ឯកឧត្តមទេសរដ្ឋមន្រ្ដី គន់ គីម ជំរុញលើកទឹកចិត្តឱ្យយកចិត្តទុកដាក់ចំពោះបងប្អូនអតីតយុទ្ធជននៅក្នុងខេត្តកំពង់ធំ

នារសៀលថ្ងៃទី១៧ ខែមេសា ឆ្នាំ២០២៤ ទេសរដ្ឋមន្ត្រី នាយឧត្តមសេនីយ៍ គន់ គីម អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា បានអញ្ជើញដឹកនាំកិច្ចប្រជុំ ប្រគល់ភារកិច្ចសំខាន់ៗមួយចំនួនជូនឯកឧត្តម ងួន រតនៈ អភិបាលខេត្ត និងជាប្រធានកិត្តិយសសមាគមអតីតយុទ្ធជនខេត្តកំពង់ធំ និងឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ដែលកិច្ចប្រជុំនេះប្រព្រឹត្តទៅនៅទីបញ្ជាការដ្ឋានតំបន់ប្រតិបត្តិការសឹករងកំពង់ធំ។

នៅក្នុងកិច្ចប្រជុំ ឯកឧត្តម ងួន រតនៈ បានរាយការណ៍អំពីកិច្ចការងារមួយចំនួនដែលពាក់ព័ន្ធនឹងការគ្រប់គ្រង និងដោះស្រាយការលំបាកជូនបងប្អូនអតីតយុទ្ធជននៅក្នុងខេត្តកំពង់ធំ ក្នុងនោះមានការដោះស្រាយដីធ្លី ការរៀបចំសាងសង់ផ្ទះ ជូនបងប្អូនអតីតយុទ្ធជន និងបានចលនាតាមបណ្ដាមន្ទីរអង្គភាព និងរដ្ឋបាលក្រុងស្រុក ក្នុងការដោះស្រាយគ្រឿងឧបភោគ បរិភោគ ព្រមទាំងថវិកាមួយចំនួនឧបត្ថម្ភជូនបងប្អូនអតីតយុទ្ធជនក្នុងឱកាសបុណ្យចូលឆ្នាំថ្មីប្រពៃណីជាតិ ក្នុងពេលកន្លងមកថ្មីៗនេះផងដែរ។

ជាមួយនឹងវឌ្ឍនភាពការងារនេះ ឯកឧត្តមទេសរដ្ឋមន្ត្រី គន់ គីម បានថ្លែងអំណរគុណចំពោះអភិបាលខេត្ត និងឧត្តមសេនីយ៍ទោ សោម ស៊ុន  ដែលបានរួមគ្នាសហការជាមួយអាជ្ញាធរដែនដីគ្រប់លំដាប់ថ្នាក់ ដោះស្រាយការលំបាកជូនបងប្អូនអតីតយុទ្ធជន បានល្អប្រសើរ។

ទន្ទឹមនឹងនេះ ដើម្បីឱ្យការងាររបស់សមាគមកាន់តែមានលទ្ធផលល្អប្រសើរ ឯកឧត្តមទេសរដ្ឋមន្ត្រី គន់ គីម ក៏បានប្រគល់ភារកិច្ចចំនួន៣បន្ថែមទៀត ដល់ប្រធានសមាគមអតីតយុទ្ធជនកម្ពុជា ខេត្ដកំពង់ធំអនុវត្ដ ដែលរួមមានដូចខាងក្រោម៖

១- ត្រូវយកចិត្តទុកដាក់រៀបចំដីធ្លីសម្រាប់សាងសង់ផ្ទះ និងផ្ដល់ជូនបងប្អូនអតីតយុទ្ធជនបន្តទៀត។

២- ត្រូវខិតខំដោះស្រាយរកដី ដើម្បីសាងសង់ទីស្នាក់ការសមាគមអតីតយុទ្ធជនកម្ពុជាខេត្តកំពង់ធំ ដើម្បីងាយស្រួលក្នុងការបំពេញការងារ និងដើម្បីនិរន្តរភាពការងារ។

៣- បន្តយកចិត្តទុកដាក់មើលថែទាំសុខទុក្ខ និងជីវភាពរស់នៅរបស់បងប្អូនអតីតយុទ្ធជនយើង ឱ្យបានល្អប្រសើរបន្ថែមទៀត៕

សម្តេចធិបតី ហ៊ុន ម៉ាណែត៖ រាជរដ្ឋាភិបាល មិនបានព្រងើយកន្តើយចំពោះការលំបាករបស់ប្រជាពលរដ្ឋនោះទេ

ក្នុងពិធីសម្ពោធកសិដ្ឋានចិញ្ចឹមគោយកទឹកដោះគិរីសួគ៌ ស្ថិតភូមិឱភាសាំង ឃុំកណ្តឹង ស្រុកបាទី ខេត្តតាកែវ នៅព្រឹកថ្ងៃទី១១ ខែមេសា ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងថា រាជរដ្ឋាភិបាល បាននិងកំពុងគិតគូរយកចិត្តទុកដាក់ក្នុងការកសាងមូលដ្ឋានគ្រឹះដើម្បីអភិវឌ្ឍសេដ្ឋកិច្ចសង្គម និងលើកកម្ពស់ជីវភាពប្រជាជន ដោយមិនបានព្រងើយកន្តើយចំពោះការលំបាករបស់ប្រជាពលរដ្ឋនោះទេ។

សម្តេចធិបតី ហ៊ុន ម៉ាណែត បានគូសបញ្ជាក់ថា ការធានានូវបរិស្ថានសុខសន្តិភាព ស្ថិរភាពនយោបាយ ដើម្បីទាក់ទាញវិនិយោគទាំងក្នុងនិងក្រៅប្រទេស លើកទឹកចិត្តដល់កសិកម្ម កម្មករ និយោជិត មន្រ្តីរាជការ ឱ្យខិតខំរៀនសូត្រ ប្រកបការងារ ថែរក្សាសុខភាពល្អ ដែលទាំងអស់នេះហើយជាចលករជំរុញសេដ្ឋកិច្ចជាតិកាន់តែរឹងមាំ។

សម្តេចធិបតី ហ៊ុន ម៉ាណែត ក៏បានសង្កត់ធ្ងន់ថា រាជរដ្ឋាភិបាល ខិតខំជំរុញសេដ្ឋកិច្ចឱ្យបានដល់មូលដ្ឋាន ដែលនឹងធ្វើឱ្យមានថវិកាចូលហោប៉ៅប្រជាពលរដ្ឋនៅក្នុងមូលដ្ឋានរៀងៗខ្លួន តាមរយៈការបង្កើតរោងចក្រនៅមូលដ្ឋានដែលផ្តល់ចំណូលដល់ប្រជាជនជាដើម។

សម្តេចធិបតី ហ៊ុន ម៉ាណែត ក៏បានគូសបញ្ជាក់ថា គោលនយោបាយរបស់រាជរដ្ឋាភិបាល គឺត្រូវធ្វើយ៉ាងណាឱ្យប្រជាពលរដ្ឋមានបាននៅគ្រប់ទីកន្លែងតែម្តងពោលគឺពីមួយជំនាន់ទៅមួយជំនាន់ឱ្យកាន់តែល្អប្រសើរឡើង៕

សម្តេចធិបតី ហ៊ុន ម៉ាណែត ៖ ក្រុមការងារចម្រុះបានកំពុងអនុវត្តការងារជាអាទិភាព ដើម្បីទប់ស្កាត់ការទន្ទ្រានដីព្រៃលិចទឹក

សម្តេចធិបតី ហ៊ុន ម៉ាណែត បានថ្លែងថា គិតចាប់ពីថ្ងៃប្រកាសរហូតមកដល់ថ្ងៃនេះ មានចំនួន ៧០ថ្ងៃគត់ ដែលបានធ្វើកិច្ចការងារជាច្រើនជុំវិញបញ្ហាបឹងទន្លេសាបមានក្រុមការងារចម្រុះ ដូចជាក្រសួងបរិស្ថាន និងក្រសួងស្ថាប័នពាក់ព័ន្ធជាច្រើនបានរួមសហការជាមួយមន្ត្រីអាជ្ញាធរខេត្តមួយចំនួន បានស្រុះគ្នាចុះធ្វើការជាបន្តបន្ទាប់ ដែលការងារខ្លះបានបង្ហោះផ្សព្វផ្សាយ និងការងារខ្លះត្រូវចុះជាប់ជាប្រចាំដោយមិនបានបង្ហោះផ្សព្វផ្សាយជាសាធារណៈបាននោះទេ។

សម្តេចធិបតី ហ៊ុន ម៉ាណែត បានថ្លែងដូចនេះ នៅរសៀលថ្ងៃទី១០ ខែមេសា ឆ្នាំ២០២៤ ក្នុងឱកាសអញ្ជើញជាអធិបតីក្នុុងពិធីបិទសន្និបាតបូកសរុបការងារក្រសួងធនធានទឹក និងឧតុនិយម គណៈកម្មាធិការជាតិទន្លេមេគង្គកម្ពុជា និងអាជ្ញាធរទន្លេសាប ក្នុងក្របខណ្ឌទូទាំងប្រទេសប្រចាំឆ្នាំ២០២៣ និងលើកទិសដៅអនុវត្តឆ្នាំ២០២៤។

សម្តេចធិបតី ហ៊ុន ម៉ាណែត បានថ្លែងបន្តថា នោក្នុងរយៈពេល ៧០ថ្ងៃនេះ គឺបានសម្រេចការងារច្រើន លាយឡំគ្នា តែការងារភាគច្រើនដែលក្រុមការងារចម្រុះ បានអនុវត្តដោយផ្ទាល់មូលដ្ឋានរួមមាន៖

១- ការផ្ទៀងផ្ទាត់ទិន្នន័យពាក់ព័ន្ធក្នុងតំបន់ ហើយបញ្ចប់ការធ្វើបច្ចុប្បន្នផែនទីឡើងវិញ ដោយកំណត់តំបន់១, ២ និង៣ ស្ថិតនៅចំណុចណាមួយ និងតំបន់ណាដែលអាចត្រូវកាត់ឆ្វៀល ។

២- ការរៀបចំបោះបង្គោលកំណត់ព្រំដី ដែលបានរាជរដ្ឋាភិបាល បានអនុម័តថវិកាចំនួន ៤លានដុល្លារ ជាជំហានមួយសម្រេចក្នុងបោះបង្គោល ដោយចាប់ផ្តើមបណ្តើរៗហើយ ដើម្បីបង្កាទប់ស្កាត់រាល់ការទន្ទ្រានកាន់កាប់ដីក្នុងអាងស្តុកទឹក ដីព្រៃលិចទឹក ការចាក់ដី និងថ្មចូលក្នុងទន្លេ ស្ទឹង អូរ បឹងបួ នៅទូទាំងប្រទេស៕

សម្តេចធិបតី ហ៊ុន ម៉ាណែត៖ រាជរដ្ឋាភិបាលកម្ពុជាបានដាក់ចេញនូវគោលនយោបាយយុទ្ធសាស្រ្ត និងវិធានការសំខាន់ៗឆ្លើយតបទៅនឹងការប្រែប្រួលអាកាសធាតុ

សម្តេចធិបតី ហ៊ុន ម៉ាណែត បានថ្លែងថា រាជរដ្ឋាភិបាលកម្ពុជាបានដាក់ចេញនូវគោលនយោបាយយុទ្ធសាស្រ្ត និងវិធានការសំខាន់ៗ សំដៅលើការគ្រប់គ្រងនិងការអភិវឌ្ឍប្រកបដោយចីរភាព និងការលើកកម្ពស់ជីវភាពប្រជាពលរដ្ឋឆ្លើយតបទៅនឹងការប្រែប្រួលអាកាសធាតុ។ 

សម្តេចធិបតី ហ៊ុន ម៉ាណែត បានថ្លែងបន្តថា ការដាក់ចេញនូវផែនការយុទ្ធសាស្រ្តអភិវឌ្ឍន៍ធនធានទឹក និងឧតុនិយមរយៈពេលមធ្យមនិងវែង គឺជាការប្តេជ្ញាចិត្តខ្ពស់របស់កម្ពុជាក្នុងការចូលរួមជាមួយពិភពលោក ដើម្បីឆ្លើយតបទៅនឹងការប្រែប្រួលអាកាសធាតុ ក៏ដូចជាការគ្រប់គ្រងការអភិរក្ស និងការអភិវឌ្ឍធនធានទឹកនៃភពផែនដីសម្រាប់អ្នកជំនាន់ក្រោយផងដែរ។

 

សម្តេចធិបតី ហ៊ុន ម៉ាណែត បានថ្លែងដូចនេះនៅក្នុងឱកាសដែលសម្តេចអញ្ជើញជាអធិបតីក្នុងពិធី « បិទសន្និបាតបូកសរុបការងារក្រសួងធនធានទឹកនិងឧតុនិយម គណៈកម្មាធិការជាតិទន្លេមេគង្គកម្ពុជា និងអាជ្ញាធរទន្លេសាប ក្នុងក្របខណ្ឌទូទាំងប្រទេសប្រចាំឆ្នាំ២០២៣ និងលើកទិសដៅអនុវត្តឆ្នាំ២០២៤» នៅរសៀលថ្ងៃទី១០ ខែមេសា ឆ្នាំ២០២៤៕

សម្តេចធិបតី ហ៊ុន ម៉ាណែត៖ ចំពោះបញ្ហាបឹងទន្លេសាប យើងត្រូវដោះស្រាយឱ្យមានប្រសិទ្ធភាពនិងចីរភាព

សម្តេចធិបតី ហ៊ុន ម៉ាណែត បានថ្លែងថា កាលពីថ្ងៃទី ៣០ ខែមករា ឆ្នាំ២០២៤ កន្លងទៅ នៅក្នុងឱកាសបិទសន្និបាតក្រសួងកសិកម្ម សម្ដេចបានផ្ដល់គោលការណ៍ឱ្យរួមគ្នាធ្វើកិច្ចការងារក្នុងការគ្រប់គ្រងតំបន់បឹងទន្លេសាប ដែលនៅតែមានបញ្ហាទន្រ្ទានកាន់កាប់។

សម្តេចធិបតី ហ៊ុន ម៉ាណែត បានថ្លែងដូចនេះ នៅរសៀលថ្ងៃទី១០ ខែមេសា ឆ្នាំ២០២៤ ក្នុងឱកាសដែលសម្ដេចអញ្ជើញជាអធិបតិបិទសន្និបាតបូកសរុបការងារក្រសួងធនធានទឹកនិងឧតុនិយម គណៈកម្មាធិការជាតិទន្លេមេគង្គកម្ពុជា និងអាជ្ញាធរទន្លេសាប ក្នុងក្របខណ្ឌទូទាំងប្រទេសប្រចាំឆ្នាំ២០២៣ និងលើកទិសដៅអនុវត្តឆ្នាំ២០២៤។

សម្តេចធិបតី បានថ្លែងបន្តថា នាពេលកន្លងទៅក៏មានអ្នកវិភាគមួយចំនួន បានលើកឡើងថា បទបញ្ជារបស់នាយករដ្ឋមន្ត្រី បានដាក់ចេញហើយ ប៉ុន្តែមិនមានប្រសិទ្ធិភាពទេ ស្ងាត់ឈឹង ពោលគឺគ្មានមន្ត្រីធ្វើអ្វីទាំងអស់។ ត្រង់ចំណុចនេះ សម្តេចធិបតីបានគូសបញ្ជាក់ថា វិធីសាស្ត្រនៅក្នុងការធ្វើការងារមានច្រើន ជាពិសេសការដោះស្រាយបញ្ហាធំៗដូចជាបញ្ហាបឹងទន្លេសាបនេះជាដើម ត្រូវមានវិធីសាស្ត្រច្បាស់លាស់ ដើម្បីដោះស្រាយបញ្ហា ឈានទៅរកការដោះស្រាយប្រកបដោយប្រសិទ្ធភាព និងចីរភាព៕

សម្តេចធិបតី ហ៊ុន ម៉ាណែត៖ រាជរដ្ឋាភិបាលតែងយល់ដឹងអំពីសារៈសំខាន់ជាយុទ្ធសាស្រ្ត និងផ្តល់អាទិភាពខ្ពស់ចំពោះវិស័យធនធានទឹក

នៅក្នុងឱកាស «បិទសន្និបាតបូកសរុបការងារក្រសួងធនធានទឹក និងឧតុនិយម គណៈកម្មាធិការជាតិទន្លេមេគង្គកម្ពុជា និងអាជ្ញាធរទន្លេសាប ក្នុងក្របខណ្ឌទូទាំងប្រទេសប្រចាំឆ្នាំ២០២៣ និងលើកទិសដៅអនុវត្តឆ្នាំ២០២៤» នៅរសៀលថ្ងៃទី១០ ខែមេសា ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងថា ការប្រើប្រាស់ធនធានទឹកប្រកបដោយប្រសិទ្ធិភាព និងសក្ដិសិទ្ធិភាពគឺជាការចាំបាច់សម្រាប់ការអភិវឌ្ឍសង្គមសេដ្ឋកិច្ចប្រកបដោយចីរភាព។

សម្តេចធិបតី ហ៊ុន ម៉ាណែត បានថ្លែងបន្តថា នៅក្នុងរបៀបវារៈឆ្នាំ២០៣០ របស់អង្គការសហប្រជាជាតិសម្រាប់ការអភិវឌ្ឍប្រកបដោយចីរភាព ធនធានទឹកត្រូវបានកំណត់នៅក្នុងគោលដៅទី៦ ស្តីពីការធានាឱ្យមានលទ្ធភាព និងការគ្រប់គ្រងទឹក និងមានចីរភាព និងអនាម័យសម្រាប់ទាំងអស់គ្នា។ ដូច្នេះ ដើម្បីចូលរួមចំណែកសម្រេចបានគោលដៅនេះ រាជរដ្ឋាភិបាលតែងយល់ដឹងអំពីសារៈសំខាន់ជាយុទ្ធសាស្រ្ត និងផ្តល់អាទិភាពខ្ពស់ចំពោះវិស័យធនធានទឹក៕

សម្តេចធិបតី ហ៊ុន ម៉ាណែត៖ កម្ពុជានិងប្រទេសមួយចំនួននៅលើលោក បាននិងកំពុងទទួលរងផលប៉ះពាល់ពីការប្រែប្រួលអាកាសធាតុ

ក្នុងពិធីបិទសន្និបាតបូកសរុបការងាររបស់ក្រសួងធនធានទឹកនិងឧតុនិយម គណៈកម្មាធិការជាតិទន្លេមេគង្គកម្ពុជា និងអាជ្ញាធរទន្លេសាប ក្នុងក្របខណ្ឌទូទាំងប្រទេសប្រចាំឆ្នាំ២០២៣ និងលើកទិសដៅអនុវត្តឆ្នាំ២០២៤ នៅរសៀលថ្ងៃទី១០ ខែមេសា ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងថា កម្ពុជា ក៏ដូចជាបណ្តាប្រទេសមួយចំនួននៅក្នុងតំបន់និងសកលលោក បាននិងកំពុងទទួលរងផលប៉ះពាល់ពីការប្រែប្រួលអាកាសធាតុ និងអាចជួបប្រទះនូវភាពមិនប្រាកដប្រជានៃប្រភពធនធានទឹកនាពេលអនាគត ប្រសិនបើគ្មានកិច្ចសហការទាន់ពេលវេលា និងគ្រប់ជ្រុងជ្រោយពីគ្រប់ភាគីពាក់ព័ន្ធទេនោះ។

សម្តេចធិបតី ហ៊ុន ម៉ាណែត បានគូសបញ្ជាក់ថា ការប្រើប្រាស់ធនធានទឹកប្រកបដោយប្រសិទ្ធភាព និងស័ក្តិសិទ្ធភាពគឺជាភាពចាំបាច់សម្រាប់ការអភិវឌ្ឍសង្គម សេដ្ឋកិច្ច ប្រកបដោយចីរភាព។ ជាក់ស្តែង នៅក្នុងរបៀបវារៈឆ្នាំ២០៣០ របស់អង្គការសហប្រជាជាតិសម្រាប់ការអភិវឌ្ឍនប្រកបដោយចីរភាព ធនធានទឹក ត្រូវបានកំណត់នៅក្នុងគោលដៅទី៦ ស្តីពីការធានាឱ្យមានលទ្ធភាពនិងការគ្រប់គ្រងទឹកប្រកបដោយចីរភាព និងអនាម័យសម្រាប់ទាំងអស់គ្នា៕