លោកនាយករដ្ឋមន្រ្តី ហ៊ុន សែន ចាត់ទុកសារព័ត៌មានជាដៃគូសំខាន់ក្នុងការចូលរួមអភិវឌ្ឍន៍សង្គមជាតិ

នៅល្ងាចថ្ងៃទី១១ ខែមករា ឆ្នាំ២០១៩ លោកនាយករដ្ឋមន្រ្តី ហ៊ុន សែន បានអញ្ជើញផ្តល់កិត្តិយជួបសំណេះសំណាលនិងពិសារបាយសាមគ្គីជាមួយអ្នកព័ត៌មាន ៤,៥០០នាក់ ដែលមកពីស្ថាប័នផ្សេងៗរួមទាំងថ្នាក់ដឹកនាំ និងមន្ត្រីក្រសួងព័ត៌មាន ស្ថានីយវិទ្យុនិងទូរទស្សន៍, សារព័ត៌មានបោះពុម្ពផ្សាយ, ក្រុមសារព័ត៌មានតាមបណ្តាញសង្គម Facebook, គេហទំព័រ និង TV Online, អ្នកនាំពាក្យក្រសួង-ស្ថាប័ន, អ្នកនាំពាក្យរាជធានី-ខេត្ត និងមន្ទីរព័ត៌មានរាជធានី-ខេត្ត ដែលបានធ្វើឡើងនៅមជ្ឈមណ្ឌលកោះពេជ្រ។ លោក មានភាពសប្បាយរីករាយយ៉ាងខ្លាំងដែលបានអញ្ជើញមកជួបជុំសំណេះសំណាល និងពិសារអាហារសាមគ្គីជាមួយបងប្អូនកូនក្មួយជាអ្នកសារព័ត៌មានជាតិនៅក្នុងជំនួបលើកទី៣ ប្រចាំឆ្នាំ២០១៩នេះ។

លោកនាយករដ្ឋមន្រ្តី ហ៊ុន សែន បានបញ្ជាក់ថា ក្នុងនាមជានាយករដ្ឋមន្ត្រី លោក តែងតែផ្សាភ្ជាប់ទំនាក់ទំនងល្អជាមួយពលរដ្ឋ អង្គការ និងសមាគមនានាតាមរយៈកម្មវិធីជួបជុំដូចល្ងាចនេះដែលកន្លងមក គឺមានកម្មវិធីជួបជុំបងប្អូនខ្មែរឥស្លាម, បងប្អូនខ្មែរ-ចិន, បងប្អូនគ្រឹស្ថសាសនា, បងប្អូនកូនក្មួយសិល្បៈករ សិល្បៈការិនី, បងប្អូនកូនក្មួយកីឡាករកីឡាការិនី និងការជួបជុំជាមួយបងប្អូនកូនក្មួយអ្នកសារព័ត៌មានជាដើម។

លោកនាយករដ្ឋមន្រ្តី ហ៊ុន សែន បានគូសបញ្ជាក់ថា គោលបំណងនៃការជួបជុំគឺដើម្បីស្វែងយល់អំពីសុខទុក្ខផ្ទាល់របស់បងប្អូនអ្នកសារព័ត៌មាន និងបានផ្តល់នូវអនុសាសន៍ល្អៗ ដើម្បីជំរុញការផ្សព្វផ្សាយព័ត៌មានឱ្យបានល្អត្រឹមត្រូវពិតប្រាកដតាមក្រមសីលធម៌ច្បាស់លាស់ដើម្បីបំរើសង្គមជាតិឱ្យកាន់តែរីកចម្រើនជឿនលឿនទៅមុខ៕

លោកនាយករដ្ឋមន្រ្តី ហ៊ុន សែន ថ្លែងថា នៅតាមច្រកព្រំដែន គឺមិនឱ្យមានផ្នែកណាផ្សេងក្រៅតែពី នគរបាលអន្តោប្រវេសន៍ និងគយ

លោកនាយករដ្ឋមន្ត្រី ហ៊ុន សែន បានប្រកាសឱ្យអ្នកសារព័ត៌មាន និងប្រជាពលរដ្ឋបានដឹងថា លោកបានសម្រេចបញ្ចប់រឿងរ៉ាវមួយដ៏សំខាន់ជាមួយរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ គឺចាប់ពីពេលនេះតទៅនៅតាមច្រកព្រំដែនទាំងអស់ គឺមិនឱ្យមានផ្នែកណាផ្សេងក្រៅតែពី នគរបាលអន្តោប្រវេសន៍ និងគយតែប៉ុណ្ណោះ។ លោក បានបន្តថា ភ្នាក់ងារដទៃៗទៀត រួមទាំងកាំកុងត្រូល គឺត្រូវដកចេញឱ្យអស់ដើម្បីជួយសម្រួលដល់ប្រជាពលរដ្ឋ និងអាជីវករ។

លោកបានថ្លែងដូចនេះ នៅល្ងាចថ្ងៃទី១១ ខែមករា ឆ្នាំ២០១៩នេះ ក្នុងឱកាសជួបសំណេះសំណាលជាមួយអ្នកកាសែតប្រមាណជិត៥ពាន់នាក់នៅក្នុងពិធីជួបជុំលើកទី៣ រវាងលោកនាយករដ្ឋមន្រ្តី ហ៊ុន សែន និងអ្នកសារព័ត៌មានដែលពិធីនេះប្រារព្ធធ្វើឡើងនៅមជ្ឈមណ្ឌលពិព័រណ៌ និងសន្និបាតកោះពេជ្រ។

លោកនាយករដ្ឋមន្រ្តី ហ៊ុន សែន បានបញ្ជាក់ថា ទន្ទឹមនឹងនោះ ក៏ត្រូវបញ្ចុះតម្លៃស្កែន (Scan) ទំនិញផងដែរ ដើម្បីឱ្យអ្នករកស៊ីទទួលបានផលចំណេញកាន់តែច្រើន។ លោក បានបញ្ជាក់ច្បាស់ថា ការអនុវត្តបែបនេះ គឺដើម្បីចូលរួមចំណែកក្នុងការលុបបំបាត់ភាពអសកម្មផ្សេងៗ និងអំពើ ពុករលួយជាដើម និងម្យ៉ាងវិញទៀតគឺបានបង្កលក្ខណៈកាន់តែងាយស្រួលដល់ពាណិជ្ជករ និងបងប្អូនប្រជាពលរដ្ឋក្នុងការប្រកបអាជីវកម្មផងដែរ។ ទន្ទឹមនឹងនេះដែរ គឺនឹងជួយឱ្យសេដ្ឋកិច្ចជាតិមានដង្ហើមរស់បានដោយស្រួលទៀតផង៕

លោកនាយករដ្ឋមន្រ្តី ហ៊ុន សែន សំណូមពរ៨ ចំណុចសំខាន់ៗ ដល់ស្ថាប័នសារព័ត៌មានទាំងអស់

ក្នុងឱកាសជួបសំណេះសំណាលជាមួយអ្នកកាសែតប្រមាណជិត៥ពាន់នាក់ នៅក្នុងពិធីជួបជុំលើកទី៣ រវាងលោកនាយករដ្ឋមន្រ្តី ហ៊ុន សែន និងអ្នកសារព័ត៌មានដែលពិធីនេះប្រារព្ធធ្វើឡើងនៅមជ្ឈមណ្ឌលពិព័រណ៌ និងសន្និបា​តកោះពេជ្រ នៅយប់ថ្ងៃទី១១ ខែមករា ឆ្នាំ២០១៨ លោកនាយករដ្ឋមន្រ្តី ហ៊ុន សែន បានសំណូមពរដល់ស្ថាប័នសារព័ត៌មានទាំងអស់ត្រូវអនុវត្តនូវចំណុចសំខាន់ៗចំនួន៨។

ចំណុចសំខាន់ៗ ដែលជាសំណូមពររបស់ប្រមុខរាជរដ្ឋាភិបាលកម្ពុជា ចំពោះស្ថាប័នសារព័ត៌មានទាំងអស់រួមមាន៖
ទី១- ស្ថាប័នព័ត៌មានទាំងរដ្ឋ និងឯកជនទាំងអស់ត្រូវដើរតួនាទីជាស្ថាប័នព័ត៌មានពិត គឺជាកញ្ចក់ឆ្លុះបញ្ចាំងពីសង្គមជាតិពិតប្រាកដ។ សូមកុំឱ្យកញ្ចក់នោះជាកញ្ចក់ដែលបែកធ្លុះផ្សាយព័ត៌មានមិនពិតពីសង្គម។
ទី២- ស្ថាប័នព័ត៌មានរដ្ឋ និងឯកជនទាំងអស់ ត្រូវផ្សព្វផ្សាយព័ត៌មានពិតដោយមានការពន្យល់ច្បាស់លាស់ទៅប្រជាពលរដ្ឋអោយបានយល់ជ្រួតជ្រាបអំពីទិសដៅនិងគោលនយោបាយរបស់រាជរដ្ឋាភិបាល ហើយនាំយកនូវអ្វីដែលជាការពិតពីប្រជាពលរដ្ឋមកកាន់រដ្ឋាភិបាលវិញ គឺទាំងក្នុងកម្រិតតាក់តែង និងកម្រិតអនុវត្តន៍អោយមានប្រសិទ្ធភាព។
ទី៣- ស្នើឱ្យសារព័ត៌មានត្រូវចេះចូលរួមជួយរិះគន់ដើម្បីស្ថាបនារាល់កំហុសឆ្គង និងផែនការដែលបានដាក់ចេញ នៃក្រសួងស្ថាប័ននានា ដើម្បីធ្វើការកែលំអរ ហើយក៏មិនមែនរិះគន់ដើម្បីតែជាន់ពន្លិចនោះទេ។
ទី៤- សំណូមពរឱ្យអ្នកសារព័ត៌មានចូលរួមសិក្សាវិភាគជាលក្ខណៈអន្តរជាតិ ដើម្បីបានដឹងអំពីររឿងរ៉ាវទាំងឡាយដែលកើតមានឡើងនៅលើពិភពលោក ហើយក៏ចង់ឱ្យអ្នកសារព័ត៌មានក្លាយទៅជាអ្នកវិភាគផងដែរចំពោះព្រឹត្តិការណ៍ក្រៅប្រទេស ពីព្រោះកន្លងមកមានបរទេសគេវិភាគ និងផ្សាយពីកម្ពុជា ដូច្នេះយើងត្រូវចេះសិក្សាបកស្រាយ និងវិភាគពីគេវិញផងដែរ។
ទី៥- សំណូមពរការផ្សព្វផ្សាយព័ត៌មានទាំងអស់ឱ្យបានត្រឹមត្រូវ មានក្រមសីលធម៌វិជ្ជាជីវៈ ពិសេស លោកបានសំណូមពរ ដល់អ្នកប្រប្រាស់បណ្តាញសង្គម ហ្វេសប៊ុក (Facebook) សូមកុំឱ្យមានការជេរប្រមាថ ហែកកេរ្តិ៍ខ្មាស់គ្នា ដែលនាំឱ្យមានរឿងប្តឹងផ្តល់ និងឡើងតុលាការជាដើម។ សូមរក្សាតម្លៃរបស់ខ្លួន ពិសេសអ្នកសារព័ត៌មានត្រូវធ្វើព័ត៌មានដែលច្បាស់ពិត កុំស្មានៗ ហើយក៏មិនត្រូវដើរតួជាតុលាការកាត់ក្តីឡើយ។
ទី៦- ត្រូវចូលរួមលុបបំបាត់អ្នកសារព័ត៌មានជម្រិតទារប្រាក់ គឺកុំធ្វើជាអ្នកសារព័ត៌មានសម្រាប់តែជម្រិតទារលុយពីគេ ឬមានលក្ខណៈជាក្រុមព័ត៌មាន “ម៉ាហ្វីយ៉ា”។
ទី៧- កុំផលិត និងជួយទប់ស្កាត់ព័ត៌មានក្លែងក្លាយ ដែលមិនបានផ្តល់ប្រយោជន៍ដល់សង្គម។ ម្យ៉ាងវិញទៀតដើម្បីប្រយុទ្ធប្រឆាំងនឹងព័ត៌មានក្លែងក្លាយ គឺអ្នកសារព័ត៌មានត្រូវបញ្ចេញព័ត៌មានពិតប្រាកដចេញមកបកស្រាយ ដើម្បីលុបបំបាត់នូវព័ត៌មានក្លែងក្លាយទាំងនោះ។
ទី៨- ត្រូវខិតខំលើកកម្ពស់សមត្ថភាពបុគ្គលិកសារព័ត៌មាន និងធ្វើការបណ្តុះបណ្តាធនធានមនុស្ស និងអភិវឌ្ឍប្រព័ន្ធផ្សព្វផ្សាយ ជាពិសេស ត្រូវទំនាក់ទំនងជាមួយបណ្តាសមាគម ស្ថាបន័ជំនាញ សាកលវិទ្យាល័យ និងក្រសួងព័ត៌មានជាដើមដើម្បីទទួលបាននូវការបណ្តុះបណ្តាលនូវជំនាញសារព័ត៌មានបន្ថែមទៀត។ ម្យ៉ាងទៀត គឺត្រូវទាក់ទងអ្នកដែលមានជំនាញច្បាស់លាស់ ដើម្បីបង្កើនគុណភាពការងារ និងការផលិតឱ្យមានភាពកាន់តែល្អប្រសើរ៕

លោកនាយករដ្ឋមន្ត្រី ហ៊ុន សែន៖ សហគមន៍អឺរ៉ុបមិនគួរបន្តប្រព្រឹត្តកំហុសជាលើកទី៣ចំពោះកម្ពុជាទៀតទេ

លោកនាយករដ្ឋមន្ត្រី បានមានប្រសាសន៍ប្រាប់លោក Enda សមាជិកសភា នៃសាធារណរដ្ឋអៀកឡង់ថា សហគមន៍អឺរ៉ុប មិនគួរបន្តប្រព្រឹត្តកំហុសជាលើកទី៣ទេចំពោះកម្ពុជា ដែលកំហុសទី១ គឺគាំទ្រការផ្តួលរំលំ អតីតព្រះមហាក្សត្រ ព្រះបរមរដ្ឋតនកោដ្ឋ ព្រះនរោត្តម សី ហនុ ដែលជាអតីតរដ្ឋាភិបាលស្របច្បាប់នៃកម្ពុជា កំហុសទី២ គឺការគាំទ្រខ្មែរក្រហមនៅអង្គការសហ​ប្រជាជាតិជាង ១២ឆ្នាំ នៅពេលដែលខ្មែរក្រហមបានកាប់សម្លាប់ប្រជាជនខ្មែរអស់រាប់លាននាក់ និងកំហុសទី៣​ គឺការប្រើប្រាស់ EBA មកគម្រាមកំហែង និងដាក់ ទណ្ឌកម្មមកលើកម្ពុជា គម្រាមដក EBA ពីកម្ពុជា និងយកប្រជាពលរដ្ឋកម្ពុជាប្រមាណជាង ១៦លាននាក់ជាចំណាប់ខ្មាំង។

លោកនាយករដ្ឋមន្ត្រី ហ៊ុន សែន បានលើកឡើងដូចនេះនៅព្រឹកថ្ងៃទី១២ ខែមករា ឆ្នាំ២០១៩ នេះ ក្នុងឱកាសអញ្ជើញជួបពិភាក្សាការងារជាមួយ លោក Enda Patrick Kenny សមាជិកសភា នៃសាធារណរដ្ឋអៀកឡង់ នៅវិមានសន្តិភាព។​ លោកនាយករដ្ឋមន្រ្តី ហ៊ុន សែន ក៏សូមបញ្ជូនសារនេះទៅតាម លោក Enda ដើម្បីជម្រាបនិងពន្យល់ដល់សហភាពអឺរ៉ុបឱ្យបានយល់អំពីសភាពការពិតនៃកម្ពុជា ដែលមានចំណុចខ្លះអាចនិយាយគ្នាបាន ចំណុចខ្លះអាចសម្រួលគ្នាបាន និងចំណុចខ្លះមិនធ្វើអាច។

លោក Enda បានគោរពជម្រាបជូនអំពីដំណើរទស្សន កិច្ចរបស់លោកមកកាន់ប្រទេសកម្ពុជានៅពេលនេះ គឺឆ្លើយតបទៅនឹងការអញ្ជើញរបស់លោក Dr.Haruhisa Handa ដែលបានអញ្ជើញរូបលោកមកចូលរួមក្នុងគម្រោងពាក់ព័ន្ធក្នុងវិស័យអប់រំ និងវិស័យដទៃទៀតនៅកម្ពុជា។

ជាការឆ្លើយតប លោកនាយករដ្ឋមន្ត្រី ហ៊ុន សែន បានស្វាគមន៍ និងថ្លែងអំណរគុណយ៉ាងជ្រាលជ្រៅចំពោះលោក Enda ដែលបានអញ្ជើញមកកម្ពុជាបានឃើញពីសភាពការណ៍ពិតនៅកម្ពុជា។ ទន្ទឹមនឹងនេះ លោកក៏បានថ្លែងអំណរគុណដល់ Dr. Haruhisa Handa ដែលបានជួយដល់កម្ពុជាលើវិស័យអប់រំនេះ ជាពិសេសផ្តល់អាហារូបករណ៍យ៉ាងច្រើនឱ្យនិស្សិតកម្ពុជាបានសិក្សានៅសាកលវិទ្យាល័យកម្ពុជា និងគម្រោងដទៃទៀតដែលលោកមាន។

លោកនាយករដ្ឋមន្ត្រី ហ៊ុន សែន ក៏បានថ្លែងអំណរគុណផងដែរចំពោះសារធារណរដ្ឋអៀកឡង់ដែលបានជួយដល់កម្ពុជាយើង ជាពិសេស បានផ្តល់ជំនួយក្នុងការកាត់ ទោសអតីតមេដឹកនាំខ្មែរក្រហម។ ជាមួយគ្នានេះដែរ ពាក់ព័ន្ធនឹងទំនាក់ទំនងរវាងកម្ពុជា និងសហគមន៍ អឺរ៉ុប លោកនាយករដ្ឋមន្ត្រី បានជម្រាបជូនសង្ខេបដល់លោក Enda ដែលមកទល់ពេលនេះ គឺការរីកចម្រើនរបស់កម្ពុជាមិនអាចកាត់ផ្តាច់ពីការចូលរួមរបស់អឺរុបបានឡើយ។

លោក Enda បានកោតសរសើរនិងពេញចិត្តចំពោះស្ថិរ​ភាពនយោបាយ និងការរីកចម្រើនរបស់កម្ពុជាបច្ចុប្បន្នដែលមានសេដ្ឋកិច្ចរីកលូតលាស់ក្នុងរង្វង់ ៧.៧% នៅក្រោមការដឹកនាំរបស់លោកនាយករដ្ឋមន្ត្រី ហ៊ុន សែន។ ទន្ទឹមនឹងការរីកចម្រើនរបស់ប្រទេសជាតិ លោក Enda បានគាំទ្រដល់ការបណ្តុះបណ្តាលធនធានមនុស្សនៅកម្រិតសាកលវិទ្យាល័យដល់យុវជនវ័យក្មេងឱ្យបានច្រើន​ប្រកបដោយគុណភាពដែលពួកគេជាអនាគតពិត​ប្រាកដរបស់ប្រទេសជាតិ។

លោកនាយករដ្ឋមន្ត្រី ហ៊ុន សែន បានថ្លែងអំណរគុណដល់លោក Enda និងជូនពរលោកទទួលបានជោគជ័យនៅក្នុងដំណើរទស្សនកិច្ចនៅកម្ពុជា ហើយសង្ឃឹមថានៅថ្ងៃណាមួយ ក្នុងពេលដែលលោកអញ្ជើញទៅលេងចៅដែលកំពុងសិក្សានៅប្រទេសអង់គ្លេស លោកនឹងឆ្លៀត​ឱកាសទៅលេងប្រទេសអៀកឡង់ជាមិនខាន៕

លោកនាយករដ្ឋមន្រ្តី​ ហ៊ុន​ សែន​ ៖​ ស្ថិរភាពនយោបាយនិងសង្គមជាឱកាសមាសនៅកម្ពុជា ក្នុងការទាក់ទាញភ្ញៀវទេសចរ និងពាណិជ្ជករបរទេស

លោកនាយករដ្ឋមន្ត្រី​ ហ៊ុន សែន នៅព្រឹកថ្ងៃទី១១ ខែ​មករា ឆ្នាំ២០១៩នេះ បានបង្ហោះផ្សាយនៅលើទំព័រហ្វេសប៊ុកដោយបានលើកឡើងថាកត្តាស្ថិរភាពនយោបាយនិងសង្គមជាឱកាសមាសនៅកម្ពុជា ក្នុងការទាក់ទាញភ្ញៀវទេសចរ និងពាណិជ្ជករបរទេសឱ្យមកវិនិយោគនៅកម្ពុជា។

លោកនាយករដ្ឋមន្ត្រី ហ៊ុន សែន បានបញ្ជាក់នៅក្នុងហ្វេសប៊ុកថា ទោះបីរវល់ការងារប្រទេសជាតិច្រើនយ៉ាងណាក្តី ក៏លោកនិងភរិយាតែងតែនឹករឮកមកដល់បងប្អូន និងកូនក្មួយគ្រប់ទីកន្លែងទាំងអស់ ជាពិសេស នៅពេលដែលប្រទេសជាតិយើងមានសុខសន្តិភាព គឺលោករំភើបរីករាយដែលបានឃើញបងប្អូនមានឱកាសកាន់តែច្រើន​ឡើងក្នុងការកសាងសង្គមគ្រួសារឱ្យមានជីវភាព​រស់នៅកាន់តែល្អប្រសើរពីមួយថ្ងៃទៅមួយថ្ងៃ។

លោកនាយករដ្ឋមន្ត្រី ហ៊ុន សែន បានគូសបញ្ជាក់ថា យើងទាំងអស់គ្នាបានឃើញច្បាស់ហើយថា ស្ថិរភាពនយោបាយនិងសង្គមជាមួយនឹងឱកាសមាសនៅកម្ពុជា គឺកំពុងទាក់ទាញភ្ញៀវទេសចរ និងពាណិជ្ជករបរទេសយ៉ាងច្រើនមកទស្សនានិងវិនិយោគនៅប្រទេសយើង។
លោកក៏សូមអរគុណក្រុមហ៊ុនក្នុងស្រុក និងក្រុមហ៊ុនបរទេសទាំងអស់ដែលមានទំនុកចិត្តលើរាជរដ្ឋាភិបាល ហើយបានចូលរួមកសាង និងអភិវឌ្ឍន៍កម្ពុជាឱ្យកាន់តែរីកចម្រើនទៅមុខ។

លោកនាយករដ្ឋមន្ត្រី ហ៊ុន សែន និងភរិយា សូមជូនពរបងប្អូនជនរួមជាតិ និងក្រុមហ៊ុនតូចធំទាំងអស់ នៅកម្ពុជាជួបតែសេចក្តីសុខ និងចម្រុងចម្រើនក្នុងកិច្ចការងារតូចធំ និងរបរទទួលទានគ្រប់កម្រិតនៅក្នុងឆ្នាំសកលថ្មី ២០១៩ នេះ៕

ក្រសួងការពារជាតិរៀបចំសិក្ខាសាលាបូកសរុបលទ្ធផលការងារយោធាសន្តិសុខឆ្នាំ២០១៨ និងផែនការការងារយោធាឆ្នាំ២០១៩ របស់យោធភួមិភាគទី៥

នៅថ្ងៃទី៩ ខែមករា ឆ្នាំ២០១៩នេះ នៅបញ្ជាការដ្ឋានយោធភូមិភាគទី៥ បានប្រារព្ធពិធីសិក្ខាសាលាបូកសរុបលទ្ធផលការងារយោធាសន្តិសុខឆ្នាំ២០១៨ និងផែនការការងារយោធាឆ្នាំ២០១៩ របស់យោធភួមិភាគទី៥ ដែលប្រព្រឹត្តទៅក្រោមអធិបតីភាព ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក។

អញ្ជើញចូលរួមក្នុងឱកាសនោះដែរ រួមមាន ឧត្តមសេនីយ៍ឯក ជា សារ៉ន មេបញ្ជាការរងនាយសេនាធិការ កងទ័ពជើងគោក ឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ លោកអភិបាលនៃគណៈអភិបាលខេត្តទាំង៤ (បន្ទាយមានជ័យ,បាត់ដំបង,ប៉ៃលិន,ពោធិ៍សាត់) និងប្រតិភូកងទ័ពជើងគោក តំណាងក្រសួងការពារជាតិ តំណាង អគ្គបញ្ជាការ អគ្គស្នងការនគរបាលប្រចាំទិស មេបញ្ជាការរង នាយសេនាធិការរង នាយការិយាល័យ មេបញ្ជាការកងពលតូចថ្មើរជើង (៥១,៥២,៥៣,និង១៤) មេបញ្ជាការតំបន់ប្រតិបត្តិការសឹករង កងរាជអាវុធហត្ថ ស្នងការនគរបាលខេត្តទាំង៤ មេបញ្ជាការកងការពារព្រំដែនទាំង៤ (៥០១,៥០២,៥០៣,៥០៤) ព្រមទាំងមេបញ្ជាការ នាយទាហានចំណុះកងឯកភាពយោធភូមិភាគទី៥ សរុបចំនួន ៣០០នាក់នៅសាលប្រជុំធំយោធភូមិភាគទី៥។

លោកឧត្តមសេនីយ៍ទោ ឯក សំអូន មេបញ្ជាការរង នាយសេនាធិការ បានអានសុន្ទរកថាស្វាគមន៍ និងអាននូវរបាយការណ៍លទ្ធផលការងារយោធាសន្តិសុខឆ្នាំ២០១៨ និងផែនការសកម្មភាពឆ្នាំ២០១៩ ជូនអង្គពិធីទាំងមូលផងដែរ៕

កម្ពុជាជាប្រទេសមួយក្នុងចំណោមប្រទេសជាច្រើន ដែលប្រកួតប្រជែងផលិតសំលៀកបំពាក់ និងស្បែកជើង សម្រាប់ការនាំចេញ

មិនមែនមានតែប្រទេសកម្ពុជាមួយទេ ដែលជាប្រទេសផលិតសំលៀកបំពាក់ និងស្បែកជើងសម្រាប់ការនាំចេញនោះ គឺមានប្រទេសច្រើនណាស់ ដែលត្រូវធ្វើការប្រកួតប្រជែងគ្នា។ នេះបើតាមការលើកឡើង របស់លោកនាយករដ្ឋមន្ត្រី ហ៊ុន សែន នៅព្រឹកថ្ងៃទី៩ ខែមករា ឆ្នាំ២០១៩ ក្នុងឱកាសជួបសំណេះសំណាលជាមួយកម្មករ កម្មការិនីជិត២ម៉ឺននាក់ មកពីរោងចក្រ សហគ្រាសចំនួន១២ ដែលជំនួបនេះធ្វើឡើងនៅ ភូមិចមពល ឃុំពពេល ស្រុកត្រាំកក់ ខេត្តតាកែវ។

លោកបានបន្តថា ប្រទេសដែលមានប្រាក់ឈ្នួលទាបជាងយើង គឺជាប្រទេសដែលគេងាយនឹងបង្វែររោងចក្រទៅកាន់ទីនោះ ហើយក្នុងករណីដែលយើងបាត់បង់រោងចក្រ ប្រទេសដែលមានប្រាក់ឈ្នួលទាបជាងយើង ជាអ្នកទាញរោងចក្រពីយើងទៅកាន់ទីនោះ ដែលអាចនឹងធ្វើឱ្យប្រទេសរបស់យើង បាត់បង់ការងារធ្វើសម្រាប់កម្មករនិយោជិត។

លោកនាយករដ្ឋមន្រ្តី ហ៊ុន សែន បានបញ្ជាក់ថា សម្រាប់ប្រាក់ឈ្នួលអប្បបរមាឆ្នាំ២០១៩នេះ គឺមានការប្រកួតប្រជែងជាមួយប្រទេសដទៃ។ សម្រាប់កម្ពុជាយើង ឆ្នាំ២០១៨ គឺ១៧០ដុល្លារ ឆ្នាំ២០១៩នេះ គឺ ១៨២ដុល្លារ ប្រទេសបង់ក្លាដេស ឆ្នាំ២០១៨ គឺ ៦៧ដុល្លារ ឆ្នាំ២០១៩នេះ គឺ៩៩ដុល្លារ ប្រទេសស្រីលង្ការ ឆ្នាំ២០១៨គឺ ៦៧ដុល្លារ ឆ្នាំ២០១៩នេះ នៅ៦៧ដុល្លារដដែល ប្រទេសឥណ្ឌា ឆ្នាំ២០១៨គឺ ៧៧ដុល្លារ- ១៤៣ដុល្លារ ឆ្នាំ២០១៩នេះ គឺ ៨១ដុល្លារ-១៥០ដុល្លារ ប្រទេសមីយ៉ាន់ម៉ា ឆ្នាំ២០១៨ គឺ ១០៨ដុល្លារ ឆ្នាំ២០១៩ គឺ១០៨ដុល្លារដដែល ប្រទេសឥណ្ឌូណេស៊ី ឆ្នាំ២០១៨ គឺ ១០៦ដុល្លារ- ២៦៧ដុល្លារ ឆ្នាំ២០១៩ គឺ១០៦ដុល្លារ- ២៦៧ដុល្លារដដែល ប្រទេសវៀតណាម ឆ្នាំ២០១៨ គឺ១២២ដុល្លារ-១៧៥ដុល្លារ ឆ្នាំ២០១៩ គឺ ១២៨ដុល្លារ-១៨៤ដុល្លារ នៅប្រទេសឡាវ ឆ្នាំ២០១៨ គឺ១៣៣ដុល្លារ នៅឆ្នាំ២០១៩ គឺ១៣៣ដុល្លារដដែល នៅប៉ាគីស្ថាន ឆ្នាំ២០១៨ គឺ ១៣៤ដុល្លារ ឆ្នាំ២០១៩ គឺ១៣៦ដុល្លារ។

លោកនាយករដ្ឋមន្រ្តី ហ៊ុន សែន ក៏បានសំណូមពរដល់កម្មករនិយោជិតទាំងអស់ ព្យាយាមពង្រឹងចំណេះដឹង និងសមត្ថភាពរបស់ខ្លួន ឱ្យកាន់តែមានគុណភាពខ្ពស់ ដោយសារកត្តាទីផ្សារប្រកួតប្រជែង និងកត្តាប្រាក់ឈ្នួលអប្បបរមារបស់កម្មករនិយោជិត៕