូងនៃកម្ពុជា ទទួលឥទ្ធិពលសម្ពាធទាបសកម្មក្រវាញ លើកទី២៣។

ថ្ងៃទី២៤ -២៩ ខែធ្នូ កម្ពុជា នឹងទទួលឥទ្ធិពលពីខ្យល់មូសុងឦសានមធ្យម។
ស្ថានភាពបែបនេះធ្វើឲ្យ៖
១៖ បណ្តាខេត្តនៅតំបន់រាលទំនាបកណ្តាល
* សីតុណ្ហភាពអប្បបរមា មានពី ២១-២៤ អង្សាសេ
* សីតុណ្ហភាពអតិបរមា មានពី ២៩ -៣២ អង្សាសេ
នៅថ្ងៃទី២៣-២៥ ខែធ្នូ នឹងអាចមានភ្លៀងធ្លាក់ក្នុងកម្រិតខ្សោយទៅបង្គួរ។ សីតុណ្ហភាពអប្បបរមា មានពី ១៩-២២ អង្សាសេ និងសីតុណ្ហភាពអតិបរមា មានពី ២៥-២៨ អង្សាសេ។
២៖ បណ្តាខេត្តជាប់ជួរភ្នំដងរែក និងខ្ពស់រាបឦសាន
* សីតុណ្ហភាពអប្បបរមា មានពី ១៩-២២ អង្សាសេ
* សីតុណ្ហភាពអតិបរមា មានពី ២៩ -៣២ អង្សាសេ
នៅថ្ងៃទី២៣-២៥ ខែធ្នូ អាចមានភ្លៀងធ្លាក់ពីខ្សោយទៅមធ្យម ។ សីតុណ្ហភាពអប្បបរមា មានពី១៧-២០ អង្សាសេ និងសីតុណ្ហភាពអតិបរមា មានពី ២៤-២៧អង្សាសេ។
៣៖ តំបន់មាត់សមុទ្រ
* សីតុណ្ហភាពអប្បបរមា មានពី ២២-២៥ អង្សាសេ
* សីតុណ្ហភាពអតិបរមា មានពី ២៨ -៣១ អង្សាសេ
ថ្ងៃទី២៣-២៤ ខែធ្នូ នឹងអាចមានភ្លៀងក្នុងកម្រិតពីខ្សោយ ទៅបង្គួរ និងនៅផ្ទៃសមុទ្រអាចនឹងមានខ្យល់បក់បោកខ្លាំង និងរលកសមុទ្រខ្ពស់ៗ។ សីតុណ្ហភាពអប្បបរមា មានពី២០-២៣ អង្សាសេ និងសីតុណ្ហភាពអតិបរមា មានពី ២៥-២៩ អង្សាសេ ៕

ក្រសួងសុខាភិបាលបន្តប្រកាសថា មិនមានរកឃើញអ្នកឆ្លងជំងឺកូវីដ១៩ ថ្មីនោះទេ ខណៈអ្នកជំងឺ២នាក់ថែមទៀតបានជាសះស្បើយ

 នៅថ្ងៃទី២៣ ខែធ្នូ ឆ្នាំ២០២០នេះ ក្រសួងសុខាភិបាល បានចេញសេចក្តីប្រកាសព័ត៌មានបញ្ជាក់ថា មិនមានរកឃើញអ្នកឆ្លងជំងឺកូវីដ១៩ ថ្មីនៅកម្ពុជានោះទេ ខណៈអ្នកជំងឺកូវីដ១៩ ចំនួន២នាក់ថែមទៀត ត្រូវបានព្យាបាលជាសះស្បើយ និងអនុញ្ញាតឲ្យចេញពីមន្ទីរពេទ្យ។

អ្នកជាសះស្បើយទាំង២នាក់នោះរួមមាន៖
១៖ ស្ត្រីជនជាតិខ្មែរ អាយុ២១ឆ្នាំ ស្នាក់នៅសង្កាត់វាលស្បូវ ខណ្ឌច្បារអំពៅ រាជធានីភ្នំពេញ ជាបុគ្គលិកធនាគារមួយ ក្នុងរាជធានីភ្នំពេញ ត្រូវបានព្យាបាលជាសះស្បើយ ដោយទទួលលទ្ធផលអវិជ្ជមាន២លើក និងបានអនុញ្ញាតឲ្យចេញពីមន្ទីរពេទ្យមិត្តភាពខ្មែរ-សូវៀត។
២៖ បុរសជនជាតិខ្មែរ អាយុ២៦ឆ្នាំ មានស្នាក់នៅស្រុកដងទង់ ខេត្តកំពត ធ្វើដំណើរមកពីប្រទេសជប៉ុន បន្តជើងហោះហើរនៅប្រទេសកូរ៉េខាងត្បូង មកដល់កម្ពុជា នៅថ្ងៃទី១៨ ខែវិច្ឆិកា ឆ្នាំ២០២០ ត្រូវបានព្យាបាលជាសះស្បើយ ដោយទទួលលទ្ធផលអវិជ្ជមាន២លើក និងបានអនុញ្ញាតឲ្យចេញពីមណ្ឌលសុខភាពចាក់អង្រែ រាជធានីភ្នំពេញ។

សូមជម្រាបថា គិតត្រឹមម៉ោង៧៖០០នាទីព្រឹកថ្ងៃទី២៣ ខែធ្នូនេះ នៅកម្ពុជាបានរកឃើញអ្នកឆ្លងសរុបចំនួន ៣៦៣នាក់ ក្នុងនោះអ្នកព្យាបាលជាសះស្បើយ ចំនួន៣៤៩នាក់ និងអ្នកកំពុងសម្រាកព្យាបាលនៅមន្ទីរពេទ្យចំនួន ១៤នាក់។ សម្រាប់ឆ្លងក្នុងព្រឹត្តិការណ៍ «សហគមន៍២៨ វិច្ឆិកា» រកឃើញសរុបចំនួន ៤១នាក់ ក្នុងនោះអ្នកជំងឺព្យាបាលជាសះស្បើយចំនួន ៣២នាក់ និងអ្នកកំពុងសម្រាកព្យាបាល នៅមន្ទីរពេទ្យមានចំនួន ៩នាក់ ៕

គ្រួសាររងគ្រោះដោយអគ្គីភ័យឆេះផ្ទះទាំងស្រុង ក្នុងស្រុកសាមគ្គីមានជ័យ ទទួលបានអំណោយពីអនុសាខាស្រុកសាមគ្គីមានជ័យ

 កំពង់ឆ្នាំង៖ នៅថ្ងៃទី២១ ខែធ្នូ ឆ្នាំ២០២០នេះ លោក ឈួន ចាន់ណា ប្រធានគណៈកម្មាធិការអនុសាខាស្រុកសាមគ្គីមានជ័យ រួមជាមួយមន្រ្តីអនុសាខាស្រុក បាននាំយកអំណោយមនុស្សធម៌ជូនគ្រួសាររងគ្រោះដោយអគ្គីភ័យឆេះផ្ទះទាំងស្រុងចំនួន ១គ្រួសារ មានឈ្មោះ រ៉េត ផល អាយុ ២៤ឆ្នាំ និងកូនក្នុងបន្ទុក ០១នាក់ ស្ថិតនៅភូមិមានកកើត ឃុំត្បែងខ្ពស់ ស្រុកសាមគ្គីមានជ័យ ខេត្តកំពង់ឆ្នាំង ដែលផ្ទះមានទំហំ ៤ម x ៤ម រួមជាមួយសម្ភារ ថវិកា មួយចំនួនទៀត មូលហេតុដោយសារផ្ទុះផ្ទាំងសូឡាពន្លឺព្រះអាទិត្យ។

ក្នុងឱកាសនៃការចុះសួរសុខទុក្ខនោះ លោកប្រធានគណៈកម្មាធិការអនុសាខាស្រុក បានសម្ដែងនូវការចូលរួមសោកស្ដាយចំពោះឧបទ្ទវហេតុដែលនឹកស្មានមិនដល់នេះ ក្នុងខណៈដែលបងប្អូនកំពុងជួបប្រទះនូវបញ្ហាជីវភាពរស់នៅប្រចាំថ្ងៃ ជាពិសេសក្នុងវិបត្តិកូវីដ១៩ ដែលកំពុងតែយាយីពិភពលោកទាំងមូល។

ម្យ៉ាងទៀត លោកប្រធានក៏បានពាំនាំប្រសាសន៍ចូលរួមសួរសុខទុក្ខ និងសោកស្ដាយពីសំណាក់លោកស្រី ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា , លោក ឈួរ ច័ន្ទឌឿន ប្រធានកិត្តិយសសាខាខេត្តកំពង់ឆ្នាំង , លោក អម សុភា ប្រធានគណៈកម្មាធិការសាខាខេត្ត ចូលរួមសោកស្តាយជាមួយគ្រួសាររងគ្រោះ។

ក្នុងនោះ លោក ឈួន ចាន់ណា ក៏បានលើកទឹកចិត្តដល់គ្រួសាររងគ្រោះត្រូវខិតខំប្រឹងប្រែងបង្កើនជីវភាពរបស់ខ្លួន ឡើងវិញនិងប្រុងប្រយ័ត្នជានិច្ច។

លើសពីនោះ លោកក៏បានអំពាវនាវ សូមឱ្យមានការប្រុងប្រយ័ត្ន រស់នៅស្អាត ហូបស្អាត ផឹកស្អាត និងការពារខ្លួនពីជំងឺផ្សេងៗ ជាពិសេសពីជំងឺកូវីដ ១៩ ដែលកំពុងតែបង្កហានិភ័យដល់ពិភពលោក ក៏ដូចជាប្រទេសកម្ពុជាយើងផងដែរ។

អំណោយដែលអនុសាខានាំមកជូននាឱកាសនោះរួមមាន៖ អង្ករ ៥០គីឡូក្រាម ,មី០១កេស ,ត្រីខ ០១យួរ ,ទឹកត្រី ០១យួរ ,ទឹកស៊ីអ៉ីវ ,តង់ធំ ០១ ,កន្ទេលជ័រ ០១ ,ឆ្នាំងបាយ ០១ ,ឆ្នាំងសម្ល ០១ ,ចានបាយ ០៥ ,ចានសម្ល ០២ ,ស្លាបព្រា ០១ឡូ ,ឃីត ០១កញ្ចប់ (ភួយ ០១, មុង ០១, ក្រម៉ា ០១, សារុង ០១ ) និងថវិកា ៥០,០០០រៀល៕

ពិធីបើកវេទិការស្តីពីភាពជាដៃគូរវាងរដ្ឋបាលខេត្ត និងអង្គការសង្គមស៊ីវិល នៅសាលាខេត្តបាត់ដំបង

បាត់ដំបង៖ នៅថ្ងៃទី២២ ខែធ្នូ ឆ្នាំ២០២០ លោក អ៊ុយ រី ប្រធានក្រុមប្រឹក្សាខេត្ត និងលោក យឹម សៀប អភិបាលរង នៃគណៈអភិបាលខេត្ត បានអញ្ជើញជាអធិបតីភាពក្នុងអង្គវេទិកាស្តីពីភាពជាដៃគូរវាងរដ្ឋបាលខេត្តបាត់ដំបង និងអង្គការសង្គមស៊ីវិល នៅសាលាខេត្តបាត់ដំបង ។

នៅក្នុងអង្គវេទិការមានការអញ្ជើញចូលរួមពី លោក លោកស្រី ប្រធាន អនុប្រធាន មន្ទីរ អង្គភាពនានាជុំវិញខេត្ត លោក លោកស្រី អភិបាល អភិបាលរង ក្រុង ស្រុកនិងតំណាងអង្គការ សមាគម សង្គមស៊ីវិលជាច្រើនផងដែរ។

លោក យឹម សៀប បានថ្លែងថា បច្ចុប្បន្នរដ្ឋបាលខេត្តបាត់ដំបងមានសមាគមន៍ អង្គការជាតិ និងអន្តរជាតិមិនប្រមាណជាង ៣៧២ អង្គភាព បាននឹងកំពុងប្រតិបត្តិការសកម្មភាពរបស់ខ្លួន ដោយអនុវត្តលើវិស័យ កសិកម្ម វិស័យសុខាភិបាល សិទ្ធិមនុស្ស អប់រំ វប្បធម៌ ទេសចរណ៍ បរិស្ថាន សង្គមកិច្ច កសិឧស្សាហកម្ម និងកិច្ចការសាសនាផងដែរ។

លោកអភិបាលរងនៃគណៈអភិបាលខេត្ត បានបន្តទៀតថា អង្គការ សមាគមន៍មួយចំនួនធំ មានកិច្ចសហប្រតិបត្តិការ និងរក្សាទំនាក់ទំនងល្អជាមួយរដ្ឋបាលខេត្ត បើទោះបីជាគោលការណ៍ណែនាំរបស់ក្រសួងមហាផ្ទៃមិនតម្រូវឱ្យមានការជូនដំណឹងដល់អាជ្ញាធរមូលដ្ឋានមុនពេលចាប់ផ្តើមធ្វើសកម្មភាពរបស់ខ្លួនក៏ដោយ ។ 

លោក យឹម សៀប គូសបញ្ជាក់បន្ថែមទៀតថា អង្គការសមាគមន៍ខ្លះ បានប្រើប្រាស់រូបភាពជាអង្គការ សមាគមន៍ តែធ្វើសកម្មភាពជាស្ថាប័នមីក្រូហិញ្ញវត្ថុ ដោយយកការប្រាក់ខ្ពស់ ដែលជាហេតុធ្វើឱ្យប៉ះពាល់ដល់ជីវភាពរស់នៅប្រចាំថ្ងៃរបស់ប្រជាពលរដ្ឋផងដែរ៕

រដ្ឋបាលខេត្តកោះកុង ចុះពិនិត្យសិក្សាជាក់ស្ដែងលើទីតាំងស្នើសុំវិនិយោគអភិវឌ្ឍទេសចរណ៍ធម្មជាតិខ្នាតតូចចំនួន ១គម្រោង

កោះកុង៖ លោក អ៊ុក ភ័ក្រ្តា អភិបាលរង នៃគណៈអភិបាលខេត្តកោះកុង នៅថ្ងៃទី២២ ខែធ្នូ ឆ្នាំ២០២០ បានអមដំណើរលោក ស្រ៊ុន ដារិទ្ធ រដ្ឋលេខាធិការ នៃក្រសួងបរិស្ថាន ចុះពិនិត្យសិក្សាជាក់ស្ដែងលើទីតាំងស្នើសុំវិនិយោគអភិវឌ្ឍទេសចរណ៍ធម្មជាតិខ្នាតតូច (ផ្ទៃដីទំហំមិនលើស១០ហិកតា) ចំនួន១គម្រោង ស្ថិតក្នុងភូមិអន្លង់វាក់ ឃុំតាតៃក្រោម ស្រុកកោះកុង។  

ការចុះពិនិត្យនេះ មានការចូលរួមពីសំណាក់តំណាងក្រសួងបរិស្ថាន តំណាងរដ្ឋបាលខេត្តកោះកុង រដ្ឋបាលស្រុកកោះកុង មេឃុំតាតៃក្រោម តំណាងមន្ទីរបរិស្ថានខេត្ត និងតំណាងម្ចាស់គម្រោង( ក្រុមហ៊ុនរបស់លោក សួរ វិរៈ)។  

ក្រោយពីក្រុមការងារបានពិនិត្យជាក់ស្តែងរួចមកឃើញថា ទីតាំងដែលស្នើសុំនេះគឺសមស្របទៅនឹងគម្រោងទេសចរណ៍ធម្មជាតិ និងទទួលបានការគាំទ្រពីរដ្ឋបាលខេត្ត ស្រុក និងឃុំ។ តាមរយៈកិច្ចប្រជុំរបស់ក្រុមការងារក្រសួងបរិស្ថាន មន្ទីរជំនាញ និងរដ្ឋបាលខេត្ត ស្រុក និងឃុំ បានដាក់ចេញអនុសាសន៍ចំនួន៤ដល់ក្រុមហ៊ុន ដូចខាងក្រោមគឺ៖                                                         ១. គាំទ្រការអនុវត្តគម្រោងទេសចរណ៍ធម្មជាតិមួយនេះ                                                                                            ២. ក្រុមហ៊ុនត្រូវចូលរួមថែរក្សាបរិស្ថាន និងអនាម័យឧ្យបានល្អ ពិសេសគឺការគ្រប់គ្រងសំណល់រឹង រាវ                                                                                                                                      ៣. ក្រុមហ៊ុនត្រូវចូលរួមការអភិវឌ្ឍមូលដ្ឋាន និងសហគមន៍ដើម្បីលើកកម្ពស់ជីវភាពប្រជាជនមូលដ្ឋាន                                                                                     ៤. ប្រសិនបើមានផលប៉ះពាល់ដីធ្លី រឺការអាស្រ័យផលរបស់ប្រជាពលរដ្ឋនៅលើទីតាំងគម្រោងនេះ ក្រុមហ៊ុនត្រូវដោះស្រាយសំណងសមស្របជូនពួកគាត់៕