(វីដេអូ)៖ អង្គភាព ព័ត៌មាន និង ប្រតិកម្ម រហ័ស រៀបចំ សិក្ខាសាលា រយៈពេល២ថ្ងៃ បូកសរុបការងារ-ផ្លាស់ ប្តូរ បទពិសោធន៍ ដើម្បីពង្រឹង ការងារ ផ្សព្វផ្សាយ អប់រំ និង បង្កើន ប្រសិទ្ធភាព នៃ ការងារ គ្រប់គ្រង សាធារណមតិ

អង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រី រៀបចំសិក្ខាសាលា រយៈពេល២ថ្ងៃដើម្បីធ្វើការ បូកសារុបការងារ - ផ្លាស់ប្តូរបទពិសោធន៍ ពង្រឹងការងារ ផ្សព្វផ្សាយអប់រំ សំដៅបន្តពង្រឹងនិងបង្កើនប្រសិទ្ធភាពនៃការងារគ្រប់គ្រងសាធារណមតិ

នៅទីស្តីការគណៈរដ្ឋមន្ត្រី នាព្រឹកថ្ងៃទី១១ ខែមីនា ឆ្នាំ២០២០ លោក ស្វាយ ស៊ីថា រដ្ឋមន្ត្រីប្រតិភូអម នាយករដ្ឋមន្ត្រី បានអញ្ជើញជាអធិបតីក្នុងការបើកសិក្ខាសាលា ដែលមានការចូលរួមពីតំណាងជាថ្នាក់ដឹកនាំ និងមន្ត្រីទទួលបន្ទុកការងារព័ត៌មាន និងការងារបណ្តាញផ្សព្វផ្សាយសង្គមមកពីបណ្តាក្រសួង ស្ថាប័ន រាជធានី ខេត្តប្រមាណ១៥០រូប។

លោក ស្វាយ ស៊ីថា បាននិយាយថា គោលបំណងនៃសិក្ខាសាលានេះ គឺដើម្បីពង្រឹងការងារ និងការទទួលខុសត្រូវខ្ពស់របស់ថ្នាក់ដឹកនាំ និងមន្ត្រីដែលទទួលបន្ទុកការងារព័ត៌មាន ត្រូវខិតខំរៀបចំតាក់តែងខ្លឹមសារ ផលិតព័ត៌មាន រួមទាំងបទយកការណ៍ ឬវីដេអូឃ្លីបផ្សេងៗតាមស្ថានការណ៍ចាំបាច់ចំពោះមុខ ដោយផ្អែកលើជំនាញ និងបច្ចេកទេស ដើម្បីធ្វើការផ្សព្វផ្សាយ បំភ្លឺ អប់រំ ក្នុងការគ្រប់គ្រងសាធារណមតិឱ្យបានលឿនរហ័ស និងមានប្រសិទ្ធភាព។

ជាមួយគ្នានេះ លោក ស្វាយ ស៊ីថា ក៏បានសំណូមពរ និងលើកទឹកចិត្តអោយអង្គសិក្ខាសាលាបន្តរួមគ្នាក្នុងការផ្តល់នូវព័ត៌មានពិត ស៊ីជម្រៅ និងមានទឡ្ហីករណ៍រឹងមាំច្បាស់លាស់ ជាពិសេសការរួមគ្នាដើម្បីប្រយុទ្ធប្រឆាំងនឹងព័ត៌មានក្លែងក្លាយ ដោយប្រើប្រព័ន្ធបណ្តាញផ្សព្វផ្សាយសង្គមថ្មីក៍ ដូចជាវិទ្យុនិងទូរទស្សន៍ឱ្យបានឆាប់រហ័សនិងទាន់ពេលវេលា។  សកម្មភាពនៃការឆ្លើយតបបានលឿនរហ័ស គឺជាភាពចាំបាច់បំផុតនៃការផ្សព្វផ្សាយ ហើយដែលយើងទាំងអស់គ្នាត្រូវខិតខំប្រមូលកម្លាំងសរុប និងមធ្យោបាយសរុប ដើម្បីបន្សាបនូវរាល់ព័ត៌មានបំពុលដែលអាចនឹងប៉ះពាល់ដល់សន្តិភាព ស្ថេរភាព សន្តិសុខ និងការអភិវឌ្ឍរបស់ប្រទេសជាតិ។

លោករដ្ឋមន្ត្រីប្រតិភូអមនាយករដ្ឋមន្ត្រី ក៍បាននិយាយបញ្ជាក់បន្ថែមថា ការគ្រប់គ្រងបាននូវសាធារណមតិ គឺ នឹងបញ្ចៀសបាននូវភាពវឹកវរចលាចលសង្គម និងបញ្ចៀសបាននូវការភ័ន្តច្រឡំរបស់ប្រជាពលរដ្ឋ ដោយសារការបំភ្លៃ បំផ្លើស បំប៉ោង និងបំភ័យពីសំណាក់ក្រុមប្រឆាំង និងជនជ្រុលនិយមមួយចំនួន។

លោក ស្វាយ ស៊ីថា ក៏បានក្រើនរំលឹកដល់តំណាងជាថ្នាក់ដឹកនាំ និងមន្ត្រីទទួលបន្ទុកព័ត៌មានទាំងអស់ ត្រូវសហការគ្នា ដើម្បីពង្រីកការងារផ្សព្វផ្សាយឱ្យបានទូលំទូលាយ និងធ្វើការតាមដានត្រួតពិនិត្យនូវរាល់មតិរិះគន់ វាយប្រហារ ឬការ Comment ដែលចេញមកពីមជ្ឈដ្ឋាននានា មកលើក្រសួង ស្ថាប័ន រាជធានី ខេត្តរៀងៗខ្លួន ដែលមតិមួយចំនួននោះមានចរិតជាការញុះញុង និងបង្កចលាចលសង្គម ជាពិសេសជុំវិញបញ្ហាវីរុសកូវីដ-១៩ ហើយដែលចាំបាច់ត្រូវតែឆាប់ធ្វើការបំភ្លឺ និងឆ្លើយតបតាមគ្រប់មធ្យោបាយឱ្យបានទាន់ពេលវេលា ព្រោះសត្រូវធំផុតរបស់ព័ត៍មានក្លែងក្លាយ គឺការនិយាយ និងផ្សព្វផ្សាយអំពីការពិតជាក់ស្តែង ៕

លោក ដូណាល់ ត្រាំ ផ្ញើលិខិតជូនលោកនាយករដ្ឋមន្ត្រី ហ៊ុន សែន អំពីការពន្យាពេល​កិច្ច​ប្រជុំកំពូលអាស៊ាន-អាមេរិក ដោយសារការរីករាលដាល Covid-19

លោក ដូណាល់ ត្រាំ ប្រធានាធិបតីអាមេរិក បានផ្ញើលិខិតជូនលោកនាយករដ្ឋមន្ត្រី ហ៊ុន សែន អំពីមូលហេតុ និងផលវិបាក ដែលនាំឱ្យមានការពន្យារពេលកិច្ចប្រជុំអាស៊ាន-អាមេរិក ដែលគ្រោងធ្វើឡើងនៅខែមីនា ឆ្នាំ២០២០នេះ ដោយសារតែការរីករាលដាលនៃជំងឺកូវីដ១៩។

សូមអានលិខិតរបស់ប្រធានាធិបតីអាមេរិក ដូណាល់ ត្រាំ ជូនលោកនាយករដ្ឋមន្ត្រី ហ៊ុន សែន ដូចតទៅ៖

លោកនាយករដ្ឋមន្រ្តី ហ៊ុន សែន៖ ស្នើរអាជ្ញាធរពាក់ព័ន្ធទាំងអស់ ជាពិសេស ខាងកំពង់ផែ និងគយ ត្រូវធ្វើយ៉ាងណាសម្រួលដល់ការដឹកជញ្ជូននេះអោយដល់រោងចក្របានឆាប់រហ័សបំផុត

ភ្នំពេញ៖ នៅព្រឹកថ្ងៃទី ១០ ខែ មីនា ឆ្នាំ ២០២០ ក្នុងពេលអញ្ជើញថ្លែងសុន្ទរកថានៅក្នុងពិធីប្រគល់សញ្ញាប័ត្រដល់និស្សិតសកវិទ្យាល័យវ៉ាន់ដា នៅកោះពេជ្រលោកនាយករដ្ឋមន្រ្តី ហ៊ុន សែន បានបញ្ជាក់ប្រាប់ថានាវាដឹកជញ្ជូនចំនួន៧គ្រឿងដែលដឹកវត្ថុធាតុដើមសម្រាប់ផ្គត់ផ្គង់រោងចក្រនៅកម្ពុជា កំពុងដឹកចូលមកផែកម្ពុជាជាបន្តបន្ទាប់ ក្នុងនោះគឺមាន៥គ្រឿងបានចូលចតនៅកំពង់ផែក្រុងព្រះសីហនុហើយ និង ២គ្រឿងទៀតចតនៅកំពង់ផែវៀតណាមសម្រាប់ផ្គត់ផ្គង់រោងចក្រនៅទីតាំងក្រុងបាវិត ខេត្តស្វាយរៀង។

លោកនាយករដ្ឋមន្រ្តី ហ៊ុន សែន បានសុំឲ្យអាជ្ញាធរពាក់ព័ន្ធទាំងអស់ ជាពិសេស ខាងកំពង់ផែ និងគយ ត្រូវធ្វើយ៉ាងណាសម្រួលដល់ការដឹកជញ្ជូននេះអោយដល់រោងចក្របានឆាប់រហ័សបំផុត។

សូមអរគុណមិត្តចិនរួមទាំងអ្នកវិនិយោគគិន និងក្រុមហ៊ុនចិនទាំងអស់ដែលបានខិតខំចូលរួមជំរុញការដឹកនាំវត្ថុធាតុដើមមកផ្គត់ផ្គង់តម្រូវការរោងចក្រនានានៅក្នុងប្រទេសកម្ពុជាអោយបានទាន់ពេលវេលា៕

ផ្សាយផ្ទាល់(Live) សម្ដេចតេជោ ហ៊ុន សែន និង ឯកអគ្គរដ្ឋទូតចិនប្រចាំកម្ពុជា អញ្ជើញជាអធិបតីសម្ពោធដាក់ឱ្យប្រើប្រាស់ផ្លូវជាតិលេខ៥៥ តភ្ជាប់ពីផ្លូវជាតិលេខ៥ ក្នុងទីរួមខេត្តពោធិ៍សាត់ ឆ្ពោះទៅកាន់ព្រំដែនថ្មដា

ផ្សាយផ្ទាល់(Live) សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង ឯ.ឧ វ៉ាង វិនធៀន ឯកអគ្គរដ្ឋទូតចិនប្រចាំកម្ពុជា អញ្ជើញជាអធិបតីសម្ពោធដាក់ឱ្យប្រើប្រាស់ផ្លូវជាតិលេខ៥៥ តភ្ជាប់ពីផ្លូវជាតិលេខ៥ ក្នុងទីរួមខេត្តពោធិ៍សាត់ ឆ្ពោះទៅកាន់ព្រំដែនថ្មដា ជាប់ជាមួយខេត្តត្រាត ប្រទេសថៃ និងបើកការដ្ឋានសាងសង់ផ្លូវជាតិ១០ តភ្ជាប់ពីសំឡូត ទៅខេត្តកោះកុង។

ព្រឹកថ្ងៃចន្ទ ១រោច ខែផល្គុន ឆ្នាំកុរ ឯកស័កព.ស.២៥៦៣ ត្រូវនឹងថ្ងៃទី០៩ ខែមីនា ឆ្នាំ ២០២០

#ហ៊ុនសែន #កម្ពុជា #អរគុណសន្តិភាព #ផ្លូវជាតិលេខ៥៥

លោកនាយករដ្ឋមន្ត្រី ហ៊ុន សែន ៖ ប្រទេសមានសុខសន្តិភាព ទើបមានការអភិវឌ្ឍលើគ្រប់វិស័យ

លោកនាយករដ្ឋមន្ត្រី ហ៊ុន សែន បានថ្លែងថា រាជរដ្ឋាភិបាលបានដាក់ចេញនូវគោលនយោបាយជាអាទិភាពនូវការអភិវឌ្ឍហេដ្ឋារចនាសម្ព័ន្ធផ្លូវថ្នល់ ទើបមានការដាក់ឱ្យបើកសម្ពោធផ្លូវជាតិលេខ៥៥នៅថ្ងៃនេះ។ លោកបន្តថា ទាក់ទិននឹងអភិវឌ្ឍនេះធ្វើឱ្យនឹកឃើញដល់អតីតកាលដែលជាកូនកសិករ ហើយប្រាថ្នាការងារត្រឹមជាគ្រូបង្រៀ​ន​តែប៉ុណ្ណោះ តែបែរជាត្រូវប្រទេសធ្លាក់ចូលទៅក្នុងភ្លើងសង្គ្រាមដែលគេជាអ្នកបង្កើតឡើង ហើយរូបលោក បានដើរតួអង្គដ៏សំខាន់ក្នុងការពន្លត់ភ្លើងសង្គ្រាមស៊ីវិលនេះ ទៅជាប្រទេសមានសុខសន្តិភាព និងការអភិវឌ្ឍរហូតមកដល់សព្វថ្ងៃនេះ។

លោកនាយករដ្ឋមន្ត្រី ហ៊ុន សែន បានថ្លែងបែបនេះក្នុងឱកាសអញ្ជើញជាអធិបតីភាពក្នុងពិធីសម្ពោធផ្លូវជាតិលេខ៥៥ តភ្ជាប់ពីផ្លូវជាតិលេខ៥ ក្នុងទីរួមខេត្តពោធិ៍សាត់ ឆ្ពោះទៅកាន់ព្រំដែនថ្មដា ជាប់ជាមួយខេត្តត្រាត ប្រទេសថៃ ត្រូវដាក់ឱ្យដំណើរការជាផ្លូវការនៅថ្ងៃច័ន្ទ ទី០៩ ខែមីនា ឆ្នាំ២០២០នេះ។

នៅក្នុងឱកាសនេះផងដែរ លោកនាយករដ្ឋមន្ត្រី ហ៊ុន សែន បានថ្លែងបញ្ជាក់បន្ថែមថា ប្រទេសមានសុខសន្តិភាព ទើបមានការអភិវឌ្ឍ ហើយលោក សូមថ្លែងអំណរគុណដល់មិត្តចិន បានចូលរួមចំណែកជាច្រើនក្នុងការកសាងហេដ្ឋារចនាសម្ព័ន្ធ ទើបមានពិធីសម្ពោធដាក់ឱ្យដំណើរការផ្លូវថ្នល់មួយខ្សែរនេះ ដែលបានដើរតួនាទីយ៉ាងសំខាន់សម្រាប់ការធ្វើដំណើររបស់ប្រជាពលរដ្ឋ និងជាផ្លូវគមនាគមន៍បម្រើឱ្យការដោះដូរពាណិជ្ជកម្ម វិនិយោគ ដំណាំកសិផល កសិ-ឧស្សាហកម្ម តំបន់ទេសចរណ៍ជាមួយសុខសន្តិភាព និងសុវត្ថិភាព៕

លោកនាយករដ្ឋមន្រ្តី ហ៊ុន សែន៖ មិត្តចិនរៀបចំនាវាចំនួ៧គ្រឿង ដើម្បីដឹកវត្ថុធាតុដើមផ្គត់ផ្គង់ដល់កម្ពុជា

លោកនាយករដ្ឋមន្រ្តី ហ៊ុន សែន បានថ្លែងថា មិត្តចិន បាននិងកំពុងរៀបចំនាវាចំនួ៧គ្រឿង ដើម្បីដឹកវត្ថុធាតុដើម ផ្គត់ផ្គង់ដល់កម្ពុជា។ ហើយនៅថ្ងៃនេះ១គ្រឿង នឹងចូលនៅកំពង់ផែខេត្តព្រះសីហនុ និង១គ្រឿងទៀត នឹងចូលនៅថ្ងៃស្អែក នៅកំពង់ផែប្រទេសវៀតណាមព្រោះវត្ថុធាតុដើមត្រូវផ្គត់ផ្គង់ដល់រោងចក្រនៅតំបន់ឧស្សាហកម្មពិសេស បាវិត ដោយផ្លូវនៅទីនោះជិតជាងពីខេត្តព្រះសីហនុ។ លោកបានថ្លែងដូចនេះនៅព្រឹកថ្ងៃទី៩ ខែមីនា ឆ្នាំ២០២០ ក្នុងឱកាសអញ្ជើញសម្ពោធបើកឲ្យប្រើប្រាស់ជាផ្លូវការកំណាត់ផ្លូវជាតិលេខ ៥៥ ប្រវែងសរុប ១៨៩,១៦ គ.ម ចាប់ពីខេត្តពោធិ៍សាត់ (ផ្លូវជាតិលេខ ៥ គីឡូម៉ែត្រលេខ ១៩១) ទៅដល់ វាលវែង-ថ្មដា (ព្រំដែនកម្ពុជា-ថៃ) និងសម្ពោធបើកឱ្យប្រើប្រាស់ជាផ្លូវការ ស្របជាមួយការបើកការដ្ឋានសាងសង់ ផ្លូវជាតិលេខ ១០ ប្រវែងសរុប ១៩៨,៧១ គ.ម ចាប់ពី ខេត្តបាត់ដំបង (សំឡូត) កាត់ខេត្តពោធិ៍សាត់ (វាលវែង) ទៅដល់ខេត្តកោះកុង (ក្រុងខេមរភូមិន្ទ)។

លោកនាយករដ្ឋមន្រ្តី ហ៊ុន សែន ក៏សូមអំពាវនាវឱ្យរោងចក្រមួយចំនួនគោរពឱ្យបានម៉ត់ចត់នូវកិច្ចសន្យារវាងរោងចក្រ និងកម្មករ និយោជិត និងច្បាប់ការងាររបស់កម្ពុជា ដោយមិនត្រូវឆ្លៀតឱកាសក្នុងពេលដែលរោងចក្រខ្វះវត្ថុធាតុដើមព្យួរការងារកម្មករ ទៅជាការបញ្ឈប់ការងារ ដោយលុបចោលកិច្ចសន្យាការងារជាមួយកម្មករ ឬបិទទ្វាររោងចក្រនោះឡើយ៕