លោកនាយករដ្ឋមន្រ្តី ហ៊ុន សែន បញ្ជាក់ពីមូលហេតុចំនួន៥ ដែលនាំឱ្យមានការធ្វើវិសោធនកម្មប្រការ ៤៨ ថ្មី៣ នៃបទបញ្ជាផ្ទៃក្នុងរដ្ឋសភា

(ភ្នំពេញ)៖ នៅថ្ងៃទី៣១ ខែមករា ឆ្នាំ២០១៧នេះ រដ្ឋសភា បានបើកកិច្ចប្រជុំវិសាមញ្ញមួយ ដើម្បីពិភាក្សាអំពីការធ្វើវិសោធនកម្ម បទបញ្ជាផ្ទៃក្នុងរដ្ឋសភា ប្រការ៤៨ថ្មី (បី) ក្រោមអធិបតីលោក ហេង សំរិន ប្រធានរដ្ឋសភាកម្ពុជា។

ថ្លែងនៅក្នុងកិច្ចប្រជុំនោះផងដែរ លោកនាយករដ្ឋមន្រ្តី ហ៊ុន សែន បានធ្វើការពន្យល់អំពីការធ្វើវិសោធនកម្មបទបញ្ជាផ្ទៃក្នុងនេះថា ការដែលគណបក្សប្រជាជនកម្ពុជា សម្រេចធ្វើវិសោធនកម្មដោយសារទង្វើខ្វះការទទួលខុសត្រូវក្នុងនាមអាណត្តិជាអ្នកតំណាងរាស្រ្តនៅក្នុងសភា។ លោកនាយករដ្ឋមន្រ្តី ហ៊ុន សែន បានលើកឡើងពីមូលហេតុ ៥ យ៉ាង ដែលនាំដល់ការធ្វើវិសោធនកម្មប្រការ ៤៨ ថ្មី៣ នៃបទបញ្ជាផ្ទៃក្នុងរដ្ឋសភាដូចជា៖ ១-បញ្ចប់ការបកស្រាយខុសគ្នានូវប្រការ៤៨ថ្មី៣ នៃបទបញ្ជាផ្ទៃក្នុងរដ្ឋសភា ២-បញ្ចប់ការបំពានអំណាចតុលាការតាមរយៈប្រការ ៤៨ ថ្មី៣ ៣- បញ្ចប់វប្បធម៌សម្លេងភាគតិច យកសម្លេងភាគច្រើន ធ្វើជាចំណាប់ខ្មាំង ៤-បញ្ចប់ការចោទប្រកាន់ថា គណបក្សប្រជាជនកម្ពុជា មិនចង់ជួបចរចា និង៥- មិនចាំបាច់ចំណាយថវិការដ្ឋ ក្នុងការទិញរថយន្ត  និងសម្ភារៈធ្វើការរបស់ក្រុមសម្លេងភាគច្រើន និង ក្រុមសម្លេងភាគតិច៕