Tuesday, August 26, 2014
Monday, August 25, 2014
អនុប្រធានព្រឹទ្ធសភាជប៉ុនពេញចិត្តកិច្ចសហប្រតិបត្តិការរវាងប្រទេសទាំងពីរកម្ពុជា-ជប៉ុន
ឯកឧត្ដម អាហ្សូម៉ា កូស្ស៊ីអ៊ិស្ស៊ី (Azuma Koshiishi) អនុប្រធានព្រឹទ្ធសភា ប្រទេសជប៉ុននារសៀលថ្ងៃទី២២ ខែសីហា ឆ្នាំ២០១៤ ក្នុងឱកាសជួបសម្ដែងការគួរសមចំពោះសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានៅវិមានសន្តិភាពក្នុងគោលបំណងស្វែងយល់ការដឹកនាំអភិវឌ្ឍន៍ប្រទេស និងការកែទម្រង់របស់កម្ពុជាបានបង្ហាញនូវមនោសញ្ចេតនាសប្បាយរីករាយ ពេលបានឃើញកម្ពុជាទទួលបាននូវសុខសន្តិភាព និងកំពុងតែមានការអភិវឌ្ឍន៍ ជាពិសេសទំនាក់ទំនងរវាងប្រទេសទាំងពីរត្រូវបានលើកកំពស់ដោយរាជរដ្ឋាភិបាលទាំពីរ ឱ្យក្លាយទៅជាទំនាក់ទំនងភាពជាដៃគូយុទ្ធសាស្ត្រ ដែលនឹងធ្វើឲ្យកិច្ចសហប្រតិបត្តិការរវាងប្រទេសទាំងពីរកម្ពុជា-ជប៉ុន នឹងកាន់តែប្រសើរឡើងថែមទៀត។
ឯកឧត្ដម អ៊ាង សុផល្លែត ជំនួយការសម្ដេចតេជោនាយករដ្ឋមន្ត្រីបានឲ្យដឹងថា ក្នុងជំនួបនោះឯកឧត្ដម អាហ្សូម៉ា កូស្ស៊ីអ៊ិស្ស៊ី អនុប្រធានព្រឹទ្ធសភាជប៉ុនបានជម្រាបសម្ដេចតេជោអំពីការសប្បាយរីករាយ ចំពោះទស្សនកិច្ចរបស់ឯកឧត្ដមមកកាន់ព្រះរាជាណាចក្រកម្ពុជា។ ឯកឧត្ដម អាហ្សូម៉ា កូស្ស៊ីអ៊ិស្ស៊ី មានប្រសាសន៍ថា ប្រជាជន និងរាជរដ្ឋាភិបាលជប៉ុនបានចូលរួមចំណែកយ៉ាងសកម្ម ក្នុងការជួយស្វែងរកសន្តិភាពជូនប្រជាជនកម្ពុជា ហើយពេលនេះបានឃើញកម្ពុជាទទួលបាននូវសុខសន្តិភាព និងកំពុងតែមានការអភិវឌ្ឍន៍។ រាជរដ្ឋាភិបាលកម្ពុជា និងរាជរដ្ឋាភិបាលជប៉ុនបានលើកកម្ពស់ទំនាក់ទំនងរវាងប្រទេសទាំងពីរ ឱ្យក្លាយទៅជាទំនាក់ទំនងភាពជាដៃគូយុទ្ធសាស្ត្រ ហើយតាមរយៈទំនាក់ទំនងដែលមានស្រាប់នេះ កិច្ចសហប្រតិបត្តិការរវាងប្រទេសទាំងពីរកម្ពុជា-ជប៉ុន នឹងកាន់តែប្រសើរឡើងថែមទៀត។
ឯកឧត្ដមអនុប្រធានព្រឹទ្ធសភាជប៉ុនបានមានប្រសាសន៍ថា អាស៊ាននឹងក្លាយជាសហគមន៍ សេដ្ឋកិច្ចមួយនៅឆ្នាំ២០១៥ ក្នុងនោះសមាជិកអាស៊ានទាំងអស់រួមទាំងកម្ពុជាផងដែរ មានកិច្ចការជាច្រើនដែលត្រូវធ្វើ ហើយជប៉ុននឹងត្រៀមខ្លួនជួយដល់កម្ពុជា តាមរយៈការឈានចូលសហគមន៍អាស៊ានឆ្នាំ២០១៥ ឱ្យមានការកើនឡើងផងដែរ។ ឯកឧត្តមក៏បានផ្ដោតក្ដីសង្ឃឹមថា ទំនាក់ទំនងរវាងកម្ពុជា និងជប៉ុននឹងត្រូវបានពង្រឹងតាមរយៈការផ្លាស់ប្ដូរទស្សនកិច្ច និងកិច្ចសហប្រតិបត្តិការលើវិស័យសេដ្ឋកិច្ច វប្បធម៌ ជាពិសេសតាមរយៈនិស្សិត ដែលបានទៅបន្តការសិក្សា ឬក៏បានទៅសិក្សានៅប្រទេសជប៉ុន។
សម្ដេចតេជោនាយករដ្ឋមន្ត្រី បានមានប្រសាសន៍វាយតម្លៃខ្ពស់ចំពោះប្រទេសជប៉ុន ដែលបានដើរតួយ៉ាងសំខាន់ ក្នុងការជួយស្វែងរកសន្តិភាពនៅក្នុងប្រទេសកម្ពុជា ប៉ុន្តែពុំសូវបានចេញមុខនោះទេ ហើយជប៉ុនក៏ផ្ដល់ជំនួយយ៉ាងច្រើនដល់កម្ពុជាសម្រាប់ការអភិវឌ្ឍន៍ ហើយឥឡូវនេះ ការវិនិយោគក៏មានការកើនឡើងជាច្រើនផងដែរ។ សម្តេចតេជោមានប្រសាសន៍បញ្ជាក់ថា ២ភាគ៣នៃទឹកស្អាតនៅកម្ពុជា គឺត្រូវបានជួយដោយប្រទេសជប៉ុន ប៉ុន្តែទោះជាយ៉ាងណាក៏ដោយ កម្ពុជាចង់ឱ្យជប៉ុនជួយជាបន្តទៀតទៅលើបញ្ហាហេដ្ឋារចនាសម្ព័ន្ធ ក៏ដូចជាអភិវឌ្ឍន៍សេដ្ឋកិច្ចផងដែរ តាមរយៈការជំរុញការវិនិយោគរបស់ជប៉ុន និងទេសចរជប៉ុនមកកាន់កម្ពុជា ជាពិសេសតាមរយៈការហោះហើរដោយផ្ទាល់ពីជប៉ុនមកកាន់កម្ពុជាតែម្ដង។
សម្ដេចតេជោនាយករដ្ឋមន្ត្រី បានមានប្រសាសន៍ថា អ្វីដែលកម្ពុជាត្រូវការជាងគេបំផុតនៅពេលនេះ គឺជាធនធានមនុស្ស។ ការកសាងធនធានមនុស្ស គឺជាអាទិភាពទី១ របស់រាជរដ្ឋាភិបាលកម្ពុជា បើគ្មានធនធានមនុស្សទេយើងមិនអាចធ្វើអ្វីបានទេ។ អាទិភាពទី២ គឺការយកចិត្តទុកដាក់ទៅលើប្រព័ន្ធស្រោចស្រពសម្រាប់វិស័យកសិកម្ម។ អាទិភាពទី៣ គឺបញ្ហា ហេដ្ឋារចនាសម្ព័ន្ធដឹកជញ្ជូន គមនាគមន៍ និងទូរគមនាគមន៍ និងអាទិភាពទី៤ គឺការយកចិត្តទុកដាក់ដោះស្រាយបញ្ហាអគ្គិសនីសម្រាប់ប្រជាជន និងការអភិវឌ្ឍន៍។ សម្តេចតេជោឲ្យដឹងថា ពីមុនអាទិភាពរបស់កម្ពុជា គឺទឹក ផ្លូវ ភ្លើង មនុស្ស ប៉ុន្តែឥឡូវនេះ គឺមនុស្ស ទឹក ផ្លូវ និង ភ្លើង។
ពាក់ព័ន្ធនឹងកម្មវិធីកំណែទម្រង់សម្ដេចតេជោបានមានប្រសាសន៍ថា កម្ពុជាបានធ្វើការកែទម្រង់ទទួលបានជោគជ័យចំពោះកំណែទម្រង់ឡូត៍នេសាទ និងកំពុងតែធ្វើការកំណែទម្រង់ដីធ្លី ដើម្បីធ្វើយ៉ាងណាឱ្យប្រជាជនមានដីធ្លីប្រើប្រាស់ និងកាត់បន្ថយជម្លោះផងដែរ។ កំណែទម្រង់ដទៃទៀតរួមមាន កំណែទម្រង់ក្នុងការប្រយុទ្ធប្រឆាំងអំពើពុករលួយ កំណែទម្រង់ប្រព័ន្ធយុត្តិធម៌ កំណែទម្រង់រដ្ឋបាលសាធារណៈ កំណែទម្រង់កងទ័ព រួមទាំងកំណែទម្រង់ហិរញ្ញវត្ថុសាធារណៈ ដែលកិច្ចការទាំងនេះកំពុងតែអនុវត្តន៍។ ដោយឡែកកំណែទម្រង់រដ្ឋបាលសាធារណៈ និងកំណែទម្រង់ហិរញ្ញវត្ថុសាធារណៈ គឺកំពុងតែមានល្បឿនលឿនជាងគេ៕
Sunday, August 24, 2014
Saturday, August 23, 2014
Friday, August 22, 2014
អភិបាល នៃគណៈអភិបាលខេត្តតាកែវ ប្រកាសបញ្ចប់កិច្ចសន្យា ក្រុមហ៊ុន លោកស្រី សុខ សារឿន ដែលរំលោភលើកិច្ចសន្យា
នៅព្រឹកថ្ងៃទី ២២ ខែសីហា ឆ្នាំ២០១៤នេះ នៅរមណីយដ្ឋានទន្លេបាទី ឯកឧត្តម ឡាយ វណ្ណៈ អភិបាលនៃគណៈអភិបាលខេត្តតាកែវ បានប្រកាសដីកាបញ្ចប់កិច្ចសន្យា ស្តីពីការបន្តជួលដី និងទីតាំងដើម្បីអភិវឌ្ឍន៍រមរណីដ្ឋានទន្លេបាទី របស់ក្រុមហ៊ុន លោកស្រី សុខ សារឿន និងបានប្រគល់ឱ្យប្រជាពលរដ្ឋសហគមន៍ជាអ្នកលក់ដូរនៅទីនោះកាន់កាប់ដោយផ្ទាល់វិញ។
យោងតាមដីកានេះ បានសម្រេច បញ្ចប់កិច្ចសន្យាជួលដី និងទីតាំងដើម្បី អភិវឌ្ឍន៍រមណីដ្ឋានទន្លេបាទី ចុះថ្ងៃទី ២១ ខែឧសភា ឆ្នាំ២០០៤ រវាងភាគី (ក) តំណាងឲ្យ លោកអភិបាលស្រុក និងភាគី (ខ ) តំណាងដោយលោកស្រី សុខ សារឿនប្រធានក្រុមហ៊ុន បាទីធួរីសឹម ឌីវីឡុបម៉ិនថ៍ និងផ្ទេរមកឱ្យស្ថិតក្រោមការគ្រប់គ្រងដោយរដ្ឋបាលស្រុកបាទី សហការជាមួយមន្ទីរ អង្គភាពដែលពាក់ព័ន្ធ អាជ្ញាធរមូលដ្ឋាន ក្រុមការងារថ្នាក់ជាតិចុះមូលដ្ឋានស្រុកបាទី និងប្រជាពលរដ្ឋ ដើម្បីបន្តគ្រប់គ្រងរដ្ឋណីយដ្ឋានបាទីដោយផ្ទាល់ រហូតដល់មានការរៀបចំជាថ្មី។
មូលហេតុដែលធ្វើឲ្យមានការបញ្ចប់កិច្ចសន្យា ពីក្រុមហ៊ុន លោកស្រី សុខ សារឿន គឺដោយសារតែភាគីខាងក្រុមហ៊ុនមិនបានអនុវត្តន៍ តាមកិច្ចសន្យាជួល និងបានរំលោភទៅលើប្រជាពលរដ្ឋ ដែលជាអាជីវករ និងមិនបានធ្វើការអភិវឌ្ឍន៍ដូចការសន្យាក្នុងពេលដែលក្រុមហ៊ុន គ្រប់គ្រងតំបន់នោះកន្លងមក។
ឯកឧត្តម ឡាយ វណ្ណៈ អភិបាលនៃគណៈអភិបាលខេត្តតាកែវ បានមានប្រសាសន៍ថា បន្ទាប់ពីបញ្ចប់កិច្ចសន្យានេះហើយ នៅពេលខាងមុខ នឹងមានការរៀបចំ សាងសង់តូបលក់ដូរថ្មី ឲ្យមានសណ្តាប់ធ្នាប់, ការស្តារកាកសំណល់ដែលមាននៅទឹកទន្លេបាទី (សំរាម, សារាយ, ស្លែរ និងកាកសំណល់ផ្សេងៗ) ក្នុងនោះក៏មានគម្រោងអភិវឌ្ឍន៍ផ្លូវចូលទៅកាន់រមណីយដ្ឋាន និងការបង្តើតឲ្យមានកន្លែងកំសាន្តផ្សេងទៀតក្នុងតំបន់ ដើម្បីទាក់ទាញភ្ញៀវទេសចរឲ្យមក កំសាន្តកាន់តែច្រើន។
ឯកឧត្តមក៏បានក្រើនរំលឹកក៏ដូចជាសំណូមពរដល់អាជីវករ និងប្រពលរដ្ឋ ធ្វើយ៉ាងណា ជួយរក្សាបរិស្ថានជុំវិញនោះ និងធ្វើការបង្កើតជាសហគមន៍កំណត់នូវតំលៃ ម្ហួបអាហារឲ្យបាន សមរម្យ និងឲ្យមានអនាម័យ។
គួរបញ្ជាក់ថា បញ្ហាជម្លោះនេះត្រូវបានអួសបន្លាយពេលជាង១០ឆ្នាំមកហើយ ទើបតែ មានការណែនាំ ផ្តល់គំនិត ដោះស្រាយ ចង្អុលបង្ហាញ ពីសំណាក់ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ប្រធានក្រុមការងារថ្នាក់ជាតិចុះមូលដ្ឋានខេត្តតាកែវ និងការចុះផ្ទាល់ ពីសំណាក់ក្រុមការងារថ្នាក់ជាតិ ចុះមូលដ្ឋានស្រុកបាទី ដែលមានការដឹកនាំដោយ សហប្រធាន ក្នុងនោះមាន ឯកឧត្តម សូ ម៉ារ៉ា រដ្ឋលេខាធិការក្រសួងទេសចរ បានសហការផ្ទាល់ជាមួយគណៈអភិបាលខេត្តតាកែវ រហូតឈានដល់សម្រេចបាននូវការលុបកិច្ចសន្យាក្នុងថ្ងៃនេះ។
ក្រោយពីបានស្តាប់ការប្រកាសដីកាសម្រេចខាងលើនេះរួចមក អាជីវករ និងប្រជាពលរដ្ឋមូលដ្ឋាន បានសំដែងនូវការសាទរ ចំពោះដំណោះស្រាយដ៏មានប្រសិទ្ធិភាពនេះ និងបានបង្ហាញនូវភាពរីករាយ រួមទាំងសេចក្តីសង្ឃឹម ក្នុងការទទួលបាននូវការអភិវឌ្ឍន៍ថ្មី នៅនឹងកន្លែង ជាមួយនឹងសុទិដ្ឋិនិយមថា អនាគតគ្រួសាររបស់ពួកគាត់នឹងមានជីវភាពកាន់តែប្រសើរឡើង។
ការបញ្ចប់កិច្ចសន្យាក្រុម ហ៊ុនលោកស្រី សុខ សារឿននេះ គឺជាគំរូនៃការដោះស្រាយដ៏ល្អ និងអាចធ្វើជាបទពិសោធន៍សម្រាប់ដំណោះស្រាយនៅទីកន្លែងផ្សេងៗទៀត។ ការប្តូរពីការកាន់កាប់របស់ក្រុមហ៊ុន ទៅឱ្យប្រជាពលរដ្ឋនេះ គឺស្របតាមការសន្យារបស់ក្រុមការងារថ្នាក់ជាតិ ចុះមូលដ្ឋានស្រុកបាទី កន្លងមក គឺបានធ្វើទៅតាមការសន្យាយ៉ាងពិតប្រាកដមែន។
ម្យ៉ាងវិញទៀត រាល់អភិវឌ្ឍន៍ទាំង ឡាយណា ដែលមិនស្ថិតនៅក្រោមច្បាប់ ហើយគាបសង្កត់លើប្រជាពលរដ្ឋ វប្បធម៌នេះ នឹងត្រូវបញ្ចប់ ជាជំនួស គឺការប្រែក្លាយទុក្ខលំបាក របស់ប្រជាពលរដ្ឋទៅជាស្នាមញញឹមវិញ៕
អត្ថបទ៖ ក្រុមការងារថ្នាក់ជាតិចុះមូលដ្ឋានស្រុកបាទី
Subscribe to:
Posts (Atom)