មតិយុវជន៖ រាជរដ្ឋាភិបាល ដែលដឹកនាំដោយគណបក្សប្រជាជនកម្ពុជា បាននឹងកំពុងផ្តល់ជូនប្រជាជន ក្នុងឃុំ/សង្កាត់នីមួយៗ ជាមធ្យមក្នុងមួយឆ្នាំលើស ៥០ម៉ឺនដុល្លារទៀត

ថ្មីៗនេះដោយមានការបង្ហោះផ្សាយលើទំព័រហ្វេសប៊ុកមន្ត្រី គណបក្សប្រឆាំង អំពីរថយន្ត ដែលមានបិតលេខ ៥០ម៉ឺនដុល្លារ ដោយដាក់អក្សរបញ្ជាក់ថា គណបក្សនេះ នឹងចំណាយប្រាក់ ៥០ម៉ឺនដុល្លា ក្នុងមួយឆ្នាំសម្រាប់អភិវឌ្ឍឃុំ -សង្កាត់នីមួយៗ ធ្វើឱ្យយើងខ្ញុំជាយុវជន មិនអស់ចិត្តនូវ ផែនការនយោបាយប្រជាភិថុតរបស់បក្សប្រឆាំង ដោយខ្ញុំសូមធ្វើការគូសបញ្ជាក់ថា ឡានដែលបើកឃោសនានេះ គឺបានមកពីសន្តិភាព និងការអភិវឌ្ឍកសាងឡើងដោយបាតដៃគណបក្សប្រជាជនកម្ពុជា ហើយឡាននេះកំពុងបើកបរលើផ្លូវដែលមានតំលៃលើសពី ៥០ ម៉ឺនដុល្លារទៀត ដែលបានកសាងឡើងក្រោមការដឹកនាំរបស់គណបក្សប្រជាជនកម្ពុជា។

បក្សប្រឆាំងកំពុងប្រើនយោបាយពីរក្នុងពេលតែមួយ គឺទី១-នយោបាយប្រជាភិថុត (មានន័យថា សារលួងលោមបោកប្រាស់ និងភូតកុហកប្រជាជន តាមរយៈការសន្យាខ្យល់ រាងរាល់រដូវបោះឆ្នោត និងការបោកប្រាស់ភូតកុហកតាមទិសស្លោក បំភ្លៃ បំភាន់ បំប៉ោង បំផ្លើស) និងទី២-នយោបាយប្រជោបាយនិយម (ញុះញង់ប្រជាជនអោយមានការស្អប់ និងមានកំហឹងនឹងរដ្ឋអំណាច មិនស្តាប់រដ្ឋអំណាច និងប្រឆាំងនឹងរដ្ឋអំណាច ហើយធ្វើនយោបាយលើកំហឹង នេះ ដែលនេះជាសញ្ញាប្រកាសអាសន្នមួយ ដែលធ្វើអោយគ្រោះថ្នាក់ដល់សន្តិភាព និងសេចក្តីសុខរបស់ប្រជាជនកម្ពុជាបច្ចុប្បន្ន ព្រោះនយោបាយប្រជោបាយនិយមនេះ នឹងនាំអោយមានការបែកបាក់ជាតិ និងបង្កភាពវឹកវរចលាចលសង្គម និងឈានទៅរកសង្រ្គាមស៊ីវិលជាថ្មី)!  អ្នកស្រឡាញ់សន្តិភាព ត្រូវតែធ្វើសកម្មភាពប្រកបដោយថាមវន្ត ហើយក្រោកឈរឡើងជ្រោងទង់សន្តិភាព ដើម្បីសេចក្តីសុខ និងបន្តការអភិវឌ្ឍ តកូនតចៅជំនាន់ក្រោយ!។

គណបក្សប្រជាជនកម្ពុជា បាននឹងកំពុងផ្ដល់ជូនប្រជាជន ក្នុងឃុំ/សង្កាត់នីមួយៗ ជាមធ្យមក្នុងមួយឆ្នាំ លើស ៥០ម៉ឺនដុល្លាទៅទៀត! សូមមើលផ្លូវ, ស្ពាន, ធារាសាស្ដ្រ, សាលារៀន, មន្ទីរពេទ្យ, មណ្ឌលសុខភាព, វត្តអារាម….។ល។ នៅក្នុងឃុំ/សង្កាត់, ក្រុង/ស្រុក និង រាជធានី/ខេត្តនីមួយៗ។ លើសពីនេះ រាជរដ្ឋាភិបាលបានលុបពន្ធ និង កំរៃសេវាជាច្រើនជាប្រយោជន៍ដល់ប្រជាជនទូទៅ ដែលរស់នៅតាមឃុំ/សង្កាត់។ ទាំងអស់នេះ សុទ្ធតែជាថវិកាដែលរាជរដ្ឋាភិបាលដឹកនាំដោយគណបក្សប្រជាជន បាន នឹង កំពុងផ្ដល់ជូនដើម្បីបម្រើប្រជាជននៅគ្រប់ឃុំ/សង្កាត់។ ជាមួយនឹងកំណើនសេដ្ឋកិច្ច និងចំណូលថវិការដ្ឋ ការបែងចែកថវិកា និងការកសាងសមិទ្ធផល ជូនប្រជាជននៅគ្រប់ឃុំ/សង្កាត់ នឹងកើនឡើងកាន់តែច្រើនថែមទៀត។
ជាការកត់សម្គាល់បន្ថែម  រថយន្តបិទបដាឃោសនា ៥០ ម៉ឺនដុល្លានេះ កំពុងចតលើផ្លូវកសាងដោយគណបក្សប្រជាជន នៅក្នុងឃុំណាមួយ ដែលផ្លូវនេះអាចថ្លៃលើស ៥០ ម៉ឺនដុល្លាទៀត៕

ពិធីសម្ពោធដាក់អោយប្រើប្រាស់ជាផ្លូវការអាគាររដ្ឋបាលឃុំប្រាសាទ និងបើកការដ្ឋានសាងសង់ផ្លូវបេតុងប្រវែង ១០០០ ម៉ែត្រ

នៅថ្ងៃទី ១៩ ខែឧសភា ឆ្នាំ២០១៧ លោក ម៉ៅ ភិរុណ អភិបាលនៃគណៈអភិបាលខេត្តកណ្តាល រួមជាមួយលោក នួន ផា ប្រធានក្រុមប្រឹក្សាខេត្ត និងលោក ជា ម៉ានិត អនុប្រធានក្រុមការងារថ្នាក់ជាតិចុះមូលដ្ឋានឃុំប្រាសាទ  បានអញ្ជើញជាអធិបតីក្នុងពិធីសម្ពោធដាក់អោយប្រើប្រាស់ជាផ្លូវការអាគាររដ្ឋបាលឃុំប្រាសាទ និងបើកការដ្ឋានសាងសង់ផ្លូវបេតុងប្រវែង ១០០០ ម៉ែត្រ នៅក្នុងភូមិលេខ១ និងភូមិលេខ២ ឃុំប្រាសាទ ស្រុកស្អាង ខេត្តកណ្តាល។

ក្នុងពិធីនោះលោក ម៉ៅ ភិរុណ បានផ្តាំផ្ញើដល់អជ្ញាធរ និងប្រជាពលរដ្ឋដោយបញ្ជាក់ពីវត្តមានរបស់លោកមកកាន់ឃុំប្រាសាទនៅពេលនេះ គឺជាលើកទី២ ដែលក្នុងនោះលើកទី១ នៅថ្ងៃទី៣០ ខែមីនា ឆ្នាំ២០១៦ មកចូលរួមជាអធិបតីក្នុងពិធីបញ្ចុះបឋមសិលា សាងសង់អគាររដ្ឋបាលឃុំប្រាសាទ និងចូលរួមវេទិកាជួបសំណេះសំណាលសួរសុខទុក្ខជាមួយប្រជាពលរដ្ឋចំនួន ១ ៤៥២ នាក់។  ដោយឡែក វត្តមាននៅថ្ងៃនេះគឺដើម្បីចូលរួមពិធីសម្ភោធ ដាក់ឱ្យប្រើប្រាស់ជាផ្លូវការអគាររដ្ឋបាលឃុំប្រាសាទ និងបើកការដ្ឋានសាងសង់ផ្លូវបេតុងប្រវែង ១០០០ ម៉ែត្រ។

លោកក៏បានអំពាវនាវប្រជាពលរដ្ឋសូមបោះឆ្នោតជូនគណបក្សណាដែលជួយប្រជាពលរដ្ឋ និងស្ថិតនៅក្បែរប្រជាពលរដ្ឋជាប្រចាំពេលបងប្អូនជួបការលំបាក
និងអំពាវនាវប្រជាពលរដ្ឋត្រូវចៀសអោយឆ្ងាយពីល្បែងស៊ីសងគ្រប់ប្រភេទ  និងណែនាំអាជ្ញាធរមានសមត្ថកិច្ចត្រូវពង្រឹង ការអនុវត្តវិធានការអប់រំ រដ្ឋបាល និងវិធានការច្បាប់ ត្រូវចៀសឱ្យឆ្ងាយពីគ្រឿងញៀន និងត្រូវរួមគ្នាទប់ស្កាត់គ្រឿងញៀននៅមូលដ្ឋានរបស់យើង។ លោកដ៏បាន អំពាវនាវដល់ប្រជាពលរដ្ឋសូមចូលរួមគោរពច្បាប់ស្តីពីជលផល ចូលរួមថែរក្សា និងអភិរក្សធនធានធម្មជាតិ និងមេត្តាកុំប្រើប្រាស់ឧបករណ៍នេសាទខុសច្បាប់។

លោកអភិបាលក៏បានប្រកាសនឹងបន្តជួយឃុំប្រាសាទនូវសមិទ្ធផលជាបន្តបន្ទាប់ទៀត ដើម្បីឱ្យមានការអភិវឌ្ឍរីកចម្រើនក្នុងឃុំនេះ

ក្នុងពិធីនោះផងដែរ លោកបានផ្តល់បន្ទប់ទឹក និងបង្គន់១ បន្ថែមពីលើអគារសាលាឃុំ ដល់ក្រុមប្រឹក្សាឃុំប្រាសាទ និងផ្តល់ តុធ្វើការចំនួន ៣ ទូដែកដាក់ឯកសារចំនួន ២ និងកៅអីមួយចំនួនដល់ក្រុមប្រឹក្សាឃុំប្រាសាទប្រើប្រាស់ក្នុងការបំពេញការងារ, ផ្តល់ម៉ាស៊ីនថតចម្លង១ និងព្រីនធ័រ១  ដល់អនុវិទ្យាល័យប្រាសាទ, ផ្តល់ថវិកា ១០៥ លានរៀលសម្រាប់ធ្វើផ្លូវលំមួយខ្សែប្រវែង៧១៥ ម៉ែត្រដល់ភូមិជ្រោយឫស្សី (ភូមិលេខ៤), ផ្តល់ថវិកា ១២ លានរៀល សម្រាប់ចាក់ដីទីធ្លា ចូលអនុវទ្យាល័យប្រាសាទ និងផ្តល់ការតភ្ជាប់ចរន្តអគ្គីសនី ចូលសាលារៀន, ផ្តល់រទះជនពិការ ០១ គ្រឿង ដល់ជនពិការភូមិលេខ២, ឧបត្ថម្ភដល់ប្រជាពលរដ្កចូលរួមចំនួន ១៥០០ នាក់ ក្នុងម្នាក់ៗទទួលបានថវិកា ១ ម៉ឺនរៀល៕

លោកឧបនាយករដ្ឋមន្ត្រី កែ គឹមយ៉ាន អញ្ជើញជួបសំណេះសំណាល និងសួរសុខទុក្ខសមាជិក​សមាជិកា ​គណបក្ស​ប្រជាជនកម្ពុជា​ចំនួន៦០០០នាក់​ មកពីឃុំចំនួន៣ ​នៃ ស្រុកថ្មពួក​

នៅថ្ងៃទី១៩ ខែឧសភា ឆ្នាំ២០១៧នេះ លោកឧបនាយករដ្ឋមន្ត្រី កែ គឹមយ៉ាន សមាជិកអចិន្ត្រៃយ៍គណៈកម្មាធិការកណ្ដាល និងជាប្រធានក្រុមការងារគណៈកម្មាធិការកណ្ដាល ចុះជួយខេត្តបន្ទាយមានជ័យ បានអញ្ជើញជួបសំណេះសំណាល និងសួរសុខទុក្ខសមាជិកសមាជិកា គណបក្សប្រជាជនកម្ពុជាចំនួន៦០០០នាក់ មកពីឃុំចំនួន៣ ​មានឃុំភូមិថ្មី​ ឃុំគំរូ​ ឃុំថ្មពួក​ នៃស្រុកថ្មពួក​ ខេត្តបន្ទាយមានជ័យ​ ក្នុងដំណើររួមគ្នាឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ នាព្រឹកថ្ងៃទី៤ ខែមិថុនា ឆ្នាំ២០១៧ខាងមុខនេះ។

លោកឧបនាយករដ្ឋមន្ត្រី បានពាំនាំនូវប្រសាសន៍ផ្ដាំផ្ញើសួរសុខទុក្ខពីសំណាក់លោកនាយករដ្ឋមន្ត្រី ហ៊ុន សែន និងលោក ហេង សំរិន លោក ស ខេង លោក សាយ ឈុំ និងថ្នាក់ដឹកនាំគណបក្សប្រជាជនកម្ពុជា ដ៏ទៃផ្សេងទៀត ដែលតែងតែគិតគូរចំពោះសុខទុក្ខ និងការរស់នៅរបស់សមាជិកសមាជិកា គណបក្សប្រជាជនកម្ពុជារបស់យើង។

នាយឧត្តមសេនីយ៍​ ​បានថ្លែងរំលឹកពីអនុស្សាវរីយ៍ពីអតីតកាល ដែលតំបន់នេះជាសមរភូមិសង្រ្គាមច្បាំងគ្នារវាងខ្មែរ​ និងខ្មែរគ្នាឯង​។ ប៉ុន្តែក្រោមយុទ្ធសាស្រ្តឈ្នះ​ឈ្នះ​ របស់លោកនាយករដ្ឋមន្រ្តី ហ៊ុន​ សែន ​សង្រ្គាមលើទឹកដីខ្មែរទាំងមូល ត្រូវបានបញ្ចប់នៅឆ្នាំ១៩៩៨​ សន្តិភាព​ សន្តិសុខ​នេះបានបន្តមកដល់សព្វថ្ងៃ​ ធ្វើឲ្យប្រទេសកម្ពុជា មានឱកាសធ្វើការអភិវឌ្ឍប្រទេស ដែលខ្ទេចខ្ទាំមួយនេះឲ្យមានការរីកចម្រើនលើគ្រប់វិស័យ​។

ថ្លែងក្នុងឱកាសនោះដែរ​ លោកឧបនាយករដ្ឋមន្ត្រី ក៏បានស្នើឲ្យអង្គពិធីយើងទាំងមូលក្រោកឈរស្មឹងស្មាធចូលរួមរំលែកទុក្ខ និងគោរពវិញ្ញាណក្ខន្ធដល់យុទ្ធជន ដែលបានពលីជីវិតក្នុងបេសកម្មអង្គការសហប្រជាជាតិ នៅអាហ្រ្វិកកណ្ដាលនាពេលថ្មីៗនេះ។ ឆ្លៀតក្នុងពេលនោះ ឧបនាយករដ្ឋមន្ត្រី បានក្រើនរំឭកដល់ប្រជាពលរដ្ឋទាំងអស់ ចាប់ពីអាយុ១៨ឡើងទៅត្រូវទៅបោះឆ្នោត អាណត្តិទី៤ ជ្រើសរើស ឃុំ-សង្កាត់ឲ្យបានគ្រប់គ្នា ហើយបោះឲ្យត្រូវចំគណបក្យណាដែលតែងតែរួមសុខទុក្ខ និងជួយបងប្អូនពេលជួបការលំបាក​ដើម្បីបន្តការអភិវឌ្ឍជាមួយគ្នាតទៅទៀត។​

ជាចុងបញ្ចប់ នាយឧត្តមសេនីយ៍ កែ​ គឹមយ៉ាន​ បានផ្តល់នូវអំណោយឧបត្ថម្ភជូនសមាជិក~សមាជិកា ក្នុងម្នាក់ៗទទួលបាន សារ៉ុង១ គណបក្សទាំង៣ឃុំ ក្នុងមួយឃុំៗទទួលបានថវិកា១លានរៀល ប្រគេនបច្ច័យវត្តពោធិរាមថ្មពួកចំនួន១លានរៀល  យុវជនស្រុកថ្មពួក១លានរៀល និងមន្ទីរពេទ្យបង្អែកស្រុកថ្មពួកថវិកា៥០ម៉ឺរៀលផងដែរ៕

ថ្មីបំផុត! ប្រជាជនកម្ពុជានឹងអាចធ្វើដំណើរតាមផ្លូវដែក ទៅកាន់២៧ប្រទេស

ឆាប់ៗ ខាងមុខនេះកម្ពុជានឹងមានផ្លូវដែកតភ្ជាប់ទៅកាន់ ២៧ប្រទេស ហើយប្រជាពលរដ្ឋខ្មែរនឹងអាចជិះរថភ្លើងទៅកាន់ប្រទេសទាំងនោះទៀតផង។ នេះបើតាមការឱ្យដឹងពី លោក លី បូរិន អនុរដ្ឋលេខាធិការក្រសួង សាធារណការ និងដឹកជញ្ជូន ទទួលបន្ទុកផ្នែកផ្លូវដែក បានផ្ដល់បទសម្ភាសន៍ដោយផ្ទាល់ជាមួយ Sabay កាលពីថ្មីៗកន្លងទៅនេះ។

នៅក្នុងកិច្ចសម្ភាសន៍ពិសេសនោះ លោក លី បូរិន បានឱ្យដឹងថា បច្ចុប្បន្នកម្ពុជាកំពុងដំណើរការគម្រោងថ្មី ដែលហៅថា SKRL(Singapore Kunming Rail Link) គឺនឹងមានផ្លូវដែកចេញពី សិង្ហបុរី មកកម្ពុជា ក្នុងនោះត្រូវឆ្លងកាត់ប្រទេសម៉ាឡេស៊ី ភ្ជាប់ទៅកាន់ប្រទេសថៃ បន្ទាប់មកទៀត នឹងភ្ជាប់មកកាន់កម្ពុជា ហើយបន្តភ្ជាប់ទៅវៀតណាម និងភ្ជាប់ទៅប្រទេសចិន ហើយបច្ចុប្បន្ននេះវៀតណាម បានភ្ជាប់ទៅកាន់ប្រទេសចិនរួចរាល់ហើយ។

អនុរដ្ឋលេខាធិការក្រសួង សាធារណការ បានបន្តទៀតថា ចំពោះគម្រោងតភ្ជាប់ផ្លូវដែកក្នុងតំបន់អាស៊ាននេះ ប្រទេសវៀតណាមត្រូវសាងសង់ ១៣០គីឡូម៉ែត្រទៀត។ ចំណែកកម្ពុជាត្រូវសាងសង់ប្រវែង ២៥៧គីឡូម៉ែត្រ។ ប្រសិនកម្ពុជា និងវៀតណាម សាងសង់រួចរាល់នោះ រទេះភ្លើងអាចរត់ទៅដល់គុនមីង នៃប្រទេសចិនតែម្ដង។

មកដល់ចំណុចនេះលោកមានប្រសាសន៍យ៉ាងដូច្នេះថា ៖ ” កាលបើបានភ្ជាប់ចិនហើយ ចិននឹងភ្ជាប់ទៅអឺរ៉ុប បច្ចុប្បន្ននេះភ្ជាប់បានមួយចំនួនហើយ ហើយនឹងត្រូវភ្ជាប់ទៅដល់ប្រទេសទួរគី។ ឥឡូវនេះនៅសល់តែកម្ពុជា និងវៀតណាមប៉ុណ្ណោះ ប្រសិនបើពីរប្រទេសនេះ ភ្ជាប់គ្នាបាន នោះមានន័យថាផ្លូវដែកអាចរត់បានចំនួន២៧ប្រទេសហើយ”។ បើសិនជាតភ្ជាប់បានគ្រប់ប្រទេសផ្លូវនេះមានប្រវែងសរុបរហូតទៅដល់ជាង ៥០០០គីឡូម៉ែត្រ។

លោក លី បូរិន បានឱ្យដឹងទៀតថា កម្ពុជាត្រូវសាងសង់ផ្លូវដែកប្រវែង ២៥៧គីឡូម៉ែត្រ ហើយគម្រោងនេះ ក៏បានសិក្សា ចំនួន ៤ដងរួចមកហើយ ក្នុងនោះលើកទី១ ដោយជំនួយឥតសំណងរបស់ចិន និងបន្ទាប់មកទៀតគឺក្រុមហ៊ុន KOICA ប្រទេសកូរ៉េ ។ ចំពោះឯកសារគឺមានគ្រប់គ្រាន់អស់ហើយ គឺនៅតែរង់ចាំថវិកាតែប៉ុណ្ណោះ។ លោកបញ្ជាក់ថា ផ្លូវនេះចាប់ផ្ដើមចេញពីបាត់ដឹង ចន្លោះខេត្តកណ្ដាល និងកំពង់ស្ពឺ កាត់ទៅកំពង់ឆ្នាំង ឆ្លងចូលខេត្តកំពង់ចាម កាត់ខេត្តត្បូងឃ្មុំ បន្តទៅខេត្តក្រចេះ ទើបទៅជួបគ្នាជាមួយព្រំប្រទល់វៀតណាម។

អនុរដ្ឋលេខាធិការ ក្រសួងសាធារណការ ទទួលបន្ទុកផ្នែក ផ្លូវដែកកម្ពុជារូបនេះ លើកឡើងទៀតថា ផ្លូវដែកដ៏វែងនេះនឹងជំរុញឱ្យមានកំណើនសេដ្ឋកិច្ចកម្ពុជា កាន់តែរីកចម្រើន ព្រោះអាចដឹកបានច្រើន បានធ្ងន់ ហើយតម្លៃថោក មានផលប្រយោជន៍ដល់ប្រជាជន កាលណាបើទំនិញដឹកតម្លៃថោក លក់ចេញក៏ថោកដែរ។ មិនត្រឹមតែប៉ុណ្ណោះ ប្រជាជនអាចឆ្លងពីប្រទេសមួយទៅប្រទេសមួយ ប្រកបដោយសុវត្ថិភាពខ្ពស់ បើធៀបជាមួយយន្តហោះ។ ជាពិសេសនោះ មិនត្រូវការវីសានោះទេ ត្រូវការតែលិខិតឆ្លងដែនប៉ុណ្ណោះ លើកលែងតែចូលទៅប្រទេសចិន និងអឺរ៉ុប នោះនឹងត្រូវការវីសា ៕

កម្លាំងសកម្មជន និងថ្នាក់ដឹកនាំគណៈ ចលនាសាសនិក ឥស្លាម CPP ទូទាំងខេត្តបាត់ដំបង មកជួបជុំ នៅមន្ទីរបក្សខេត្ត ដេីម្បីពង្រឹងចលនាគាំទ្រគណបក្សប្រជាជនកម្ពុជាទូទាំងខេត្ត

ដេីម្បីពង្រឹងកម្លាំងគៀងគរមហាជនយកឈ្នះនៅក្នុងការបោះឆ្នោតក្រុមប្រឹក្សា ឃុំសង្កាត់ដែលនៅតែប៉ុន្មានថ្ងៃទៀតនេះផង និង ការបោះឆ្នោតសភា ឆ្នាំ២០១៨ ខាងមុខ សកម្មជនCPP ជាបងប្អូនខ្មែ់រឥស្លាមមកពី៣៦ភូមិ នៃឃុំចំនួន២៣ និង ស្រុកចំនួន១១ ទូទាំងខេត្ត ដែលជាថ្នាក់ដឹកនាំ គណៈអ៊ីម៉ាំ( មេគុណ) គណៈចលនាសាសនិកឥស្លាមរបស់CPP ខេត្ត ក្រុង ស្រុក និងភូមិនានា លោកគ្រូ អ្នកគ្រូខ្មែរឥស្លាមនៅក្នុងក្របខណ្ឌ និង កិច្ចសន្យារបស់ក្រសួងអប់រំយុវជន និង កីឡា  ទូទាំងខេត្ត បានអញ្ជេីញចូលរួមក្នុងពិធីសំណេះសំណាល និង ប្រកាសទទួលស្គាល់ សម្រួលភារកិច្ច ថ្នាក់ដឹកនាំ សមាជិក សមាជិកា គណណៈចលនាសាសនិកឥស្លាមរបស់CPP ក្រោមសហអធិបតីភាព លោក អូស្មាន ហាស្សាន់ សមាជិកគណៈកម្មាធិការកណ្តាល និង ជាប្រធានគណៈចលនាសាសនិកឥស្លាមរបស់គណបក្សប្រជាជនកម្ពុជា ជាមួយ លោក ឆាយ សារ៉េត សមាជិកគណៈកម្មាធិកាកណ្តាល និង ជាអនុប្រធានគណៈកម្មាធិការគណបក្សប្រជាជនកម្ពុជាខេត្តបាត់ដំបង។

ពិធីនេះធ្វេីឡេីង នៅព្រឹកថ្ងៃទី១៧ ខែឧសភា ឆ្នាំ២០១៧ នៅមន្ទីរគណបក្សប្រជាជនកម្ពុជាខេត្តបាត់ដំបង។
លោក ស៊ូ អារ៉ាហ្វាត ជាប្រធានគណៈចលនាសាសនិកឥស្លាមCPP ខេត្តបាត់ដំបង បានឡេីងផ្តល់ចំណាប់អារម្មណ៍ ការផ្តេជ្ញារក្សាសម្លេងឆ្នោតជោគជ័យជូនគណបក្សប្រជាជនកម្ពុជា តាមរយៈការរក្សាកម្លាំងចាស់ និងបង្កេីនសមាជិកថ្មី ដោយផ្សះផ្សារ សម្របសម្រួលមហាជននៅសេសសល់មិនទាន់ចូលជាសមាជិកគណបក្សប្រជាជន អោយបានសហការចូលរួមរស់ជាមួយម្លប់នៃបក្សតែមួយ សុខទុក្ខរួមគ្នា។

លោក អូស្មាន ហាស្សាន់ ប្រធានគណៈចលនាសាសនិកឥស្លាម CPP បានថ្លែងអំណអរគុណដល់កម្លាំងសកម្មជន និង សមាសភាពគណៈចលនាសាសនិកឥស្លាម CPP ខេត្តបាត់ដំបង ដែលបានគៀងគរអោយមហាជនរបស់ខ្លួនភាគច្រេីន បានសម្រេចចិត្តដ៏ត្រឹមត្រូវក្នុងការបោះឆ្នោតជ្រេីសរេីសគណបក្សប្រជាជនកម្ពុជា នៅតែជាមេដឹកនាំដឹកនាំប្រទេស ដែលរួមសុខរួមទុក្ខជាមួយគ្នារហូតបានទទួលនូវភាពចម្រុងចម្រេីន សន្តិភាព និងកក់ក្តៅជាទីបំផុត។
លោកប្រធានគណៈចលនា បានក្រេីនរំលឹកថា សូមកុំញញេីត រឺចាញ់បោកនូវការសន្យាអះអាងបែបបោកប្រាស់របស់បណ្តាបក្សប្រឆាំង ថានឹងផ្តល់នូវអ្វីគ្រប់បែបយ៉ាង ខណៈដែលកន្លងមក រហូតបច្ចុប្បន្ន មិនទាន់មានពួកគាត់ណាបានសាងនូវស្នាដៃបន្តិចណាជូនសហគមន៍ឡេីយ ផ្ទុយទៅវិញមានតែការបង្ករផ្គរភ្លៀង និង ញុះញង់បង្កចលាចលដល់សហគមន៍ ការបំបែកបំបាក់សាមគ្គីរវាងបងប្អូនក្នុងគ្រួសារ និងសហគមន៍តែប៉ុណ្ណោះ។ ជាក់ស្តែង ការប្រកាសអូតអាងពីការទាមទារសេរីភាពរបស់ពួកគាត់ ខណៈដែលមេដឹកនាំគណបក្សរបស់ពួកគេ គ្មានទាំងដែលស្គាល់អ្វីជាលះបង់ដេីម្បីទាមទារសេរីភាព និង សេចក្តីសុខសន្តិភាពជូនប្រជារាស្ត្របទាល់តែសោះ ផ្ទុយទៅវិញសេរីភាព សុខសន្តិភាព និង ភាពចម្រុងចម្រេីនមកដល់សព្វថ្ងៃនេះ គឺបានមកដោយការតស៊ូយ៉ាងលំបាក ការលះបង់ឈាមស្រស់ ព្រាត់ប្រាស បងប្អូនគ្រួសារ នៃមេដឹកនាំរបស់គណបក្សប្រជាជនកម្ពុជាតែ១គត់៕

អភិបាលខេត្ត កំពង់ឆ្នាំង៖ ការ​ទៅបោះឆ្នោត គឺជា​រឿង​ប្រទេសជាតិ

កាលពីរសៀល ថ្ងៃទី១៦ ខែឧសភា ឆ្នាំ២០១៧ នៅសង្កាត់ធម្មយុត្តិ ក្រុង​កំពង់ឆ្នាំង​ ខេត្ត​កំពង់ឆ្នាំង មានរៀប​ចំ ពិធីសំណេះសំណាលសួរសុខទុក្ខ​សមាជិក សមាជិកា​បក្ស​ប្រជាជន ក្រោមអធិបតីលោក​ ឈួរ ច័ន្ទឌឿន អភិបាល​ខេត្តកំពង់ឆ្នាំង និង​មាន​ការ​ចូល​រួម​ពី​លោក នាយក​ នាយករង​រដ្ឋ​បាល​សាលាខេត្ត មន្ត្រីមន្ទីរ​ផែន​ការ​ខេត្ត មន្ត្រីពន្ធនាគារ​ ​មន្ត្រីសាលាខេត្ត​​ និងតំណាង​គ្រួសារ​បក្ស​សរុប​ចំនួន​២០០នាក់។

ក្នុង​ឱកាស​នោះ លោក ឈួរ ច័ន្ទឌឿន​ បាន​មាន​ប្រសាសន៍ថា ការ​ទៅចូលរួមបោះឆ្នោតគឺជារឿង​ប្រទេសជាតិ។​ លោកបាន​បន្ត​ថា មន្ត្រីរាជការ​គ្រប់​លំដាប់ថ្នាក់​ក្នុង​ខេត្ត​ និ​ង​ប្រជាពល​រដ្ឋ​ទាំង​អស់ត្រូវ​តែគិតគូ​ពីប្រទេស​ជាតិ ពីព្រោះ​ប្រទេស​កម្ពុជា​មិនមែន​ជាកម្ម​សិទ្ធិ​ផ្ដាច់​មុខ​របស់​បុគ្គល​ណា​ម្នាក់​ឡើយ។

ជាមួយ​គ្នានោះដែរ លោក​អភិបាល​ ក៏បាន​អំពាវ​នាវ​ដល់​ប្រជាពល​រដ្ឋ និង​មន្ត្រីរាជការ​ទាំង​អស់ សូម​បន្ត​គាំទ្រ​បោះឆ្នោត​ជូន​CPP ព្រោះCPP មាន​គុណ​សម្បត្តិ​បីយ៉ាង​ ទី១.​​ គណបក្សប្រជាជនកម្ពុជា ជាអ្នក​ដែលវាយ​ប៉ុល ពត​ ទី២. គណបក្ស​ប្រជាជន បាន​ផ្ដល់ជីវិត​ទី២អោយយើង​ គឺ៧ មករា ១៩៧៩ និង​បាន​បង្រួប​បង្រួម​ជាតិដោយ​ប្រើនយោបាយ​ឈ្នះ ឈ្នះ​ របស់​សម្ដេច​តេជោ​សែន។​ លោកបាន​បញ្ជាក់បន្ថែម​ថា យើង​ទាំង​អស់​គ្នា​ កុំស្រមើ​ស្រមៃ​ជាមួយ​គណបក្ស​ប្រឆាំង​ ដែលជានិច្ច​កាលគណបក្ស​នេះ តែង​សន្យា​អោយនេះ អោយនោះ​ អោយលុយ​ចាស់ៗ​៤០០០០៛ តែ​ទីបំផុត ការ​សន្យា​របស់​បក្ស​ប្រឆាំង គឺសន្យា​ខ្យល់ បោក​ប្រាស់ ​សូម្បីសកម្មជន​របស់​ខ្លួន​ក៏បោក​ដែរ​។ ចំណុច​សំខាន់​មួយ​ទៀត ដែល​បាន​សំណូម​ពរ​នោះគឺយើង​ទាំង​អស់​គ្នា គួរ​កុំខឹង​គោ​វាយ​រទេះ ត្រូវ​មាន​ការ​ជឿជាក់​លើ​ការ​ដឹក​នាំ​គណបក្ស​ប្រជាជន ដែល​មាន​សម្ដេច​តេជោ​សែន​ជា​ប្រមុខ។

នៅ​ទី​បញ្ចប់ លោក​អភិបាល​ បាន​រំលឹក​បន្ថែម​ពីកាល​បរិច្ឆេទស្ដីពី​ការ​បោះឆ្នោតក្រុម​ប្រឹក្សា​ ឃុំ-សង្កាត់ ដែល​នឹង​ប្រព្រឹត្ត​ទៅ​នៅថ្ងៃទី៤ ខែមិថុនា​ ឆ្នាំ២០១៧ ខាង​មុខ​នេះ៕

សន្តិភាព ដែលគណបក្សប្រជាជនកម្ពុជាបានខិតខំថែរក្សាកន្លងមកគឺសម្រាប់ប្រទេសជាតិយើង និងកូនចៅជំនាន់ក្រោយរបស់យើង

ស្វាយរៀង៖ លោកស្រីឧបនាយករដ្ឋមន្រ្តី ម៉ែន សំអន រដ្ឋមន្រ្តីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានមានប្រសាសន៍ថា សន្តិភាព ដែលគណបក្សប្រជាជនកម្ពុជាបានខិតខំថែរក្សាកន្លងមក គឺសម្រាប់ប្រទេសជាតិយើង និងកូនចៅជំនាន់ក្រោយរបស់យើង លោកស្រីបានលើកឡើងដូច្នេះ នៅថ្ងៃទី១៧ ខែឧសភា ឆ្នាំ២០១៧ ក្នុងឱកាសដែល បានអញ្ជើញជាអធិបតី ក្នុងពិធីបុណ្យឆ្លងឧបដ្ឋានសាលា សម្ពោធស្ពានបេតុងកាត់ព្រែក ផ្លូវ និងសមិទ្ធិផលនានាវត្តឧត្តមសាមគ្គី ស្ថិតនៅភូមិតាកុត ឃុំត្រពាំងស្តៅ ស្រុករមាសហែក ខេត្តស្វាយរៀង។

អញ្ជើញចូលរួមក្នុងពិធីនេះរួមមាន លោកអភិបាល អភិបាលរងខេត្ត អភិបាល អភិបាលរងស្រុករមាសហែក កងកម្លាំងទាំងបី មន្ទីរ អង្គភាពនានា ព្រះសង្ឃ , យាយជី- តាជី , លោកគ្រូ- អ្នកគ្រូ , សិស្សានុសិស្ស ,មន្ត្រីរាជការ ,ប្រជាពលរដ្ឋចូលរួមប្រមាណចំនួន ១៤០០នាក់ ។

ថ្លែងក្នុងឱកាសនោះ លោកស្រីឧបនាយករដ្ឋមន្រ្តី បានមានប្រសាសន៍ថា សព្វថ្ងៃនេះ សមិទ្ធផល រួមទាំងអាណាចក្រ និងពុទ្ធចក្រ កំពុងបោះជំហានដើរទន្ទឹមគ្នា ស្របពេលដែល ប្រទេសជាតិ កំពុងដើរនៅលើផ្លូវ សុខសន្តិភាពស្ថិរភាព ក្រោមការដឹកនាំរបស់ លោកនាយរដ្ឋមន្ត្រី ហ៊ុន សែន ដែលបានដឹកនាំ ប្រទេសឈានទៅរកការអភិវឌ្ឈលើគ្រប់វិស័យ ។ សម្រាប់ខេត្តស្វាយរៀងយើង ក៏កំពុងតែមានការរីកចម្រើនគ្រប់ផ្នែក ក្នុងនោះយើងរក្សាបាននូវ សន្តិសុខ សុវត្ថិភាព និងស្ថិរភាពល្អជូនដល់ប្រជាពលរដ្ឋ តាមរយៈគណៈបញ្ជាការឯកភាពខេត្ត បានយកចិត្តទុកដាក់ខ្ពស់ ក្នុងការពង្រឹងកម្លាំងប្រដាប់អាវុធ គ្រប់ប្រភេទ បំផុសចលនាមហាជន និង ប្រជាពលរដ្ឋឱ្យចូលរួមអនុវត្ត គោលនយោបាយ ភូមិ-ឃុំ មានសុវត្ថិភាព និងបានរៀបចំ ប្រជាកាពារតាមភូមិ ដើម្បីការពារសន្តិសុខជូនប្រជាពលរដ្ឋ រស់នៅយ៉ាងសុខសាន្ត ប្រកបអាជីវកម្មគ្រប់ប្រភេទ ដោយសប្បាយគ្មានការភ័យខ្លាច។

ជាមួយគ្នានោះដែរ លោកស្រី ម៉ែន សំអន ក៏បានសំណូមពរឱ្យបងប្អូនប្រជាពលរដ្ឋ មន្ត្រីរាជការ និងកងកម្លាំងប្រដាប់អាវុធទាំងអស់ ត្រូវជឿជាក់លើគណបក្សប្រជាជនកម្ពុជា ហើយសូមបោះឆ្នោតជូនគណបក្ស ព្រោះថាមានតែមេឃុំ-សង្កាត់គណបក្សប្រជាជនកម្ពុជា ប៉ុណ្ណោះដែលរស់នៅផ្ទាល់ និងដឹងពីសុខទុក្ខរបស់ប្រជាពលរដ្ឋក្នុងមូលដ្ឋាន ហើយក៏សូមឱ្យ បងប្អូនប្រជាពលរដ្ឋទាំងអស់ កុំចាញ់បោកការឃោសនា របស់គណបក្សផ្សេង ឬអ្នកនយោបាយមួយចំនួន ដែលតែងតែដើរបំផុសបំផុលបោកប្រាស់តាមរូបភាពផ្សេងៗ ។

ទន្ទឹមនោះ លោកស្រី ក៏បានអំពាវនាវឱ្យបងប្អូនប្រជាពលរដ្ឋទាំងអស់ ត្រូវរួមគ្នាថែក្សាសន្តិភាព ដែលគណបក្សប្រជាជនកម្ពុជា បានខិតខំកន្លងមកដើម្បីឱ្យបានស្ថិតស្ថេរយូរអង្វែង សម្រាប់ប្រទេសជាតិ និងកូនចៅជំនាន់ក្រោយ ហើយសូមបងប្អូនប្រជាពលរដ្ឋទាំងអស់ ចូលរួមបោះឆ្នោតទាំងអស់គ្នា នាពេលខាងមុខ ដើម្បីបន្តគាំទ្រគណបក្សប្រជាជនកម្ពុជា ដឹកនាំប្រទេសជាតិមាតុភូមិ៕