១០ កក្កដា ២០១៧​ អបអរសាទរ«តំបន់ប្រាសាទសំបូរព្រៃគុក» ចុះក្នុងបញ្ជីបេតិកភណ្ឌពិភពលោក របស់អង្គការយូណេស្កូ

អបអរសាទរ«តំបន់ប្រាសាទសំបូរព្រៃគុក» ចុះក្នុងបញ្ជីបេតិកភណ្ឌពិភពលោក របស់អង្គការយូណេស្កូ ថ្ងៃទី៨ កក្កដា ២០១៧ ក្រោម​អធិបតី​ភាពដ៏ខ្ពង់​ខ្ពស់ សម្តេច​អគ្គមហាសេនាបតីតេជោ​ ហ៊ុន សែន នាយក​រដ្ឋមន្រ្តី​ នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុន សែន រាជធានីភ្នំពេញ ថ្ងៃទី១០ កក្កដា ២០១៧ Cambodia’s Prime Minister Samdech Akka Moha Sena Padei Techo Hun Sen and his spouse Samdech Kittiprittbandit Bun Rany Hun Sen preside over at the National Olympic Stadium in Phnom Penh on July 17 evening the Official Celebration of Sambor Prei Kuk’s Inscription into the UNESCO’s World Heritage List during the 41st Session of the World Heritage Committee held in Krakow, Poland on July 08.

​លោក សុខ ឥសាន​៖ ច្បាប់​គណបក្ស​នយោបាយ​​គឺដើម្បី​តម្រង់ទិស​គណបក្ស​នយោបាយ​ឱ្យអនុវត្តត្រឹម​ត្រូវតាម​គោលការណ៍​ប្រកួត​ប្រជែងបែបប្រជាធិបតេយ្យ​ និង​កុំឱ្យ​លេង​ល្បិច​ទុច្ចរិត

ភ្លាមៗបន្ទាប់ពីរដ្ឋសភា បើកកិច្ចប្រជុំអនុម័តលើសេចក្តីស្នើវិសោធនកម្មច្បាប់ស្តីពីគណបក្សនយោបាយ នៅព្រឹកថ្ងៃទី១០ ខែកក្កដា ឆ្នាំ២០១៧នេះ ក្រុមសមាជិកសភាមកពីគណបក្សសង្រ្គោះជាតិ បានចេញសេចក្តីថ្លែងការណ៍មួយដោយមិនគាំទ្រ និងទាមទារឱ្យបញ្ឈប់ការពិ​ភាក្សា និងអនុម័តទៅលើសេចក្តីស្នើច្បាប់មួយនេះ។ ទោះជាយ៉ាងណា អ្នកនាំពាក្យគណបក្សប្រជាជនកម្ពុជា បានអះអាងថា ការធ្វើវិសោធនកម្មច្បាប់នេះ អនុវត្តត្រឹមត្រូវតាមគោលការណ៍ប្រកួតប្រជែងតាមលក្ខណៈប្រជាធិបតេយ្យ។

លោក សុខ​ ឥសាន អ្នកនាំពាក្យគណបក្សប្រជាជនកម្ពុជា បានថ្លែងថា ការធ្វើវិសោធនកម្មច្បាប់គណបក្សនយោបាយជាថ្មីម្តងទៀតនេះ គឺដើម្បីតម្រង់ទិសគណបក្សន​យោបាយឱ្យអនុវត្តត្រឹមត្រូវតាមគោលការណ៍ប្រកួតប្រជែងតាមលក្ខណៈប្រជាធិបតេយ្យ កុំឱ្យលេងល្បិចទុច្ចរិត រំលោភច្បាប់ រំលោភក្រមសីលធម៌ គោលការណ៍ និងនីតិវិធីផ្សេងៗដែលបានកំណត់។

ដោយឡែកជាការឆ្លើយតបទៅនឹងសេចក្តីថ្លែងការណ៍របស់ក្រុមតំណាងរាស្រ្តគណបក្សសង្រ្គោះជាតិ ដែលបានលើកឡើងថា សេចក្តីស្នើច្បាប់នេះ មានចរិតន​យោបាយ គាបសង្កត់លើសិទ្ធិបុគ្គល និងគាបសង្កត់មកលើគណបក្សនយោបាយក្នុងន័យកម្ចាត់ខ្មែរគ្នាឯង និងគាបសង្កត់គូប្រជែងនយោបាយនោះ ត្រូវបានលោក សុខ ឥសាន បញ្ជាក់ថា «ចំពោះលោក សម រង្ស៊ី មិនបាច់អ្នកណាសម្លាប់ជីវិតនយោបាយរបស់គាត់ទេ ជាក់ស្តែងគឺខ្លួនគាត់បានសម្លាប់ជីវិតនយោបាយខ្លួនឯងរួចទៅហើយ តាមរយៈការដាក់ពាក្យសុំលាលែងពីប្រធានគណបក្ស និងពីសមាជិកគណបក្ស កាលពីថ្ងៃទី ១១ ខែកុម្ភៈ ឆ្នាំ២០១៧កន្លងទៅនេះ។ ដូច្នេះ ការធ្វើវិសោធនកម្មច្បាប់ស្តីពីគណបក្សន​យោបាយមិនមែនគោលដៅបញ្ចប់ជីវិតនយោបាយរបស់លោក សម រង្ស៊ីនោះទេ»។

គួរបញ្ជាក់ថា វិសោធនកម្មច្បាប់ស្តីពីគណបក្សនយោបាយថ្មី ត្រូវរៀបចំដោយក្រុមតំណាងរាស្រ្តគណបក្សប្រជាជនកម្ពុជា ដែលចុះហត្ថលេខាដោយតំណាងរាស្រ្តច្រើនជាង៣០រូប។ ច្បាប់ថ្មីនេះ មានការកំណត់តឹងរ៉ឹងជាងមុន ដោយមិនឱ្យគណបក្សនយោបាយឃុបឃិតជាមួយទណ្ឌិតដើម្បីប្រយោជន៍ផ្ទាល់ខ្លួនឡើយ។ វិសោធនកម្មច្បាប់ស្តីពីគណបក្សនយោបាយថ្មីនេះ ត្រូវបានកែប្រែចំនួន៥មាត្រា ក្នុងនោះមាត្រា ៦ថ្មី(ពីរ) មាត្រា១១(ថ្មី) មាត្រា​៤៤ថ្មី(ពីរ) មាត្រា៤៥ថ្មី(ស្ទួន) និងមាត្រា៤៨ថ្មី (សួន)។ មាត្រា៦ ថ្មី(ពីរ) ដែលកែប្រែឡើងវិញនេះ បានកំណត់ថា គណបក្សនយោបាយមិនត្រូវប្រើប្រាស់សារជាសំឡេង រូបភាព ឯកសារជាលាយលក្ខណ៍អក្សរ ឬសកម្មភាពរបស់ទណ្ឌិតជាប់ទោសបទឧក្រិដ្ឋ ឬពីបទមជ្ឈឹម ដើម្បីជាផលប្រយោជន៍នយោបាយខ្លួនឡើយ ហើយគណបក្សនយោ​បាយទាំងអស់ មិនត្រូវ យល់ព្រមដោយចំហរ ឬឃុបឃិតជាមួយ ទណ្ឌិតជាប់ទោស បទឧក្រិដ្ឋ ឬពីបទមជ្ឈឹមឱ្យធ្វើ សកម្មភាពណាមួយ ដើម្បីជាប្រយោជន៍ផងដែរ៕

សម្លេងយើង៖ ដូរអំណាចរដ្ឋាភិបាលមិនបាន តម្រូវឲ្យលោក កឹម សុខា ដូរក្រុមខ្លួនកាន់កាប់អំណាចផ្ទៃក្នុងបក្សវិញម្តង ...!"

ពាក្យថា "ឈ្នះ" របស់មេដឹកនាំបក្សប្រឆាំងទាំង សម រង្ស៊ី ទាំងកឹម សុខា មានន័យគ្រាន់តែជាអំណួតនៃក្តីស្រម៉ៃប៉ុណ្ណោះ។ ទីបំផុតជួបតែការបរាជ័យគ្រប់ការបោះឆ្នោត ហើយសម្រែក "ដូរៗៗ" របស់បុគ្គលទាំងពីររូបនេះ ក៏ការពិតមិនអាចដូរអំណាចគ្រប់គ្រងរដ្ឋបានដែរទេ។ ផ្ទុយទៅវិញ ដូរបានត្រឹមតែអំណាចគ្រប់គ្រងគណបក្សសង្គ្រោះជាតិប៉ុណ្ណឹងឯង។ ការវិវត្តន៍ជាក់ស្តែងបានចេញដំណើរដោយប្តូរលោក សម រង្ស៊ី ចេញពីតំណែងមេបក្ស ដាក់លោក កឹម សុខា ជំនួសវិញ និងប្តូររបបដឹកនាំបក្សបែបកុងសង់ស៊ុសរវាងប្រធាន-អនុប្រធានមួយរូប មកជារបបប្រធាន-អនុប្រធានបីរូបដែលជាសមាមាត្រកម្លាំងដឹកនាំថ្មីនៃអំណាចមានទម្ងន់មកខាងលោក កឹម សុខា ទាំងស្រុង ព្រោះសមាសភាពអនុប្រធានបីរូប ៖ (១) គឺលោក ប៉ុល ហំម ជាសហសេវិកនយោបាយយូរមកហើយ ជាមួយលោក កឹម សុខា តាំងពីនៅក្នុងគណបក្សលោកតា ស៊ឺន សាន, (២) គឺលោកស្រី មួរ សុខហួរ មានប្រវត្តិជានារីផ្តាច់និស្ស័យនយោបាយពីគណបក្សហ្វ៊ុនស៊ីនប៉ិច ព្រោះអស់អនាគតជាមួយសម្តេចក្រុមព្រះ បើទោះបីងាកមកស៊ីផលពីគណបក្សប្រឆាំង ក៏មិនប្រាកដជាប្តូរផ្តាច់ជាមួយក្រុម សម រង្ស៊ី ណាស់ណាប៉ុន្មានទេ និង(៣) មានតែអនុប្រធានបក្សម្នាក់គត់ គឺលោក អេង ឆៃអ៊ាង ដែលជាមនុស្សស្និត និងជាជើងកាងរបស់លោក សម រង្ស៊ី។ ប៉ុន្តែជំហាននៃការវិវត្តន៍ថ្មីនេះ ពុំទាន់ធានាដល់បើកផ្លូវ១០០% ឲ្យលោក កឹម សុខា សម្រេចមហិច្ឆិតាធ្វើជាបេក្ខជននាយករដ្ឋមន្ត្រីសម្រាប់ការបោះឆ្នោត ២០១៨ នៅឡើយទេ ព្រោះលោក សម រង្ស៊ី នៅតែប្រកាសថាខ្លួនជាបេក្ខជននាយករដ្ឋមន្ត្រីតែមួយគត់របស់គណបក្សសង្គ្រោះជាតិដដែល បើទោះបីជាគ្មានតួនាទីជាផ្លូវការ និងលែងជាសមាជិកបក្សក៏ដោយ។ រីឯ លោក យឹម សុវណ្ណ មនុស្សជំនិត និងជើងកាងម្នាក់ទៀតរបស់លោក សម រង្ស៊ី បានចាត់ទុកថា ការបោះឆ្នោត២០១៨ គ្មានវត្តមានលោក សម រង្ស៊ី គឺជាការបោះឆ្នោតមិនសេរី និងយុត្តិធម៌ដែលមានន័យទុកលោក កឹម សុខា ប្រធានថ្មីនៃគណបក្សសង្គ្រោះជាតិ ឲ្យនៅគន្លាតជញ្ជាំង ពោលគឺ មិនមែនជាមនុស្សទី១របស់បក្សប្រឆាំង។

ដូច្នេះការធ្វើវិសោធនកម្មច្បាប់គណបក្សដែលតម្រូវឲ្យគ្រប់គណបក្សមិនត្រូវភ្ជាប់ខ្លួនជាមួយទណ្ឌិតក្នុងគ្រប់សណ្ឋាន និងគ្រប់រូបភាព គឺលោក កឹម សុខា ពិតជារីករាយក្នុងចិត្តជាពន់ពេក និងគាំទ្រដោយលាក់លៀម ក្នុងការកម្ចាយបុគ្គលលោក សម រង្ស៊ី និងកាត់បន្ថយឥទ្ធិពលរបស់គាត់មកលើគណបក្សសង្គ្រោះជាតិបច្ចុប្បន្ន នេះបើនិយាយជារួម។ បើនិយាយដោយឡែកវិញ គឺលែងរាំងស្ទះបុគ្គលលោក កឹម សុខា ក្នុងការសម្រេចមហិច្ឆិតាឈរឈ្មោះជាបេក្ខជននាយករដ្ឋមន្ត្រីរបស់គណបក្សសង្គ្រោះជាតិតែម្តង។ លើសពីនេះទៅទៀត លោក កឹម សុខា និងលោក ប៉ុល ហំម មានឱកាសរៀបចំសេណារីយ៉ូ ពង្រឹងអំណាចកាន់កាប់បក្ស ដោយបន្ថយសមាសភាពភាគីលោក សម រង្ស៊ី ជាពិសេសនឹងរៀបចំដាក់បញ្ចូលសមាសភាពភាគីលោក កឹម សុខា ក្នុងចំនួនអតិបរិមាតាមតែអាចធ្វើទៅបាន ឲ្យឈរជាបេក្ខជនសមាជិកព្រឹទ្ធសភា, សមាជិកក្រុមប្រឹក្សារាជធានី-ខេត្ត, ក្រុង-ស្រុក-ខ័ណ្ឌ សម្រាប់ការបោះឆ្នោត់អាណត្តិថ្មីខាងមុខ៕

ប្រភព៖ ហ្វេសបុក សម្លេង យើង

គណៈកម្មាធិការ​បេតិកភណ្ឌពិភពលោក «UNESCO» សម្រេចដាក់​ប្រាសាទសំបូរព្រៃគុក​កម្ពុជា ជាសម្បត្តិ​បេតិកភណ្ឌពិភពលោក

កំពង់ធំ ៖ ទីបំផុតគណៈកម្មាធិការបេតិកភណ្ឌពិភពលោកដែលហៅកាត់ថា (UNESCO) បានសម្រេចដាក់ប្រាសាទសំបូរព្រៃគុក របស់កម្ពុជា ជាសម្បត្តិបេតិកភណ្ឌពិភពលោក ខណៈប្រាសាទវ័យជាង១៤០០ឆ្នាំនេះ អាចទាក់ទាញភ្ញៀវទេសចរណ៍ជាតិ និងអន្តរជាតិបានក្នុងមួយឆ្នាំៗ ជាងពីរសែននាក់នោះ។
ប្រាសាទសំបូរព្រៃគុកគឺជាប្រាសាទទីបីហើយ ដែលអង្គការ UNESCOសម្រេចចុះបញ្ជីជាសម្បតិ្តបេតិកភណ្ឌពិភពលោក ដែលលើកទី១ គឺប្រាសាទអង្គរវត្ត ទី២ប្រាសាទព្រះវិហារ និងទី៣ប្រាសាទសំបូរព្រៃគុកនេះតែម្តង។
យោងតាមសេចក្តីជូនដំណឹងរបស់ក្រសួងវប្បធម៌ និងវិចិត្រសិល្បៈ ដែលបានចេញនៅថ្ងៃទី៩ ខែកក្កដា ឆ្នាំ២០១៧នេះ បានឲ្យដឹងថា នៅថ្ងៃទី៨ ខែកក្កដា ឆ្នាំ២០១៧ក្នុងកិច្ចប្រជុំលើកទី៤១ នៅទីក្រុងក្រាកូវ (Krakow) ប្រទេសប៉ូឡូញ គណៈកម្មាធិការបេតិកភណ្ឌពិភពលោក បានពិនិត្យ ពិភាក្សានិងវាយតម្លៃថា «តំបន់ប្រាសាទសំបូរព្រៃគុក» មានគុណតម្លៃលេចធ្លោជាសកល ហើយតាមរយៈកិច្ចប្រជុំនេះ គណៈកម្មាធិការបានសម្រេចចុះ «តំបន់ប្រាសាទសំបូរព្រៃគុក» ទៅជាបញ្ជីបេតិកភណ្ឌពិភពលោក។
សេចក្តីជូនដំណឹងដដែល បានបន្តទៀតថា ការសម្រេចនៃគណៈកម្មាធិការបេតិកភណ្ឌពិភពលោកនៃអង្គការយូនីស្កូនេះ គឺជាមោទនភាពជាតិដ៏ធំធេងថ្មីមួយទៀត ដែលកើតចេញពីការខិតខំប្រឹងប្រែងរបស់រាជរដ្ឋាភិបាលកម្ពុជា ដែលមានលោកនាយករដ្ឋមន្ត្រី ហ៊ុន សែន ជាប្រមុខដឹកនាំ ដោយគតិបណ្ឌិត តែងតែយកចិត្តទុកដាក់លើកិត្តិយសជាតិនៅលើឆាក់អន្តរជាតិ ក៏ដូចជាឆ្លុះបញ្ចាំងពីការខិតខំប្រឹងប្រែងរបស់រាជដ្ឋាភិបាល ក្នុងការគ្រប់គ្រងការងារអភិរក្ស បេតិកភណ្ឌប្រកបដោយចីរភាព។
ប៉ុន្មានម៉ោងក្រោយពីគណៈកម្មាធិការបេតិកភណ្ឌពិភពលោកសម្រេចដាក់ប្រាសាទសំបូរព្រៃគុករបស់កម្ពុជាទៅជាសម្បត្តិបេតិកភណ្ឌពិភពលោកនោះលោកនាយករដ្ឋមន្រ្តី ហ៊ុន សែន ក៏បានបង្ហោះតាមសង្គមហ្វេសបុក សម្តេចផ្ទាល់ អបអរសាទរ ចំពោះព្រឹត្តិការណ៍ ដ៏ប្រវត្តិសាស្ត្រមួយនេះផងដែរ។
ក្នុងហ្វេសប៊ុកលោកនាយករដ្ឋមន្ត្រីដែលបានបង្ហោះនៅថ្ងៃទី៩ ខែកក្កដានេះ លោកនាយករដ្ឋមន្រ្តី ហ៊ុន សែន បានលើកឡើងថា «កម្ពុជាអបអរសាទរប្រាសាទសំបូរព្រៃគុក ជាសម្បត្តិបេតិកភណ្ឌពិភពលោក»។ នេះជាមោទនភាពជាតិថ្មីមួយទៀតដែល «ប្រាសាទសំបូរព្រៃគុក» ត្រូវបានចុះបញ្ជីជាបេតិកភណ្ឌពិភពលោកហើយនៅក្នុងកិច្ចប្រជុំគណៈកម្មាធិការ បេតិកភណ្ឌពិភពលោក នៅទីក្រុង Krakow ប្រទេសប៉ូឡូញ កាលពីថ្ងៃទី០៨ ខែកក្កដា ឆ្នាំ២០១៧ យប់មិញនេះ។
ជាមួយគ្នានោះលោកនាយករដ្ឋមន្រ្តី ហ៊ុន សែន ក៏បានថ្លែងអំណរអរគុណ ដល់ក្រសួងវប្បធម៌ និងវិចិត្រសិល្បៈ និងគ្រប់មន្ទីរស្ថាប័នពាក់ព័ន្ធ រួមជាមួយមន្ត្រី និង អាជ្ញាធរមានសមត្ថកិច្ចគ្រប់លំដាប់ថ្នាក់ដែលបានចូលរួមខិតខំប្រឹងប្រែងក្នុងការថែរក្សាការពារអភិរក្ស និងបញ្ចូលប្រាសាទសំបូរព្រៃគុកជាសម្បត្តិបេតិកភណ្ឌពិភពលោកជាស្ថាពរកាលពីយប់មិញនេះផងដែរ។
សូមរំលឹកថា ប្រាសាទសំបូរព្រៃគុកនេះ គឺស្ថិតនៅភូមិសំបូរ ឃុំសំបូរ ស្រុកប្រាសាទសំបូរ ដែលមានចម្ងាយ ៣៧គីឡូម៉ែត្រពីទីរួមខេត្តកំពង់ធំ ដោយសង់លើដីរាបស្មើមានទំហំ៣,០០០ ហិកតា។ ប្រាសាទវ័យជាង១៤០០ឆ្នាំនេះ គឺបានសាងឡើងនៅរជ្ជកាល ស្តេចឥសានវរ្ម័ន ទី១ នៅក្នុង សត ទី៧ (គ.ស. ៦១៦–៦៣៥) នាសម័យចេនឡា។
ក្រុមប្រាសាទសំបូរព្រៃគុកនេះ គឺជារាជធានីចាស់ឈ្មោះថា ឥសានបុរៈ ពីសម័យនោះជាមជ្ឈមណ្ឌលនៃ សាសនា ឧទ្ទិសថ្វាយសវៈនិយម។ ក្រុមប្រាសាទនេះសាងសង់អំពីឥដ្ឋ តាន់ និង ថ្មបាយក្រៀមលំអរទៅដោយចម្លាក់ពីលើឥដ្ឋ ចាក់ពុម្ពដោយបាយអជាផ្ទាំងៗ អំពីឥដ្ឋ តែបច្ចុប្បន្នត្រូវបានប្រេះអស់។
តែយ៉ាងណាក៏ដោយប្រាសាទសំបូរព្រៃគុកនេះ បានក្លាយទៅជារមណីយដ្ឋាន ដែលអាចទាក់ទាញភ្ញៀវទេសចរណ៍ជាតិ និងអន្តរជាតិប្រមាណជាងពីរសែននាក់ក្នុងមួយឆ្នាំៗ ជាក់ស្តែងកាលពីឆ្នាំ២០១៦ កន្លងទៅ មានអ្នកទេសចរជាតិ និងអន្តរជាតិប្រមាណ១២៥.០០០នាក់ ទៅទស្សនាប្រាសាទសំបូរព្រៃគុកក្នុងនោះភ្ញៀវជាតិ១០៨.៨៨៥នាក់ និងភ្ញៀវអន្តរជាតិ១៦.៣០១នាក់។ នេះបើតាមការឱ្យដឹងពីលោក សេង អាន ប្រធានមន្ទីរទេសចរណ៍ខេត្តកំពង់ធំ កាលពីកន្លងទៅ៕

លោកនាយករដ្ឋមន្រ្តីហ៊ុន សែន អបអរសាទរបុណ្យរុក្ខទិវា ៩កក្កដា ២០១៧

យោងតាមទំព័រហ្វេសប៊ុករបស់លោកនាយករដ្ឋមន្រ្តីហ៊ុន សែន ដែលមានឈ្មោះថា Samdech Hun Sen, Cambodian Prime Minister នៅព្រឹកថ្ងៃទី០៩ ខែកក្កដា ឆ្នាំ ២០១៧នេះ បានបង្ហោះសារ អបអរសាទរបុណ្យរុក្ខទិវា ៩កក្កដា ២០១៧ ដែលមានខ្លឹមសារដូចខាងក្រោម៖

បុណ្យរុក្ខទិវា បានបង្កើតឡើងនៅក្នុងឆ្នាំ១៩៥២ ក្រោមព្រះរាជកិច្ចដឹកនាំរបស់ព្រះបរមរតនកោដ ព្រះមហាវីរក្សត្រ ព្រះករុណា ព្រះបាទសម្តេចព្រះនរោត្តម សីហនុ ក្នុងគោលបំណងបំផុសចលនាដាំដើមឈើឡើងវិញ និងការថែរក្សាសម្បត្ដិព្រៃឈើ ជាពិសេស ដើម្បីថែរក្សា ការពារ និងបណ្តុះគំនិតស្រលាញ់ព្រៃឈើ និងបរិស្ថានធម្មជាតិ។

សូមអរគុណក្រសួង មន្ទីរ ស្ថាប័នពាក់ព័ន្ឋ អាជ្ញាធរនិងសមត្ថកិច្ចគ្រប់លំដាប់ថ្នាក់ ព្រមទាំងសមាគម អង្គការជាតិ និងអន្តរជាតិ ម្ចាស់ជំនួយ និងដៃគូអភិវឌ្ឍន៍ ព្រមទាំងបងប្អូនប្រជាពលរដ្ឋដែលបានចូលរួម ថែរក្សាការពារ និងដាំដុះដើមឈើកាន់តែច្រើនឡើងនៅទូទាំងប្រទេស។

សូមបងប្អូនចូលរួមបណ្តុះគំនិតនៃការស្រឡាញ់ដើមឈើ និងចូលរួមដាំដុះ ថែរក្សា ការពារព្រៃឈើ និងបរិស្ថានធម្មជាតិឲ្យបានគ្រប់ៗគ្នា ដើម្បីជាប្រយោជន៍ដល់ការរស់នៅរបស់ខ្លូនយើងផង សហគមន៍យើងផង និងជីវិតសត្វព្រៃគ្រប់ប្រភេទ ព្រមទាំងប្រព័ន្ធជីវៈចម្រុះផងដែរ។ ប្រទេសជាតិដែលសំបូរ ព្រៃឈើគឺបានជួយយ៉ាងច្រើនដល់បញ្ហាកាត់បន្ថយការបម្រែបម្រួលអាកាសធាតុ៕

ការចុះតំបន់ប្រាសាទ​សំបូរព្រៃគុក ក្នុងបញ្ជីបេតិកភណ្ឌ​ពិភពលោក គឺឆ្លុះបញ្ចាំង​ពីកិច្ចខិតខំប្រឹងប្រែង​របស់រាជរដ្ឋាភិបាល ក្នុងការងារ​បេតិកភណ្ឌ

យោងតាមសេចក្តីជូនដំណឹង របស់ក្រសួងវប្បធម៌ និងវិចិត្រសិល្បៈនៅថ្ងៃទី០៩ ខែកក្កដា ឆ្នាំ២០១៧នេះ ស្តីពីការចុះបញ្ជីតំបន់ប្រាសាទសំបូរព្រៃគុកក្នុងបញ្ជី បេតិកភណ្ឌពិភពលោក របស់អង្គការយូណេស្កូ បានអោយដឹងថា ការចុះបញ្ជីនេះគឺជាមោទនភាពជាតិ យ៉ាងធំធេងមួយទៀត ដែលកើតចេញពីកិច្ចខិតខំប្រឹងប្រែងរបស់រាជរដ្ឋាភិបាល ក្នុងការងារគ្រប់គ្រង អភិរក្ស និងអភិវឌ្ឍ បេតិកភណ្ឌ ប្រកបដោយចីរភាព។

សេចក្តីជូនដំណឹងដដែលបានអោយដឹងទៀតថា នៅថ្ងៃទី០៨ ខែកក្កដា ឆ្នាំ២០១៧ ក្នុងកិច្ចប្រជុំលើកទី៤១ នៅទីក្រុង Krakow ប្រទេសប៉ូឡូញ គណៈកម្មការបេតិកភណ្ឌពិភពលោកបានពិនិត្យពិភាក្សា និងវាយតំលៃថា «តំបន់ប្រាសាទសំបូរព្រៃគុក» មានគុណតំលៃលេចធ្លោជាសកល ហើយតាមរយៈ DECISION 41 COM 8B. 15 បានសម្រេចចុះ តំបន់ប្រាសាទសំបូរព្រៃគុក ទៅក្នុងបញ្ជីបេតិកភណ្ឌពិភពលោក៕
សូមអានខ្លឹមសារលិខិតទាំងស្រុងដូចខាងក្រោម៖

កម្ពុជា-ថៃ រួមគ្នាផ្ដល់ភាពស្របច្បាប់ជូនពលករកម្ពុជា កំពុងធ្វើការនៅប្រទេសថៃ ដោយមិនចាំបាច់វិលត្រឡប់មកវិញ

យោងតាមទំព័រហ្វេសប៊ុកដែលមានឈ្មោះថា Samheng Boros បានឱ្យដឹងថា កម្ពុជា-ថៃ បានបើកកិច្ចប្រជុំរួមគ្នាមួយដើម្បីផ្ដល់ភាពស្របច្បាប់ជូនពលករកម្ពុជា កំពុងធ្វើការនៅប្រទេសថៃ ដោយមិនចាំបាច់វិលត្រឡប់មកកម្ពុជានោះទេ ។

សូមជម្រាបផងដែរថា ក្នុងកិច្ចប្រជុំនោះ ភាគីទាំងពីរកម្ពុជា-ថៃ បានឯកភាពគ្នាលើ៤ចំណុចរួមមាន៖
១-រដ្ឋាភិបាលថៃ មិនបណ្ដេញពលករកម្ពុជាធ្វើការនៅក្នុងប្រទេសថៃនោះទេ។
២-រដ្ឋាភិបាលថៃ នឹងមិនដាក់ពិន័យនិយោជកដែលប្រើប្រាស់ពលករកម្ពុជាគ្មានឯកសារនោះទេ ។
៣-រដ្ឋាភិបាលថៃនឹងបើកឲ្យមានការិយាល័យចុះបញ្ជីពលករ ដែលមិនទាន់មានឯកសារចាប់ពីថ្ងៃទី២៤ ខែកក្កដានេះតទៅ
៤-ភាគីកម្ពុជា ក៏នឹងធ្វើយុទ្ធនាការ១០០ថ្ងៃ ដើម្បីធ្វើការបើកផ្ដល់លិខិតធ្វើដំណើរជូនពលករកម្ពុជា ចាប់ពីថ្ងៃទី០១ ខែសីហានេះតទៅ។ រាជរដ្ឋាភិបាល ក៏បានសំណូមពរដល់ពលករកម្ពុជា ដែលកំពុងធ្វើការនៅប្រទេសថៃរក្សាភាពស្ងៀមស្ងាត់ រង់ចាំចំណាត់ការស្របច្បាប់ដែលរដ្ឋាភិបាលទាំងពីរ នឹងខិតខំដោះស្រាយបន្តបន្ទាប់ទៀត៕