ថ្នាក់ដឹកនាំ និងមន្ត្រី​ជាច្រើននាក់ នៃទីស្តីការគណៈ​រដ្ឋមន្រ្តី ដង្ហែរ​ក​ឋិនទានទៅកាន់​វត្តឧទម្ពរក្រោម ដើម្បីរួម​ចំណែកទ្រទ្រង់​វិស័យព្រះពុទ្ធសាសនា

នៅរសៀលថ្ងៃទី ០៥ ខែវិច្ឆិកា ឆ្នាំ២០១៦នេះ  ឯកឧត្តម ស៊ូ ភិរិន្ទ និងលោកជំទាវ ​ឯកឧត្ដម ជីវ កេង និងលោកជំទាវ  តំណាងដ៍ខ្ពង់ខ្ពស់ឯកឧត្តមបណ្ឌិតសភាចារ្យ សុខ អាន និងលោកជំទាវ បានដឹកនាំកឋិនទាន ដែលបានផ្តូចផ្តើមគំនិតដោយឯកឧត្តមបណ្ឌិតសភាចារ្យ សុខ អាន និងលោកជំទាវ   រួមជាមួយថ្នាក់ដឹកនាំនៃរាជរដ្ឋាភិបាល និងមន្រ្ដីរាជការនៃទីស្តីការគណៈរដ្ឋមន្រ្តី ព្រមទាំងប្រជាពុទ្ធបរិស័ទ មកពីទីជិតឆ្ងាយនិងពុទ្ធបរិស័ទចំណុះជើងវត្ត ដង្ហែយកទៅវេប្រគេន ដល់ភិក្ខុសង្ឃ ដែលគង់ចាំព្រះវវស្សាអស់កាលត្រីមាស ក្នុងពុទ្ធសីមាវត្ដ ឧទម្ពរក្រោម ស្ថិតក្នុងភូមិកំពុង ឃុំព្រះបាទជាន់ជុំ ស្រុកគីរីវង់ខេត្តតាកែវ។

អង្គកឋិនទានសាមគ្គីនេះ ត្រូវបានប្រារព្ធធ្វើឡើងតាមគន្លងប្រពៃណីយព្រះពុទ្ធសាសនា  ដោយបានដង្ហែប្រទក្សិណ ៣ ជុំព្រះវិហារ រួចវេអង្គកឋិនទាន ប្រគេនព្រះសង្ឃ ដើម្បីក្រាលគ្រង និងធ្វើសង្ឃកម្មតាមពុទ្ធានុញ្ញាត។

ព្រះមហាកល្យាណមិត្តោ លី ម៉ុនថា ព្រះគ្រូចៅអធិការវត្តឧទុម្ពរ ក្រោមបានមាន ថិរៈ ដិការ ថ្លែងអំណរគុណយ៉ាងជ្រាលជ្រៅ ចំពោះឯកឧត្តមបណ្ឌិតសភាចារ្យ សុខ អាន និងលោកជំទាវ ព្រមទាំង ឯកឧត្តម ថ្នាក់ដឹកនាំរដ្ឋាភិបាល និងប្រជាពុទ្ធបរិស័ទ ទាំងអស់ ដែល មានសទ្ធាជ្រះថ្លាបរិច្ចាគធនធានផ្ទាល់ខ្លួន ដើម្បីចូលរួមចំណែកទ្រទ្រង់វិស័យព្រះពុទ្ធសាសនា ដែលជាសាសនារបស់រដ្ឋឲ្យកាន់តែមានការរីកចំរើន ថែមទៀត។

បច្ច័យសង្កត់ត្រ័យដែលប្រមូលបានពីបុណ្យកឋិនទាននាពេលនេះ មានចំនួន សរុប១២០លានរៀល ត្រូវបានវេប្រគេនព្រះសង្ឃ  សំរាប់យកទៅជួសជុលព្រះវិហារ និងកសាងកុដិ ធម្មត្រ័យថ្មី១ខ្នងដែលមានបណ្ដោយ ១៣ម៉ែត្រ ទទឹង ៩ម៉ែត្រ និងកម្ពស់១៩ម៉ែត្រ  ប្រើប្រាស់ជាប្រយោជន៍ នៅក្នុងទីអារាម ឲ្យកាន់តែមានភាពល្អប្រសើរ ថែមទៀតសាកសមជាទីសេនាសេនៈ សំរាប់ប្រជាពុទ្ធបរិ ស័ទ គ្រប់រូបមកសិក្សារៀនសូត្រធម៌វិន័យ៕

កាកបាទក្រហមប្រទេសចិន នឹងជួយអភិវឌ្ឍវិស័យអប់រំ សុខាភិបាល និងកសិកម្ម នៅភូមិធម្មជាតិរុនតាឯក

ក្នុងដំណើរទស្សនកិច្ចទៅកាន់ភូមិធម្មជាតិរុនតាឯក នារសៀលថ្ងៃទី០២ ខែវិច្ឆិកា ឆ្នាំ២០១៦កន្លងទៅនេះ គណៈប្រតិភូខេត្តក្វាងស៊ីនៃសាធារណរដ្ឋប្រជាមានិតចិន បានសន្យាចូលរួមក្នុងការអភិវឌ្ឍន៍ភូមិធម្មជាតិរុនតាឯក ដោយផ្តោតសំខាន់ទៅលើវិស័យអប់រំ វិស័យសុខាភិបាល និងកសិកម្ម។ ជាមួយនឹងដំណើរទស្សនកិច្ចនេះ ក្រុមប្រតិភូកាកបាទក្រហមខេត្តក្វាងស៊ីក៏បាននាំយកកាបូប និងសម្ភារៈសិក្សាមួយចំនួន ដើម្បីចែកជូនសិស្សានុសិស្សដែលកំពុងសិក្សានៅសាលាបឋមសិក្សាភូមិធម្មជាតិផងដែរ។

លោក Feng Guoping អនុប្រធានអចិន្ត្រៃយ៍ កាកបាទក្រហមខេត្តក្វាងស៊ី ដែលជាអ្នកដឹកនាំក្រុមប្រតិភូ បានសរសើរភូមិធម្មជាតិរុនតាឯកថា មានការអភិវឌ្ឍល្អ បរិស្ថានស្អាត ជាពិសេសគឺប្រជាពលរដ្ឋមានទឹកមុខញញឹមរួសរាយរាក់ទាក់ ធ្វើឲ្យគណៈប្រតិភូរបស់លោកមានភាពកក់ក្តៅ និងមានចិត្តសោមនស្សរីករាយខ្លាំង។

លោកបានបន្ថែមថា ការអភិវឌ្ឍភូមិនេះមានសារៈសំខាន់ណាស់ ព្រោះវាជួយការពាររមណីយដ្ឋានប្រវត្តិសាស្រ្តអង្គរ ឲ្យមានភាពគង់វង្សយូរអង្វែង និងកាន់តែមានភាពល្បីល្បាញឡើងលើឆាកអន្តរជាតិថែមទៀត។ ជាមួយគ្នានេះ លោក Guoping បានសន្យាថា ក្រុមប្រតិភូកាកបាទក្រហមខេត្តក្វាងស៊ីប្រទេសចិននឹងជួយអភិវឌ្ឍភូមិនេះបន្ថែមទៀតលើវិស័យអប់រំ សុខាភិបាលនិងកសិកម្ម ហើយលោកសង្ឃឹមថានឹងមានសប្បុរសជនជាតិនិងអន្តរជាតិជាច្រើនទៀត ចូលរួមជួយអភិវឌ្ឍភូមិនេះកាន់តែល្អប្រសើរឡើងបន្តទៀត។

លោក ម៉ី ម៉ារ៉ាឌី ទីប្រឹក្សាអាជ្ញាធរជាតិអប្សរា និងជាប្រធានគម្រោងអភិវឌ្ឍន៍ភូមិធម្មជាតិរុនតាឯក បានធ្វើបទបង្ហាញស្តីពីការកកើត ការវិវឌ្ឍ និងគម្រោងអភិវឌ្ឍន៍ដទៃៗទៀត។ ជាមួយគ្នានេះ លោកក៏បានថ្លែងអំណរគុណចំពោះក្រុមប្រតិភូ ដែលបានចំណាយពេលវេលាមកបំពេញទស្សនកិច្ចនៅភូមិធម្មជាតិតាឯក និងសង្ឃឹមថា ទទួលបានការចូលរួមអភិវឌ្ឍន៍ភូមិធម្មជាតិមួយនេះឲ្យកាន់តែល្អប្រសើរក្នុងពេលឆាប់ៗខាងមុខនេះ។
គួររំឭកថា ដើម្បីដោះស្រាយការកើនឡើងនូវចំនួនខ្នងផ្ទះ នៅក្នុងតំបន់រមណីយដ្ឋានអង្គរ រាជរដ្ឋាភិបាល តាមរយៈអាជ្ញាធរជាតិអប្សរា បានសម្រេចជ្រើសរើសដីមួយកន្លែងដែលស្ថិតនៅក្រៅតំបន់ការពារ មានទំហំ១០១២ហិកតា ដើម្បីចែកជូនប្រជាពលរដ្ឋក្នុងឧទ្យានអង្គរ ដែលមានគ្រួសារថ្មីហើយមានបំណងបំបែកខ្នងផ្ទះពីឪពុកម្តាយ។ គ្រួសារថ្មីដែលស្ម័គ្រចិត្តចាប់ឆ្នោតមករស់នៅទីនេះ នឹងបានទទួលដីឡូត៍ទំហំ១៥x២៥ម៉ែត្រការ៉េសម្រាប់សាងសង់ផ្ទះ និងដាំបន្លែ និងទទួលបានដីសម្រាប់ធ្វើស្រែចម្ការមានទំហំ ១ហិកតាថែមទៀត។ បច្ចុប្បន្ន មានប្រជាពលរដ្ឋជាង១០០គ្រួសារហើយ ដែលកំពុងរស់នៅក្នុងភូមិធម្មជាតិរុនតាឯកនេះ៕

សម្តេចតេជោ ហ៊ុន សែន ចង់ឱ្យលោកត្រាំឈ្នះគូប្រជែង ព្រោះបើត្រាំឈ្នះ ពិភពលោកអាចនឹងប្រែប្រួល សភាពការណ៍សេដ្ឋកិច្ច នឹងល្អប្រសើរជាងសព្វថ្ងៃនេះ

ខណៈការបោះឆ្នោត ប្រធានាធិបតីអាម៉េរិច កាន់តែខិតជិតមកដល់នោះ សម្តេចតេជោ ហ៊ុន សែន បានបង្ហាញទស្សនៈផ្ទាល់ ដោយចង់អោយលោកត្រាំឈ្នះគូប្រជែង ខ្លាំងណាស់ ព្រោះបើត្រាំឈ្នះ ពិភពលោកអាចនឹងមានការប្រែប្រួល ហើយសភាពការណ៍សេដ្ឋកិច្ច នឹងល្អប្រសើរជាងសព្វថ្ងៃ​នេះ។

នៅក្នុងឱកាសអញ្ចើញធ្វើបឋកថា ចែករំលែកបទពិសោធន៍លើប្រធានបទ ស្តីពី ការដឹកនាំ​បញ្ជា​កងកំលាំងសភាពការណ៍ជាតិ -អន្តរជាតិ និងងបញ្ហាផ្សេងៗ ជូនដល់ថ្នាក់ដឹកនាំ មន្ត្រី គ្រូ​នគរបាល​ជាតិ និងនិស្សិត-សិក្ខាកាម នៃបណ្ឌិតសភានគរបាលកម្ពុជា នាព្រឹកថ្ងៃទី០៣ ខែវិច្ឆិកា ឆ្នាំ២០១៦នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រ កម្ពុជា បានទាញចំណាប់អារម្មណ៍ អ្នកចូលរួមទាំអស់ឱ្យផ្តោតការយកចិត្តទុកដាក់សំខាន់ ទៅលើ​បញ្ហាទិដ្ឋភាពមួយចំនួន ទាក់ទងទៅនិងសភាពការអន្តរជាតិ នៃបរិបទនយោបាយពិភពលោក និងនៅក្នុងស្ថានភាពនៃសង្គ្រាមត្រជាក់ ដែលកាន់តែបើកចំហ ដែលវាបានវិវត្តន៍ឈានឡើងថ្មីៗ ក្នុងនោះរាប់ទាំងបញ្ហាសភាពការណ៍ខ្លះ ដែលពិភពលោក កំពុងតាមដានយ៉ាងយកចិត្តទុកដាក់ បំផុត នោះគឺការបោះឆ្នោតសាកល ជ្រើសរើសប្រធានាធិបតីអាម៉េរិច ដែលជាការប្រជែង រវាង​បេក្ខភាព មកពីគណបក្សសាធារណរដ្ឋ របស់លោក ដូណាល់ត្រាំ  និងគណបក្សប្រជាធិបតេយ្យ របស់​លោស្រី ហ៊ីលឡារី គ្លីនតុន។

សម្តេចបន្តថា ពិភពលោកបានកំពុង តាមដាន ចំពោះ​ការ​បោះឆ្នោតនៅអាម៉េរិច ដែល​ជិត​មក​ដល់​នេះ ហើយអ្វីដែលយើងចាប់អារម្មណ៍ គឺការធ្លាក់ដ៏គំហុក របស់លោកស្រី គ្លីនតុន ដោយ​សារតែ​ស្ថាប័ន FBI  បានទាមទារលិខិតបំភ្លឺពី លោកស្រី គ្លីនតុន ពាក់ពន្ធ័និងករណី នៃភាពមិនប្រក្រតី​មួយ​ចំនួននាពេលកន្លងមក។ សម្តេចបានបន្តថា  ដោយ​សារ​បញ្ហានេះហើយ ដែលជាដើម​ចម​ធ្វើឱ្យលោកត្រាំ មានមួយពិន្ទុឡើងបន្ថែមទៀត លើលោក​ស្រី​ គ្លីនតុន។ ដូច្នេះក្នុងការបោះ​ឆ្នោត​ជ្រើស​រើសប្រធានាធិបតី អាម៉េរិច នាពេលខាងមុខនេះ សំរាប់​រូបសម្តេចផ្ទាល់ គឺចង់អោយលោក ដូណាល់​ត្រាំ ឈ្នះ លោកស្រីគ្លីនតុន ដោយសម្តេច​បញ្ជាក់​យ៉ាងដូច្នេះថា «ប៉ុន្តែសំរាប់ខ្ញុំ និយាយ​ដោយត្រង់ ខ្ញុំចង់ឲ្យ លោកត្រាំ ឈ្នះខ្លាំងណាស់..បើ លោកត្រាំ​ឈ្នះ ពិភពលោកអាច​និងមាន​ការប្រែប្រួល ហើយអាចមានសភាពការសេដ្ឋកិច្ច កាន់តែប្រសើរជាង ដោយសារលោកត្រាំ គាត់ជាអ្នករកស៊ី..បើលោកត្រាំរកស៊ី អញ្ចឹងត្រាំ មិនចង់ឲ្យកើតមានសង្គ្រាមនោះទេ»។

ម្យ៉ាងទៀត បើលោកត្រាំ ឈ្នះទំនាក់ទំនង ដែលធ្លាប់​ល្អក់កករ ដោយសារបញ្ហាវិបត្តិនៅក្នុង​ប្រទេស​​ស៊ីរី និងតំបន់គ្រីមមៀរ (ព្រំដែនរុស្សី) រវាងអាម៉េរិច និងរុស្សី អាចនិង​មាន​ស្ថានភាព​ប្រសើរ​ឡើង ហើយស្ថានការណ៍នយោបាយ និងកិច្ចការបរទេស នឹងវិលមករកប្រក្រតីភាព និងជាមិត្ត​និងគ្នាឡើងវិញ ជាធម្មតាដូចគ្រាមុន។ តែយ៉ាងណា បើ​តាមប្រសាសន៍ សម្តេចតេជោ ហ៊ុន សែន ទោះអ្នកណាឈ្នះ អ្នកណាចាញ់ នោះវាជារឿង​របស់អាម៉េរិច ប៉ុន្តែវាក៏ទាក់ទង​ជាមួយ​យើងដែរ ព្រោះបើខាងលោកស្រី គ្លីនតុនឈ្នះ សភាព​ការណ៍​អន្តរជាតិ ក៏មិនងាយស្រួល​ប៉ុន្មាន​នោះឡើយ ហើយទំនាក់ទំនង អាម៉េរិច និងរុស្សី នឹង​កាន់តែមានការលំបាកបន្ថែមទៀត ដោយ​សារ​តែអាម៉េរិច និងសម្ព័ន្ធមិត្តណាតូ គាំទ្រឧទ្ទាមស៊ីរី ហើយរុស្សីប្រឆាំង និងការគាំទ្រទាំងនេះ ហើយបានបង្កើនការវាយប្រហារ ក្រុមឧទាមក្នុង​ប្រទេស​ស៊ីរី ជាប់ព្រំដែនរុស្សី ជាញឹកញ៉យនោះ។

ដោយឡែកទាក់ទង និងដំណើរការ នៃបណ្ឌិតសភានគរបាលកម្ពុជា សម្តេចអគ្គមហាសេនាបតី តេជោ ហ៊ុន សែន បានថ្លែងអបអរសាទរ ជាមួយនិងកំណែទម្រង់ស៊ីជំរៅ របស់ក្រសួងមហាផ្ទៃ លើបញ្ហានគរបាលជាតិ ពិសេសទាក់ទងនិងការបណ្តុះបណ្តាល ធនធាននគរបាលជាតិ មិនត្រឹម​កន្លែង​នេះនោះទេ បុន្តែនៅគ្រប់ទីកន្លែង ដែលមានសាលា តាមភូមិភាគជាដើម។

បើតាម នាយឧត្តមសេនីយ៍ សេង ផល្លី ប្រធានបណ្ឌិតសភានគរបាលកម្ពុជា បានឱ្យដឹងថា ចាប់​តាំង​ពីឆ្នាំ២០០៧ រហូតដល់ឆ្នាំ២០១៦នេះ បណ្ឌិតសភានគរបាលកម្ពុជា បានធ្វើការបណ្តុះ​បណ្តាលដល់និស្សិត សិក្ខាកាម ដែលជាមន្ត្រីនគរបាលជាតិ និងមន្ត្រីពន្ធនាគារសរុប ៤៧៩៩៧​នាក់ ក្នុងនោះវគ្គខ្លី ចំនួន៤៣៨៧១នាក់ វគ្គមធ្យមចំនួន ៦២៤នាក់ វគ្គវែងចំនួន២៤០២នាក់ និងវគ្គ​បណ្តុះ​បណ្តាលមន្ត្រីពន្ធនាគារ ១១០០នាក់ ហើយបច្ចុប្បន្នកំពុងធ្វើការបណ្តុះបណ្តាលនិស្សិត សិក្ខាកាម សរុប ១១២៥នាក់៕

គម្រោង​ជួសជុល​​កែលម្អផ្លូវពី​ខាងកើតកស្សិណ​អង្គរវត្ត ឆ្ពោះទៅស្រះស្រង់

ប្រធានផ្នែក​កិច្ចការបម្រែ​បម្រួល​អាកាសធាតុ​របស់ចិន​និយាយ​ពីគោលការណ៍​របស់លោក Trump ថា មេដឹក​ដែល​មាន​គតិ​បណ្ឌិត​មិនរារាំង​និន្នាការ​ពិភពលោក​ឡើយ

ខណៈដែលកិច្ចព្រមព្រៀងទីក្រុងប៉ារីសនឹងចូលជាធរមាននៅសប្តាហ៍នេះ ពិភពលោកចង់ដឹងថាតើប្រធានាធិបតីសហរដ្ឋអាមេរិកថ្មីនឹងដកវាចេញឬទេ។

រយៈពេលបួនថ្ងៃ បន្ទាប់ពីកិច្ចព្រមព្រៀងទីក្រុងប៉ារីសចូលជាធរមាន សហរដ្ឋអាមេរិកនឹងរៀបចំបោះឆ្នោតជ្រើសរើសប្រធានាធិបតី។ បេក្ខជនប្រធានាធិបតីមកពីគណបក្សសាធារណរដ្ឋ លោក Donald Trump បាននិយាយកាលពីពេលមុនថា គាត់នឹង «លុបចោលកិច្ចព្រមព្រៀងទីក្រុងប៉ារីសស្តីពីបម្រែបម្រួលអាកាសធាតុ» ដែលបានញ៉ាំងឱ្យអ្នកយកព័ត៌មានម្នាក់សួរអ្នកតំណាងពិសេសសម្រាប់កិច្ចការបម្រែបម្រួលអាកាសធាតុរបស់ចិន លោក Xie Zhenhua ថាតើប្រទេសចិននឹងធ្វើការងារជាមួយលោក Trump លើបញ្ហានេះដោយរបៀបណា។

បើយោងតាមសារព័ត៌មាន Wall Street Journal បានឱ្យដឹងថា លោក Xie បានថ្លែងថា «ខ្ញុំមិនគិតថា មនុស្សធម្មតានឹងយល់ស្របទេ ប្រសិនបើអ្នកបានបដិសេធនឹងនិន្នាការនោះ»។ គាត់បានបន្តថា «ខ្ញុំជឿជាក់ថា ប្រសិនបើជាមេដឹកនាំដែលមានគតិបណ្ឌិត ជាពិសេសមេដឹកនាំនយោបាយ គាត់គួរតែដឹងថា គោលនយោបាយទាំងអស់គួរតែអនុលោមតាមនិន្នាការវិវត្តន៍របស់ពិភពលោក»។ នេះគឺជាការបញ្ចេញមតិដ៏កម្រទៅលើដំណើរការនយោបាយរបស់ប្រទេសមួយផ្សេងទៀត។

កិច្ចសហប្រតិបត្តិការស្តីពីបម្រែបម្រួលអាកាសធាតុបានក្លាយជាបញ្ហាលេចធ្លោក្នុងទំនាក់ទំនងរវាងសហរដ្ឋអាមេរិក និងចិននាពេលចុងក្រោយ ថែមទាំងបង្ហាញឱ្យឃើញចេញពីស្រមោលនៃស្ថានភាពលំបាករបស់សមុទ្រចិនខាងត្បូង។

មុនកិច្ចប្រជុំកំពូល G20 កាលពីខែកញ្ញា ប្រធានាធិបតីសហរដ្ឋអាមេរិក លោក Barack Obama បានឈរនៅលើវេទិកាក្នុងទីក្រុង Hangzhou នៃប្រទេសចិន ដែលអមជាមួយនឹងសមភាគីចិនរបស់គាត់ លោក Xi Jinping បានប្រកាសជាផ្លូវការថា ប្រទេសទាំងពីរបានផ្តល់សច្ចាប័នលើកិច្ចព្រមព្រៀងទីក្រុងប៉ារីស។ កិច្ចព្រមព្រៀងស្តីពីបម្រែបម្រួលអាកាសធាតុដែលបានសម្រេចដល់សន្និសីទអង្គការសហប្រជាជាតិកាលពីឆ្នាំមុនស្តីពីការផ្លាស់ប្តូរអាកាសធាតុ ដើម្បីស្វែងរកការទប់ទល់នូវការឡើងសីតុណ្ហភាពពិភពលោកឱ្យនៅក្រោម២ អង្សាសេ និងចៀសវាងពីការប្រើប្រាស់ដុតកម្ទេចកម្ទីយកចំហេះ។

លោក Obama បានព្យាករណ៍ថា «ថ្ងៃណាមួយ យើងប្រហែលជាឃើញរឿងនេះ គឺជាពេលវេលាមួយដែលទីបំផុតយើងបានសម្រេចចិត្តជួយសង្រ្គោះភពផែនដីរបស់យើង»។

ក្នុងរយៈពេលប៉ុន្មានសប្តាហ៍ បន្ទាប់ពីចិន និងអាមេរិក «បានបង្កើតភាពជាដៃគូប្រវត្តិសាស្រ្ត ដើម្បីនាំឱ្យមានការប្រយុទ្ធប្រឆាំងនឹងបម្រែបម្រួលអាកាសធាតុ» ដែលប្រទេសមួយចំនួននៅជុំវិញពិភពលោកត្រូវបានគេជំរុញឱ្យផ្តល់សច្ចាប័ន។

រវាងពួកគេទាំងពីរ ទីក្រុងប៉េកាំង និងទីក្រុងវ៉ាស៊ីនតោនមានចំនួន៣៨ ភាគរយនៃការបំភាយឧស្ម័នពិភពលោក។ ដើម្បីឱ្យកិច្ចព្រមព្រៀងនេះចូលជាធរមាន ប្រទេសចំនួន៥៥ ដែលយ៉ាងហោចណាស់បំភាយឧស្ម័នពិភពលោក៥៥ ភាគរយ ដែលចាំបាច់ត្រូវផ្តល់សច្ចាប័ន។ មុនពេលអាមេរិក និងចិនបានធ្វើរឿងនេះ មានប្រទេសចំនួន២៣ ប៉ុណ្ណោះបានផ្តល់សច្ចាប័ន ដោយប្រទេសទាំងនេះបានបំភាយឧស្ម័នពិភពលោកជាង១ ភាគរយ។ បច្ចុប្បន្ន កិច្ចព្រមព្រៀងនេះត្រូវបានផ្តល់សច្ចាប័នដោយប្រទេសចំនួន៨៩ ហើយនឹងចូលជាធរមានសម្រាប់ប្រទេសជាច្រើននៅថ្ងៃទី៤ ខែវិច្ឆិកា។

ការបោះឆ្នោតសហរដ្ឋអាមេរិកដែលកំពុងតែរង់ចាំនោះ ហាក់បីដូចជាបន្ថែមការលើកទឹកចិត្តសម្រាប់អាមេរិក និងចិនដើម្បីផ្តល់សច្ចាប័នដល់កិច្ចព្រមព្រៀងទីក្រុងប៉ារីស។ លោក Li Shuo ដែលជាទីប្រឹក្សាផ្នែកបម្រែបម្រួលអាកាសធាតុនៃអង្គការ Greenpeace បានប្រាប់ទីភ្នាក់ងារសារព័ត៌មាន Reuters ថា អាមេរិក និងចិនចង់បានកិច្ចព្រមព្រៀងនេះឱ្យចូលជាធរមានមុនពេលបោះឆ្នោត។

ពួកសាធារណរដ្ឋបានរិះគន់លោក Obama សម្រាប់ការជំរុញឱ្យមានកិច្ចព្រមព្រៀងបម្រែបម្រួលអាកាសធាតុ ដោយគ្មានការពិគ្រោះយោបល់ជាមួយនឹងសភា។

គេហទំព័រយុទ្ធនាការរបស់លោក Trump មិនបានដាក់គោលនយោបាយស្តីពីបម្រែបម្រួលអាកាសធាតុឱ្យបានច្បាស់លាស់ទេ។ ប៉ុន្តែគាត់ត្រូវបានគេមើលឃើញយ៉ាងច្បាស់ថា ជាអ្នករិះគន់៕

ប្រភព: The Diplomat ចុះថ្ងៃទី០២ ខែវិច្ឆិកា ឆ្នាំ២០១៦