សម្តេចធិបតី ហ៊ុន ម៉ាណែត ៖ កម្ពុជានឹងធ្វើជាម្ចាស់ផ្ទះក្នុងការរៀបចំការប្រកួតកីឡាយុវជនអាស៊ីនៅឆ្នាំ ២០២៩

សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នាល្ងាចថ្ងៃទី៣០ ខែតុលា ឆ្នាំ២០២៤ បានអញ្ជើញ ចូលរួមពិធីបើកការប្រកួតកីឡាជាតិលើកទី៤ និងកីឡាជាតិជនពិការលើកទី២ ដែលបានប្រព្រឹត្តទៅនៅពហុកីឡដ្ឋានជាតិអូឡាំពិក។ ក្នុងឱកាសនោះ សម្តេចធិបតី ហ៊ុន ម៉ាណែត ក៏បានកោតសរសើរចំពោះកិច្ចខិតខំប្រឹងប្រែងរួមគ្នារវាងក្រសួងអប់រំ យុវជន និងកីឡា គណៈកម្មាធិការជាតិអូឡាំពិកកម្ពុជា គណៈកម្មាធិការជាតិប៉ារ៉ាឡាំពិកកម្ពុជា សហព័ន្ធកីឡាជាតិ និងក្រសួង-ស្ថាប័នពាក់ព័ន្ធ ដែលបានសហការគ្នាយ៉ាងល្អ រៀបចំការប្រកួតកីឡាជាតិ លើកទី៤ និងកីឡាជាតិជនពិការ លើកទី២ នេះឡើង ព្រមទាំងបានវាយតម្លៃខ្ពស់ចំពោះការខិតខំប្រឹងប្រែងរបស់ក្រសួងអប់រំ យុវជន និងកីឡា ក្នុងការដាក់ចេញនូវវិធានការកំណែទម្រង់ស៊ីជម្រៅលើវិស័យអប់រំកាយ និង កីឡា តាមរយៈការបន្តការជួសជុលកែលម្អហេដ្ឋារចនាសម្ព័ន្ធកីឡា ការធ្វើប្រតិភូកម្មការងារ និងការផ្តល់គាំទ្រថវិកាដល់សហព័ន្ធកីឡាជាតិ ដើម្បីធ្វើការបណ្តុះបណ្តាលធនធានមនុស្សជំនាញកីឡា និងការកែទម្រង់ការប្រកួតកីឡាជាដើម។ 

 សមិទ្ធផលជាក់ស្តែង នៅឆ្នាំ២០២៣ កន្លងទៅ ខណៈពេលដែលព្រះរាជាណាចក្រកម្ពុជាធ្វើជាម្ចាស់ផ្ទះនៃការប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ កម្ពុជា ទទួលបានជោគជ័យយ៉ាងធំធេង ព្រមទាំងទទួលបានការកោតសរសើរពីប្រទេសក្នុងតំបន់ និងពិភពលោក ទាំងលើទិដ្ឋភាពនៃការរៀបចំ និងការទទួលបានមេដាយពីការប្រកួតសរុបចំនួន ២៨២ គ្រឿង ដោយឈរលេខរៀងទី៤ ក្នុងចំនួន១១ ប្រទេស ក្នុងតំបន់អាស៊ាន និងអាស៊ានប៉ារ៉ាហ្គេមលើកទី១២ កម្ពុជាទទួលបានមេដាយសរុប ៧៣ គ្រឿង ដោយឈរលេខរៀងទី ៨ ក្នុងចំនួន ១១ ប្រទេស ក្នុងតំបន់អាស៊ាន។ 

 ជាមួយគ្នានោះ សម្តេចបវរធិបតី បានលើកឡើងថា ការរៀបចំការប្រកួតកីឡាជាតិលើកទី ៤ និងកីឡាជាតិជនពិការលើកទី ២ នេះ ជាឱកាសថ្មីមួយទៀត ដែលបានបង្ហាញអំពីការរីកចម្រើន និងការអភិវឌ្ឍវិស័យកីឡានៅកម្ពុជា និងជាការត្រៀមខ្លួនរួចរាល់សម្រាប់ការរៀបចំការប្រកួតកីឡាយុវជនអាស៊ីលើកទី៥ និងយុវជនអាស៊ីប៉ារ៉ាហ្គេមលើកទី ៦ នៅឆ្នាំ ២០២៩។ ម៉្យាងវិញទៀត ការរៀបចំព្រឹត្តិការណ៍កីឡាបានផ្តល់អត្ថប្រយោជន៍ជាច្រើនដល់សង្គម ក៏ដូចជា នយោបាយ ការទូត សេដ្ឋកិច្ច វប្បធម៌ ការលើកកម្ពស់មុខមាត់ជាតិ ទីផ្សារ ពាណិជ្ជកម្ម និងការទាក់ទាញភ្ញៀវទេសចរណ៍ ជាដើម ដែលនេះគឺជាការខិតខំប្រឹងប្រែងរបស់កម្ពុជា មួយជំហានទៀតក្នុងការបង្ហាញឱ្យឃើញនូវកម្លាំងសាមគ្គីភាពជាតិ និងកម្លាំងសេដ្ឋកិច្ច កម្ពុជា។ 

 ក្នុងពិធីនោះ សម្តេចបវរធិបតី បានបញ្ជាក់ថាកម្ពុជា នឹងធ្វើជាម្ចាស់ផ្ទះក្នុងការរៀបចំការប្រកួតកីឡាយុវជនអាស៊ីនៅឆ្នាំ ២០២៩ ហើយការសម្រេចធ្វើជាម្ចាស់ផ្ទះនេះអាចប្រព្រឹត្តទៅបាន គឺអាស្រ័យលើសមត្ថភាពពេញលេញ និងការកៀរគរធនធានចាំបាច់ និងគ្រប់គ្រាន់ សម្រាប់រៀបចំការប្រកួតកីឡាថ្នាក់តំបន់អាស៊ីដ៏ធំនេះឱ្យបានល្អ និងរលូនប្រកបដោយស្មារតីទទួលខុសត្រូវខ្ពស់។ ក្នុងនាមជាម្ចាស់ផ្ទះ សម្រាប់ការប្រកួតកីឡា យុវជនអាស៊ីឆ្នាំ២០២៩ កម្ពុជា មានមហិច្ឆតារៀបចំទទួលស្វាគមន៍ភ្ញៀវជាតិ និងអន្តរជាតិ ប្រកបដោយភាពកក់ក្តៅ បដិសណ្ឋារកិច្ចល្អ និងសេវាល្អ សម្រាប់គ្រប់ប្រតិភូកីឡា និងភ្ញៀវជាតិ-អន្តរជាតិ ឱ្យទទួលបានបទពិសោធល្អក្នុងការចូលរួមការប្រកួតកីឡាយុវជនអាស៊ីឆ្នាំ ២០២៩ នៅព្រះរាជាណាចក្រកម្ពុជា៕

លិខិតមិត្តអ្នកអាន៖ ប្រជាពលរដ្ឋចាំបាច់ត្រូវចូលរួមថែរក្សាសុខសន្តិភាពអោយបានគង់វង្ស

ជាការពិត សោកនាដកម្មនៃសង្គ្រាម បាននាំឱ្យប្រជាពលរដ្ឋធ្លាក់ក្នុងភាពអពមង្គលនៃរបបកម្ពុជាប្រជាធិបតេយ្យ របស់បនប្រល័យពូជសាសន៍ ប៉ុល ពត ដែលជាឃាតករដ៏ឃោរឃៅយង់ឃ្នង កាប់សម្លាប់ បំផ្លិចបំផ្លាញកម្ទេចចោលអស់នូវអ្វីៗដែលជាអត្តសញ្ញាណជាតិ អ្វីជាសមិទ្ធផលដែលបុព្វបុរសយើងបានខំកសាងបន្សល់ដោយញើសឈាម។ ក្រោយឆ្លងកាត់សង្គ្រាម អស្ថិរភាព និងរបបប្រល័យពូជសាសន៍ កម្ពុជាទំរាំបានស្គាល់រសជាតិសុខសន្តិភាពពេញលេញក្រោមការដឹកនាំរបស់ សម្តេចតេជោ ហ៊ុន សែន គឺពុំមែនជារឿងងាយស្រួលនោះទេ។ 

សន្តិភាព មានតម្លៃជាងអ្វីៗទាំងអស់ សន្តិភាពបានផ្ដល់នូវក្តីសង្ឃឹម និងស្នាមញញឹមដល់ប្រជាជនកម្ពុជាឡើងវិញ ដែលពុំធ្លាប់មានជាង៥០០ឆ្នាំក្នុងប្រវត្តិសាស្រ្តរបស់ខ្លួន។ អ្នកដែលមិនធ្លាប់បានឆ្លងកាត់នូវទុក្ខលំបាក និងការឈឺចាប់ដែលបង្កដោយសង្គ្រាម ប្រហែលជាមិនសូវយល់ច្បាស់ ពីតម្លៃនៃសន្តិភាពនោះឡើយ ចំណែកឯអ្នកដែលធ្លាប់បានឆ្លងកាត់ជម្លោះហិង្សា ឬភ្លើងសង្គ្រាម ទើបដឹងថាសន្តិភាពមានតម្លៃខ្លាំងកម្រិតណា។ បន្តវេនពីរាជរដ្ឋាភិបាលអាណត្តិមុន នៅអាណត្តិទី៧ ដែលដឹកនាំដោយ សម្តេចធិបតី ហ៊ុន ម៉ាណែត បានបន្តប្តេជ្ញាចិត្តការពារ និងលើកស្ទួយសន្តិភាពបន្ថែមទៀត ដោយហេតុថា «គ្មានសន្តិភាព គ្មានក្តីសង្ឃឹម គ្មានសន្តិភាព គ្មានការអភិវឌ្ឍ គ្មានសន្តិភាព គ្មានការគោរពសិទ្ធិមនុស្ស និងគ្មានលទ្ធិប្រជាធិបតេយ្យ»។ 

 ជាងនេះទៅទៀត ទោះបីជាប្រទេសកម្ពុជាតូចក៏ដោយ ក៏កម្ពុជាបានចូលរួមចំណែកដល់ដំណើរការនៃការស្វែងរកសន្តិភាពនៅក្នុងតំបន់ និងពិភពលោក ប្រកបដោយសុឆន្ទៈ ការទទួលខុសត្រូវ និងភាពស្មោះត្រង់ផងដែរ ជាពិសេសរាជរដ្ឋាភិបាលបានបង្កើតពាក្យមួយឃ្លាថា «អរគុណសន្តិភាព» ដើម្បីអោយប្រជាពលរដ្ឋចងចាំពាក្យនេះក្នុងចិត្តគ្រប់ៗគ្នា។ ក្នុងនាមប្រជាពលរដ្ឋខ្មែរ យើងត្រូវរួមគ្នាថែរក្សា និងលើកកម្ពស់សន្តិភាពជាមួយប្រមុខរាជរដ្ឋាភិបាល ឱ្យនៅស្ថិតស្ថេរគង់វង្សយូរអង្វែងដើម្បីការអភិវឌ្ឍសង្គមជាតិយើង៕ ដោយ៖ សំ ដានីរ៉ា

ឧបនាយករដ្ឋមន្រ្តីប្រចាំការ វង្សី វិស្សុត អញ្ជើញចូលរួមរៀបចំបង្កើតក្រុមប្រឹក្សាស្ថាប័ននីតិកម្មអាស៊ី និងសន្និសីទលើកទី១២ នៃអ្នកជំនាញនីតិកម្មអាស៊ី នៅសាធារណរដ្ឋកូរ៉េ

ភ្នំពេញ៖ ដោយទទួលបានគោលការណ៍អនុញ្ញាតដ៏ខ្ពង់ខ្ពស់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា, កាលពីយប់ថ្ងៃទី២៩ ខែតុលា ឆ្នាំ២០២៤ ឧបនាយករដ្ឋមន្ត្រីប្រចាំការ វង្សី វិស្សុត រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ប្រធានក្រុមប្រឹក្សាអ្នកច្បាប់ និងជាប្រធានគណៈកម្មាធិការដឹកនាំការកែទម្រង់ច្បាប់ បានដឹកនាំគណៈប្រតិភូទៅចូលរួមពិធីបើករបស់គណៈកម្មការរៀបចំបង្កើតក្រុមប្រឹក្សាស្ថាប័ននីតិកម្មអាស៊ី និងសន្និសីទលើកទី១២ នៃអ្នកជំនាញនីតិកម្មអាស៊ី នៅសាធារណរដ្ឋកូរ៉េ ដែលនឹងប្រព្រឹត្តទៅចាប់ពីថ្ងៃទី៣០ ខែតុលា ឆ្នាំ២០២៤ ដល់ថ្ងៃទី១ ខែវិច្ឆិកា ឆ្នាំ២០២៤ ក្រោមប្រធានបទ «ច្បាប់និងបញ្ញាសិប្បនិម្មិត៖ កិច្ចសហប្រតិបត្តិការក្នុងការអភិវឌ្ឍបច្ចេកវិទ្យាសម្រាប់នីតិកម្មនៅអាស៊ី (Law Encounters AI : Cooperation Measures for Advancing Legal Tech in Asia)»។

តាមកម្មវិធីដែលបានគ្រោងទុក ឧបនាយករដ្ឋមន្ត្រីប្រចាំការ វង្សី វិស្សុត នឹងថ្លែងសុន្ទរកថាក្នុងពិធីបើករបស់គណៈកម្មការរៀបចំបង្កើតក្រុមប្រឹក្សាស្ថាប័ននីតិកម្មអាស៊ី និងថ្លែងសុន្ទរកថាក្នុងសន្និសីទលើកទី១២ នៃអ្នកជំនាញនីតិកម្មអាស៊ី។ ក្រៅពីនេះ ឧបនាយករដ្ឋមន្ត្រីប្រចាំការ ក៏នឹងមានជំនួបពិភាក្សាការងារទ្វេភាគីជាមួយលោក Lee Wan-kyu រដ្ឋមន្ត្រីក្រសួងនីតិកម្ម នៃសាធារណរដ្ឋកូរ៉េ និងចុះហត្ថលេខាលើកំណត់ហេតុនៃកិច្ចប្រជុំរបស់គណៈកម្មការរៀបចំបង្កើតក្រុមប្រឹក្សាស្ថាប័ននីតិកម្មអាស៊ីផងដែរ។

ការចូលរួមពិធីបើករបស់គណៈកម្មាធិការរៀបចំបង្កើតក្រុមប្រឹក្សាស្ថាប័ននីតិកម្មអាស៊ី ក្នុងគោលបំណងដើម្បីគាំទ្រនូវចក្ខុវិស័យនៃការបង្កើតក្រុមប្រឹក្សាស្ថាប័ននីតិកម្មអាស៊ីមួយ ជាអង្គការអន្តរជាតិមួយ សម្រាប់កិច្ចសហការផ្នែកនីតិកម្មក្នុងតំបន់អាស៊ីនៅឆ្នាំ២០៣០។ ទន្ទឹមនេះ ការចូលរួមសន្និសីទលើកទី១២ នៃអ្នកជំនាញនីតិកម្មអាស៊ី ក្នុងគោលបំណងដើម្បីពង្រឹង និងពង្រីកកិច្ចសហការក្នុងការអភិវឌ្ឍឧស្សាហកម្មបច្ចេកវិទ្យាក្នុងវិស័យនីតិកម្ម ពោលគឺការធ្វើសមាហរណកម្មវិស័យបញ្ញាសិប្បនិម្មិតនិងនីតិកម្ម និងការកសាងសមត្ថភាពលើវិស័យនីតិកម្មក្នុងបរិការណ៍នៃការវិវត្តឥតឈប់ឈរក្នុងវិស័យឌីជីថលនិងបញ្ញាសិប្បនិម្មិត។

ការចូលរួមពិធីបើករបស់គណៈកម្មាធិការរៀបចំបង្កើតក្រុមប្រឹក្សាស្ថាប័ននីតិកម្មអាស៊ី និង សន្និសីទលើកទី១២ នៃអ្នកជំនាញនីតិកម្មអាស៊ី គឺជាឱកាសដ៏ល្អសម្រាប់កម្ពុជា ដើម្បីក្លាយជាសហស្ថាបនិកនៃក្រុមប្រឹក្សាស្ថាប័ននីតិកម្មអាស៊ី និងដើម្បីកសាង និងពង្រឹងសមត្ថភាពផ្នែកនីតិកម្មរបស់កម្ពុជាបន្ថែមទៀត ជាពិសេសលើការកសាងច្បាប់ដ៏មានប្រសិទ្ធភាព សំដៅពង្រឹងនីតិរដ្ឋ សន្តិសុខគតិយុត្ត និងសុខដុមនីយកម្មនៃប្រព័ន្ធច្បាប់កម្ពុជាជាមួយនឹងប្រព័ន្ធច្បាប់នៃបណ្តាប្រទេសនានាក្នុងតំបន់អាស៊ី និងសកលលោក ដែលជាកាតាលីករដ៏សំខាន់ និងចាំបាច់សម្រាប់គាំទ្រដល់កិច្ចអភិវឌ្ឍន៍សង្គម សេដ្ឋកិច្ចកម្ពុជានៅក្នុងដំណាក់កាលថ្មី៕

តើកត្តាសំខាន់ៗអ្វីខ្លះដែលប្រជាពលរដ្ឋត្រូវចូលរួមដើម្បីកសាងប្រទេសជាតិ?

ក្នុងឱកាសអញ្ជើញជាអធិបតីសម្ពោធសមិទ្ធផលនានានៅវិទ្យាល័យ ហ៊ុន សែន ពាមជីកង ស្រុកកងមាស ខេត្តកំពង់ចាម នៅថ្ងៃទី២៦ ខែតុលា ឆ្នាំ ២០២៤ សម្តេចធិបតី ហ៊ុន ម៉ាណែត បានថ្លែងថា កត្តា ៣ ដែលប្រជាពលរដ្ឋត្រូវចូលរួមកសាងប្រទេសជាតិគឺ៖ ទី១-ការចូលរួមថែរក្សាលំនឹងស្ថិរភាព និងសន្តិភាព ទី២-យល់ពីតម្លៃនៃសន្តិភាព និងសន្តិសុខ ទី៣-ចូលរួមក្នុងការកសាងជីវភាពរស់នៅរបស់ខ្លួន ទន្ទឹមនេះដែរ សម្តេចធិបតី ហ៊ុន ម៉ាណែត បានថ្លែងបន្តថា យើងមិនអាចថែរក្សា និងជំរុញប្រទេសយើងបានទេ ប្រសិនបើប្រជាជនមិនចូលរួម។ ជាក់ស្តែង ការខិតខំរបស់រាជរដ្ឋាភិបាលជាផ្នែកមួយជួយសម្រួលដល់ជីវភាពរស់នៅរបស់ប្រជាជន ប៉ុន្តែគឺអាស្រ័យលើប្រជាជនដែលខិតខំចាប់យកឱកាសនៃសុខសន្តិភាព និងស្ថិរភាព ថែរក្សាលំនឹងសន្តិសុខ ជាពិសេសរួមគ្នាខិតខំរៀនសូត្រកសាងសមត្ថភាពដើម្បីយើងកសាងប្រទេសតទៅទៀត៕

សេចក្តីសម្រេចតែងតាំងសមាសភាពគណៈកម្មាធិការរៀបចំដែនដី និងនគរូបនីយកម្មថ្នាក់ជាតិ ដែលមានឯកឧត្តម សាយ សំអាល់ និងឯកឧត្តមអភិសន្តិបណ្ឌិត ស សុខា ជាសហប្រធាន!

រាជរដ្ឋាភិបាលកម្ពុជា៖ សេចក្តីសម្រេចតែងតាំងសមាសភាពគណៈកម្មាធិការរៀបចំដែនដី និងនគរូបនីយកម្មថ្នាក់ជាតិ ដែលមានឯកឧត្តម សាយ សំអាល់ និងឯកឧត្តមអភិសន្តិបណ្ឌិត ស សុខា ជាសហប្រធាន!

ទស្សន:មិត្តអ្នកអាន៖ បាតុកម្មប្រឆាំងនឹង CLV-DTA គឺជានយោបាយប្រជាភិថុតិរបស់ក្រុមជ្រុលនិយម

 

មួយរយៈចុងក្រោយនេះ បើទោះបីរាជរដ្ឋាភិបាលបានប្រកាសជាផ្លូវការថា កម្ពុជាបានសម្រេចបញ្ចប់ការចូលរួមក្នុងកិច្ចសហប្រតិបត្តិការតំបន់ត្រីកោណអភិវឌ្ឍ កម្ពុជា ឡាវ វៀតណាម (CLV-DTA) តាំងពីថ្ងៃទី២០ ខែកញ្ញា ឆ្នាំ២០២៤ រួចមកហើយក្តី ក៏ពួកក្រុមជ្រុលនិយមនៅក្រៅប្រទេសមួយក្តាប់តូច នៅតែខំបន្តយករឿងនេះ មកធ្វើជាលេសនយោបាយ ដើម្បីបោកប្រាស់យុវជនមួយចំនួន ឱ្យចាញ់បោកឧបាយកលទុច្ចរិតរបស់ខ្លួនដើម្បីតែមហិច្ឆតាអំណាចរបស់គេតែប៉ុណ្ណោះ។ កិច្ចសហប្រតិបត្តិការ តំបន់ត្រីកោណអភិវឌ្ឍន កម្ពុជា ឡាវ វៀតណាម (CLV-DTA) បានអនុវត្តអស់រយ:ពេលជាង២៥ឆ្នាំមកហើយ គឺតាំងពីពេលដែលក្រុមអ្នកនយោបាយចាស់ក្បាលទាំងនោះ កំពុងមានសំឡេងនៅក្នុងរដ្ឋសភាមកម្លេះ ព្រមទាំងមានសមាសភាពក្រុមអ្នកនយោបាយចាស់ក្បាលទាំងនោះ បានទៅចូលរួមប្រជុំពិភាក្សា និងសម្រេចគម្រោងមួយចំនួនផងដែរ ប៉ុន្តែចុងក្រោយពួកគេបែរជាធ្វើជាមិនដឹងខ្យល់ ប្រឆាំងកោកៗដូចជារឿងថ្មីទើបផុសឡើងឆ្នាំ២០២៤អ៊ីចឹង។ តើនេះឬជាចេតនាអីឱ្យពិតប្រាកដ?ចុះតើហេតុអ្វីបានជាគណបក្សប្រឆាំង ដែលមានសមាសភាពរបស់ខ្លួនចូលរួមនៅពេលនោះ មិនព្រមជំទាស់នឹងកិច្ចសហប្រតិបត្តិការ CLV-DTA ខណៈខ្លួននៅក្នុងសភា? ចំណុចនេះត្រូវបាន សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានចោទសួរទៅគណបក្សប្រឆាំងថា នៅពេលដែលខ្លួននៅក្នុងសភា និងមានអំណាច ខណៈមានការអនុវត្តកិច្ចសហប្រតិបត្តិការនេះហេតុអ្វីក៏មិនចោទសួរ មិននិយាយអ្វីសោះ ហើយមិនសើរើនៅពេលនោះ ស្របពេលដែលពួកគេមានតំណាងរបស់ខ្លួនចូលរួមប្រជុំពី CLV-DTA ដែរ។ ការមិននិយាយអ្វីសោះរបស់ពួកអ្នកនយោបាយចាស់ក្បាលនៅពេលនោះ ក៏ព្រោះតែកិច្ចសហប្រត្តិបត្តិការ CLV-DTA មិនបានធ្វើឱ្យកម្ពុជាខាតបង់អ្វីឡើយ។ ប៉ុន្តែពេលនេះ បែរជាក្រុមអ្នកនយោបាយចាស់ក្បាលទាំងនោះ មកប្រកូកប្រកាសប្រមូលផ្តុំយុវជនឱ្យមកចូលរួមធ្វើបាតុកម្មតវ៉ាប្រឆាង CLV-DTA នេះទៅវិញ ដែលការពិតវាគឺជាឧបាយកលនយោបាយដែលមានចរិតញុះញង់របស់ពួកគេទាំងនោះ ដែលចង់បង្កឱ្យមានចលាចល មើលឃើញកម្ពុជាក្នុងរូបភាពអវិជ្ជមាន និងដើម្បីឈានទៅដល់ការផ្តួលរំលំរាជរដ្ឋាភិបាលស្របច្បាប់ តាមគន្លងបដិវត្តពណ៌ដូចនៅប្រទេសមួយចំនួន ដែលបានហិនហោច និងរងគ្រោះជាបន្តបន្ទាប់។ បងប្អូនយុវជនមួយចំនួននៅក្រៅប្រទេស ដែលត្រូវបានពួកអ្នកនយោបាយចាស់ក្បាលអូសទាញឱ្យចាញ់ឧបាយកល ហើយបបួលធ្វើបាតុកម្មនោះ ត្រូវសួរទៅពួកមេក្លោងបាតុកម្មចាស់ក្បាលទាំងនោះថា ហេតុអ្វីកាលពីពេលនៅក្នុងសភាអត់មាននិយាយអ្វីសោះ អំពីរឿង CLV-DTA ហ្នឹង? ចាំមើលតើអ្នកនយោបាយចាស់ក្បាលទាំងនោះឆ្លើយយ៉ាងម៉េច? ការពិត ក្រុមអ្នកនយោបាយដែលចាញ់ការបោះឆ្នោតងើបមុខមិនរួចទាំងនោះ ចង់ប្រើល្បិចធ្វើបាតុកម្មតវ៉ាទាមទារនេះដើម្បីស្តារមុខមាត់របស់ពួកគេ ដែលកំពុងរលាយបាត់ពីឆាកនយោបាយនៅកម្ពុជា ក្រែងបានកំរើកឡើងវិញខ្លះ ហើយមួយវិញទៀត ក៏ជាពេលវេលាមួយដែលត្រូវទៅកៀរគរប្រមូលលុយពីបងប្អូនយុវជនដែលកំពុងខិតខំធ្វើការរកប្រាក់ដោយលំបាកនៅប្រទេសកូរ៉េ និងជប៉ុនផងដែរ។ ក្រោយពេលដែលប្រមូលលុយបានច្រើហើយ ក្រុមអ្នកនយោបាយចាស់ក្បាលទាំងនោះ ប្រាកដជាយកលុយដែលប្រមូលបានទៅស៊ីចាយ និងលេងល្បែងយ៉ាងសប្បាយដូចពេលមុនៗទៀតជាមិនខាន។ ជារួម ផែនការប្រមូលយុជនមកចូលរួមធ្វើបាតុកម្ម តវ៉ារឿង CLV-DTA គឺជាល្បិចកលរបស់ក្រុមអ្នកនយោបាយចាស់ក្បាលមួយក្តាប់តូច ដែលចង់បោកប្រាស់កម្លាំងយុវជនដែលធ្វើការនៅក្រៅប្រទេស ដើម្បីសម្រេចមហិច្ឆតានយោបាយ និងការបោកប្រាស់ប្រមូលថវិកាពីយុវជនប៉ុណ្ណោះ។ សរុបមក បាតុកម្មប្រឆាំងនឹង CLV-DTA ដែលពួកគេធ្វើនេះ គឺជានយោបាយប្រជាភិថុតិរបស់ក្រុមជ្រុលនិយមតែប៉ុណ្ណោះ ដែលនេះហើយជាចរិតញុះញង់របស់អ្នកនយោបាយចាស់ក្បាល ដែលចង់បង្កចលាចលសង្គម ជាក់ស្តែង ព្រឹត្តិការណ៍ ថ្ងៃ១៨ សីហា ឆ្នាំ២០២៤ ដែលបម្រុងនឹងដុតប្រទេសឱ្យមានចលាចលកន្លងមកជាភ័ស្តុតាងស្រាប់។ ប៉ុន្តែជាភ័ព្វសំណាងល្អ រាល់ឧបាយកលខ្មៅងងឹតរបស់ពួកគេ ដែលចង់មកបំផ្លាញភាពសុខសាន្តរបស់ប្រជាពលរដ្ឋ ត្រូវបានកំចាត់ចោលទាន់ពេលវេលា ដោយរាជរដ្ឋាភិបាលមិនអនុញ្ញាត្តឱ្យមានការបំផ្លិចបំផ្លាញសុខសន្តិភាពដែលកម្ពុជាកំពុងមាន និងរកបានដោយលំបាកបានជាដាច់ខាត។ ដោយ : ឌី វីរ:

លិខិតមិត្តអ្នកអាន៖ បាតុកម្មនៅក្រៅប្រទេសរៀបចំឡើងដើម្បីបំផ្លាញខ្មែរ មិនមែនដើម្បីជួយខ្មែរនោះទេ

 

ថ្មីៗនេះ ក្រុមប្រឆាំងជ្រុលនិយមមួយក្តាប់តូចនៅក្រៅប្រទេស បានប្រកាសរៀបចំគម្រោងធ្វើបាតុកម្មជាបន្តបន្ទាប់នៅតាមបណ្តាប្រទេសមួយចំនួន ក្រោមលេសពាក់ព័ន្ធនឹងកិច្ចសហប្រតិបត្តិការ CLV-DTA បើទោះបីជារាជរដ្ឋាភិបាលកម្ពុជា បានប្រកាសបិទបញ្ចប់ទៅហើយ ក៏ពួកគេនៅតែយករឿង CLV-DTA មកបោកប្រាស់ អ្នកចូលរួមឱ្យធ្វើបាតុកម្មប្រឆាំងទាំងងងើល មិនដឹងខ្យល់អីដដែល។ ជុំវិញកិច្ចសហប្រតិបត្តិការ CLV-DTA គឺមានការបកស្រាយច្បាស់លាស់ហើយពីប្រមុខរាជរដ្ឋាភិបាល និងអ្នកជំនាញ ព្រមទាំងមានការផ្ញើរលិខិតផ្លូវការសុំបញ្ចប់ពីភាគីកម្ពុជា និងមានការជួបរវាងមេដឹកនាំប្រទេសទាំង៣ កម្ពុជា ឡាវ វៀតណាម កាលពីពេលកន្លងទៅថ្មីៗនៅជុំវិញការបិទបញ្ចប់កិច្ចសហប្រតិបត្តិការរួមគ្នានេះហើយក៏ដោយ ក៏ពួកជ្រុលនិយមទាំងនោះ នៅតែធ្វើមិនយល់ និងធ្វើជាភ្លើមិនព្រមស្តាប់។ តើអ្វីជាមូលហេតុនៃការធ្វើបាតុកម្មរបស់ពួកប្រឆាំងជ្រុលនិយមនៅក្រៅប្រទេស? ទី១- ក្រុមប្រឆាំងមានចេតនាបំផ្លាញមុខមាត់ប្រទេសកម្ពុជានៅក្រៅប្រទេស៖ បាតុកម្មរបស់ក្រុមប្រឆាំងជ្រុលនិយមនៅក្រៅប្រទេស ធ្វើឡើងដើម្បីតែអុចអាល បោកប្រាស់ បំភ្លៃការពិតពីកម្ពុជា ធ្វើឱ្យមានការស្អប់ខ្ពើមភាន់ច្រឡំមកលើការដឹកនាំដ៏ត្រឹមត្រូវ របស់រាជរដ្ឋាភិបាលក្នុងការកសាងអភិវឌ្ឍប្រទេសជាតិ។ បច្ចុប្បន្ននេះ កម្ពុជាកំពុងដើរលើផ្លូវដ៏ត្រឹមត្រូវ គឺអភិវឌ្ឍន៍លើគ្រប់វិស័យ ប្រជាពលរដ្ឋរស់នៅដោយសេចក្តីសុខសាន្ត ក្រោមម្លប់សុខសន្តិភាព និងការរីកចម្រើន ជាបន្តបន្ទាប់ ចំណែកឯក្រុមប្រឆាំងជ្រុលនិយមវិញ ពួកគេបានតែបំផ្លាញកេរ្តិ៍ឈ្មោះប្រទេសកម្ពុជាប៉ុណ្ណោះ។ ជាក់ស្តែងពួកគេធ្វើនយោបាយយូរឆ្នាំមកហើយ មិនដែលឃើញជួយប្រទេសកម្ពុជា ឬប្រជាជនកម្ពុជា ក្នុងរូបភាពតិចតួចណាមួយឡើយ។ ពួកប្រឆាំងជ្រុលនិយម មិនដែលបានកសាងសូម្បីបង្គន់១នៅកម្ពុជាឡើយ កុំថាឡើយដល់ផ្លូវ ស្ពាន សាលារៀន ឬមន្ទើរពេទ្យ ហើយការរៀបចំបាតុកម្មនៅតាមបណ្តាប្រទេសនានានោះទៀតសោត គឺដើម្បីយកវេទិកានោះ និយាយបំផ្លើសការពិតពីប្រទេសកម្ពុជា ដែលវាគ្មានអ្វីជាការផ្តល់ផលប្រយោជន៍ដល់សង្គមជាតិ និងអ្នកចូលរួមនោះទេ។ ទី២- ដើម្បីបន្តអាជីវកម្មនយោបាយបោកលុយអ្នកចូលរួម៖ ការធ្វើបាតុកម្មនៅតាមបណ្តាប្រទេសនានា ដែលក្រុមប្រឆាំងរៀបចំ ត្រូវបានមើលឃើញយ៉ាងច្បាស់ថា ពួកគេកំពុងត្រូវការលុយពីអ្នកចូលរួមបាតុកម្ម ព្រោះបើមិនមានព្រឹត្តិការណ៍ទេ ពួកគេគ្មានឱកាសរកលុយចូលហោប៉ៅងាយៗឡើយ។ បាតុកម្ម គឺជាឧបករណ៍មួយ ក្នុងការចិញ្ចឹមឆ្នាំងបាយ និងកៀរគរថវិកាពីអ្នកចូលរួម ដែលនេះជារបៀបវារៈនយោបាយដដែលៗ ពោលគឺត្រីធំស៊ីត្រីតូច។ កន្លងមកពួកគេធ្លាប់បានរៃអង្គាសប្រាក់មិនតិចទេពីអ្នកចូលរួម ដើម្បីយកទៅចែកគ្នាចាយ និងហ៊ឺរហារ ផ្ទាល់ខ្លួន ដូចជាករណីមូលនិធិទូរទស្សន៍ព្រះអាទិត្យ មូលនិធិនាឡិកាទណ្ឌិតមេក្លោង និងមូលនិធិជាច្រើនទៀត ដែលពួកគេធ្លាប់បានអះអាងថា ប្រមូលលុយដើម្បីយកមកជួយប្រជាពលរដ្ឋខ្មែរក្នុងស្រុក តែជាក់ស្តែងគឺបាត់ស្រមោល ពេលបានលុយច្រើន គឺចប់។ ចំណែកអ្នកចូលរួម ដែលខំធ្វើការហត់នឿយមិនហ៊ានសម្រាក សន្សំសំចៃ ត្រូវយកលុយទៅឱ្យគេបោកស្រួលៗទៅវិញ។ ទី៣- ចេតនាចង់ផ្តួលរំលំរាជរដ្ឋាភិបាលស្របច្បាប់៖ បាតុកម្មនៅក្រៅប្រទេស ដឹកនាំដោយមេក្លោងជាជនក្បត់ជាតិ និងជាទណ្ឌិតរត់ចោលស្រុក គឺដើម្បីបម្រើតែប្រយោជន៍បក្ខពួកខ្លួន បំបែកបំបាក់សាមគ្គីជាតិខ្មែរទាំងក្នុង និងក្រៅប្រទេស មានបំណងផ្តួលរំលំរដ្ឋាភិបាលស្របច្បាប់ ដោយពួកគេយល់ថា នឹងកៀរគរបានកម្លាំងអ្នកចូលរួម ដើម្បីបង្កើតជាចលនា បះបោរណាមួយក្នុងពេលខាងមុខ។ នេះជាចេតនាចង់បំផ្លាញកម្ពុជា ពោលគឺពួកប្រឆាំងជ្រុលនិយម ធ្វើនយោបាយចងគំនុំ និងមិនដែលធ្វើសកម្មភាពណាមួយដើម្បីប្រយោជន៍ជាតិឡើយ ក្រៅតែពីបំផ្លាញផលប្រយោជន៍ជាតិខ្មែរ។ កន្លងមក ទណ្ឌិតក្បត់ជាតិ និងបក្ខពួក តែងតែធ្វើការអំពាវនាវដោយបង្កប់ចរិតពិសពុល បំបែកបំបាក់សាមគ្គីជាតិខ្មែរ ចង់ឱ្យពលរដ្ឋខ្មែរក្នុងស្រុក ដើរតាមពួកគេ ដោយងើបបះបោរ និងចង់ដណ្តើមអំណាចក្រៅប្រព័ន្ធប្រជាធិបតេយ្យ ព្រោះតែពួកគេបោះឆ្នោតមិនដែលឈ្នះ។ សកម្មភាពទាំងអស់នេះ គឺជាការប៉ុនប៉ងផ្តួលរំលំរាជរដ្ឋាភិបាលដែលកើតចេញពីការគាំទ្រដោយសំឡេងឆ្នោតរបស់ប្រជាពលរដ្ឋខ្មែរជាច្រើនលើសលុប ដែលយើងនឹងមិនអនុញ្ញាតឱ្យវាកើតឡើងបានជាដាច់ខាតទោះក្នុងតម្លៃណាក៏ដោយ។ ជារួម ការប្រកាសធ្វើបាតុកម្មនៅក្រៅប្រទេសរបស់ក្រុមប្រឆាំងជ្រុលនិយមក្រោមលេសកិច្ចសហប្រតិបត្តិការ CLV-DTA គឺគ្រាន់តែជាចេតនាទុច្ចរិតក្នុងការចិញ្ចឹមបញ្ហារបស់ពួកគេ ដើម្បីផលប្រយោជន៍ខ្លួន និងជារបៀបវារៈនយោបាយដ៏ទុច្ចរិត ដែលមិនផ្តល់ផលប្រយោជន៍សូម្បីបន្តិចសោះឡើយសម្រាប់ជាតិខ្មែរ។ ពួកគេមានបំណងបំផ្លាញសេចក្តីសុខរបស់ប្រជាជនខ្មែរដែលកំពុងតែរស់នៅក្នុងសុខសន្តិភាពនិងការអភិវឌ្ឍ។ ដូចនេះ ក្នុងនាមជាពលរដ្ឋខ្មែរនៅក្នុងស្រុក យើងពិតជាថ្កោលលទោសចំពោះការបាតុកម្មក្រៅប្រទេសរបស់ក្រុមប្រឆាំងជ្រុលនិយម ដែលចង់បំផ្លាញផលប្រយោជន៍ជាតិ និងបំផ្លាញសេចក្តីសុខរបស់ប្រជាពលរដ្ឋខ្មែរជាង១៧លាននាក់៕ ដោយ៖ មាន មេត្តា

លិខិតមិត្តអ្នកអាន៖ តើការបោះពុម្ពធនបត្រប្រភេទ ២០ម៉ឺនរៀលថ្មី មានកំហុសឬទេ?

នៅលើលោកនេះ ការបោះពុម្ពក្រដាស់ប្រាក់ប្រភេទថ្មីសម្រាប់ប្រើបា្រស់នៅក្នុងប្រទេសនីមួយៗ មិនមានអ្វីដែលចម្លែកនោះទេ ព្រោះនេះជាការធ្វើឡើងដោយផ្អែកទៅលើទំហំនៃម៉ាក្រូសេដ្ឋកិច្ច និងប្រកបដោយការទទួលខុសត្រូវ ដោយធានាបាននូវលំនឹងសេដ្ឋកិច្ច និងធានាបានថាមិនមានអតិផរណាកើនឡើង នៅក្នុងទីផ្សារនៃប្រទេសរបស់ខ្លួន។ ត្រង់ចំណុចនេះ ចង់សួរដល់ពួកប្រឆាំង និងអ្នករិះគន់មួយក្តាប់តូចដែរថា តើប្រទេសកម្ពុជាទើបតែបានបោះពុម្ពធនបត្រប្រភេទថ្មីបែបនេះជាលើកទី១ឬយ៉ាងណា? តាមពិត ធនាគារជាតិនៃកម្ពុជាបានបោះពុម្ពធនបត្រប្រភេទថ្មីបែបនេះ ច្រើនលើករួចមកហើយ ថែមទាំងមានទំហំទឹកប្រាក់ច្រើនទៀតផង អាចនិយាយបានថាមានតម្លៃរាប់ពាន់លានដុល្លារ ដោយកាលពី៥ឆ្នាំមុន ធនាគារជាតិនៃកម្ពុជាក៏បានបោះពុម្ពក្រដាស់ប្រាក់ ១៥០០០រៀល ក្នុងឱកាសរំលឹកដល់ខួបទី១៥ឆ្នាំ នៃការឡើងគ្រងរាជរបស់ព្រះមហាក្សត្រផងដែរ ហេតុអ្វីក្រុមប្រឆាំងនិងអ្នករិះគន់ពេលនោះមិនចេញមករិះគន់ បែរជាទើបតែចេញមុខមករិះគន់នៅពេលនេះ ឬមួយពួកគេមានបង្កប់នូវរបៀបវីរៈនយោបាយនៅពីក្រោយខ្នង ដើម្បីធ្វើយ៉ាងណាបង្កើតជាបញ្ហា រិះគន់ វាយប្រហារលើរាជរដ្ឋាភិបាលដែលដឹកនាំដោយ សម្តេចធិបតីហ៊ុន ម៉ាណែត នាយករដ្ឋមន្ត្រីកម្ពុជាអាណត្តីទី៧នេះ។ ពួកប្រឆាំងជ្រុលនិយមមួយក្តាប់តូច តែងព្យាយាមយករឿងជាច្រើន យកមករិះគន់រាជរដ្ឋាភិបាល ដែលធាតុពិតរឿងទាំងនោះ មិនដូចជាការចោទប្រកាន់គ្មានការពិតរបស់ពួកគេឡើយ។ ជាក់ស្តែងដូចជាពេលថ្មីៗនេះ ពួកគេបានរិះគន់ទៅលើការបោះពុម្ពធនបត្រប្រភេទថ្មី២០ម៉ឺនរៀល គឺតាមពិតពួកគេមានគោលបំណងតែម្យ៉ាងគត់គឺចង់បង្ខូចកេរ្តិ៍ឈ្មោះរាជរដ្ឋាភិបាល ឱ្យប្រជាពលរដ្ឋមានការខឹងសម្បា ឬមិនពេញចិត្តនឹងរាជរដ្ឋាភិបាល ដោយចោទប្រកាន់ថាកម្ពុជានឹងជួបវិបត្តិដោយសាររាជរដ្ឋាភិបាលបោះពុម្ពក្រដាសប្រាក់ថ្មី២០ម៉ឺនរៀល ធ្វើឱ្យមានអតិផរណាអីជាដើម។ ការចោទប្រកាន់នេះវាអត់មានចំណុចឡូស៊ីកទាល់តែសោះ ព្រោះការបោះពុម្ពក្រដាសប្រាក់ថ្មីគឺ គេបោះដោយប្តូរជំនួសឱ្យក្រដាសប្រាក់ចាស់ រហែក ទក់ និងខូច ប៉ុណ្ណោះ។ ចំណែកឯចំនួនទឹកប្រាក់ដែលបានបោះពុម្ពថ្មីនោះទៀតសោត គឺស្ថិតក្នុងកម្រិតមធ្យមដែលត្រឹមត្រូវទៅតាមទំហំសេដ្ឋកិច្ចកម្ពុជា ពោលគឺមិនមានការបោះពុម្ពក្រដាសប្រាក់លើសចំនួន ដែលធ្វើឱ្យលុយរៀលធ្លាក់ថ្លៃដូចការចោទប្រកាន់ឡើយ។ ពាក់ព័ន្ធនឹងករណីនេះ ធនាគារជាតិនៃកម្ពុជាបានចេញមកបកស្រាយពន្យល់អំពីការបោះពុម្ពក្រដាស់ប្រាក់២០ម៉ឺនរៀលថ្មី ដោយបំភ្លឺច្បាស់ៗថា ការបោះពុម្ពក្រដាស់ប្រាក់ប្រភេទថ្មីនេះគឺជាការដាក់ជំនួសក្រដាស់ប្រាក់ដែលរហែក ប្រលាក់ និងខូចគុណភាពមិនអាចប្រើប្រាស់បាន និងមានទំហំទឹកប្រាក់ស្មើគ្នាទៅនិងក្រដាស់ប្រាក់ដែលត្រូវបានកម្ទេចចោល និងស្របពេលទៅនឹងខួបព្រះរាជពិធីគ្រងព្រះបរមរាជសម្បត្តិរបស់ព្រះករុណាព្រះបាទសម្តេចព្រះបរមនាថ នរោត្តម សីហមុនី គម្រប់ខួបលើកទី២០ឆ្នាំ រាជរបស់ព្រះអង្គ គឺនៅថ្ងៃ២៩ ខែតុលា ឆ្នាំ២០២៤ ខាងមុននេះក៏ដោយ ក៏ពួកប្រឆាំងជ្រុលនិយម នៅតែមិនព្រមធ្វើយល់ ហើយនៅតែខិតខំរិះគន់ទាំងបិទភ្នែក បិទត្រចៀក ដោយមិនខ្វល់ និងមិនស្តាប់អ្វីៗទាំងអស់ គឺនៅតែបន្តរិះគន់ទាំងទទឹងទិស និងដោយមិនសមហេតុផល។ យើងអាចនិយាយបានថា កាបោះពុម្ពធនបត្រប្រភេទ២០ម៉ឺនរៀលថ្មីនេះ ជាការធ្វើចរាចរបំពេញបន្ថែមសាច់ប្រាក់បង្គ្រប់នៅក្នុងទីផ្សារតែប៉ុណ្ពោះ មិនមានអ្វីចម្លែកនោះទេ។ បើយើងមើលឱ្យឆ្ងាយពីប្រាក់រៀលខ្មែរ សូម្បីតែនៅសហរដ្ឋអាមេរិកដែលគេចាយប្រាក់ដុល្លារ ដែលជាប្រទេសមួយដែលក្រុមប្រឆាំងជ្រុលនិយមមួយក្តាប់តូច សរសើមិនដាច់ពីមាត់ និងមើលឃើញថាធ្វើអ្វីៗល្អដូចផ្កា និងកំពុងសង្ងំលាក់ខ្លួនជ្រកកោណ គេចវេសពីទោសទណ្ឌ ដែលខ្លួនបានប្រព្រឹត្តនៅកម្ពុជា ក៏ប្រទេសគេបាននិងកំពុងបោះពុម្ពក្រដាស់ថ្មីដូចកម្ពុជាដែរ ថែមទាំងពេលខ្លះគេបោះពុម្ពលើសពីទំហំទឹកប្រាក់ដែលត្រូវការថែមទៀតផង ព្រោះដើម្បីយកប្រាក់ទាំងនោះទៅផ្គត់ផ្គង់ដល់ប្រទេសផ្សេងៗដែលកំពុងត្រូវការជំនួយ ក្នុងការធ្វើសង្គ្រាមដណ្តើមភូមិសាស្ត្រនយោបាយគ្នាពីមួយកន្លែងទៅមួយកន្លែងមិនចេះចប់មិនចេះហើយ។ ជាពិសេស ក្នុងពេលនេះពិភពលោកកំពុងមានវិបត្តិសេដ្ឋកិច្ច និងមានអតិផរណាមួយយ៉ាងខ្ពស់ តួយ៉ាងដូចសព្វថ្ងៃនេះតម្លៃមាសបាននិងកំពុងហក់ឡើងយ៉ាងខ្ពស់ ធៀបទៅនិងប្រាក់ដុល្លារ ដែលបញ្ហានេះមិនធ្លាប់មានទេក្នុងប្រវត្តិសាស្ត្រពិភពលោក ដោយក្នុង១តម្លឹងមាស មានតម្លៃជាង ៣ពាន់ដុល្លារអាមេរិកទៅហើយ។ តើនេះមកពីមាសឡើងថ្លៃ ឬប្រាក់ដុល្លារចុះថោក? តើក្រុមប្រឆាំងនិងអ្នករិះគន់ជ្រុលនិយមមួយចំនួន ធ្លាប់បានលើកបញ្ហានេះមកវិភាគ និងរិះគន់ដែរឬទេ? បើយើងក្រឡេកមើលមកកម្ពុជាក្នុងក្រសែភ្នែកល្អវិញ តើនៅមុនពេលនិងក្រោយពេលបោះពុម្ពធនបត្រប្រភេទ២០ម៉ឺនរៀលថ្មី អត្រាប្តូរប្រាក់មានការប្រែប្រួលដែរទេ បើធៀបនិងប្រាក់ដុល្លារនោះ គឺមិនមានទេ មិនត្រឹមតែប៉ុណ្ណោះកម្ពុជាថែមទាំងរក្សាបាននូវលំនឹងសេដ្ឋកិច្ចបានល្អទៀតផង ពោលគឺមានតម្លៃថេរដោយក្នុង១ដុល្លារចម្លោះត្រឹមពី ៤០៥០ រៀល ទៅ៤១០០រៀល ប៉ុណ្ណោះ ត្រង់នេះឬ ដែលគេអាចនិយាយថាប្រាក់រៀលខ្មែរចុះថោកនោះ? ក្នុងនាមជាពលរដ្ឋខ្មែរមួយរូប សូមក្រើនរំលឹកដល់អ្នកប្រឆាំងដែលចូលចិត្តរិះគន់បែបជ្រុលនិយមខ្លះ និងអ្នកវិភាគដូរបាយទាំងឡាយថា ប្រជាពលរដ្ឋខ្មែរសម័យនេះ គាត់មានការយល់ដឹងច្រើននិងមានការវិភាគលើបញ្ហាសង្គម នយោបាយ និងសេដ្ឋកិច្ច បានគ្រប់ជ្រុងជ្រោយល្អណាស់ អាចនិយាយបានថាមិនចាញ់ក្រុមប្រឆាំងរត់ចោលស្រុកមួយចំនួននោះទេ ព្រោះសម័យនេះពួកគាត់ទទួលបាននូវព័ត៌មានច្រើនពីគ្រប់ទិសទី និងលឿនរហ័ស ដែលពួកប្រឆាំងមិនអាចបំភ្លៃការពិត និងញុះញុងបានទៀតនោះទេ។ ប្រជាជពលរដ្ឋខ្មែរដឹងយ៉ាងច្បាស់ថា ពួកប្រឆាំងរត់ចោលស្រុកនេះ មិនដែលមើលឃើញប្រទេសរបស់ខ្លួនក្នុងក្រសែភ្នែកល្អម្តងណាទេ៕ 

ដោយ៖ ជា ឧត្តម

សម្តេចបវរធិបតី៖ បន្ទាប់ពីការអនុវត្ត “គោលនយោបាយឈ្នះ-ឈ្នះ”

សម្តេចបវរធិបតី៖ បន្ទាប់ពីការអនុវត្ត “គោលនយោបាយឈ្នះ-ឈ្នះ” ប្រកបដោយភាពជោគជ័យ កម្ពុជាបានបិទបញ្ចប់ការបែកបាក់ទឹកដីក្នុងរយៈពេល៥០០ឆ្នាំចុងក្រោយ និងទទួលបានឯកភាពជាតិពេញលេញនៅក្នុងឆ្នាំ១៩៩៨ ដែលធ្វើឱ្យប្រទេសរួបរួមគ្នា ហើយក៏ជាកត្តាអំណោយផលដល់រាជរដ្ឋាភិបាលក្នុងការដាក់ចេញយុទ្ធសាស្ត្រត្រីកោណ រយៈពេល ៥ឆ្នាំ (១៩៩៨-២០០៣) នាគ្រានោះ ដែលផ្តោតការយកចិត្តទុកដាក់ទៅលើកិច្ចការធំៗចំនួន ៣ រួមមាន៖ (១) ការពង្រឹងភាពជឿទុកចិត្តដើម្បីរក្សាសន្ដិភាពឱ្យបានថិតថេរ (២) ការធ្វើសមាហរណកម្មកម្ពុជាទៅក្នុងឆាកអន្តរជាតិ និង (៣) ការដាក់ចេញគោលនយោបាយអភិវឌ្ឍន៍ និងកាត់បន្ថយភាពក្រីក្រ។ (២៤ តុលា ២០២៤) Samdech Borvor Thipadei: After the successful implementation of the "Win-Win Policy", Cambodia ended 500 years of territorial fragmentation and achieved full national unity in 1998, resulting in the unification of the country. This created a favorable environment for the Royal Government to introduce the five-year Triangle Strategy (1998-2003), which focused on three main priorities: (1) strengthening trust to maintain stable peace, (2) integrating Cambodia into the international community, and (3) implementing policies for development and poverty reduction. (24 October 2024) Unofficial translation

ត្រូវស្រាក់ដៃគ្នាការពារសន្តិភាព និងចូលរួមជាមួយរាជរដ្ឋាភិបាល ដើម្បីអនាគតរុងរឿងរបស់ប្រទេសជាតិនិងកូនចៅយើង

 

ឯកឧត្ដម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល បានលើកឡើងថា រាជរដ្ឋាភិបាលដឹកនាំដោយគណបក្សប្រជាជនកម្ពុជា បានធ្វើឱ្យប្រទេសយើងប្រែមុខមាត់ថ្មីទាំងស្រុងមិនធ្លាប់មានពីមុន និងកំពុងដាក់ទិសដៅឈានទៅសម្រេចចក្ខុវិស័យកម្ពុជាឆ្នាំ២០៥០ ក្លាយជាប្រទេសដែលមានចំណូលខ្ពស់ ដូចបណ្តាប្រទេសអភិវឌ្ឍន៍ផ្សេងៗទៀតដែរ។ ដូច្នេះ យើងទាំងអស់គ្នា ត្រូវស្រាក់ដៃគ្នាការពារសន្តិភាព និងចូលរួមជាមួយរាជរដ្ឋាភិបាល ដើម្បីអនាគតរុងរឿងរបស់ប្រទេសយើង និងកូនចៅយើង។ 

ការលើកឡើងដូច្នេះរបស់ឯកឧត្ដម ប៉ែន បូណា បានធ្វើឡើងនៅក្នុងឱកាសអញ្ជើញជាអធិបតី និងជាវាគ្មិនកិត្តិយសផ្តល់បាឋកថា ស្តីពី «ប្រសិទ្ធភាពនៃការងារព័ត៌មាន និងគ្រប់គ្រងសាធារណមតិ» នៅសាលាភូមិន្ទរដ្ឋបាល (ERA) នារសៀលថ្ងៃទី២៤ ខែតុលា ឆ្នាំ២០២៤។ 

នាឱកាសនោះដែរ ឯកឧត្ដម ប៉ែន បូណា បានលើកឡើងថា ប្រទេសកម្ពុជា ធ្លាប់បានឆ្លងកាត់អតីតកាលដ៏មហាជូរចត់ រន្ធត់តក់ស្លុត គ្រប់គ្រាន់ហើយ ដូច្នេះ យើងមិនចង់ឃើញកូនចៅយើង ដែលកើតក្រោយសម័យសង្គ្រាម ជួបរស់ជាតិជីវិតលំបាកវេទនាដូចពួកយើងឡើយ។ដើម្បីបញ្ចៀសកុំឱ្យប្រវត្តិសាស្ត្រច្រំដែល មានជម្រើសតែមួយគត់ គឺការចូលរួមគាំទ្រដឹកនាំរបស់រាជរដ្ឋាភិបាល ចេញពីគណបក្សប្រជាជនកម្ពុជា ដែលមានសម្តេចធិបតី ហ៊ុន ម៉ាណែត ជានាយករដ្ឋមន្ត្រី។ ហើយការងារដ៏សំខាន់មួយរបស់យើងទាំងអស់គ្នា ពិសេសមន្ត្រីរាជការ គឺនាំគ្នាប្រយុទ្ធប្រឆាំងនិងបន្សាបព័ត៌មានក្លែងក្លាយ បំផ្លើសបំភ្លៃ ដែលមានចរិតបំផ្លិចបំផ្លាញ និងផ្តួលរំលំរាជរដ្ឋាភិបាលស្របច្បាប់។ 

ដើម្បីបន្សាបព័ត៌មានក្លែងក្លាយដែលបង្កើតឡើងដើម្បីបំពុលសង្គមទាំងនេះ គឺមានតែបញ្ចេញព័ត៌មានពិត និងស្នាដៃទាំងឡាយដែលរាជរដ្ឋាភិបាលបានកសាងទុកជាប្រយោជន៍សម្រាប់យើងទាំងអស់គ្នា ដោយមិនទុកឱកាសឱ្យព័ត៌មានមិនពិតទាំងនោះ ចូលមកបំពុលសង្គមបានឡើយ ជាពិសេសនោះ ត្រូវបង្ហាញពីគុណតម្លៃសន្តិភាព សមិទ្ធផល និងចក្ខុវិស័យដ៏ច្បាស់លាស់របស់រាជរដ្ឋាភិបាលក្នុងបុព្វហេតុជាតិនិងប្រជាជន ដើម្បីឱ្យប្រជាពលរដ្ឋបានជ្រួតជ្រាបជាប្រចាំ ក្នុងស្មារតីបុរេសកម្មដ៏រស់រវើក៕

ហេតុអ្វីបានជាគណបក្សប្រឆាំងមិនព្រមជំទាស់នឹងកិច្ចសហប្រតិបត្តិការ CLV-DTA ខណៈខ្លួននៅក្នុងសភា?

សម្តេចធិបតី ហ៊ុន ម៉ាណែត បានចោទសួរទៅគណបក្សប្រឆាំងថា នៅពេលដែលខ្លួននៅក្នុងសភា និងមានអំណាច ខណៈមានការអនុវត្តកិច្ចព្រមព្រៀងនេះហេតុអ្វីក៏មិនចោទ មិននិយាយអ្វីសោះ ហើយមិនសើរើនៅពេលនោះ ស្របពេលដែលមានតំណាងរបស់ខ្លួនចូលរួមប្រជុំពី CLV-DTA ដែរ។ សម្តេចធិបតី ហ៊ុន ម៉ាណែត បានអំពាវនាវឱ្យបងប្អូនយុវជនមួយចំនួននៅក្រៅប្រទេសដែលត្រូវបានពួកអ្នកនយោបាយចាស់វស្សាបបួលធ្វើបាតុកម្មត្រូវសួរទៅពួកគាត់ថា ហេតុអ្វីកាលពីពេលនៅក្នុងសភាអត់មាននិយាយអ្វីសោះអំពីរឿងហ្នឹង។ 

 សម្តេចធិបតី ហ៊ុន ម៉ាណែត បានថ្លែងបន្តថា ការមិននិយាយអ្វីសោះរបស់ពួកអ្នកនយោបាយចាស់វស្សាក៏ព្រោះតែកិច្ចព្រមព្រៀងនេះមិនបានធ្វើឱ្យកម្ពុជាខាតបង់អ្វីឡើយ ប៉ុន្តែឥឡូវបែរជាមកចាក់សាំងដុតបន្ថែមទៅលើបញ្ហានេះទៅវិញ។ នេះហើយជាចរិកញុះញង់របស់អ្នកនយោបាយចាស់វស្សាដែលចង់បង្ករចលាចលសង្គមរហូតដល់មានសកម្មភាពថ្ងៃ១៨ សីហា ដែលបម្រុងនឹងដុតប្រទេសថែមទៀតផង។ សម្តេចធិបតី ហ៊ុន ម៉ាណែត បានថ្លែងបែបនេះនៅក្នុងឱកាសអញ្ជើញជាអធិបតីនៅក្នុងពិធីសំណេះសំណាលសម្ពោធដាក់ឱ្យប្រើប្រាស់ជាផ្លូវការទំនប់អាងទឹកអូរតេធិបតី នៅស្រុកអូររាំង ខេត្តមណ្ឌលគិរី នៅព្រឹកថ្ងៃទី២៤ ខែតុលា ឆ្នាំ២០២៤៕

តើដំណើរទស្សនកិច្ចទៅខេត្តភាគឦសាន្តផ្តល់ផលប្រយោជន៍អ្វីខ្លះ?

សម្តេចធិបតី ហ៊ុន ម៉ាណែត បានអំពាវនាវជាថ្មីម្តងទៀតឱ្យប្រជាពលរដ្ឋចូលរួមក្នុងដំណើរទស្សនកិច្ចទៅខេត្តភាគឦសាន្តដើម្បីមើលឃើញពីការអភិវឌ្ឍពិតប្រាកដនៅតំបន់ទាំងនោះដើម្បីកុំឱ្យគេបំផុសបំភិតបំភ័យបាន។ នៅក្នុងពិធីសម្ពោធដាក់ឱ្យប្រើប្រាស់ជាផ្លូវការទំនប់អូរតេធិបតី ស្ថិតនៅស្រុកអូរាំង ទំនប់សែនសុខដុម និងទំនប់សែនមនោរម្យ ខេត្តមណ្ឌលគិរី នៅព្រឹកថ្ងៃទី២៤ ខែតុលា ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងថា កន្លងមក ប្រជាពលរដ្ឋមួយចំនួនដែលមិនធ្លាប់បានទៅខេត្តភាគឦសាន្ត យល់ថា ខេត្តទាំងនោះ គ្មានការរីកចម្រើន មានតែសត្វដំរី ខ្លា ជាដើម ប៉ុន្តែបច្ចុប្បន្ននេះ ខេត្តទាំងនោះមានការរីកចម្រើន និងមានហេដ្ឋារចនាសម្ព័ន្ធតភ្ជាប់រឹងមាំផងដែរ។ សម្តេចធិបតី ហ៊ុន ម៉ាណែត បានគូសបញ្ជាក់ថា នៅឆ្នាំ២០២៥ រាជរដ្ឋាភិបាល នឹងដាក់ចេញគោលនយោបាយវិនិយោគនៅខេត្តភាគឦសាន្តបន្ថែមទៀតដើម្បីជំរុញការអភិវឌ្ឍនៅទីនោះផងដែរ៕

តើការបញ្ចប់កិច្ចសហប្រតិបត្តិការ CLV-DTA ជាការកាត់ដីឱ្យប្រទេសជិតខាងដូចការចោទប្រកាន់មែនឬ?

សម្តេចធិបតី ហ៊ុន ម៉ាណែត បានថ្លែងថា ការដាក់កិច្ចសហប្រតិបត្តិការ CLV-DTA មិនមែនដាក់ដើម្បីបាត់ទឹកដី មិនមែនដាក់ដើម្បីឱ្យយើងបាត់អធិបតេយ្យភាព មិនមែនដាក់ដើម្បីឱ្យខេត្តទាំង៤ក្លាយជាខេត្តមិនអភិវឌ្ឍន៍ដើម្បីឱ្យបាត់ដីនោះទេ ប៉ុន្តែផ្ទុយទៅវិញ គោលការណ៍នេះគឺដាក់ដើម្បីជំរុញការអភិវឌ្ឍខេត្តឦសានរបស់យើងឱ្យមានការរីកចម្រើនកាន់តែច្រើន។ 

 សម្តេចធិបតី ហ៊ុន ម៉ាណែត បានថ្លែងបន្តថា ការបញ្ចប់ការចូលរួមកិច្ចសហប្រតិបត្តិការ CLV-DTA របស់កម្ពុជាមិនមែនដោយសារយើងមានផែនការដើម្បីបំផ្លាញ ឬកាត់ប្រទេសយើង កាត់ខេត្តយើងទៅឱ្យអ្នកណាទេ ប៉ុន្តែគោលដៅសំខាន់គឺពន្លឿនការអភិវឌ្ឍ ដើម្បីកាត់បន្ថយគម្លាតជាមួយខេត្តផ្សេងៗនៅក្នុងប្រទេសរបស់យើង។ 

 សម្តេចធិបតី ហ៊ុន ម៉ាណែត បានគូសបញ្ជាក់ថា ក្នុងរយៈពេល ២៥ ឆ្នាំនៃការអនុវត្តកិច្ចសហប្រតិបត្តិការនោះ កម្ពុជាមិនបានបាត់អធិបតេយ្យភាព ឬយកច្បាប់របស់ប្រទេសណាមកអនុវត្តន៍ក្នុងខេត្តមណ្ឌលគិរីទេ។ សម្តេចធិបតី ហ៊ុន ម៉ាណែត បានថ្លែងបែបនេះនៅក្នុងឱកាសអញ្ជើញជាអធិបតីនៅក្នុងពិធីសំណេះសំណាលសម្ពោធដាក់ឱ្យប្រើប្រាស់ជាផ្លូវការទំនប់អាងទឹកអូរតេធិបតី នៅស្រុកអូររាំង ខេត្តមណ្ឌលគិរី នៅព្រឹកថ្ងៃទី២៤ ខែតុលា ឆ្នាំ២០២៤៕

កត្តា ៣សំខាន់ៗ ក្នុងការអនុវត្តគោលនយោបាយឈ្នះ-ឈ្នះប្រកបដោយប្រសិទ្ធភាពខ្ពស់

សម្តេចធិបតី ហ៊ុន ម៉ាណែត នាយករដ្ឋមន្ត្រី បានថ្លែងថា ក្រោយពីការអនុវត្តគោលនយោបាយឈ្នះ-ឈ្នះបានជោគជ័យ គឺប្រទេសយើងរួមគ្នា ដោយគោលនយោបាយថ្មីភ្លាម ដែលត្រូវដាក់ចេញនៅពេលនោះ ហើយសម្តេចតេជោ ហ៊ុន សែន នាយករដ្ឋមន្ត្រី និងរាជរដ្ឋាភិបាលនៅពេលនោះ បានយកចិត្តទុកដាក់ទៅលើកិច្ចការចំនួន ៣ធំៗ។ សម្តេចធិបតីនាយករដ្ឋមន្ត្រី បានថ្លែងបន្តថា កិច្ចការធំៗទាំង ៣នោះរួមមាន៖ 

១. ការពង្រឹងភាពជឿទុកចិត្ត ដើម្បីឱ្យសន្តិភាពបានស្ថិតស្ថេរ ការពារកុំឱ្យមានសន្តិភាពបាន១ ឬ២ឆ្នាំ បែកបាក់សាមគ្គីចេញទៅវៃប្រហារគ្នាបន្តទៀតនៅតាមតំបន់ជាច្រើន 

២. សមាហរណកម្មខ្លួនយើងនៅលើឆាកអន្តរជាតិ ៣. ការដាក់ចេញគោលនយោបាយអភិវឌ្ឍ ន៍កាត់បន្ថយភាពក្រីក្រដែលហៅថា យុទ្ធសាស្រ្តត្រីកោណ នៅឆ្នាំ១៩៩៨ ដែលបានដាក់ចេញ ៥ឆ្នាំម្តង។ 

 សម្តេចធិបតី ហ៊ុន ម៉ាណែត បានថ្លែងបញ្ជាក់ថា នៅចំណុចទី៣ នេះពិតជាសំខាន់ណាស់ គឺការថែរក្សា សុខសន្តិភាព ជាគន្លឹះទុកចិត្តគ្នាកុំឱ្យបែកបាក់សាមគ្គីគ្នា។ ប៉ុន្តែអ្វីដែលធ្វើជាមួយគ្នាគឺកាត់បន្ថយភាពក្រីក្ររបស់ប្រជាពលរដ្ឋ និងអភិវឌ្ឍន៍នៅទូទាំងប្រទេសកម្ពុជាតែម្តង។ សម្តេចធិបតី ហ៊ុន ម៉ាណែត បានថ្លែងដូចនេះ នៅថ្ងៃទី២៤ ខែតុលា ឆ្នាំ២០២៤ ក្នុងឱកាសជាអធិបតីសម្ពោធដាក់ឲ្យប្រើប្រាស់ជាផ្លូវការទំនប់អូរតេធិបតី ស្ថិតនៅស្រុកអូរាំង ទំនប់សែនសុខដុម និងទំនប់សែនមនោរម្យ ខេត្តមណ្ឌលគិរី៕